Tibuok-Kalibotang Kasegurohan Ilalom sa “Prinsipe sa Pakigdait”
Kapitulo 18
Pagkamaunongon Ngadto sa Makitang Organisasyon sa Diyos Karong Adlawa
SA Salmo 16:10 kini nahisulat: “Dili nimo pagabiyaan ang akong kalag sa Sheol. Dili nimo itugot nga ang imong usang maunongon makakita sa gahong.” Ug sa Salmo 50:5 kini nahisulat: “Tigoma ngari kanako ang akong mga maunongon, kadtong mihimo sa akong pakigtugon ibabaw sa halad.” Kadto bang nagahimo sa pakigtugon ni Jehova mao ang nagatagana sa “halad”? Dili, ang maong mga maunongon dili mohimog indibiduwal nga “halad” sa ilang kaugalingon, nga itugyan ang ilang unodnong mga lawas aron makahimo sa usa ka kasabotan uban sa Diyos.
2 Nan, sa unsang paagi gihimo ang pakigtugon? Ibabaw sa “halad” sa “usang maunongon” kansang kalag wala ibilin sa Sheol kondili gibanhaw gikan sa mga patay. Gipadapat ni apostol Pedro ang mga pulong sa Salmo 16:10 ngadto kang Jesu-Kristo ug miingon: “Siya [David] nakakita daan ug nagsulti mahitungod sa pagkabanhaw ni Kristo, nga siya wala pasagdi sa Hades ni ang iyang unod nakakitag pagkadunot. Kini nga Jesus gibanhaw sa Diyos.”—Buhat 2:25, 27, 31, 32.
3 Kining gibanhaw nga Jesus mao ang Tigpataliwala sa bag-ong pakigtugon, ug maoy pinasukad sa iyang halad nga ang bag-ong pakigtugon gibalido. (Hebreohanon 9:15, 17) Busa kinsa ba kadtong gitigom sumala sa sugo sa Salmo 50:5? Sila mao ang mga tinun-an ni Jesus nga anaa sa bag-ong pakigtugon pinasukad sa iyang halad. Tungod sa pagkamapasalamaton kang Jehova tungod sa maong way-ikatanding nga halad, sila angay matukmod sa pagpamatuod nga maunongon kaniya.
4 Dihang ang Gingharian ni Jehova natukod sa mga langit sa 1914, ang kanasoran sa pagkamasupakon naaligutgot sa maong Gingharian pinaagi sa pagbugno sa unang gubat sa kalibotan, ug ang Diyos mitugot niadto. (Salmo 2:1, 2) Si Satanas nga Yawa nanlimbasog sa paggamit niadtong away sa kalibotan sa paglaglag sa makitang bahin sa organisasyon ni Jehova. Siya milampos sa pagpabilanggo sa presidente sa Watch Tower Bible and Tract Society sa pederal nga bilanggoan sa Atlanta, Georgia. Ang pito pa ka hawas sa Sosyedad gibilanggo uban kaniya.
5 Tungod sa paglutos, ang hedkuwarter sa Sosyedad sa Brooklyn, New York, gibalhin ngadto sa giabangang tinukod sa Pittsburgh, Pennsylvania. Kadto gihimo aron ipadayon ang pagpatik sa magasing Watch Tower. Ang langitnong paghimaya sa mga maunongon gidahom sa dili madugay. Apan kadtong sakop sa nahibilin lagmit nakahilak samtang ilang gipalandong ang gidaugdaog, inutil nga kahimtang sa organisasyon ni Jehova.—Salmo 137:1.
Pagkamaunongon Panahon sa Pagkabilanggo
6 Sa pagpadayag sa pagkamaunongon ngadto sa organisasyon ni Jehova panahon sa iyang pagkabilanggo, ang presidente sa Watch Tower Society, si J. F. Rutherford, sa Disyembre 25, 1918, misulat sa usa ka linaing sulat ngadto kang J. A. Bohnet, usa ka sinaligang isigkaalagad ni Jehova. Kadto giadres kaniya sa opisina sa Sosyedad sa Pittsburgh. Si Rutherford misulat sa mosunod:
7 “Tungod kay midumili ako nga mokompromiso sa Babilonya, apan matinumanong naningkamot sa pag-alagad sa akong Ginoo, ako ania sa bilanggoan, nga tungod niana ako mapasalamaton. . . . Palabihon ko pa ang Iyang pag-uyon ug pahiyom ug mabilanggo, kay sa pagkompromiso o pagpahiuyon ngadto sa Mananap ug mahigawas ug magbaton sa mga pagdayeg sa tibuok kalibotan. Usa ka bulahan, matam-is nga kasinatian ang pag-antos tungod sa matinumanong pag-alagad sa Ginoo. Sa Gingharian atong mahalon ang pahiyom sa Amahan labaw sa tanang butang. Kini angay mao ang kinalabwan diha sa hunahuna sa tanang anak sa Diyos. Kita nangandoy sa panaghiusa nga mohimo kanatong Usa didto. Ako malipayon, apan nangandoy nga makakita pag-usab kaninyong tanan. Nagkaduol na ang kombensiyon ug ang tinuig nga miting. Hinaot ang espiritu ni Kristo magpuno sa kasingkasing sa tanang motambong mapuno sa espiritu ni Kristo. . .
