Kahadloki si Jehova, ang Tigpatalinghog sa Pag-ampo
“O Tigpatalinghog sa pag-ampo, nganha kanimo manuol ang tanang unod.”—SALMO 65:2.
1. Nganong kita makalaom kang Jehova nga adunay mga kinahanglanon alang niadtong nagatinguha sa pagduol kaniya diha sa pag-ampo?
SI Jehova nga Diyos mao ang “Hari nga walay kataposan.” Siya usab mao ang “Tigpatalinghog sa pag-ampo,” nga kaniya “manuol ang tanang unod.” (Pinadayag 15:3; Salmo 65:2) Apan sa unsang paagi sila moduol kaniya? Ang yutan-ong mga hari maoy magbuot sa mga butang sama sa besti ug sa paagi niadtong gitugotang moatubang sa ilang presensiya. Nan, sa pagkatinuod, kita magalaom nga ang Haring Walay-Kataposan adunay mga kinahanglanon nga kinahanglang kab-oton sa tanan nga nagatinguha sa pagduol atubangan kaniya uban ang pangamuyo ug pasalamat.—Filipos 4:6, 7.
2. Unsang mga pangutana ang mobangon bahin sa ulohan sa pag-ampo?
2 Unsay gikinahanglan sa Haring Walay-Kataposan niadtong moduol kaniya diha sa pag-ampo? Kinsa ang makaampo ug patalinghogan? Ug bahin sa unsa nga sila makaampo?
Pagduol sa Haring Walay-Kataposan
3. Unsang mga panig-ingnan ang imong ikahatag bahin sa mga pag-ampo nga gitanyag sa unang mga alagad sa Diyos, ug sila ba miduol kaniya pinaagig tigpataliwala?
3 Sa wala pa siya mahimong usa ka makasasala, si Adan, ang “anak sa Diyos,” dayag nakigkomunikar uban sa Hari nga walay kataposan. (Lucas 3:38; Genesis 1:26-28) Sa dihang ang anak ni Adan nga si Abel naghalad ug “pipila ka panganay sa iyang mga karnero” ngadto sa Diyos, sa walay duhaduha kining halara giubanan ug mga pahayag sa pangamuyo ug pagdayeg. (Genesis 4:2-4) Si Noe, Abraham, Isaac, ug Jacob nagtukod ug mga halaran ug miduol kang Jehova nga mainampoon uban sa ilang mga halad. (Genesis 8:18-22; 12:7, 8; 13:3, 4, 18; 22:9-14; 26:23-25; 33:18-20; 35:1, 3, 7) Ug ang mga pag-ampo ni Solomon, Esdras, ug ang dinasig sa Diyos nga mga salmista nagpaila nga ang mga Israelinhon miduol sa Diyos nga walay tigpataliwala.—1 Hari 8:22-24; Esdras 9:5, 6; Salmo 6:1, 2; 43:1; 55:1; 61:1; 72:1; 80:1; 143:1.
4. (a) Unsang bag-ong paagi sa pagduol sa Diyos diha sa pag-ampo ang gisugdan sa unang siglo? (b) Nganong ilabinang tukma nga ang pag-ampo himoon pinaagi sa ngalan ni Jesus?
4 Ang bag-ong paagi sa pagduol sa Diyos diha sa pag-ampo gisugdan sa unang siglo sa atong Kumong Panahon. Kadto maoy pinaagi sa iyang Anak, si Jesu-Kristo, kinsa adunay linaing gugma alang sa katawhan. Diha sa iyang una-tawhanong paglungtad, si Jesus nag-alagad nga malipayon ingong “usa ka batid nga magbubuhat,” nga mahinagpon sa mga butang nga may kalabotan sa katawhan. (Proverbio 8:30, 31) Ingong usa ka tawo sa yuta, si Jesus sa pagkamahigugmaon mitabang sa dili hingpit nga katawhan sa espirituwal, nag-ayo sa mga masakiton, ug nagbanhaw pa sa mga patay. (Mateo 9:35-38; Lucas 8:1-3, 49-56) Labaw sa tanan, si Jesus ‘naghatag sa iyang kalag ingong usa ka lukat alang sa daghan.’ (Mateo 20:28) Nan, pagkatukma nga silang nagapahimulos sa lukat angay moduol sa Diyos pinaagi niining usa kinsa nahigugma pag-ayo sa katawhan! Kini karon mao lamang ang bugtong paagi sa pagduol sa Haring Walay-Kataposan, kay si Jesus mismo nag-ingon: “Walay usa nga makaadto sa Amahan gawas kon pinaagi kanako” ug, “Kon ikaw mangayo sa Amahan ug bisan unsa kini igahatag kanimo pinaagi sa akong ngalan.” (Juan 14:6; 16:23) Ang pagpangayog mga butang sa ngalan ni Jesus nagkahulogan sa pag-ila kaniya ingong ang dalan sa pagduol sa Tigpatalinghog sa pag-ampo.
