Magmalipayon ug Magmaorganisado
ANG pagkaorganisado motugot kanato sa pagbuhat nga maayo sa mga butang. Ang pagkaepektibo motabang kanato sa paggamit nga labing maayo sa panahon ug kahinguhaan. (Galacia 6:16; Filipos 3:16; 1 Timoteo 3:2) Apan may daghan pang butang sa kinabuhi kay sa organisasyon ug kaepektibo. Ang dinasig nga salmista nagsulat: “Malipayon ang katawhan kansang Diyos mao si Jehova!” (Salmo 144:15) Ang hagit mao ang pagkahimong malipayon ug organisado sa tanan natong gibuhat.
Organisado ug Malipayon
Si Jehova nga Diyos mao ang kinalabwang panig-ingnan sa maayong organisasyon. Ang tanan niyang linalang, gikan sa mga usag selula ngadto sa komplikadong mga linalang nga buhi, gikan sa gagmitoyng mga atomo ngadto sa hilabihan ka dagkong mga galaksiya, nagpakitag kahusay ug katukma. Ang iyang unibersohanong mga balaod motugot kanato sa pagplano sa atong mga kinabuhi nga masaligon. Kita nasayod nga ang adlaw mosubang kada buntag ug ang ting-init moabot tapos sa tingtugnaw.—Genesis 8:22; Isaias 40:26.
Apan si Jehova dili lang kay Diyos sa kahusay. Siya usab “ang malipayong Diyos.” (1 Timoteo 1:11; 1 Corinto 14:33) Ang iyang kalipay makita diha sa iyang mga kalalangan. Ang tigdulang mga miming, maanindot nga mga pagsalop sa adlaw, lamiang mga pagkaon, makadasig nga musika, makapalihok nga buluhaton, ug daghan pang ubang butang nagpakita nga maoy iyang katuyoan nga kita magkalipay sa kinabuhi. Ang iyang mga balaod dili makapikal nga mga pagdili apan mga panalipod alang sa atong kalipay.
Si Jesu-Kristo nagsundog sa iyang Amahan. Siya “ang malipayon ug usa lamang nga Gamhanan” ug naggawi sama gayod sa iyang Amahan. (1 Timoteo 6:15; Juan 5:19) Sa dihang siya nagbudlay uban sa iyang Amahan sa iyang pagpanglalang, siya labaw pa kay sa yano epektibong “batid nga magbubuhat.” Siya nalipay sa iyang gihimo. Siya “nalipay sa atubangan [ni Jehova] sa tanang panahon, nga nalipay sa iyang mabungahong kayutaan sa iyang yuta, ug ang mga butang nga [iyang] gikahimut-an mao ang mga anak sa mga tawo.”—Proverbio 8:30, 31.
Gusto natong ibanaag ang samang kalulot, kangaya, ug kahimuot sa mga tawo sa tanan nga atong himoon. Hinuon, usahay sa paningkamot nga mahimong epektibo, lagmit malimtan nato nga “ang mahusay nga paglakaw . . . pinaagi sa espiritu [sa Diyos]” naglakip sa pagpamunga sa mga bunga sa espiritu sa Diyos. (Galacia 5:22-25) Busa kita makapangutana, Sa unsang paagi kita mahimong organisado ug sa samang panahon magmalipayon sa atong kaugalingong kalihokan ug sa pagdirehir sa buluhaton sa uban?
Ayawg Kapintas sa Imong Kaugalingon
Tagda ang maayong tambag nga natala sa Proverbio 11:17. Una ang dinasig nga magsusulat nagtug-an kanato nga “ang tawong may mahigugmaong-kalulot nagatratar ug maayo sa iyang kaugalingong kalag.” Unya siya miingon sa kaatbang: “Apan ang pintas nga tawo nagasakit sa iyang kaugalingong lawas.” Ang New International Version nagpahayag niana niining paagiha: “Ang malulotong tawo nagahatag ug kaayohan sa iyang kaugalingon, apan ang pintas nga tawo nagadalag kadaotan sa iyang kaugalingon.”
Sa unsang paagi nga kita tingali sa wala tuyoa nagmapintason sa atong kaugalingon? Ang usa ka paagi mao ang pagbaton ug maayong tuyo apan bug-os nga dili organisado. Unsay mga sangpotanan? Matud sa usa ka eksperto: “Ang pagkalimot, ang dokumento nga gibutang sa sayop nga dapit, usa ka mando nga wala kaayo masabti, usa ka tawag sa telepono nga wala marekord ug tukma—kini mao ang gigming nga mga kapakyasan, ang mga ulod nga nagaut-ot sa gambalay sa pagkaepektibo ug mag-usik sa kinamaayohang mga tuyo.”—Teach Yourself Personal Efficiency.
