Pagpalit ug Kalipay nga Walay Salapi

GIUHAW sa hilabihan human naglakaw sa halayong distansiya ilalom sa mainit nga adlaw, miabot ka sa gamayng baryo. Sa imong kalipay nakakita kag anunsiyo nga nagpahibalo nga may mapalit nga bugnawng mga ilimnon. Apan imong naamgohan nga wala ka diay dalang kuwarta sa pagbayad sa ilimnon.

Nakakita sa imong situwasyon, ang tag-iya sa tindahan miingon, ‘Dali, palit ug ilimnon—kini walay bayad nga salapi.’ Dihadiha, pagkadako sa imong gibating pasalamat alang niining malulutong tanyag. Apan, nangutana ka, ‘Sa unsang paagi mahimo kana? Sa unsang paagi makapalit ako nga walay salapi?’

Pagpalit nga Walay Salapi

Bisan pa nga daw sa handurawan lang kini, si Karel ug si Julian, nga gihisgotan sa panid 3, nakaagi sa maong kasinatian. Nagtuo sila nga ang salapi mohatag kanilag kalipay. Apan si Karel miasoy: “Ang pagtuon sa Bibliya nakabag-o sa akong panglantaw sa salapi. Kini nakahatag kanakog paglaom sa kinabuhing walay kataposan diha sa usa ka paraiso sa yuta, usa ka butang nga bililhon kay sa bisan unsang butang nga mapalit sa salapi.” Ang nangandoy niadto nga mahimong milyonaryo nga si Julian miasoy: “Hapit na nakong makab-ot ang akong tumong sa dihang nakat-onan ko ang kamatuoran gikan sa Bibliya.”

Sa susama, ang tag-iyag supermarket niadto si Kiyoshi Tomomitsu gikan sa Japan naanad sa pag-una sa iyang trabaho, samtang ang pag-atiman sa iyang pamilya maoy “ikaduha lamang nga interes.” Siya nangatarongan: “Abi nako ug mapalipay nako ang akong pamilya pinaagi sa paghatag ug igong materyal nga mga butang alang sa ilang umaabot.” Sa dihang gipangutana kon unsay nakapabag-o sa iyang panglantaw sa salapi ug sa materyal nga mga butang, si Kiyoshi mitubag: “Ang mga Kasulatan gikan sa Bibliya, sama sa Proverbio 23:23, nga nagaingon, ‘Palita ang kamatuoran ug ayaw kinig ibaligya.’”

‘Apan,’ ikaw mangutana, ‘sa unsang paagi akong “mapalit ang kamatuoran”?’

Ang Kabayaran sa Kalipay

Isakripisyo nimo ang imong panahon alang niini. ‘Pahimusli ang higayon,’ mitambag ang Kristohanong apostol Pablo, ‘kay daotan ang panahon.’ (Efeso 5:15-17) Ang mga Saksi ni Jehova sa inyong lugar malipay sa paghikay sa pagpakigsulti kanimo bahin sa mga kamatuoran gikan sa Pulong sa Diyos, ang Bibliya, sa panahong kombenyente kanimo, ug kini walay bayad.

Nagapanuko ka bang ‘magpalangkit’? Kon mao, pamatia ang mga pulong ni Jesus: “Malipayon kadtong gigutom ug giuhaw sa pagkamatarong, sanglit sila pagabusgon.” Gikuha ang pagtagad sa iyang mga mamiminaw diha sa mga paagi nga ilang mabatonan ang kalipay, si Jesus miingon: “Malipayon kadtong mahunahunaon sa ilang espirituwal nga panginahanglan, kay ila ang gingharian sa langit.” (Mateo 5:3, 6) Kining langitnong kagamhanan, ang Gingharian sa Diyos, mao ang may bugtong awtoridad sa paghatag kanimo sa imong “pasaporte sa kalipay.”

Nan, unsay bahin sa salapi diha sa imong kinabuhi? Makaikag, ang Bibliya nagahatag ug praktikal nga mga giya bahin niini.

Maalamong Paggamit sa Salapi Karon

“Himayaa si Jehova uban sa imong bililhong mga butang,” nagtambag ang Pulong sa Diyos. (Porverbio 3:9) Busa, kadtong nagalaom sa Diyos alang sa tinuod nga kalipay nagagamit sa ilang salapi sa paagi nga makapahimuot kaniya. Nagatinguha sila sa pag-atiman sa materyal nga mga panginahanglan sa ilang pamilya. (1 Timoteo 5:8) Sila tim-os nga nagatabang sa ilang kauban sa pagtuo. Ug sila nagahatag usab ug kinabubut-ong mga kontribusyon sa pagsuportar sa buluhaton sa pagtaganag makalig-on sa espirituwal nga impormasyon diha sa porma sa mga Bibliya ug sa binase sa Bibliya nga mga publikasyon, sama niining magasina.

Ang kahibalo nga paphaon sa Gingharian sa Diyos ang tawhanong katilingban uban ang materyalistiko, hakog nga komersiyal nga mga elemento, nagalikay sila nga dili mabitik sa pagbubo sa kuwarta ngadto sa mga plano nga hinukman nang mapakyas. (Daniel 2:44) “Kon dunay makaon ug ikabesti,” sila kontento na sa paagi sa kinabuhi nga nagatagad sa butang nga angay unahon sa kinabuhi.—1 Timoteo 6:8.

Kalipay Karon—Usa ka Kamatuoran

“Ang usa sa unang mga butang nga akong namatikdan sa dihang nahibalag ang mga Saksi ni Jehova,” misaoy si Sue sa Inglaterra, “mao nga giunsa niadtong nagakinabuhi sa mga prinsipyo sa Bibliya, kinsa bug-os nalangkit sa ilang pagsimba, nga daw nakabaton sa mga butang nga ilang kinahanglan.” Ang iyang bana, si John, nakamatikod sa samang butang. Siya misaysay:

“Tungod lamang kadto sa pagkahibalo sa mga kamatuoran sa Bibliya nga akong nakita kon unsay nahitabo sa kadaghanang mga tawo. Ang ilang gihagoan bug-os nasandig sa salapi. Ang Bibliya nakatabang kanako sa pagkakat-on nga ang kalipay dili motungha nianang paagiha. Karon akong naamgohan nga ang kalipay maoy resulta lamang sa pagbuhat sa mga butang alang sa uban ug dili kay mao na kana ang kataposan niini.”

Si John ug Sue maoy duha lamang taliwala niadtong kapin sa tulo ka milyong mga Saksi ni Jehova kinsa makapamatuod sa pagkatinuod sa saad ni Jesus nga kon pangitaon pag-una ang Gingharian sa Diyos ug ang iyang pagkamatarong, ang tanang materyal nga mga kinahanglanon “igadugang ra kanimo.”—Mateo 6:33.

Nagapangita ka ba alang sa makatagbaw sa kauhaw nga mga tubig sa kamatuoran? Dato ka man ugaling o kabos, maangkon nimo ang kalipay pinaagi sa pagpamati sa matagnaong panawag sa Diyos: “Oy kamo diha, kamo nga giuhaw! Umari kamo sa tubig. Ug kamo nga walay salapi! Umari, pumalit . . . bisan walay salapi ug sa walay bili.” (Isaias 55:1) Kining maong tanyag balido gihapon. Pahimusli kini samtang makahimo ka pa.

[Mga Letrato sa panid 10]

Ang kalipay mosangpot gikan sa paggamit sa salapi aron sa pagtagana sa atong mga pamilya ug sa pagtabang sa uban