5. Unsa ang tinamdan sa Diyos ngadto sa kalibotan sa katawhan, ug unsay kalabotan niini diha sa pag-ampo?
5 Ilabina nga atong pabilhan ang gugma nga gipakita ni Jehova pinaagi sa pagtagana sa lukat. Si Jesus nag-ingon: “Gihigugma gayod sa Diyos ang kalibotan [sa katawhan] nga iyang gihatag ang iyang bugtong Anak, aron ang bisan kinsa nga motuo kaniya dili malaglag kondili makabaton ug kinabuhing walay kataposan.” (Juan 3:16) Ang kalalom sa gugma sa Diyos maayo kaayong pagkahayag pinaagi sa mga pulong sa salmista: “Ingon nga ang langit hataas kay sa yuta, ang iyang mahigugmaong kalulot labi pang dako ngadto kanila nga nahadlok kaniya. Ingon sa pagkahalayo sa silangan gikan sa kasadpan, sa mao nga gilay-on iyang gipahilayo kanato ang atong mga kalapasan. Ingon sa usa ka amahan nga naluoy sa iyang mga anak, sa mao nga pagkaagi naluoy si Jehova kanila nga may kahadlok kaniya. Kay siya nahibalo sa pagkagama kanato, nahinumdom nga kita mga abog lamang.” (Salmo 103:11-14) Pagkamakalilipay nga masayod nga ang mga pag-ampo sa dedikadong mga Saksi ni Jehova mosaka ngadto sa ingon niana ka mahigugmaong Amahan pinaagi sa iyang Anak!
May Kondisyon nga Pribilehiyo
6. Uban sa unsang tinamdan nga kinahanglang duolon si Jehova diha sa pag-ampo?
6 Ang tawhanong mga hari dili motugot kang bisan kinsa na lang nga mosulod sa harianong palasyo nga walay pahibalo. Ang pakigkita sa usa hari maoy usa ka pribilehiyo nga may kondisyon. Busa mao man usab ang pag-ampo ngadto sa Hari nga walay kataposan. Siyempre, sila nga moduol kaniya pinaagi kang Jesu-Kristo uban ang hustong pagpabili sa mahimayaong pagkahalangdon sa Diyos makalaom nga patalinghogan. Ang Haring Walay-Kataposan angay nga pagaduolon uban ang matinahuron, masimbahong tinamdan. Ug sila nga nagatinguha nga patalinghogan kinahanglang magpakitag “kahadlok kang Jehova.”—Proverbio 1:7.
7. Unsa ang “pagkahadlok kang Jehova”?
7 Unsa ang “kahadlok kang Jehova”? Kini maoy halawom nga pagtahod alang sa Diyos, nga inubanan sa maayong pagkahadlok nga dili makapahimuot kaniya. Kini nga kahadlok nagagikan sa halawom nga pagkamapasalamaton alang sa iyang mahigugmaong-kalulot ug kaayo. (Salmo 106:1) Kini naglakip sa pagdawat kaniya ingong Hari nga walay kataposan, kinsa adunay katungod ug gahom sa pagpahamtang sa silot, apil ang kamatayon, diha kang bisan kinsa nga mosupak kaniya. Ang mga tawong nagapasundayag ug kahadlok kang Jehova makaampo kaniya uban ang paglaom nga patalinghogan.
8. Nganong patalinghogan sa Diyos ang mga pag-ampo niadtong nahadlok kaniya?
8 Sa kinaiyanhon, ang Diyos dili motubag sa mga pag-ampo sa daotan, dili matinumanon, ug tawong nagpakamatarong sa kaugalingon. (Proverbio 15:29; Isaias 1:15; Lucas 18:9-14) Apan sila nga nahadlok kang Jehova patalinghogan tungod kay sila nagasunod sa iyang matarong nga mga sukdanan. Dugang pa, sila nagabuhat ug labaw pa. Ang mga nangahadlok kang Jehova nagapahinungod sa Diyos diha sa pag-ampo ug nagapasimbolo niini pinaagi sa pagpabawtismo sa tubig. Busa sila nakabaton ug walay-kondisyon nga pribilehiyo sa pag-ampo.