Kini uyon sa dinasig nga magsusulat nga miingon: “Siya nga danghag sa iyang buluhaton—maoy igsoon sa usa nga malaglagon.” (Proverbio 18:9) Oo, ang dili-organisado, dili-epektibong mga tawo makapahinabog kadaot ug kalaglagan sa ilang kaugalingon ug sa uban. Tungod niini, ang uban subsob molikay kanila. Ingong sangpotanan sa ilang pagdinanghag, sila nagsakit sa ilang kaugalingon.
Buhing Iro o Patayng Leyon?
Apan kita usab mahimong pintas sa atong kaugalingon pinaagi sa pagbutang ug taas kaayong mga sukdanan. Makatumong kita, matud sa magsusulat sa ibabaw bahin sa pagkaepektibo, alang sa “usa ka sukdanan sa kahingpitan nga imposibleng makab-ot sa bug-os.” Ang sangpotanan, matud niya, mao nga “sa ulahi atong dad-on ang atong kaugalingon sa kagul-anan ug kawalay paglaom.” Ang usa nga nangitag kahingpitan mahimong organisado kaayo ug epektibo, apan dili gayod siya tinuod nga malipayon. Sa madali o madugay maguol lang siya.
Kon kita makiling nga mangitag kahingpitan, maayong atong hinumdoman nga “ang buhing iro mas maayo kay sa patayng leyon.” (Ecclesiastes 9:4) Mahimong wala nato patya sa literal ang atong kaugalingon pinaagig pagpaningkamot sa dili makab-ot nga kahingpitan, apan madaot nato sa seryoso ang atong kaugalingon pinaagig kahago. Kini, matud sa usa ka awtoridad, naglangkit sa “kahago sa pisikal, emosyonal, espirituwal, intelektuwal, ug sa personal nga relasyon sa uban.” (Job Stress and Burnout) Ang paghago sa atong kaugalingon tungod sa pag-agpas sa dili-makab-ot nga mga tumong tinuod nga pagkamapintason sa atong kaugalingon ug dili kalikayang mohikaw kanato sa kalipay.
Tratahag Maayo ang Imong Kaugalingon
Hinumdomi: “Ang tawong may mahigugmaong-kalulot nagatratar ug maayo sa iyang kaugalingong kalag.” (Proverbio 11:17) Kita nagatratar ug maayo sa atong kaugalingon sa dihang kita mohimog makab-ot ug makataronganong mga tumong, nga dili kalimtan nga ang malipayong Diyos, si Jehova, nasayod sa atong mga limitasyon. (Salmo 103:8-14) Kita mahimong magmalipayon kon kita usab moila nianang mga limitasyona ug unya “himoon ang atong maarangan,” sulod sa atong mga katakos, aron matuman ang atong mga obligasyon sa maayog paagi.—Hebreohanon 4:11; 2 Timoteo 2:15; 2 Pedro 1:10.
Siyempre, anaa kanunay ang kapeligrohan sa paghingapin sa kaatbang—ang pagtratar ug sobra ra ka maayo sa atong kaugalingon. Ayawg kalimti ang tubag ni Jesus sa sugyot ni apostol Pedro, “Magmaluluton ka sa imong kaugalingon, Ginoo,” sa dihang, sa pagkamatuod, gikinahanglan ang lig-ong desisyon. Peligroso kaayo ang panghunahuna ni Pedro nga si Jesus miingon: “Pahawa, Satanas! Usa ikaw ka babag alang kanako, kay ang imong gihunahuna, dili ang mga butang sa Diyos, kondili niadtong iya sa tawo.” (Mateo 16:22, 23) Ang pagtratar ug maayo sa atong kaugalingong kalag dili motugot kanato sa dinanghag, mapatuyangon-sa-kaugalingon nga tinamdan. Kana usab mohikaw kanato sa tanang kalipay. Ang pagkamakataronganon, dili pagkapanatiko, mao ang atong gikinahanglan.—Filipos 4:5.
