“Kon Unsay Imong Gipanaad, Bayri”

 1. (a) Sa unsa managsama si Maghuhukom Jepte ug si Ana? (Tan-awa ang hulagway sa sinugdan sa artikulo.) (b) Unsang mga pangutana ang tubagon niining artikuloha?

SI Jepte usa ka banggiitang lider ug maisogong manggugubat. Si Ana usa ka mapinasakopon ug mapainubsanong asawa. Gawas nga nagsimba sila sa mao rang Diyos, sa unsa managsama si Maghuhukom Jepte ug ang asawa ni Elkana nga si Ana? Matag usa kanila may panaad sa Diyos, ug matinumanon nilang gibayran ang ilang panaad. Maayo silang ehemplo para sa mga lalaki ug babaye karon nga mihimog mga panaad kang Jehova. Bisan pa niana, motungha ang importanteng mga pangutana: Unsa ang panaad? Unsa ka seryoso ang paghimog panaad ngadto sa Diyos? Unsay atong makat-onan kang Jepte ug Ana?

2, 3. (a) Unsa ang panaad? (b) Unsay giingon sa Kasulatan bahin sa paghimog mga panaad ngadto sa Diyos?

² Ingon sa pagkagamit diha sa Bibliya, ang panaad maoy seryosong saad ngadto sa Diyos. Ang usa ka tawo nanaad sa paghimog usa ka buhat, paghatag ug regalo, pagsulod sa usa ka matang sa pag-alagad, o sa paglikay sa pipila ka butang. Ang mga panaad gihimo nga kinabubut-on, gamit ang kagawasan sa pagpili. Bisan pa niana, sa mata sa Diyos kini sagrado ug kinahanglang tumanon kay kini naglakip ug panumpa​—usa ka gipanumpaang pahayag—​nga nagsaad nga ang usa ka tawo mobuhat o dili mobuhat sa usa ka butang. (Gen. 14:22, 23; Heb. 6:16, 17) Unsay giingon sa Kasulatan bahin sa kaseryoso sa paghimog panaad ngadto sa Diyos?

³ Ang Moisesnong Balaod nag-ingon: “Kon ang usa ka tawo manaad kang Jehova o manumpa ug usa ka panumpa . . . , kinahanglan nga siya dili maglapas sa iyang pulong. Magabuhat siya sumala sa tanan nga migula sa iyang baba.” (Num. 30:2) Sa ulahi, si Solomon giinspirar sa pagsulat: “Dihang ikaw manaad ug panaad ngadto sa Diyos, ayaw pagpanuko sa pagbayad niini, kay siya walay kahimuot sa mga hungog. Kon unsay imong gipanaad, bayri.” (Eccl. 5:4) Gipamatud-an ni Jesus ang kaseryoso sa paghimog mga panaad dihang siya miingon: “Giingon kini ngadto kanila sa kanhing panahon, ‘Dili ka manumpa nga dili nimo tumanon, apan angay nga bayran nimo ang imong mga panaad kang Jehova.’”​—Mat. 5:33.

 4. (a) Unsa ka seryoso ang paghimog panaad ngadto sa Diyos? (b) Unsay gusto natong masayran bahin kang Jepte ug Ana?

⁴ Busa, klaro nga seryoso gayod ang paghimog mga panaad ngadto sa Diyos. Ang pagtuman nato sa atong mga panaad makaapektar sa atong relasyon kang Jehova. Si David misulat: “Kinsa ba ang makasaka ngadto sa bukid ni Jehova, ug kinsa ba ang makatindog diha sa iyang balaang dapit? Siya nga . . . wala magdala sa Akong [si Jehova] kalag ngadto sa bug-os nga kawalay-kapuslanan [o, manumpag bakak], ni nanumpa sa pagkamalimbongon.” (Sal. 24:3, 4) Unsay panaad ni Jepte ug Ana, ug sayon ba para nila ang pagbayad sa ilang panaad?

 5. Unsay panaad ni Jepte, ug unsay resulta?

⁵ Gituman ni Jepte ang iyang panaad kang Jehova dihang nakiggubat siya sa mga Ammonhanon, kinsa nagdaogdaog sa katawhan sa Diyos. (Maghu. 10:7-9) Kay gusto gayod ni Jepte nga modaog sa gubat, siya nanaad: “Kon . . . imong itugyan sa akong kamot ang mga anak sa Ammon, mahitabo usab nga ang usa nga mogula sa mga pultahan sa akong balay kinsa mogula sa pagsugat kanako, inigpauli ko sa kalinaw gikan sa mga anak sa Ammon, maiya gayod usab kang Jehova.” Unsay resulta? Napildi ang mga Ammonhanon, ug ang minahal nga anak nga babaye ni Jepte ang misugat kaniya sa iyang pagbalik. ‘Maiya ni Jehova’ ang anak ni Jepte. (Maghu. 11:30-34) Unsay ipasabot niini alang sa anak ni Jepte?