8 “Daghan pa ang buluhaton. Dako unyang pabor ang pag-apil. Kadto lamang nahigugma Kaniya nga labaw sa tanan maoy matinumanon ug sa ingon mapasidunggan. . . . Una pa nianang masadyaong adlaw kinahanglang ikahatag ang kusganong pamatuod. . . . Ang nangaging mga paagi ug galamiton dili makakab-ot sa mga kinahanglanon, apan ang Ginoo sa Iyang kaugalingong maayong paagi motagana. . . . Ako malipayon nga kining kasinatian sa pagkabilanggo gireserba alang kanamo inay kay kang Igsoong Russell. Wala pa sukad nga dako kaayo ang akong pagdumot sa pagkawalay katarongan ug paghigugma sa pagkamatarong ug pagpangandoy sa pagtabang sa uban kay sa karon. . . . Ang kadaogan sa Sion haduol na.”
Ang Organisasyon sa Diyos Ilang “Pangunang Hinungdan sa Pagkalipay”
9 Bisan pag ang mga alagad ni Jehova gitawag sa kalibotan nga dili maunongon, maluibon, ug dili-patriotiko, wala nila isalikway ang organisasyon ni Jehova. Midumili sila sa pagkompromiso ilalom sa maong pagpit-os. Palabihon nilang mawad-an sa kagamitan sa tuong kamot o maamang inay kay hikalimtan ang organisasyon sa Diyos ug dili na kini himoong ilang “pangunang hinungdan sa pagkalipay.”—Salmo 137:5, 6.
10 Ang mga kaaway ni Jehova sa kamadaoton nagkalipay tungod sa aksiyon batok sa yutan-ong mga hawas sa iyang unibersohanong organisasyon. Apan ang mga alagad ni Jehova miampo nga moabot ang iyang adlaw sa panimalos tungod nianang tanang pasipala nga gipahamtang diha sa iyang organisasyon. Ilang gipahayag ang mga pulong nga gisulti sa salmista maylabot sa karaang Edom: “Hinumdomi, Oh Jehova, ang mahitungod sa mga anak ni Edom sa adlaw sa Jerusalem, kinsa nag-ingon: “Gun-oba siya! Gun-oba siya hangtod sa patukoranan niini!’” (Salmo 137:7; Galacia 4:26) Ah, dili, gihigugma pag-ayo ni Jehova ang iyang samag-asawang organisasyon sa pagkalimot sa gisulti ug gibuhat niadtong bahin sa organisasyon sa Yawa batok sa mga maunongon sa iyang yutan-ong organisasyon.
11 Sa dagway sa gawas niadtong panahona, kadtong tanang politikanhong mga misimpatiya sa Dakong Babilonya nakagun-ob gayod sa makitang organisasyon ni Jehova “hangtod sa patukoranan niini.” Wala gayod sila magdahom nga kini mobangon gikan sa abog ngadto sa pagkahimong tibuok-kalibotang organisasyon nga mao kini karong adlawa.
Ang Kalipay sa Iyang Tigpanimalos
12 Gigamit ni Jehova ang Persianhong magmamando si Ciro sa pagpahigawas sa iyang katawhan gikan sa karaang gahom sa kalibotan nga Babilonya. Apan sa labing bug-os nga diwa, si Ciro dili mao ang gipasabot sa hinapos nga mga pulong sa Salmo 137, nga nagatumong sa Dakong Babilonya, ang imperyo sa kalibotan sa bakak nga relihiyon: “Oh anak nga babaye sa Babilonya, kinsa pagalumpagon, malipayon siya nga magaganti kanimo sa imong kaugalingong pagtagad nga maoy imong pagtagad kanamo. Malipayon siya nga magakupot ug magasalibay sa pagkadugmok sa imong mga anak batok sa bato.”—Salmo 137:8, 9.
