LEKSIYON 38
Pabilhi ang Regalo nga Kinabuhi
Ang kinabuhi punog makapalipay nga mga eksperyensiya. Bisan dihang naa tay mga problema, naa gihapoy mga butang nga makapalipay nato. Unsaon nato pagpakita nga atong gipabilhan ang regalo nga kinabuhi? Ug unsa ang pinakaimportanteng rason sa pagbuhat niana?
1. Nganong angay natong pabilhan ang kinabuhi?
Angay natong pabilhan ang kinabuhi kay regalo ni gikan sa atong mahigugmaong Amahan, si Jehova. Siya ang “tuboran sa kinabuhi”—iyang gilalang ang tanang kinabuhi. (Salmo 36:9) “Siya ang naghatag sa tanang tawo ug kinabuhi ug gininhawa ug tanang butang.” (Buhat 17:25, 28) Si Jehova naghatag nato sa atong gikinahanglan aron magpabilin tang buhi. Pero dili kay kana ra. Iya pong gipaposible nga ma-enjoy nato ang kinabuhi.—Basaha ang Buhat 14:17.
2. Unsaon nato pagpakita kang Jehova nga atong gipabilhan ang regalo nga kinabuhi?
Sukad nga gibuntis pa ka sa imong mama, gimahal na ka ni Jehova. Ubos sa paggiya sa Diyos, ang usa sa iyang mga magsisimba, si David, miingon kaniya: “Nakita ko nimo bisan niadtong binhi pa ko sa tagoangkan.” (Salmo 139:16) Gipabilhan pag-ayo ni Jehova ang imong kinabuhi. (Basaha ang Mateo 10:29-31.) Masakitan gyod siya kon tinuyong taposon sa usa ang kinabuhi sa uban, ug bisan ang iyang kaugalingong kinabuhi.a (Exodo 20:13) Masakitan pod si Jehova kon ipameligro nato ang atong kinabuhi bisag dili kinahanglan o kon dili nato ampingan ang kinabuhi sa uban. Dihang atong ampingan ang atong kinabuhi ug ang kinabuhi sa uban, atong gipakita nga atong gipabilhan ang nindot kaayo nga regalo nga kinabuhi.
TUN-IG DUGANG
Sayra ang mga paagi nga imong mapakita ang imong pagpabili sa regalo nga kinabuhi.
3. Ampingi ang imong panglawas
Ang dedikadong mga Kristohanon naggamit sa tanang bahin sa ilang kinabuhi sa pag-alagad kang Jehova. Sama rag ilang gipresentar ang ilang lawas ingong halad ngadto sa Diyos. Basaha ang Roma 12:1, 2, ug dayon hisgoti kini nga mga pangutana:
Unsay angayng magpalihok nimo nga ampingan ang imong panglawas?
Unsa ang mga paagi nga imo nang mahimo?
4. Pag-amping aron malikayan nga naay madisgrasya o mamatay
Gidasig ta sa Bibliya nga likayan ang mga buhat nga delikado. I-play ang VIDEO aron imong mahibaloan kon unsay imong mahimo sa pag-amping sa kinabuhi.
Basaha ang Proverbio 22:3, ug dayon hisgoti kon sa unsang paagi ka ug ang uban mahimong luwas . . .
diha sa imong balay.
diha sa imong trabahoan.
dihang magdula.
dihang magdrayb o magsakay ug sakyanan.
5. Tahora ang kinabuhi sa bata nga wala pa matawo
Pinaagig balak, gisulti ni David nga si Jehova interesado sa kinabuhi ug sa pagtubo sa bata nga wala pa matawo. Basaha ang Salmo 139:13-17, ug dayon hisgoti kini nga pangutana:
Para kang Jehova, ang kinabuhi ba sa tawo magsugod dihang mabuntis ang inahan o dihang matawo ang bata?
Ang mga balaod ni Jehova sa karaang Israel naghatag ug proteksiyon sa mga inahan ug sa ilang mga anak nga wala pa matawo. Basaha ang Exodo 21:22, 23, ug dayon hisgoti kini nga mga pangutana:
Unsay hunahuna ni Jehova sa tawo nga aksidenteng nakapatay sa bata nga wala pa matawo?
Unsay iyang bation kon tinuyo nang himoon sa usa?b
Unsay imong gibati sa panghunahuna sa Diyos?
Bisan ang babaye nga nagpabili sa kinabuhi mobati tingali nga aborsiyon lang ang solusyon sa iyang kahimtang. Basaha ang Isaias 41:10, ug dayon hisgoti kini nga mga pangutana:
Kon ang usa ka babaye presyuron nga magpa-abort, kang kinsa siya angayng mangayog tabang? Ngano?
ANG UBAN MOINGON: “Ang babaye ang magbuot kon magpa-abort ba siya o dili. Iya god nang lawas.”
Unsay nagkombinsir nimo nga gipabilhan ni Jehova ang kinabuhi sa mama ug sa bata nga wala pa matawo?
SUMARYO
Ang Bibliya nagtudlo nga atong higugmaon, tahoron, ug ampingan ang regalo ni Jehova nga kinabuhi—ang atong kinabuhi ug ang kinabuhi sa uban.
Review
Nganong ang kinabuhi sa tawo importante kang Jehova?
Unsay bation ni Jehova kon tinuyong taposon sa usa ang kinabuhi sa uban o ang iyang kinabuhi?
Nganong mapasalamaton ka sa regalo nga kinabuhi?
SUSIHA
Sa unsang paagi nato mapasalamatan si Jehova sa regalo nga kinabuhi?
Sayra ang tubag sa pangutanang, Mapasaylo ba sa Diyos ang babaye nga nakahimog aborsiyon?
“Unsay Giingon sa Bibliya Bahin sa Aborsiyon?” (Web article)
Sayra kon sa unsang paagi ang panghunahuna sa Diyos sa kinabuhi angayng makaapektar sa atong pagpilig kalingawan.
Komosta kon ang usa ka tawo gustong maghikog? Sayra kon sa unsang paagi makatabang ang Bibliya.
“Gusto na Kong Mamatay—Kon Maghunahuna Kog Hikog Makatabang ba Nako ang Bibliya?” (Web article)
a Naghunahuna gyod si Jehova niadtong mga dugmok ug kasingkasing. (Salmo 34:18) Iyang nasabtan ang ilang kasakit nga mopahunahuna nilang maghikog, ug gusto niya silang tabangan. Aron imong makita kon unsay kaayohan sa tabang ni Jehova, basaha ang artikulo nga “Gusto na Kong Mamatay—Kon Maghunahuna Kog Hikog Makatabang ba Nako ang Bibliya?” nga naa sa Susiha nga seksiyon niini nga leksiyon.
b Kadtong nagpa-abort dili kinahanglang mobati nga dili na sila mapasaylo, kay si Jehova andam mopasaylo nila. Para sa dugang impormasyon, tan-awa ang artikulo nga “Unsay Giingon sa Bibliya Bahin sa Aborsiyon?” nga naa sa Susiha nga seksiyon niini nga leksiyon.