 6. (a) Nganong dili sayon para kang Jepte ug sa iyang anak ang pagbayad sa iyang panaad ngadto sa Diyos? (b) Unsay imong nakat-onan sa Deuteronomio 23:21, 23 ug Salmo 15:4 bahin sa paghimog panaad ngadto sa Diyos?

⁶ Aron mabayran ang panaad sa iyang amahan, ang anak ni Jepte kinahanglang mag-alagad kang Jehova nga bug-os panahon sa Iyang sangtuwaryo. Dinalidali ba ang panaad nga gihimo ni Jepte? Dili, kay lagmit nahibalo na siya nga ang iyang anak mao ang mosugat niya. Bisan pa niana, dili kadto sayon para sa amahan ug anak​—dako gyod nga sakripisyo sa ilang bahin. Dihang nakita niya ang iyang anak, “gigisi [ni Jepte] ang iyang besti” ug miingon siya nga nadugmok ang iyang kasingkasing. ‘Gihilakan’ sa iyang anak ang “pagkaulay” niini. Ngano? Si Jepte walay anak nga lalaki, ug ang iyang bugtong anak nga babaye dili na puwedeng magminyo ug manganak. Wala nay paagi nga mapasa ang ngalan ug kabilin sa pamilya. Pero dili kana ang labing importante kanila. Si Jepte miingon: “Ako nakabungat na sa akong baba kang Jehova, ug dili ko na mabakwi.” Ug ang iyang anak mitubag: “Buhata kanako sumala sa migula sa imong baba.” (Maghu. 11:35-39) Maunongon sila nga mga indibiduwal kay wala gyod sila maghunahuna nga lapason ang ilang panaad ngadto sa Labing Hataas nga Diyos​—bisag unsa pay mahitabo kanila.​—Basaha ang Deuteronomio 23:21, 23; Salmo 15:4.

 7. (a) Unsay panaad ni Ana, ug ngano, ug unsay epekto niini kaniya? (b) Unsay gipasabot sa panaad ni Ana para kang Samuel? (Tan-awa ang footnote.)

⁷ Gituman sab ni Ana ang iyang panaad kang Jehova. Nanaad siya panahon nga siya grabeng naguol tungod sa pagkabaog ug sa kanunayng pag-insulto kaniya. (1 Sam. 1:4-7, 10, 16) Gibubo ni Ana ang iyang kaguol ngadto sa Diyos ug nanaad siya: “Oh Jehova sa mga panon, kon ikaw sa walay pakyas magsud-ong sa kasakitan sa imong ulipong babaye ug mahinumdom gayod kanako, ug ikaw dili mahikalimot sa imong ulipong babaye ug maghatag gayod sa imong ulipong babaye ug usa ka anak nga lalaki, akong ihatag siya kang Jehova sa tanang adlaw sa iyang kinabuhi, ug walay labaha nga modapat sa iyang ulo.”a (1 Sam. 1:11) Gidungog ang hangyo ni Ana, ug siya nanganak sa iyang kamagulangan​—usa ka anak nga lalaki. Nalipay kaayo si Ana! Bisan pa niana, wala niya kalimti ang iyang panaad sa Diyos. Dihang gipanganak niya ang bata, siya miingon: “Gipangayo ko siya kang Jehova.”​—1 Sam. 1:20.

 8. (a) Nganong dili sayon para kang Ana ang pagbayad sa iyang panaad? (b) Sa unsang paagi ang mga pulong ni David sa Salmo 61 nagpahinumdom nimo sa maayong ehemplo ni Ana?