13 Kinsa ba unya kanang usang “malipayon”? Ang usang “malipayon” nagabarog ba sa simbolikong “napulo ka sungay” nga anaa sa ibabaw sa ulo sa “mapintas nga mananap,” nga sa bukobuko niana nagkabayo uban ang hilabihang pagawal sa dugay na kaayong panahon? Dili, tungod kay ang politikanhong mga tiglaglag sa imperyo sa kalibotan sa bakak nga relihiyon dili maglaglag niini aron sa paghatag luna sa maputling pagsimba sa matuod nga Diyos. Dili nila kana buhaton alang sa himaya sa Diyos sa Bibliya. Nan, sa unsang paagi kana sila aktuwal mahimong ang usang “malipayon” nga ginganlan sa salmista?
14 Ang politikanhong mga gahom niining kalibotana dili magbuhat niining batok-relihiyosong buluhaton tungod sa gugma alang sa mga magsisimba ni Jehova. Nganong dili man? Tungod kay ang mga Saksi ni Jehova mobabag sa ilang pagpatunghag bug-os dili-diyosnong kalibotan. Busa ang politikanhong mga gahom sa yano mao ang mga galamitong gamiton sa Diyos sa mga Saksi sa pagtuman sa iyang kaugalingong katuyoan.—Pinadayag 17:17.
15 Busa, bisan pag kining politikanhong mga gahom tingali gamitong direkta sa paglaglag sa imperyo sa kalibotan sa bakak nga relihiyon, si Jehova nga Diyos mao gayod ang nagapalihok kanila. Sa unsang paagi? Iyang gamiton ang iyang gihatagag-gahom nga harianong Anak, ang Labaw nga Ciro, si Jesu-Kristo. Busa, si Jesu-Kristo nga anaa sa gahom sa Gingharian mao ang usang “malipayon” nga gitagna sa salmista!
16 Samtang panalipdan ni Jehova ang iyang mga maunongon, siya, sa masambingayong diwa, magasakmit sa matag usa sa relihiyosong “mga anak” sa samag-bigaong sistema sa bakak nga pagtulon-an ug dugmokon sila batok sa nagabuntaog nga samag “bato”—ang dili mopahiuyon nga Gingharian ni Jehova nga Diyos pinaagi ni Jesu-Kristo.
17 Sa dinhi siya sa yuta, si Jesus gidihogan sa espiritu sa iyang balaang Tigpaluyo dili lamang sa “pagmantala sa tuig sa maayong kabubut-on sa bahin ni Jehova” kondili sa pagmantala usab “sa adlaw sa panimalos sa bahin sa atong Diyos.” (Isaias 61:1, 2; Lucas 4:16-21) Sa atong panahon, niining “kataposang mga adlaw” niining sistema sa mga butang, si Jehova nagapamantala sa iyang matinumanong mga alagad sa “adlaw sa panimalos sa bahin sa atong Diyos” sa tibuok gipuy-ang yuta alang sa usa ka pamatuod sa tanang nasod. Sa maong pagmantala ang nahibilin giduyogan sa nag-uswag nga “dakong panon” sa karnerohong mga tinun-an ni Jesu-Kristo, sumala sa napanan-aw daan sa Pinadayag 7:9-17.
18 Kini silang tanan, ang nahibilin ug ang “dakong panon,” nagsugot sa sugo sa manulonda sa Pinadayag 18:4. Sila nanggula sa Dakong Babilonya. Nganong ang maong lihok kinahanglanon? Kay kinahanglang sila mokalagiw gikan sa Dakong Babilonya sa dili pa dugmokon ang iyang relihiyosong “mga anak” ug laglagon pinaagi sa “mapintas nga mananap” ug sa iyang “napulo ka sungay” sa dayon nang Armageddon. Kining mga maunongon moambit sa kalipay sa Labaw nga Ciro, si Jesu-Kristo. Sila moduyog sa mga langit sa pag-ingon: “Dayega ninyo si Jah, kamong katawhan! Ang kaluwasan ug ang himaya ug ang gahom iya sa atong Diyos, tungod kay ang iyang mga paghukom matuod ug matarong. Kay iyang gipahamtang ang paghukom sa dakong bigaon nga nagdaot sa yuta tungod sa iyang pakighilawas.”—Pinadayag 19:1, 2; itandi ang Jeremias 51:8-11.
19 Sukad sa 1919 gibuhat ni Jehova ang “usa ka dakong butang” alang sa iyang katawhan. (Salmo 126:1-3) Tungod niining pagpadako sa iyang gahom sa pagpahigawas, nga nagpasundayag nga siya mao “ang matinumanon nga Diyos,” ang gipahigawas nga nahibilin sa gihapon malipayon sa kasingkasing. (Deuteronomio 7:9) Sila malipayon kaayo, apan adunay labaw nga kalipay nga nagapaabot kanila. Kini maoy sa panahon unya nga sila makaduyog sa kalipay sa Labaw nga Ciro, ang nagamandong Hari, si Jesu-Kristo, sa panahong iyang dugmokon ang tanang “mga anak” nianang yawan-ong organisasyon.
