BARAK
[Kilat].
Anak nga lalaki ni Abinoam sa Kedes sa teritoryo sa Neptali. Sa sayong yugto sa panahon sa mga maghuhukom, ang mga Israelinhon nahulog gikan sa matuod nga pagsimba, ug busa sulod sa 20 ka tuig gitugotan sa Diyos nga sila daogdaogon ni Jabin, ang hari sa Canaan. Sila mituaw kang Jehova alang sa tabang, ug nianang panahona gitudlo sa Diyos si Barak ingong ilang pangulo. (Huk 4:1-3) Bisan tuod ang Canaanhong mga tigdaogdaog sa mga Israelinhon sinangkapan kaayo sa hinagiban, “walay taming nga makita, ni usa ka bangkaw, taliwala sa kap-atan ka libo sa Israel.” (Huk 5:8) Apan, sa adlaw ni Barak, gihatag ni Jehova sa Israel ang kadaogan batok sa ilang mga kaaway, usa ka kadaogan nga dili mahikalimtan. (Sal 83:9) Ang duha ka asoy bahin niining mga butanga diha sa Mga Maghuhukom (kapitulo 4, ug sa masadyaong awit ni Debora ug Barak sa kapitulo 5) nagtampohay sa usag usa ug naghulagway ug usa ka tin-awng larawan kon unsay nahitabo nianang panahona.
Ang manalagnang si Debora, nga naghukom sa Israel nianang panahona, nagdasig kang Barak nga manguna sa pagpagawas sa iyang katawhan. Miuyon si Barak, apan ubos sa kondisyon nga mouban kaniya si Debora. Siya misugot apan giingnan si Barak nga ibaligya ni Jehova si Sisera, ang pangulo sa kasundalohan ni Jabin, ngadto sa kamot sa usa ka babaye.—Huk 4:4-9.
Nagrekluta si Barak ug 10,000 ka lalaki gikan sa Neptali, Zabulon, ug sa ubang mga tribo sa Israel (Huk 4:6; 5:9-18) ug mitungas sa Bukid sa Tabor. Sa pagkadungog niini, si Sisera ug ang iyang kasundalohan, nga sinangkapan sa 900 ka karo nga tinaoran ug puthawng mga sanggot, midasdas sa mga Israelinhon ubay sa naughang suba sa Kison (sa Patag sa Jezreel). Uban sa pagpanguna ni Barak, ang Israelinhong kasundalohan, nga dili kaayo sinangkapan, maisogong milugsong gikan sa Bukid sa Tabor, nga andam makigsangka batok sa nasangkapan pag-ayong mga Canaanhon. Apan, ang Kison mibaha pag-ayo, nga tungod niana dili na makadagan ang mga karo sa mga kaaway. Sa pagkatinuod, “gikan sa langit ang mga bituon nakig-away, gikan sa ilang mga agianan nakig-away sila batok kang Sisera. Ang suba sa Kison mibanlas kanila.” Si Barak ug ang iyang mga tawo midasdas nga nakabentaha, ug ang asoy nag-ingon: “Ang tibuok panon ni Sisera napukan pinaagi sa sulab sa espada. Walay bisan usa nga nabilin.”—Huk 5:20-22; 4:10-16.
Si Sisera, nga mibiya sa iyang karo ug sa iyang gilikosang kasundalohan, mikalagiw ug midangop sa tolda ni Jael, ang asawa ni Heber, nga usa ka Kenihanon nga nakigdait kang Jabin. Giabiabi ni Jael si Sisera, apan samtang siya natulog, siya gipatay ni Jael pinaagi sa pagbugsok sa ugsok sa tolda nganha sa iyang mga tampihak lahos sa yuta. Sa dihang miabot si Barak, gipadayon siya ni Jael sa sulod sa tolda, diin iyang nakita nga natuman ang pulong ni Jehova; sa pagkatinuod si Sisera gibaligya ngadto sa kamot sa usa ka babaye. (Huk 4:17-22; 5:24-27) Human niana, ang kamot sa madaogong mga Israelinhon “nagkabangis batok kang Jabin nga hari sa Canaan, hangtod nga sila nagpatay kang Jabin.” Busa, ang mao nga dapit sa Israel “wala nay kasamok sulod sa kap-atan ka tuig.”—Huk 4:23, 24; 5:31.
Si Barak giapil paghisgot ingong panig-ingnan sa pagkamatinumanon “nga tungod sa pagtuo nagpildi ug mga gingharian diha sa panaggubat, . . . nahimong maisogon sa gubat, nagparot sa kasundalohan sa mga langyaw.”—Heb 11:32-34.
Lagmit si Barak mao ang “Bedan” sa 1 Samuel 12:11 (kon sundon ang LXX ug ang Sy).—Tan-awa ang BEDAN Num. 1.