9, 10. Ang dili-bawtismadong mga tawo makaampo ba uban sa paglaom nga patalinghogan?
9 Aron patalinghogan sa Diyos, kinahanglang ipahayag sa usa ka tawo ang mainampoong mga pagbati nga nahiuyon sa balaang kabubut-on. Oo, siya kinahanglang sinsero, apan labaw pa ang gikinahanglan. “Kon walay pagtuo dili gayod mahimo ang pagpahimuot sa [Diyos] ug maayo,” misulat si apostol Pablo, “kay siya nga moduol sa Diyos kinahanglang motuo sa iyang pagkaanaa ug nga magabalos siya niadtong matinuoron nga nagapangita kaniya.” (Hebreohanon 11:6) Nan, ang dili-bawtismadong mga tawo ba mahimong dasigon sa pag-ampo uban ang paglaom nga patalinghogan?
10 Kay nahibalo nga ang pag-ampo maoy usa ka may kondisyon nga pribilehiyo, si Haring Solomon mihangyo nga pamation lamang unta ni Jehova ang mga dumuloong nga moampo diha sa templo sa Diyos sa Jerusalem. (1 Hari 8:41-43) Kasiglohan sa ulahi, ang langyaw nga Hentil nga si Cornelio “nag-ampo kanunay sa Diyos” ingong usa ka tawong debotado. Sa dihang nakabaton sa tukmang kahibalo, gipahinungod ni Cornelio ang iyang kaugalingon ngadto sa Diyos, kinsa mihatag dayon kaniya sa balaang espiritu. Pagkahuman niini, si Cornelio ug ang ubang mga Hentil gibawtismohan. (Buhat 10:1-44) Sama kang Cornelio, ang bisan kinsa karon nga nagauswag ngadto sa pagpahinungod mahimong dasigon sa pag-ampo. Apan ang usa ka tawo nga dili sinsero sa pagtuon sa mga Kasulatan, nga wala mahibalo sa kinahanglanon sa Diyos sa pag-ampo, ug wala pa magpakitag tinamdan sa pagpahimuot sa Diyos dili ikaingon nga nahadlok kang Jehova, adunay pagtuo, o tim-os nga nagapangita kaniya. Kining klaseha sa mga tawo wala sa kahimtang sa pagtanyag ug mga pag-ampo nga dawaton sa Diyos.
11. Unsay nahitabo sa uban nga miuswag na ngadto sa pagpahinungod, ug unsang mga pangutana ang kinahanglang ibangon nila sa ilang kaugalingon?
11 Ang uban nga sa usa ka panahon miuswag na ngadto sa pagpahinungod sa ulahi daw nagpanuko. Kon sila walay igong gugma alang sa Diyos diha sa ilang kasingkasing aron sa paghimog bug-os nga pagpahinungod ngadto kaniya, angay nilang pangutan-on ang ilang kaugalingon kon sila aduna ba nianang kahibulongang pribilehiyo sa pag-ampo. Tingali wala, tungod kay sila nga moduol sa Diyos kinahanglang tim-os nga nagapangita kaniya ug usab sa pagkamatarong ug kaaghop. (Sofonias 2:3) Ang matag usa nga nahadlok gayod kang Jehova maoy usa ka magtutuo nga nagahimog pagpahinungod sa Diyos ug simbolohan kini pinaagi sa bawtismo. (Buhat 8:13; 18:8) Ug ang bawtismadong mga magtutuo lamang ang adunay walay-kondisyon nga pribilehiyo sa pagduol sa Hari nga Walay Kataposan diha sa pag-ampo.
“Pag-ampo Pinaagi sa Balaang Espiritu”
