Hinaot ang Imong Pagboluntaryo Maghatag ug Pagdayeg Kang Jehova!

1, 2. (a) Unsay pangangkon ni Elipaz ug Bildad bahin sa atong pag-alagad sa Diyos? (b) Sa unsang paagi gipadayag ni Jehova ang iyang panglantaw?

“ANG usa ka tawo . . . may pulos ba alang sa Diyos, nga siya nga hait ug salabotan magmapuslanon alang kaniya? May kahimuot ba ang Labing Gamhanan nga ikaw matarong, o may makuhang kaayohan nga gihimo mo ang imong dalan nga walay-ikasaway?” (Job 22:1-3) Nakahunahuna ka na ba sukad kon unsay tubag sa mga pangutanang sama niana? Dihang gipangutana kana ni Elipaz nga Temanhon kang Job, seguradong nagtuo si Elipaz nga dili ang tubag niana. Ang iyang kauban, si Bildad nga Shuhanon, nakiglalis pa gani nga imposible nga mahimong matarong ang mga tawo atubangan sa Diyos.​—Basaha ang Job 25:4.

² Kining bakak nga mga maghuhupay nangangkon nga walay pulos kang Jehova ang atong pagkamaunongon kaniya ug gilantaw lang ta sa Diyos nga samag insekto, ulod, o wati. (Job 4:19; 25:6) Sa unang tan-aw, morag mapainubsanon si Elipaz ug Bildad. (Job 22:29) Aw, kon motan-aw ta gikan sa ibabaw sa taas kaayong bukid o sa bentana sa eroplano, ang kalihokan sa mga tawo tingali dili makita. Pero, mao kaha nay pag-isip ni Jehova sa atong pagsuportar sa Gingharian samtang siya naglantaw sa yuta gikan sa iyang taas nga posisyon? Gipadayag ni Jehova ang iyang panglantaw dihang iyang gibadlong si Elipaz, Bildad ug Zopar sa pagsultig bakak pero nalipay siya kang Job, kinsa iyang gitawag nga “akong alagad.” (Job 42:7, 8) Busa, ang usa ka tawo mahimo gayong ‘mapuslanon sa Diyos.’

 3. Unsay giingon ni Elihu maylabot sa atong mga paningkamot sa pag-alagad kang Jehova, ug unsay iyang gipasabot?

³ Wala badlonga ni Jehova si Elihu sa pagpangutana: “Kon ikaw husto man gayod, unsay imong ikahatag [sa Diyos], o unsa ang iyang madawat gikan sa imong kamot?” (Job 35:7) Gipasiugda ba ni Elihu nga walay pulos ang atong mga paningkamot sa pag-alagad sa Diyos? Wala. Siya miingon nga wala magdepende si Jehova sa atong pagsimba. Walay kulang kang Jehova. Dili nato siya mahimong mas dato o mas kusgan. Sa laing bahin, gikan sa Diyos ang atong pagkamaayo, talento, o kusog, ug nakita niya kon giunsa nato kini paggamit.

 4. Sa unsa gipakasama ni Jehova ang atong pagpakitag kaayo sa uban?

⁴ Giisip ni Jehova ang atong pagpakitag maunongong gugma sa iyang mga alagad nga samag siya mismo ang atong gipakitaan niini. Ang Proverbio 19:17 nag-ingon: “Siya nga nagapakitag kaluoy sa timawa nagapahulam kang Jehova, ug Siya magabayad kaniya sa iyang gibuhat.” Gipasiugda ba niining tekstoha nga nakita ni Jehova ang atong matag maayong buhat ngadto sa mga kabos? Makaingon ba ta nga ang Maglalalang sa uniberso mobating utangan siya sa mga tawo nga nagpakitag kaluoy sa mga kabos, ug isipon niya kana ingong utang nga iyang bayrag pabor ug panalangin? Oo, ug gipamatud-an kana sa bugtong Anak sa Diyos.​—Basaha ang Lucas 14:13, 14.