Pagtratar ug Maayo sa Uban
Ang mga eskriba ug ang mga Pariseo sa adlaw ni Jesus malagmit naghunahuna nga sila maoy labing epektibo ug organisado. Ang A Dictionary of the Bible miingon mahitungod sa ilang paagi sa pagsimba: “Ang matag biblikanhong sugo gilibotan sa kutay sa ginagmayng mga lagda. Walay luna alang sa nagakausab nga mga kahimtang; ang bug-os nga pagsugot sa Kasugoan sa iyang tanang bahin maoy dili mabalhin nga gibaod sa matag Hudiyo . . . Ang legal nga mga detalye midaghan hangtod nga ang relihiyon nahimong negosyo, ug ang kinabuhi dili na maantos nga kabug-at. Ang mga tawo nahimong moral nga mga robot. Ang tingog sa tanlag natuok; ang buhing gahom sa Balaang pulong nawad-an ug gahom ug natabonan sa ilalom sa tipun-og sa walay-kataposang mga lagda.”
Dili ikatingala nga si Jesu-Kristo nagsaway kanila tungod niana. “Nagbugkos silag bug-at nga mga lulan,” matud niya, “ug gitungtong kana sa mga abaga sa mga tawo, apan sila sa ilang kaugalingon dili buot nga molihok niana pinaagig ilang tudlo.” (Mateo 23:4) Ang mahigugmaong mga ansiano naglikay sa pagpabug-at sa panon pinaagig daghang ginagmayng mga latid ug mga lagda. Sila nagtratar ug maayo sa panon sa Diyos pinaagi sa pagsunod sa malulot, makarepreskong panig-ingnan ni Kristo Jesus.—Mateo 11:28-30; Filipos 2:1-5.
Bisan pag modaghan ang organisasyonal nga mga responsabilidad, ang matinagdanong mga ansiano dili gayod makalimot sa kamatuoran nga sila nagapakiglabot sa mga tawo—mga tawo nga gihigugma sa Diyos. (1 Pedro 5:2, 3, 7; 1 Juan 4:8-10) Sila dili gayod okupado kaayo sa organisasyonal nga mga butang o mga pamaagi nga ilang makalimtan ang ilang pangunang papel ingong mga magbalantay, mga sinaligan, ug mga tigpanalipod sa panon.—Proverbio 3:3; 19:22; 21:21; Isaias 32:1, 2; Jeremias 23:3, 4.
Pananglitan, tungod sa hilabihang pagkapuliki sa eskedyul ug mga kuwenta, malagmit mawala na ang kahangawa sa mga tawo. Tagda ang usa ka drayber sa bus nga naghunahuna nga ang iyang pangunang obligasyon mao ang epektibong pagsunod sa iyang eskedyul bisag unsay mahitabo. Siya nagtinguha lang nga makaabot sa iyang destinasyon sa igong panahon nga gihatag. Ikasubo, gikan sa iyang panglantaw, ang mga pasahero nahimong babag. Sila hinay ug dili organisado ug kanunay nga moabot sa hulatanan sa bus sa dihang siya molargahay na. Inay hinumdoman nga ang katuyoan sa iyang trabaho mao ang pag-alagad sa panginahanglan sa iyang mga pasahero, gilantaw niya sila ingong babag sa pagkaepektibo ug naglikay kanila.
Pag-atiman sa Matag Indibiduwal
Ang walay-kaluoy nga pag-agpas nga mahimong epektibo subsob dili manumbaling sa panginahanglan sa mga indibiduwal. Ang mas huyang, mga dili-epektibo mahimong isipon ingong pabug-at. Sa dihang mahitabo kana, grabe ang mahimong sangpotanan. Pananglitan, sa karaang Gregong siyudad-estado sa Sparta, ang luyahon ug masakitong mga bata pasagdan nga mamatay. Sila dili mahimong kusgan, epektibong mga sundalo aron makapanalipod sa kusgan, epektibong estado. “Sa dihang mahimugso ang usa ka bata,” matud sa pilosopong si Bertrand Russell, “dad-on kana sa iyang amahan sa atubangan sa mga tigulang sa iyang pamilya aron hilingon: kon siya himsog, ibalik siya sa amahan aron padakoon; kon dili, kana ilabog sa lalom nga atabay.”—History of Western Philosophy.