12. Kanus-a ikaingon nga ang tawo “nagaampo pinaagi sa balaang espiritu”?
12 Human nga ang tawo nakapahinungod sa Diyos ug nagpasimbolo niini pinaagi sa pagpabawtismo, siya anaa sa kahimtang sa ‘pag-ampo pinaagi ang balaang espiritu.’ Mahitungod niini, si Judas nagsulat: “Apan kamo, mga hinigugma, pinaagi sa paglig-on sa inyong balaan uyamot nga pagtuo, ug sa pag-ampo pinaagi sa balaang espiritu, pabilin kamo diha sa gugma sa Diyos, samtang kamo nagapaabot sa kaluoy sa atong Ginoong Jesu-Kristo uban ang paglantaw sa kinabuhing walay kataposan.” (Judas 20, 21) Ang tawo moampo pinaagi sa balaang espiritu sa dihang nagaampo ubos sa impluwensiya sa espiritu sa Diyos, o aktibong gahom, ug nahiuyon sa mga butang nga gipahayag diha sa Iyang Pulong. Ang Kasulatan, nga gisulat ubos sa pagdasig sa espiritu ni Jehova, nagtudlo kanato kon unsaon sa pag-ampo ug unsay pangayoon diha sa pag-ampo. Pananglitan, kita masaligong makaampo nga ang Diyos mohatag kanato sa iyang balaang espiritu. (Lucas 11:13) Sa dihang kita moampo pinaagi sa balaang espiritu, ang atong mga pag-ampo mopadayag sa kahimtang sa kasingkasing nga gihigugma ni Jehova.
13. Kon kita moampo pinaagi sa balaang espiritu, unsay angay natong likayan, ug unsang tambag ni Jesus ang atong ipadapat?
13 Sa dihang kita moampo pinaagi sa balaang espiritu, ang atong mga pag-ampo dili puno sa mabulakbulakong mga pulong. Kini walay mga pormula nga ginasumaysumay. Dili, kini walay rituwal nga mga pangadyeon nga walay-kahulogan, dili tim-os nga mga pahayag sa pagdayeg. Ang mga pag-ampo nga ingon nianang matanga daghan kaayo diha sa Kakristiyanohan ug sa nahibilin sa Dakong Babilonya, ang imperyo sa bakak nga relihiyon sa kalibotan. Apan ang tinuod nga mga Kristohanon mamati sa tambag ni Jesus: “Sa dihang kamo mag-ampo ayaw kamo panig-ingon sa mga maut; kay sila mahigugma sa pag-ampo nga magatindog sa mga sinagoga ug diha sa mga likoanan sa kadalanan, aron sila makita sa mga tawo . . . Ug sa pag-ampo ayaw kamo pagsumaysumay sa mga pulong sama sa mga pagano; kay sila [sa sayop] naghunahuna nga sila patalinghogan tungod sa kadaghan sa ilang gipamulong. Busa ayaw kamo panig-ingon kanila.”—Mateo 6:5-8, Byington.
14. Unsang mailahong mga pulong ang gihimo sa uban bahin sa pag-ampo?
14 Dugang pa kang Jesus ug sa mga magsusulat sa Bibliya, ang uban naghimog mailahon nga mga pulong bahin sa pag-ampo. Pananglitan, ang Ingles nga magsusulat si John Bunyan (1628-88) nag-ingon: “Ang pag-ampo maoy tim-os, maalamon, mahigugmaong pagbubo sa kalag ngadto sa Diyos, pinaagi kang Kristo, diha sa kusog ug pagpaluyo sa Espiritu, kay kanang mga butanga mao ang gisaad sa Diyos.” Ang Puritanhong ministro nga si Thomas Brooks (1608-80) miingon: “Ang Diyos dili maglantaw sa kahanas sa imong mga pag-ampo, kon unsa ka maayong pagkapahayag kini; ni sa geometriya sa imong mga pag-ampo, kon unsa ka taas kini; ni sa aritmetika sa imong mga pag-ampo, kon unsa ka daghan kini; dili sa lohika sa imong mga pag-ampo, kon unsa ka sistematiko kini; kondili sa katim-os niini ang iyang gilantaw.” Niini nga mga komento mahimong ikadugang ang giingon ni Bunyan: “Diha sa pag-ampo mas maayo pang adunay kasingkasing nga walay mga pulong, kay sa mga pulong nga walay kasingkasing.” Apan kon kita tim-os ug nakakab-ot sa balaang mga kinahanglanon, sa unsang paagi kita makatino nga ang Hari nga walay kataposan mopatalinghog sa atong mga pag-ampo?
