Kapitulo 8

Nakigduyog sa “Kalipay” sa “Prinsipe sa Pakigdait”

DIHA sa sambingay ni Jesus sa mga talanton, ang tawo nga adunay walo ka salapi nga talanton wala mopanaw sa langyawng yuta aron lamang maglingawlingaw sa pagtan-aw sa lugar. Siya may seryosong katarongan sa pagpanaw sa langyawng yuta; nagtinguha siya nga makabaton ug usa ka bililhong butang. Siya mipanaw sa langyawng yuta, sumala sa gipakita sa sambingay, aron makabaton ug “kalipay,” lakip sa “daghang mga butang.” (Mateo 25:21) Busa mipanaw siya sa halayo, nga nagkinahanglag taas nga panahon, aron sa paghangyo ngadto sa usa nga makahatag kaniya nianang partikular nga kalipay.

² Sanglit ang adunahang tawo sa sambingay naglarawan man kang Jesu-Kristo, ang tawong mipanaw sa langyawng yuta alang sa hataas nga panaw naglarawan sa pag-adto ni Jesus ngadto sa usa nga Tuboran sa linaing kalipay nga anaa sa iyang hunahuna. Nan, ngadto kang kinsa siya miadto? Ang Hebreohanon 12:2 nagsulti kanato: “Kita nagatutok sa Pangulong Ahente ug Maghihingpit sa atong pagtuo, si Jesus. Tungod sa kalipay nga gibutang sa iyang atubangan iyang giantos ang kahoy sa pagsakit, sa walay pagsapayan sa pagkamakauulaw niini, milingkod siya diha sa tuo sa trono sa Diyos.” Oo, sa pagkatinuod, si Jehova nga Diyos mao ang Tuboran nianang kalipaya. Ngadto kaniya nga mipanaw si Jesus, gibilin ang iyang matinumanong mga tinun-an dinhi sa yuta nga gisaligan sa iyang “mga talanton.” Mibalik ang Agalon nga may “daghang mga butang” nga wala niya mahupti dihang iyang gipiyal ang walo ka salapi nga talanton sa iyang tulo ka ulipon. Ug ang una pang sambingay nga gihatag ni Jesus, ang sambingay sa “napulo ka mina,” nagpakita nga siya mibalik uban ang “harianong gahom.”—Lucas 19:12-15.

³ Sanglit bag-o nga naentrono, ang hari adunay katarongang malipay, ug maingon man ang iyang maunongong mga sakop. Atong mahinumdoman ang okasyon dihang ang Anak sa Diyos misakay paingon sa Jerusalem sa pagtuman sa tagna sa Zacarias 9:9. Mahitungod sa katumanan niadtong tagnaa, kini ang nasulat: “Ang katilingban sa mga tawo nanagpamuklad sa ilang mga sapot diha sa dalan, ug ang uban nanagpamutol ug mga sanga sa mga kahoy ug ilang gikatag kini diha sa dalan. Ug ang mga panon sa katawhan nga nanag-una ug nanagsunod kaniya misinggit nga nag-ingon: ‘Luwasa, kami nagaampo, Anak ni David! Bulahan ang nagaanhi sa ngalan ni Jehova! Luwasa siya, kami nagaampo, sa kahitas-an!’ Ug sa pagsulod niya sa Jerusalem, naukay ang tanan sa siyudad, nga nag-ingon: ‘Kinsa ba kini siya?’”—Mateo 21:4-10; tan-awa usab ang Lucas 19:36-38.

⁴ Nan, kon, malipayon kadtong okasyona bisan gipresentar lamang niya ang iyang kaugalingon ngadto sa mga pumoluyo sa Jerusalem ingong usa nga dinihogan sa espiritu ni Jehova alang sa pagkahari, mas labi na dihang naentrono siya ingong Hari sa kataposan sa mga Panahon sa mga Hentil sa 1914! Labing malipayong okasyon kadto alang kaniya. Sa pagkatinuod, misulod siya ngadto niana nga kalipay nga wala pa maagii sukad. Mahitungod sa paghusay, siya nakapamulong sa mga tinun-an nga iyang gihukmang “maayo ug kasaligan”: “Sa diyutay kasaligan ka diay. Sa daghan pagapiyalan ko ikaw. Dumuyog ka sa kalipay sa imong agalon.” (Mateo 25:21) Karon adunay bag-ong kalipay nga niini makabahin ang iyang gikahimut-ang “mga ulipon.” Pagkadako nga ganti!