 5. Unsang mga pangutana ang atong konsiderahon?

⁵ Gidapit ni Jehova si propetang Isaias sa pagsulti alang Kaniya, nga nagpakitang malipay Siya nga may matinumanong mga tawo nga makigbahin sa pagpalampos sa Iyang katuyoan. (Isa. 6:8-10) Kinabubut-ong gidawat ni Isaias ang maong imbitasyon. Karon, linibo usab ang nagpakita nianang “Ania ako! Ipadala ako” nga espiritu dihang ilang gidawat ang lisod nga mga asaynment sa pag-alagad kang Jehova. Pero, makapangutana tingali ta: ‘Importante ba gyod ang akong nahimo? Bisan pag nalipay si Jehova sa akong pagboluntaryo, dili ba matuman ra gihapon ang iyang Pulong bisag unsa pay akong himoon sa pag-alagad kaniya?’ Konsideraha kon giunsa pagtubag kining mga pangutanaha diha sa asoy ni Debora ug Barak.

 6. Unsay kalainan sa mga Israelinhon ug sa kasundalohan ni Jabin?

⁶ Ang hari sa Canaan nga si Jabin “naglupig . . . sa hilabihan” sa mga Israelinhon sulod sa 20 ka tuig. Gani, ang mga Israelinhon mahadlok nang mogawas sa ilang gitagoan. Ang kasundalohan sa Israel kulang ug armas​—pangsukol man o pangdepensa—​samtang ang ilang mga kaaway may 900 ka karong iggugubat nga may puthawng mga sanggot.​—Maghu. 4:1-3, 13; 5:6-8.a

7, 8. (a) Unsa ang unang instruksiyon nga gihatag ni Jehova kang Barak? (b) Giunsa pagpildi sa Israel ang kasundalohan ni Jabin? (Tan-awa ang hulagway sa sinugdan sa artikulo.)

⁷ Bisan pa niana, si Jehova naghatag ug klarong sugo kang Barak pinaagi sa propetisang si Debora: “Lakaw ug lukpi ang ibabaw sa Bukid sa Tabor, ug pagdalag napulo ka libo ka tawo sa mga anak ni Neptali ug sa mga anak ni Zabulon. Ug paduolon ko kanimo sa bul-oganang walog sa Kison si Sisera nga pangulo sa kasundalohan ni Jabin ug ang iyang mga karong iggugubat ug ang iyang panon, ug itugyan ko gayod siya sa imong kamot.”​—Maghu. 4:4-7.

⁸ Gipahibalo sa tanan ang maong sugo. Ang mga boluntaryo nangadto sa Bukid sa Tabor. Ug gisunod dayon ni Barak ang mga instruksiyon ni Jehova. (Basaha ang Maghuhukom 4:14-16.) Sa ilang pagpakiggubat sa Taanak, kalit nga mibunok ang ulan ug nahimong kalapokan ang palibot. Gigukod ni Barak ang kasundalohan ni Sisera hangtod sa Haroset​—nga may gilay-ong 24 kilometros. Samtang miikyas, giabandonar ni Sisera ang gikahadlokan pero karon wala nay pulos nga karo ug miadto siya sa Zaananim, tingali duol sa Kedes. Midangop siya sa tolda ni Jael, asawa ni Heber nga Kenihanon, ug giabiabi siya ni Jael. Kay gikapoy pag-ayo sa gubat, nakatulog si Sisera. Karon, may kahigayonan na ang maisogong si Jael sa pagpatay kang Sisera. (Maghu. 4:17-21) Ang kaaway sa Israel napildi!b

 9. Unsang dugang detalye ang gihisgotan sa Maghuhukom 5:20, 21 bahin sa gubat batok kang Sisera?

⁹ Ang Maghuhukom kapitulo 4 ug 5 angay nga dungang tun-an, kay dunay detalye ang usa ka kapitulo nga wala sa laing kapitulo. Pananglitan, ang Maghuhukom 5:20, 21 miingon: “Gikan sa langit ang mga bituon nakig-away, gikan sa ilang mga agianan nakig-away sila batok kang Sisera. Ang suba sa Kison mibanlas kanila.” Naghisgot ba kini sa tabang sa mga anghel, o may nangahulog bang bulalakaw? Wala maghisgot niini ang asoy. May lain pa ba gawas sa Diyos ang makapahinabo nga mobunok ang ulan sa eksaktong dapit ug panahon, nga maoy hinungdan nga nalubong sa lapok ang 900 ka karo? Tulo ka beses nga gihisgotan sa Maghuhukom 4:14, 15 nga si Jehova ang nagpahinabo sa maong kadaogan. Walay bisan usa sa 10,000 ka boluntaryong Israelinhon ang makapangangkon sa maong kadaogan.