Dili Gayod Mobalibad
15. Sa diwa, unsay gipamulong ni Jesus diha sa Lucas 11:5-8?
15 Si Jehova nga Diyos mamati gayod sa mga pag-ampo sa iyang dedikadong mga alagad. Kini gitin-aw sa makapalipayng mga pulong ni Jesus sa dihang ang iyang mga disipulo nangayo ug kasayoran bahin sa pag-ampo. Sa lakbit siya nag-ingon: “Kinsa kaninyo ang adunay higala ug moadto kaniya sa tungang gabii ug moingon kaniya, ‘Migo, pabayloa ra kog tulo ka tinapay, kay nahiabot kanako ang usa ko ka higala nga nagapanaw ug wala gayod akoy ikadulot kaniya’? Ug siya motubag gikan sa sulod, ‘Ayaw ako pagsamoka. Ang pultahan gikatrangkahan na, ug ang mga bata ania na uban kanako sa katre; Dili na ako makabangon sa paghatag kanimog bisan unsa.’ Sultihan ko kamo, Bisan dili siya mobangon sa paghatag unta kaniyag bisan unsa tungod kay higala niya, apan tungod sa iyang pagsigeg hangyo siya mobangon na lang ug mohatag kaniyag bisan unsa nga iyang gikinahanglan.” (Lucas 11:1, 5-8) Unsa ang punto niining ilustrasyona?
16. Kon bahin sa pag-ampo, unsay gusto ni Jesus nga maoy atong buhaton?
16 Si Jesus sa pagkamatuod wala magpasabot nga si Jehova dili gustong motabang kanato. Hinunoa, gusto ni Kristo nga kita bug-os nga mosalig sa Diyos ug higugmaon siya nga igong makaampo nga walay paghunong. Busa, si Jesus nagpadayon: “Ako magaingon kaninyo, Padayon sa pagpangayo, ug kamo pagahatagan; padayon sa pagpangita, ug kamo makakaplag; padayon sa pagtuktok, ug kamo pagaablihan. Kay ang tanang magapangayo magadawat, ug ang tanang magapangita makakaplag, ug ang tanang magatuktok pagaablihan.” (Lucas 11:9, 10) Nan, tino nga kita kinahanglang magpadayon sa pag-ampo sa dihang kita pagalutoson, nagmagul-anon tungod sa pipila ka nakagamot pag-ayong personal nga kahuyangan, o bisan unsang pagsulay. Si Jehova andam kanunay sa pagtabang sa iyang matinumanong mga alagad. Siya dili gayod magaingon kanato: “Ayaw ako pagsamoka.”
17, 18. (a) Giunsa kita pagdasig ni Jesus nga mangayo alang sa balaang espiritu, ug unsay nakapadugang sa puwersa sa iyang mga pulong? (b) Giunsa pagtandi ni Jesus ang pakiglabot sa yutan-ong ginikanan uban niadtong sa Diyos?
17 Aron atong matagamtam ang usa ka suod nga relasyon sa Diyos, kita nagkinahanglan sa iyang balaang espiritu, o aktibong gahom. Busa, si Jesus nagpadayon: “Sa pagkamatuod, kinsa bang amahana diha kaninyo, nga kon ang iyang anak mangayog isda, hatagan hinoon niyag bitin inay isda? O kon siya mangayog itlog, siya hatagan niyag tanga? Busa, kon kamo, bisan sa inyong pagkadaotan, mahibalong mohatag ug maayong mga gasa ngadto sa inyong mga anak, unsa pa kaha ang Amahan nga anaa sa langit magahatag ug balaang espiritu ngadto sa mga nagapangayo kaniya!” (Lucas 11:11-13) Ang Mateo 7:9-11 naghisgot bahin sa paghatag ug usa ka bato inay tinapay. Ang puwersa sa mga pulong ni Jesus mapauswag kon atong maamgohan nga ang tinapay sa karaang kayutaan sa Bibliya maoy samag gidak-on ug porma nianang usa ka lapad, lingin nga bato. Ang ubang matang sa mga bitin kaamgid sa pipila ka matang sa isda, ug adunay usa ka gamay puting tanga nga daw kaamgid sa usa ka itlog. Apan kon pangayoan ug tinapay, isda, o itlog, unsang matanga sa amahan ang mohatag sa iyang anak ug bato, bitin, o tanga?
18 Sunod gitandi ni Jesus ang pakiglabot sa yutan-ong ginikanan uban sa mga lihok sa Diyos diha sa mga membro sa Iyang pamilya sa mga magsisimba. Kon kita, bisan pa sa labing menos daotan tungod sa napanunod nga kasal-anan, mohatag ug maayong mga gasa ngadto sa atong mga anak, unsa pa kaha nga makalaom kita sa atong langitnong Amahan nga mohatag ug mahimayaong gasa sa iyang balaang espiritu ngadto sa iyang maunongong mga alagad kinsa mapainubsanong nagapangayo niana!
