Ang Hunahuna sa Bibliya

Unsaon Nato Pagtagad ang mga Tigulang?

NIADTONG ting-init sa 2003, libolibo ang nangamatay sa tibuok Uropa tungod sa usa sa kinainitan nga panahon nga mihampak sa Kontinente sulod sa 60 ka tuig. Kadaghanan sa nangamatay maoy mga tigulang. Ang uban gibiyaang nag-inusara sa balay samtang ang ilang mga paryente namakasyon sa laing lugar. Ang uban usab gikataho nga napasagdan o wala maatiman sa gikapoy na nga mga kawani sa ospital ug balay amomahan. Ang mantalaang Le Parisien nagtaho nga sa Paris lang, 450 ka patayng lawas wala kuhaa sa mga paryente. “Unsa nang matanga sa panahon kining atong gipuy-an nga gikalimtan na nato ang atong mga amahan, inahan, apohan?” nangutana ang mantalaan bahin sa kahimtang niadtong nangamatay nga nag-inusara ug wala-mailhi.

Niining kalibotan diin ang gidaghanon sa mga nag-edad ug kapin 65 madugangan na ug 795,000 ka tawo kada bulan, ang pag-atiman sa mga panginahanglan sa mga tigulang nahimo nang usa sa dagkong mga problema karon. “Nagkadaghan ang mga tawong edaran sa tibuok kalibotan karon kay sukad masukad ug kinahanglang tagdon nato pag-ayo kon unsay himoon sa mga nasod sa mga problema ug mga kahigayonan sa pagkatigulang,” matod ni Nancy Gordon, luyoluyong direktor sa mga programa maylabot sa populasyon alang sa U.S. Census Bureau.

Ang atong Maglalalang usab maikagon sa mga tigulang. Sa pagkatinuod, ang iyang Pulong, ang Bibliya, naghatag kanato ug giya kon unsaon sila pagtagad.

Pagtahod sa mga Tigulang

Ang Balaod sa Diyos, nga gihatag kang Moises, nagdasig ug pagtahod sa mga tigulang. Ang Balaod nagsugo: “Atubangan sa buhok nga ubanon motindog ka, ug magpakita ka ug pagtamod sa tawong tigulang.” (Levitico 19:32) Ang masinugtanong mga alagad sa Diyos gidahom nga “motindog” atubangan sa mga tigulang (1) ingong timaan sa pagtahod sa usa ka tawong edaran ug (2) ingong pamatuod sa matahaon nga kahadlok sa mga magsisimba sa Diyos. Busa ang mga edaran angay nga pasidunggan ug lantawon ingong mga tawo nga makahatag ug kaayohan.​—Proverbio 16:31; 23:22.

Bisan tuod ang mga Kristohanon karon dili na ubos sa Moisesnong Balaod, ang mga prinsipyo niini nagpadayag kon unsa ang panglantaw ug ang gihatagan ug pangunang pagtagad ni Jehova, nga klarong nagpakita nga siya nagtamod pag-ayo sa mga tigulang. Ang mga membro sa unang-siglong Kristohanong kongregasyon nakasabot niining mga prinsipyoha. Ang unang ebidensiya niini narekord sa basahon sa Bibliya nga Mga Buhat. Taliwala sa mga Kristohanon sa Jerusalem niadtong panahona mao ang pipila ka kabos nga mga balo. Walay duhaduha nga daghan kanila maoy mga tigulang. Ang mga apostoles nagtudlo ug pito ka ‘napanghimatud-ag maayo nga mga lalaki’ sa pagtino nga kining mga babayhana makadawat sa ilang adlaw-adlaw nga mga suplay sa pagkaon sa hapsay nga paagi, nga nag-isip niining linain nga pag-atiman ingong “hinungdanong atimanonon” sa kongregasyon.​—Buhat 6:1-7.