⁸ Wala madugay human malutas ang batang si Samuel, dihang mga tres anyos kini, gituman ni Ana ang iyang panaad sa Diyos. Wala gyod siya magduhaduha sa pagbuhat niini. Iyang gidala si Samuel sa Hataas nga Saserdoteng si Eli sa tabernakulo sa Shilo ug siya miingon: “May kalabotan niining bataa nga ako nag-ampo nga unta ihatag ni Jehova kanako ang akong gipangaliya kaniya. Ug ako, sa baylo, nagpahulam kaniya kang Jehova. Sa tanan niyang mga adlaw, siya ang gipangayo alang kang Jehova.” (1 Sam. 1:24-28) Didto, “ang batang si Samuel nagpadayon sa pagdako sa atubangan ni Jehova.” (1 Sam. 2:21) Apan unsay gipasabot niana kang Ana? Gimahal gyod niya ang iyang anak, ug karon dili na niya kini makauban adlaw-adlaw samtang kini magdako. Handurawa kon unsa ka dako ang iyang pangandoy nga magakos, makadula, ug maatiman ang bata samtang kini magdako. Bisan pa niana, si Ana wala magmahay nga gituman niya ang iyang panaad sa Diyos. Ang iyang kasingkasing nagmaya kang Jehova.​—1 Sam. 2:1, 2; basaha ang Salmo 61:1, 5, 8.

 9. Unsa pang mga pangutana ang atong tubagon?

⁹ Karon nga ato nang nasabtan kon unsa ka seryoso ang paghimog panaad ngadto sa Diyos, atong konsiderahon kining mga pangutanaha: Unsang mga panaad ang lagmit gihimo nato ingong mga Kristohanon? Ug, unsay angay natong determinasyon sa pagtuman sa atong panaad?

10. Unsa ang labing importanteng panaad sa usa ka Kristohanon, ug unsay ipasabot niini?

¹⁰ Ang labing importanteng panaad nga mahimo sa usa ka Kristohanon mao ang pagpahinungod sa iyang kinabuhi kang Jehova. Ngano man? Kay, pinaagi sa pribadong pag-ampo, seryoso siyang nanaad kang Jehova nga gamiton ang iyang kinabuhi sa pag-alagad sa Diyos hangtod sa hangtod, bisag unsay mahitabo. Sa pagkutlo sa giingon ni Jesus, ang usa ‘modumili sa iyang kaugalingon,’ dili na sundon ang kaugalingon, ug manaad nga unahon niya ang kabubut-on sa Diyos labaw sa bisan unsa. (Mat. 16:24) Sukad nianang adlawa, ‘siya iya ni Jehova.’ (Roma 14:8) Si bisan kinsa nga mohimog pahinungod angayng mag-isip niini nga seryoso kaayo, sama sa salmista nga naghisgot sa iyang panaad sa Diyos: “Unsay akong igabayad kang Jehova tungod sa tanan niyang mga kaayohan kanako? Pagabayran ko ang akong mga panaad kang Jehova, oo, sa atubangan sa tanan niyang katawhan.”​—Sal. 116:12, 14.

11. Unsay nahitabo sa adlaw sa imong bawtismo?

¹¹ Gipahinungod na ba nimo ang imong kinabuhi kang Jehova ug gisimbolohan kana pinaagig bawtismo? Kon mao, maayo kana! Hinumdomi nga sa adlaw sa imong bawtismo, atubangan sa mga saksi, gipangutana ka kon gipahinungod na ba nimo ang imong kaugalingon kang Jehova ug nakasabot nga “ang imong pagpahinungod ug pagpabawtismo magpaila nga ikaw usa na ka Saksi ni Jehova nga nakig-uban sa organisasyon nga tinultolan sa espiritu sa Diyos.” Ang pagtubag nimog “oo” nagsilbing pagpahayag sa dayag nga bug-os kang nagpahinungod ug nagpakita nga kuwalipikado ka na sa bawtismo ingong ordinadong ministro ni Jehova. Seguradong nakapalipay ka kang Jehova!

12. (a) Unsay atong ikapangutana sa kaugalingon? (b) Unsang mga hiyas ang giingon ni Pedro nga angay natong ugmaron?

¹² Bisan pa niana, sinugdanan lang ang bawtismo. Sukad nianang adlawa, gusto natong magpadayon sa pagkinabuhi sumala sa atong pahinungod pinaagi sa matinumanong pag-alagad sa Diyos. Busa, makapangutana tingali ta: ‘Unsa nay mga pag-uswag sa akong espirituwal nga pagkinabuhi sukad sa akong bawtismo? Nagpadayon ba ko sa pag-alagad kang Jehova nga kinasingkasing? (Col. 3:23) Ako ba nagaampo, nagbasa sa Pulong sa Diyos, nagtambong sa mga tigom, ug nakigbahin sa pagsangyaw kutob sa maarangan? O, ako ba nagakaluya sa akong espirituwal nga kalihokan?’ Si apostol Pedro nagpatin-aw nga malikayan nato nga mahimong dili aktibo sa pag-alagad kon pirme natong palig-onon ang atong pagtuo pinaagi sa kahibalo, paglahutay, ug diyosnong debosyon.​—Basaha ang 2 Pedro 1:5-8.