19. (a) Unsay gipasabot sa mga pulong ni Jesus nga narekord sa Lucas 11:11-13 ug sa Mateo 7:9-11? (b) Kon kita gigiyahan sa balaang espiritu, sa unsang paagi lantawon nato ang atong mga pagsulay?
19 Ang mga pulong ni Jesus nagpasabot nga kita kinahanglang mangayo sa Diyos alang sa dugang sa Iyang balaang espiritu. Aron kita magiyahan niana, kita dili ‘moreklamo bahin sa atong luna sa kinabuhi’ ug lantawon ang mga pagsulay ug mga kapakyasan ingong tinuod nga makadaot kanato. (Judas 16) Tinuod, ang “tawo, nga natawo sa usa ka babaye, mubo ra ug kinabuhi ug tugob sa kasamok,” ug daghan ang nangamatay na nga wala makakita sa kataposan sa ilang mga suliran o kasakitan. (Job 14:1) Apan dili gayod nato lantawon ang atong mga pagsulay ingong mga bato, mga bitin ug mga tanga nga daw gihatag kanato sa Tigpatalinghog sa pag-ampo. Siya mao ang hingpit nga panig-ingnan sa gugma ug dili mosulay kang bisan kinsa ug daotang mga butang. Hinunoa, siya nagahatag kanato sa ‘tanang maayo ug hingpit nga gasa.’ Sa kaulahian, siya magahimo sa tanang butang nga maayo alang sa tanang nahigugma ug nahadlok kaniya. (Santiago 1:12-17; 1 Juan 4:8) Kadto nga nagalakaw diha sa kamatuoran sa daghan nang katuigan nahibalo gikan sa kasinatian nga ang pipila sa ilang labing malisod nga mga pagsulay, pinaagi sa pag-ampo ug pagtuo, nabuntog ra alang sa ilang kaayohan ug napauswag ang mga bunga sa espiritu sa Diyos diha sa ilang mga kinabuhi. (3 Juan 4) Sa pagkamatuod, unsa pang maayong paagi nga atong makat-onan ang pagsalig sa atong langitnong Amahan ug matabangan sa pagpalambo sa mga bunga sa espiritu sa gugma, kalipay, kalinaw, pailob, pagkamapuangoron, pagkamaayo, pagtuo, kaaghop, ug pagpugong sa kaugalingon?—Galacia 5:22, 23.
20. Ang mga pulong ni Jesus nga narekord sa Lucas 11:5-13 mohatag ug unsang epekto kanato?
20 Ang mga pulong ni Jesus nga narekord sa Lucas 11:5-13 naghatag kanato ug mahimayaong pasalig sa gugma ug sa malumong pag-amoma ni Jehova. Kini mopatugob sa atong mga kasingkasing uban ang halalom nga pagpasalamat ug gugma. Kini angayng mopalig-on sa atong pagtuo ug pagpauswag sa atong tinguha sa pag-adto kanunay sa tumbanan sa Haring Walay-Kataposan ug magpabilin diha sa iyang mahigugmaong presensiya. Labaw sa tanan, ang mga pulong ni Jesus nagapasalig kanato nga dili gayod kita balibaran. Ang atong langitnong Amahan malipay kaayo nga atong itugyan kaniya ang atong mga palas-anon. (Salmo 55:22; 121:1-3) Ug kon kita, ingong iyang matinumanon dedikadong mga alagad, mangayo sa iyang balaang espiritu, siya mohatag kanato sa tugob. Kini mao ang atong mahigugmaong Diyos, ug kita makabaton sa bug-os nga pagtuo nga siya mao ang Tigpatalinghog sa atong mga pag-ampo.
Nakahinumdom Ka Ba?
◻ Pinaagi kang kinsa nga kita kinahanglan moduol sa Diyos diha sa pag-ampo, ug ngano?
◻ Diha sa unsang paagi nga ang pag-ampo maoy usa ka may kondisyon nga pribilehiyo?
◻ Unsay kahulogan sa ‘pag-ampo pinaagi sa balaang espiritu’?
◻ Unsaon nimo sa pagpamatuod sa Kasulatan nga ang mga pag-ampo sa matinumanon bawtismadong mga Saksi ni Jehova ginapatalinghogan?
[Mga hulagway sa panid 14]
Sama sa tawhanong mga amahan nga mohatag ug maayong mga gasa sa ilang mga anak, si Jehova nagahatag ug balaang espiritu ngadto kanila nga nagapangayo kaniya