Gipakita ni apostol Pablo nga ang prinsipyo sa ‘pagtindog atubangan sa buhok nga ubanon’ mapadapat usab diha sa Kristohanong kongregasyon. Iyang giingnan ang batan-ong Kristohanong magtatan-aw nga si Timoteo: “Ayaw kasab-i ang usa ka tigulang nga lalaki. Sa kasukwahi, maymayi siya ingon sa usa ka amahan, . . . ang tigulang nga mga babaye ingong mga inahan.” (1 Timoteo 5:​1, 2) Bisan tuod ang batan-ong si Timoteo dunay igong awtoridad ibabaw sa tigulang nga mga Kristohanon, siya gisugo sa dili pagtamay sa tigulang nga tawo. Hinunoa, kinahanglang matinahoron niya nga maymayan siya samag amahan. Ug kinahanglang pakitaan usab niya ug samang pagtahod ang tigulang nga mga babaye sa kongregasyon. Nianang paagiha, gitambagan ni apostol Pablo si Timoteo​—ug lakip na ang tanang membro sa Kristohanong kongregasyon​—sa ‘pagtindog atubangan sa buhok nga ubanon.’

Siyempre, ang diyosnong mga tawo wala magkinahanglan ug balaod aron tagdon ang mga tigulang nga may dignidad ug pagtahod. Tagda ang panig-ingnan sa Bibliya nga si Jose, kinsa andam sa pagbuhat sa tanang maarangan aron ang iyang tigulang nga amahan madala sa Ehipto, sa ingon nagluwas sa 130 -anyos nga si Jacob gikan sa kaylap nga kagutmanan. Sa pagkakita niya sa iyang amahan sa unang higayon sulod sa kapig kawhaan ka tuig, si Jose “dihadiha mihalog sa iyang liog ug mihilak nganha sa iyang liog nga sublisubli.” (Genesis 46:29) Bisan tuod dugay pa una nahimong balaod taliwala sa mga Israelinhon ang pagtagad sa mga tigulang uban ang pagkamabination ug lalom nga pagtahod, gipabanaag na ni Jose ang panglantaw sa Diyos pinaagi sa pagbuhat niana.

Panahon sa iyang ministeryo, si Jesus mismo nagpakitag kabalaka sa mga tigulang. Kusganon niyang gihukman ang relihiyosong mga lider kinsa mibati nga sila walay nahimong sayop sa pagpasagad nila sa ilang tigulang nga mga ginikanan tungod sa ilang relihiyosong mga tradisyon. (Mateo 15:3-9) Si Jesus mahigugmaon nga nag-atiman usab sa iyang inahan. Samtang nag-antos sa grabeng kasakit diha sa sakitanang estaka, iyang gipaneguro nga ang iyang nagkatigulang nga inahan maatiman sa iyang pinalanggang apostol nga si Juan.​—Juan 19:​26, 27.

Dili Isalikway sa Diyos ang Iyang Maunongong mga Alagad

Ang salmista miampo: “Ayaw ako isalikway sa panahon sa akong pagkatigulang; sa diha nga ang akong kusog maluya na, ayaw ako pagbiyai.” (Salmo 71:9) Dili “isalikway” sa Diyos ang iyang matinumanong mga alagad bisan pag mibati sila nga wala nay pulos. Ang salmista wala mobati nga gisalikway siya ni Jehova; hinunoa, iyang giila ang panginahanglan sa pagsalig ug dugang sa iyang Magbubuhat samtang siya nagkatigulang. Si Jehova mosanong sa maong pagkamaunongon pinaagi sa pagtaganag tabang samtang ang usa buhi pa. (Salmo 18:25) Kasagaran, ang maong tabang moabot pinaagi sa mga isigka-Kristohanon.

Sumala sa nahisgotan na sa ibabaw, tin-aw nga kadtong buot nga magpasidungog sa Diyos angay usab nga magpasidungog sa mga tigulang. Ang mga tigulang bililhon gayod sa mga mata sa atong Maglalalang. Sanglit kita gihimo man sumala sa iyang dagway, hinaot nga ipabanaag nato kanunay ang panglantaw sa Diyos bahin sa “pagkaubanon.”​—Salmo 71:18.

[Hulagway sa panid 23]

Tagdon sa mga Kristohanon ang mga tigulang nga may pasidungog ug pagtahod