13. Unsay angayng maamgohan sa usa ka dedikado, bawtismadong Kristohanon?

¹³ Dili na puwedeng bawion ang pahinungod, nga bakwion kon unsay atong gisaad sa Diyos. Kon ang usa ka tawo moundang sa pag-alagad kang Jehova o sa pagkinabuhi sa Kristohanong paagi, dili siya makapangangkon nga dili tinuod ang iyang pahinungod ug nga ang iyang bawtismo dili balido.b Kon buot hunahunaon, gipresentar niya ang iyang kaugalingon ingong usa nga bug-os napahinungod sa Diyos. Manubag siya kang Jehova ug sa kongregasyon kon makahimo siyag seryosong mga sala. (Roma 14:12) Hinaot dili ta mahisama niadtong giingon ni Jesus: “Imong gibiyaan ang gugma nga imong nabatonan sa sinugdan.” Hinuon, gusto natong moingon si Jesus bahin kanato: “Nahibalo ako sa imong mga buhat, ug sa imong gugma ug pagtuo ug ministeryo ug paglahutay, ug nga ang imong ulahing mga buhat mas labaw pa kay sa mga nahauna.” (Pin. 2:4, 19) Hinaot magmadasigon ta sa pagkinabuhi sumala sa atong pahinungod aron malipay si Jehova.

14. Unsa ang ikaduha nga labing importanteng panaad sa usa, ug ngano?

¹⁴ Ang ikaduha nga labing importanteng panaad sa usa mao ang iyang panaad sa kaminyoon. Ngano man? Tungod kay sagrado ang kaminyoon. Atubangan sa Diyos ug sa mga testigos, gipahayag sa lalaki ug babaye ang ilang panaad sa kaminyoon. Sagad, litokon nila ang panaad nga ilang higugmaon, panggaon, ug tahoron ang usag usa ug nga ila kanang buhaton “samtang [silang] duha buhi dinhi sa yuta sumala sa kahikayan sa Diyos sa kaminyoon.” Ang uban wala tingali mobungat nianang eksaktong mga pulong, apan nanaad gihapon sila sa Diyos. Dayon ipahibalo nga silang duha bana ug asawa na, ug ang ilang kaminyoon maoy hangtod sa hangtod samtang sila buhi. (Gen. 2:24; 1 Cor. 7:39) “Busa,” sa pagkutlo sa giingon ni Jesus, “kon unsay gihiusa pagyugo sa Diyos ayaw ipabulag ni bisan kinsang tawo”​—bana man o asawa o ni bisan kinsa. Busa, ang magminyo dili angayng maghunahuna nga diborsiyo ang solusyon kon dili sila magkasinabot.​—Mar. 10:9.

15. Nganong dili angayng sundogon sa mga Kristohanon ang panglantaw sa kalibotan maylabot sa kaminyoon?

¹⁵ Tinuod, wala gyoy hingpit nga kaminyoon. Ang matag kaminyoon gilangkoban sa duha ka dili hingpit nga tawo. Kanay rason nga ang Bibliya nag-ingon nga ang magtiayon usahay “makaagom ug kasakitan.” (1 Cor. 7:28) Ikasubo, daghan karon sa kalibotan ang naghunahuna nga dili seryoso ang kaminyoon. Kon may problema sa panagtiayon, mosurender dayon sila ug mobiya sa ilang kapikas. Apan dili ingon niana ang mga Kristohanon. Ang pagbungkag sa panaad sa kaminyoon maoy katumbas sa pagpamakak ngadto sa Diyos, ug gidumtan sa Diyos ang mga bakakon! (Lev. 19:12; Prov. 6:16-19) Si apostol Pablo misulat: “Nahigot ka ba sa usa ka asawa? Hunong na sa pagtinguhang makagawas.” (1 Cor. 7:27) Nakaingon si Pablo niana kay nahibalo siya nga gidumtan sab ni Jehova ang malimbongong pakigdiborsiyo.​—Mal. 2:13-16.