⁵ Sa 1919 ang dinihogang mga tinun-an sa nagamandong Hari, si Jesu-Kristo, misulod sa gikahimut-ang kahimtang, ug kini gitagad uban ang dakong kalipay sa ilang bahin. Napulog-siyam ka siglo sa miagi misulat si apostol Pablo ngadto sa iyang kaubang mga magtutuo sa pagsugilon kanila sa ilang mahimayaong posisyon: “Busa kami mga sinugo nga kapuli ni Kristo.” (2 Corinto 5:20) Gisulat kana dihang usa pa lamang ka manununod si Jesus nga may palaabotong makadawat sa “gingharian sa langit.” (Mateo 25:1) Busa, siya kinahanglang molingkod sa tuong kamot sa Diyos ug maghulat didto alang sa adlaw sa inagurasyon. Apan karon, sukad sa 1919, ang gikahimut-ang nanghibilin nahimo nang “mga sinugo” nga gipadala sa Usa nga nagamando na ingong Hari. (Hebreohanon 10:12, 13) Kining kamatuorana ilabinang gihatagag pasiugda sa International Bible Students diha sa Cedar Point, Ohio, nga kombensiyon sa 1922.

⁶ Sa 1919 gipiyal diha kanila ang katumbas sa “mga talanton” sa nagamandong Hari, si Jesu-Kristo. Nakahatag kini kanilag dakong tulobagon ngadto sa ilang nagamandong Hari. Sa sinugdan, ang ilang tapos sa gubat nga mga paningkamot gitumong diha sa buluhatong “pagpangani,” sa pagtigom sa “trigo” nga matang. (Mateo 13:24-30) Sanglit, sumala si gipamulong ni Jesus, ang pagpangani mao ang “konklusyon sa sistema sa mga butang,” ang tapos sa gubat nga tuig sa 1919 mao ang gitakdang panahon sa pagsugod sa pagpangani sa samag-trigo nga “mga anak sa gingharian,” ang matinumanon ug dinihogang nanghibilin.—Mateo 13:37-39.

⁷ Malipayong panahon ang ting-ani alang sa mga mangagani, ug ang Agalon sa anihon miduyog sa kalipay niining okasyona uban kanila. (Salmo 126:6) Kining panahona sa ting-ani gipadagaya ug dako pinaagi sa nagakadaghang ebidensiya nga ang Gingharian sa Diyos pinaagi ni Jesu-Kristo natukod na sa langit sa 1914 ug nga gipasig-uli ni Jehova ang matarong nga baroganan sa iyang dedikadong katawhan sa yuta. Ingong usa ka matang, ilang gipahayag ang mga pulong sa Isaias 61:10: “Sa walay pagkapakyas ako magakalipay kang Jehova. Ang akong kalag magmasadya diha sa akong Diyos. Kay ako gibistihan niya sa mga sapot sa kaluwasan; ug gisul-oban niya ako sa kupo sa pagkamatarong.”

Nagatigom sa “Dakong Panon” sa mga Mag-aambit sa “Kalipay”

⁸ Ang dinihogang nanghibilin nga miduyog sa “kalipay” sa ilang Agalon walay kasayoran nga dihang hapit nang taposon ang pagtigom sa kataposang sakop sa mga manununod sa langitnong Gingharian adunay lain na usab nga kalipay, usa ka butang nga wala dahoma. Kini mao ang pagpanigom sa yutan-ong matang nga mabuhi sa Paraiso sa yuta ilalom sa Milenyal nga Pagmando ni Jesu-Kristo. Kinsa pa ba kondili ang katawhan gikan niining yutan-ong matang ang tukmang dapiton diha sa unang pagbutyag sa impormasyon maylabot kanila?

⁹ Busa, sa pagsanong sa pagdapit nga gipatik sa The Watch Tower,a ginatos niadtong nagtinguha nga makabaton ug relasyon kang Jehova, uban sa katawhan nga nagdala sa iyang ngalan, mitambong sa heneral nga kombensiyon sa mga Saksi ni Jehova sa Washington, D.C., sa Mayo 30 ngadto sa Hunyo 2, 1935. Nianang kombensiyona sila napukaw sa kinasuloran sa ilang mga kasingkasing sa kasayoran nga ang “dakong panon” nga nakita sa panan-awon diha sa Pinadayag 7:9-17 maoy yutan-ong matang.