Ang pagkaistrikto ug kapintas, dili kalipay, ang nagtimaan sa maong walay-kaluoy nga estado. (Itandi ang Ecclesiastes 8:9.) Walay duhaduha nga ang mga awtoridad nga Spartan mibati nga sila may maayong katarongan pinasikad sa pagkaepektibo, apan ang ilang panggawi haw-ang sa tanang pagbati o kalulot. Ang ilang paagi dili pamaagi sa Diyos. (Salmo 41:1; Proverbio 14:21) Sa kasukwahi, ang mga magtatan-aw sa Kristohanong kongregasyon nahinumdom nga ang tanang karnero sa Diyos bililhon sa iyang mga mata, ug sila nagtratar ug maayo sa matag usa kanila. Sila nagtagad dili lang sa 99 nga himsog apan usab sa usa nga huyang o nalibog sa emosyonal nga paagi.—Mateo 18:12-14; Buhat 20:28; 1 Tesalonica 5:14, 15; 1 Pedro 5:7.
Pakigsuod sa Panon
Ang mga ansiano makigsuod sa panon nga ilalom sa ilang pag-atiman. Hinuon, ang modernong pagdukiduki sa mga pamaagi sa negosyo tingali mosugyot nga aron mahimong labing epektibo ang manedyer o ang magtatan-aw kinahanglang dili kaayo makighigala sa iyang mga gidumala. Ang usa ka tigdukiduki nagbatbat sa lahing mga sangpotanan sumala sa kasinatian sa usa ka opisyal sa puwersa sa kahanginan sa dihang siya suod o dili suod sa iyang mga sakop: “Sa dihang suod kaayo ang iyang relasyon sa [iyang] mga tawo, mora silag mobating masaligon ug wala kaayo sila mabalaka sa pagkaepektibo sa ilang mga yunit. Sa dihang siya mas hilomon ug nagpatamod sa iyang superyor nga posisyon, ang iyang ubos nga mga komander nabalaka basin naa nay wala magkadimao . . . ug gidala ang ilang mga kabalaka sa dugang pagtagad sa ilang trabaho. Ingong resulta, may namatikdang pag-uswag sa pagkaepektibo sa kampo.”—Understanding Organizations.
Hinuon, ang Kristohanong kongregasyon dili usa ka organisasyong militar. Ang Kristohanong mga ansiano nga nagadirehir sa buluhaton sa uban nagsundog kang Jesu-Kristo. Siya kanunay nga suod sa iyang mga tinun-an. (Mateo 12:49, 50; Juan 13:34, 35) Siya wala gayod mogamit sa ilang mga kabalaka aron pugson ang mas pang pagkaepektibo. Siya nagtukod ug lig-ong bugkos sa pagtuo ug pagsalig sa usag usa tali kaniya ug sa iyang mga sumusunod. Ang suod nga bugkos sa mahigugmaong pagbati maoy ilhanan sa iyang mga tinun-an. (1 Tesalonica 2:7, 8) Sa dihang ang maong kasuod naglungtad, ang malipayong panon, nga gipalihok sa bug-os sa gugma sa Diyos, andam nga mosanong sa direksiyon nga wala pugsa ug mohimo sa ilang labing maarangan sa andam nga pag-alagad kaniya.—Itandi ang Exodo 35:21.
Daghang kasulatan ang nagpasiugda sa Kristohanong mga hiyas sama sa kalipay ug gugma alang sa panag-igsoon. (Mateo 5:3-12; 1 Corinto 13:1-13) Daw gamay ra ang nagapasiugdag panginahanglan nga magmaepektibo. Segurado gayod, may panginahanglan alang sa maayong organisasyon. Ang katawhan sa Diyos kanunay nga organisado. Apan hunahunaa pananglitan, kon unsa kasubsob ang mga magsusulat sa mga salmo mihubit sa mga alagad sa Diyos ingong malipayon. Ang Salmo 119, nga daghang ikasulti mahitungod sa mga balaod, pahamatngon, ug mga lagda ni Jehova, nagsugod: “Malipayon sila nga walay ikasaway sa ilang dalan, sila nga nanaglakaw sa balaod ni Jehova. Malipayon silang nagabantay sa iyang mga pahamatngon; uban sa bug-os kasingkasing sila nanagpangita kaniya.” (Salmo 119:1, 2) Imo bang maatubang ang hagit nga mahimong organisado ug malipayon?
[Hulagway sa panid 28]
“Armillary sphere”—usa ka galamiton sa unang panahon nga naghawas sa dagkong mga biyohan sa kalangitan
[Hulagway sa panid 31]
Si Jehova, ingong usa ka mahigugmaong Magbalantay, dili lang kay Diyos sa kahusay apan usab sa kalipay
[Credit Line]
Garo Nalbandian