16. Unsay giingon sa Bibliya bahin sa diborsiyo ug panagbulag?

¹⁶ Gitudlo ni Jesus nga ang bugtong Kasulatanhong basehanan sa pagtapos sa panaad sa kaminyoon mao kini​—kon ang inosenteng kapikas modesisyon nga dili pasayloon ang nakapanapawng kapikas. (Mat. 19:9; Heb. 13:4) Apan, komosta kon mobiya ang usa ka kapikas? Klaro usab ang giingon sa Bibliya bahin niana. (Basaha ang 1 Corinto 7:10, 11.) Ang Bibliya wala maghisgot ug mga basehanan sa panagbulag sa magtiayon. Apan, giisip sa ubang minyong Kristohanon ang pipila ka situwasyon ingong rason sa panagbulag, sama sa grabeng pagpameligro sa kinabuhi o sa espirituwalidad sa usa tungod sa abusado o apostatang kapikas.c

17. Unsay buhaton sa Kristohanong magtiayon aron magmalungtaron ang ilang kaminyoon?

¹⁷ Kon ang magtiayon moduol sa mga ansiyano para magpatambag maylabot sa problema sa kaminyoon, angayng pangutan-on sa mga ansiyano ang magtiayon kon nakatan-aw na ba sila sa video nga What Is True Love? ug kon natun-an na ba nila nga magkauban ang brosyur nga Mahimong Magmalipayon ang Imong Pamilya. Ngano? Tungod kay kini nga mga galamiton nagpasiugda sa mga prinsipyo sa Diyos nga nakatabang sa daghan sa pagpalig-on sa ilang kaminyoon. Usa ka magtiayon miingon: “Sukad mi nagtuon niini nga brosyur, nahimong mas malipayon ang among kaminyoon.” Usa ka asawa, kinsa 22 ka tuig nang minyo ug hapit na untang makigbulag, miingon: “Pareho ming bawtismado, pero lainlain mig pagbati sa mga butang. Tayming kaayo ang pagluwat sa video! Karon, miarang-arang na ang among panagtiayon.” Minyo ka ba? Nan, ipadapat ang mga prinsipyo ni Jehova sa imong kaminyoon. Kon buhaton nimo kana, matabangan ka nga magkinabuhing malipayon sumala sa imong panaad sa kaminyoon!

18, 19. (a) Unsay gihimo sa daghang Kristohanong ginikanan? (b) Unsay atong ikaingon bahin sa mga special full-time servant?

¹⁸ Namatikdan ba nimo kon sa unsa pang paagi managsama si Jepte ug Ana? Tungod sa ilang mga panaad, ang anak nga babaye ni Jepte ug anak nga lalaki ni Ana gihatag alang sa espesyal nga sagradong pag-alagad sa tabernakulo. Nagkahulogan kana sa labing makapatagbawng kinabuhi. Karon, daghang Kristohanong ginikanan ang nagdasig sa ilang mga anak sa pag-alagad nga bug-os panahon ug sa pagsentro sa ilang kinabuhi sa buluhaton sa Diyos. Kadtong nagbuhat niana takos gayod sa sinserong komendasyon.​—Maghu. 11:40; Sal. 110:3.

¹⁹ Sa pagkakaron, dunay mga 67,000 ka membro sa Worldwide Order of Special Full-Time Servants of Jehovah’s Witnesses. Ang pipila anaa sa Bethel, o kaha sa pagpanukod o sirkito nga buluhaton. Ang uban nag-alagad ingong field instructor, espesyal payunir, misyonaryo, Assembly Hall servant, o Bible school facility servant. Silang tanan nailalom sa “Vow of Obedience and Poverty,” diin nanaad sila sa pagdawat sa bisan unsang asaynment alang sa pagpauswag sa intereses sa Gingharian, sa pagkinabuhing simple, ug sa pagdumili nga modawat ug sekular nga trabaho nga walay permiso. Ang giisip nga espesyal dili ang mga tawo kondili ang ilang mga asaynment. Nahibalo sila sa kaseryoso sa mapainubsanong pagkinabuhi sumala sa ilang panaad samtang mga special full-time servant sila.

20. Unsay angay natong buhaton “adlaw-adlaw,” ug ngano?

²⁰ Pila sa mga panaad nga atong gihisgotan ang imo nang nahimo ngadto sa Diyos​—usa, duha, o kadtong tulo? Seguradong nakakat-on ka nga angayng seryosohon ang imong mga panaad. (Prov. 20:25) Mahimong dili maayo ang resulta kon mapakyas ta sa pagtuman ug sa pagbayad sa atong panaad kang Jehova. (Eccl. 5:6) Busa malipayon kitang ‘mag-awit ug mga pagdayeg sa ngalan ni Jehova hangtod sa kahangtoran samtang magabayad kita sa atong mga panaad adlaw-adlaw.’​—Sal. 61:8.