¹⁰ Pagkadako sa kalipay ang gibati niadto sa Labing Hataas nga Diyos, si Jehova, dihang gihimo kadtong kombensiyona sa Washington, D.C.! Pagkadako sa kalipay ang gibati niadto sa iyang Anak ingong Maayong Magbalantay nga karon nagsugod na sa pagtigom niining “ubang mga karnero” ngadto sa “usa ka panon”!—Juan 10:16.

¹¹ Samtang ginatultolan ug ginabantayan, sa malarawanong pagkasulti, malipayon ug malinawong nagkauban ang mga sakop sa nanghibilin ug ang nagakadaghang “panon” sa “ubang mga karnero.” Ang kasingkasing sa ilang “usa ka magbalantay” natugob sa kalipay sa pagbaton ug ingon ka dakong “panon” niining hapit nang matapos nga “konklusyon sa sistema sa mga butang.”

Mga Pinadala sa “Prinsipe sa Pakigdait”

¹² Kadtong samag mga karnero nga naglangkob sa “dakong panon” karon adunay dakong bahin sa kalipay sa Agalon, si Jesu-Kristo. Tungod kini sa ilang pagbaton ug aktibong pakigbahin sa pagpasulod sa mga sakop nga gikinahanglan aron mabug-os ang “dakong panon,” nga walay gitakdang numero diha sa Pinadayag 7:9.

¹³ Ang buluhatong pagpanigom nga niini nakigbahin ang “ubang mga karnero” miuswag sa tibuok-kalibotang sukod, nga saylo na sa katakos sa nagkadiyutayng gidaghanon sa dinihogang nanghibilin. Busa, ilabinang gikinahanglan alang sa nagkadaghang gidaghanon sa “ubang mga karnero” nga makabaton ug mas dakong bahin sa pagpasulod sa dugang pang “ubang mga karnero” nga may yutan-ong paglaom. Busa ang “ubang mga karnero” nakaalagad ingong matinumanong mga pinadala sa “Prinsipe sa Pakigdait.” Ang Proverbio 25:13 midugang: “Ingon sa kabugnawon sa niyebe sa panahon sa ting-ani mao man ang usa ka matinumanong pinadala niadtong nagasugo kaniya, kay siya nakalipay sa kalag sa iyang mga agalon.”

¹⁴ Diha sa sambingay sa mga karnero ug sa mga kanding, ang simbolikong mga karnero mao ang gisultihan ni Haring Jesu-Kristo: “Umari kamo, kamo nga gipanalanginan sa akong Amahan, panunda ninyo ang gingharian nga giandam alang kaninyo sukad pa sa pagkatukod sa kalibotan.” (Mateo 25:31-46) Ilang mapanunod ang yutan-ong gingharian nga ibabaw niini ang Gingharian sa langit magmando sa panahon sa Milenyal nga paghari ni Kristo. Sukad pa sa panahon sa matinumanong Abel, nangandam na si Jehova niining ginghariana alang sa kalibotan sa gilukat nga katawhan.—Lucas 11:50, 51.

¹⁵ Ang maalamong Haring Solomon sa karaan misulat: “Diha sa panon sa katawhan anaa ang kahimayaan sa hari.” (Proverbio 14:28) Ang harianong Agalon karon, si Jesu-Kristo, nga usa ka opisyal nga mas labaw kay sa yutan-ong Haring Solomon, adunay ingon nga “kahimayaan” maylabot sa “panon sa katawhan.” Tinuod kini karon bisag wala pa magsugod ang iyang paghari sa usa ka libo ka tuig, oo, dihang magmando siya sa taliwala sa iyang yutan-ong mga kaaway, nga ibabaw kanila si Satanas nga Yawa mao ang labaw-tawhanon dili makitang hari.—Mateo 4:8, 9; Lucas 4:5, 6.

¹⁶ Karon ang “kahimayaan” nga angay alang sa hataas nga opisyal nga hari ang ranggo nakita karon diha sa nagtubong gidaghanon sa iyang “ubang mga karnero” nga nagalangkob sa “dakong panon.” Malipayong nagdungan sila sa pagsinggit: “Kaluwasan nautang namo sa atong Diyos, nga nagalingkod sa trono, ug sa Kordero.” (Pinadayag 7:9, 10) Sila nakasinati nag kaluwasan gikan sa hinukmang sistema sa mga butang, nga niini si Satanas nga Yawa mao “ang diyos.” (2 Corinto 4:4) Sila, sa masumbingayong pagkasulti, “nakalaba na sa ilang mga besti . . . sa dugo sa Kordero” ug nakapaputi na kanila aron makitang walay buling sa atubangan ni Jehova, nga Maghuhukom.—Pinadayag 7:14.