10, 11. Unsa ang “Meroz,” ug nganong gitunglo kini?

¹⁰ Apan makapatingala nga sa usa ka bahin sa awit ni Debora ug Barak sa pagdayeg kang Jehova tungod sa milagrosong kadaogan, sila miingon: “‘Tungloha ninyo ang Meroz,’ miingon ang manulonda ni Jehova, ‘tungloha ninyo nga walay hunong ang mga molupyo niini, kay sila wala moanhi aron sa pagtabang kang Jehova, sa pagtabang kang Jehova uban sa mga gamhanan.’”​—Maghu. 5:23.

¹¹ Klaro nga gitunglo pag-ayo ang Meroz nga tungod niana dili na maseguro kon unsa kini. Siyudad ba kini nga midumili sa panawagan alang sa mga boluntaryo? Kon dinhi miagi si Sisera aron moikyas, may kahigayonan ba silang dakpon siya pero wala nila kini buhata? Imposibleng wala sila kadungog sa panawagan ni Jehova alang sa mga boluntaryo kay 10,000 gikan sa maong rehiyon ang nagtigom aron sa pagpakiggubat. Handurawa nga nakita sa mga taga-Meroz ang bangis nga manggugubat nga nagdagan sa ilang kadalanan nga nag-inusara ug naningkamot sa pag-ikyas. Dako unta ning kahigayonan aron masuportahan ang katuyoan ni Jehova ug maeksperyensiyahan ang iyang panalangin. Pero sa maong kritikal nga situwasyon, diin makapili unta sila sa pagboluntaryo, nagpakabana ba sila? Pagkalahi nila sa maisogong si Jael nga milihok dayon sumala sa gihisgotan sa sunod nga mga bersikulo!​—Maghu. 5:24-27.

12. Unsang kalainan sa panghunahuna ang makita sa Maghuhukom 5:9, 10, ug sa unsang paagi kini makaapektar kanato karon?

¹² Sa Maghuhukom 5:9, 10, makita nato ang kalainan sa panghunahuna niadtong miuban kang Barak ug niadtong wala. Gikomendahan ni Debora ug Barak ang “mga komandante sa Israel, kinsa kinabubut-ong nag-alagad [o, miboluntaryo uban] . . . sa katawhan.” Pagkalahi nila sa mga “nagsakay sa dalagong-pula nga mga asna,” kinsa wala moboluntaryo tungod sa garbo, ug niadtong “naglingkod sa mahalon nga mga alpombra” nga gustog komportableng kinabuhi! Dili sama niadtong “naglakaw sa dalan,” nga dili gustong mahago, kadtong miuban kang Barak andam makiggubat diha sa batoong mga bakilid sa Tabor ug sa lapokong walog sa Kison! Ang tanan nga dili andam mosakripisyo giawhag sa ‘pagtagad!’ Oo, kinahanglan silang mamalandong sa nawalang kahigayonan nga suportahan ang buluhaton ni Jehova. Mao man sab kadtong nagduhaduha karon sa pag-alagad sa Diyos.

13. Sa unsang paagi ang panghunahuna sa tribo ni Ruben, Dan, ug Aser lahi nianang sa tribo ni Zabulon ug Neptali?

¹³ Nakita mismo sa mga miboluntaryo kon giunsa pagbayaw ni Jehova ang iyang pagkasoberano. Mas kombinsido silang ‘isugilon ang matarong nga mga buhat ni Jehova.’ (Maghu. 5:11) Sa laing bahin, gihisgotan sa Maghuhukom 5:15-17 ang tribo ni Ruben, Dan, ug Aser nga nagpokus sa materyal nga mga butang​—nga girepresentahan sa ilang mga karnero, barko, ug pantalan—​imbes mosuportar sa buluhaton ni Jehova. Lahi sila sa tribo ni Zabulon ug Neptali, kinsa nagpameligro “sa ilang mga kalag hangtod sa kamatayon” aron suportahan si Debora ug Barak. (Maghu. 5:18) Kining magkalahing panghunahuna sa pagboluntaryo magtudlo natog importanteng leksiyon.