20 Ang milyonmilyon sa kanhing “mga bihag” sa Dakong Babilonya natabangan na sa pagkalagiw nianang hinukman-sa-kalaglagang relihiyosong organisasyon una pa sa iyang mapintasong pagkalaglag. Ang resulta mao ang “dakong panon” sa “ubang mga karnero.” Karon sila may gidaghanon, sa tibuok yuta, nga kapin sa 3,000,000, nga ang gidaghanong pagaluwason pa gikan sa pagkalaglag sa tibuok-kalibotang imperyo sa bakak nga relihiyon walay limitasyon. Sa pagkamaunongon ngadto sa organisasyon ni Jehova, sila nagapakig-ambit sa kalipay sa nahibilin pinaagi sa pagduyog kanila sa pagmantala sa adlaw sa panimalos ni Jehova diha sa relihiyosong Dakong Babilonya.
21 Nan, pasagding walay mokompromiso sa maong imperyo sa kalibotan sa bakak nga relihiyon. Pasagding walay mobalik kaniya niining mga adlaw sa iyang pag-us-os. Hinaot kita mopadayon sa pagtabang sa labing daghan nga binihag sa Dakong Babilonya sa paggula gikan nianang hinukman-sa-kalaglagang sistema sa dili pa maangkon sa Labaw nga Ciro ang iyang makapalipay nga kadaogan.
[Mga Pangutana nga Pagatun-an]
1, 2. Unsaon pagsabot ang kasulatan sa Salmo 50:5?
3. Kinsa ang gitigom sumala sa sugo sa Salmo 50:5, ug nganong sila matukmod sa pagpamatuod nga maunongon sa Diyos?
4, 5. (a) Unsang kalamposan ang nabatonan ni Satanas nga Yawa panahon sa unang gubat sa kalibotan sa iyang paningkamot sa paglaglag sa makitang organisasyon ni Jehova? (b) Diin man gibalhin ang hedkuwarter sa Sosyedad, ug ngano? (c) Sa modernong-adlawng katumbas sa Salmo 137:1, unsa ang emosyonal nga kahimtang, o disposisyon, sa maunongong nahibilin dihang ilang gipalandong ang inutil nga kahimtang sa organisasyon sa Diyos?
6-8. Panahon sa iyang pagkabilanggo, sa unsang paagi gipadayag sa presidente sa Sosyedad, si J. F. Rutherford, ang pagkamaunongon ngadto sa organisasyon ni Jehova?
9. Unsang tinamdan sa salmista ang gibanaag sa nabilanggong mga hawas sa Sosyedad?
10, 11. (a) Ang maunongong nahibilin miampo alang sa unsa, ug unsang mga pulong sa salmista ang ilang gipahayag mahitungod sa Edom? (b) Unsay nahimo sa mga kaaway sa makitang organisasyon ni Jehova, ug unsay wala dahoma sa maong mga kaaway?
12. (a) Kinsay nahimong tigpagawas sa binihag nga katawhan ni Jehova sa karaang Babilonya, ug ang Salmo 137:8, 9 nagatumong ba kaniya sa labing bug-os nga diwa? (b) Unsay gitagna sa maong mga bersikulo mahitungod sa tigpanimalos sa yutan-ong organisasyon sa Diyos?
13, 14. Nganong ang usang “malipayon” sa Salmo 137:8, 9 wala magtumong sa politikanhong mga gahom nga magalaglag sa Dakong Babilonya?
15. Kinsa ang tinuod nagapalihok sa politikanhong mga gahom, ug pinaagi ni kinsa?
16. Sa unsang paagi laglagon ni Jehova ang “mga anak” sa Babilonya?
17. (a) Sumala sa Isaias 61:1, 2, unsay imantala ni Jesus tapos siya dihogi sa espiritu sa Diyos? (b) Sa unsang paagi ginatuman karong adlawa ang pagmantala?
18. Ang mga maunongon sa Diyos makaambit sa unsang kalipay?
19. Unsang kalipay ang gipahimuslan karon sa maunongong nahibilin, ug unsang labaw nga kalipay ang nagapaabot kanila?
20. Kinsa pa ang nakaambit sa kalipay sa dinihogang nahibilin, ug ngano?
21. Angay kitang magbaton sa unsang tinamdan bahin sa Dakong Babilonya ug sa iyang mga binihag?