¹⁷ Apan nagapaabot sila sa gitagana sa Diyos nga kaluwasan nga ilang maeksperyensiyahan diha sa mahimayaong kadaogan ni Jehova diha sa “gubat sa dakong adlaw sa Diyos nga Makagagahom” sa Har Magedon. Ang iyang halangdong kadaogan didto mosangpot sa kabayawan sa iyang unibersal nga pagkasoberano, ug sila mahimong yutan-ong mga saksi tungod sa pagtipig kanilang luwas latas sa makalilisang nga kataposan niining daotang kalibotan. (Pinadayag 16:14; 2 Pedro 3:12) Pagkabililhong pribilehiyo! Pagkadakong kalipay sa “Prinsipe sa Pakigdait” nga duyogan unya sa mga mangaluwas sa “dakong panon” sa iyang maunongong “ubang mga karnero”!

[Mga footnote]

[Mga Pangutana nga Pagatun-an]

 1. (a) Unsay katarongan nga mipanaw ang usa ka tawo sa langyawng yuta? (b) Unsay gipasabot sa sambingay ni Jesus, bisag dili-direktang gipahayag?

 2. (a) Sa kabahin ni Jesus, unsay gilarawanan sa pagpanaw sa adunahang tawo sa langyawng yuta, ug diin siya miadto? (b) Unsay gidala pagbalik sa Agalon?

 3. Unsang matanga sa panahon kadto dihang misugod sa pagkatuman ang Zacarias 9:9 sa unang siglo K.P.?

 4. Tapos nga naentrono ingong Hari, nganong si Jesu-Kristo adunay linaing basehanan sa pagdapit sa iyang matinumanong “mga ulipon” ngadto sa malipayong okasyon?

 5. (a) Sa unsang yugto sa panahon nga si apostol Pablo maoy usa ka “sinugo” ni Kristo? (b) Apan karon ang dinihogang nanghibilin maoy mga “sinugo” ni Kristo tapos sa unsang hitabo?

 6. Ang mga paningkamot tapos sa gubat niadtong nakadawat sa “mga talanton” unang gitumong sa unsang matanga sa buluhaton?

 7. (a) Ngadto sa unsang mga kahimtang nga misulod ang mga mangagani uban sa ilang mga Agalon? (b) Ngadto sa unsang kahimtang nga gidala ni Jehova ang mga mangangani, ug unsang matagnaong pulong ang ilang gidawat?

 8. Unsang kalipay ang wala dahoma sa dinihogang nanghibilin maylabot sa ilang bahin sa kataposan sa pagpanigom sa mga manununod sa Gingharian?

 9. Kinsa ang linaing gidapit sa pagtambong sa Washington, D.C., nga kombensiyon sa 1935, ug unsang tukma sa panahong impormasyon ang gipahayag ngadto kanila?

10, 11. Alang kang kinsa sa langit nga kini napamatud-ang usa ka panahon sa linain nga kalipay?

12, 13. (a) Kinsa ang gidapit sa pakigbahin sa dinihogang nanghibilin sa kalipay sa mibalik nga Agalon, ug unsay katarongan niini? (b) Sa unsang kapasidad nga nag-alagad ang “dakong panon” sa “ubang mga karnero” sa intereses sa “Prinsipe sa Pakigdait”?

14. (a) Unsay panulondon sa simbolikong mga karnero diha sa sambingay ni Jesus sa Mateo 25:31-46? (b) Sa unsang paagi ang Gingharian giandam alang kanila “sukad pa sa pagkatukod sa kalibotan”?

15, 16. (a) Unsang “kahimayaan” sa hari, sumala sa gihisgotan ni Solomon, ang nabatonan sa Agalon karon bisan pa sa iyang pagmando sa taliwala sa iyang mga kaaway? (b) Diha sa unsang porma may “kahimayaan” ang nagamandong Hari karon? (c) Unsay gihimo niadtong nagalangkob niining “kahimayaan”?

17. (a) Unsa nga kaluwasan ang gipaabot sa “dakong panon”? (b) Unsang pribilehiyo ang ilang matagamtam sa panahon sa Milenyal nga Pagmando sa “Prinsipe sa Pakigdait”?