14. Unsaon nato pagpakita ang atong pagsuportar sa pagkasoberano ni Jehova?

¹⁴ Wala na ta dapita sa literal nga pagpakiggubat, pero pribilehiyo nato nga ipakita ang atong kaisog pinaagi sa madasigong pagsangyaw. Karon, mas dako ang panginahanglan alang sa mga boluntaryo sa organisasyon ni Jehova. Minilyong brader, sister, ug batan-on ang miboluntaryo sa lainlaing matang sa bug-os panahong pag-alagad ingong mga payunir, Bethelite, boluntaryo sa pagpanukod ug Kingdom Hall, ug boluntaryo sa mga asembliya ug kombensiyon. Hunahunaa usab ang mga ansiyano nga nagpas-an ug bug-at nga mga responsabilidad sa Hospital Liaison Committee ug sa pag-organisar ug kombensiyon. Makaseguro ka nga pabilhan pag-ayo ni Jehova ang imong pagkaandam moboluntaryo, ug dili niya kini kalimtan.​—Heb. 6:10.

15. Unsaon nato pagseguro nga wala nato balewalaa ang buluhaton ni Jehova?

¹⁵ Maayong pangutan-on nato ang kaugalingon: ‘Gipasagdan ba nako ang uban nga magbaguod sa responsabilidad? Gitugotan ba nako ang sobrang interes sa materyal nga mopugong nako sa pagboluntaryo? Sama kang Barak, Debora, Jael, ug sa 10,000 ka boluntaryo, duna ba koy pagtuo ug kaisog sa paggamit sa tanan nakong nabatonan aron tumanon ang klarong sugo ni Jehova? Kon naghunahuna ko nga mobalhin sa laing siyudad o nasod aron mokitag dako, gipalandong ba nako ang epekto niini sa akong pamilya ug kongregasyon?’c

16. Unsay atong mahatag kang Jehova nga wala pa niya mabatoni?

¹⁶ Gipasidunggan ta ni Jehova pinaagi sa pagtugot kanato nga suportahan ang iyang pagkasoberano. Sukad nga nahaylo sa Yawa ang unang mga tawo sa pagsuportar sa iyang pagmando, ang imong pagsuportar sa pagmando ni Jehova magpakita kang Satanas kon kinsay imong gidapigan. Ang imong pagtuo ug integridad nagpalihok nimo sa pagboluntaryo, ug kini nakapalipay kang Jehova. (Prov. 23:15, 16) Iyang gigamit ang imong pagsuportar kaniya aron matubag ang mga pagtamay ni Satanas. (Prov. 27:11) Busa, tungod sa imong pagkamatinumanon, naghatag ka kang Jehova ug usa ka butang nga bililhon ug makapalipay kaayo kaniya.

17. Unsay giingon sa Maghuhukom 5:31 bahin sa umaabot?

¹⁷ Sa dili madugay, mapuno ang yuta sa mga tawong dapig sa pagkasoberano ni Jehova. Gipangandoy gyod nato nang adlawa! Sama kang Debora ug Barak, kita moawit: “Sa ingon niana laglaga ang tanan mong kaaway, Oh Jehova, ug ang mga nahigugma kanimo himoang ingon sa pagsidlak sa adlaw diha sa pagkagamhanan niini.” (Maghu. 5:31) Matubag kini nga hangyo dihang taposon na ni Jehova ang daotang kalibotan ni Satanas! Inigsugod sa gubat sa Armagedon, dili na magkinahanglag boluntaryong mga tawo sa pagpildi sa mga kaaway. Panahon kana nga kita ‘mobarog nga walay lihok ug tan-awon ang kaluwasan ni Jehova.’ (2 Cron. 20:17) Apan sa kasamtangan, daghan tag kahigayonan nga suportahan ang katuyoan ni Jehova uban ang kaisog ug kadasig.

18. Unsay epekto sa imong pagboluntaryo ngadto sa tanang makabenepisyo niini?

¹⁸ “Tungod kay kinabubut-ong nag-alagad ang katawhan, dayega ninyo si Jehova.” Sa ingon, gisugdan ni Debora ug Barak ang ilang awit sa kadaogan pinaagig pagdayeg kang Jehova, dili sa mga linalang. (Maghu. 5:1, 2) Sa susama, hinaot ang imong pagboluntaryo magdasig sa tanang makabenepisyo niini sa pag-ingong “dayega ninyo si Jehova”!