Gikan sa Among mga Magbabasa

Paglaom sa Alang sa Masakiton sa Utok

Nagsulat ako aron sa pagpahayag sa akong pasalamat sa inyong mga artikulo bahin sa “Paglaom Alang sa Masakiton sa Utok.” (Pebrero 8, 1987) Sa pagkakaron gitambalan ako alang sa sakit sa utok. Dugay na nako kining problema, sanglit wala mahibalo kon unsay buhaton, gipalabay lang nako kini. Dayon sa miaging Septiyembre nadaot gayod ang akong hunahuna. Miadto ako sa ospital aron masusi ug gihatagag medisina. Miuswag ug dako ang akong kahimtang. Nalipay ako nga inyong nahatag ang punto nga dili makagiyan ang mga medisina ug nga kadtong motomar ug medisina dili mahuyang. Nanghinaot ako nga ang kaulawng nalangkit sa pagdawat sa tambal mawala.

T. K., Japan

Nasyonalismo

Dili ako makasabot sa inyong pagpunay ug panaway sa nasyonalismo dihang maningkamot kamo sa paghupot ug bulag-sa-politika nga baroganan. Ang relihiyon, kasaysayan, ug ang pagbati sa nasyonalidad mao ang nagatultol nga mga prinsipyo sa kapalaran sa tawo. Daghang mga tawo nag-ingon nga si Kristo sa iyang panahon sa dinhi sa yuta maoy usa ka Hudiyohanong nasyonlistiko nga nagabatok sa Romanong pagmando.

J. M., Scotland

Mahitungod sa nasyonalismo, ang Britanikong manalaysay nga si Arnold Toynbee miingon: “Kini maoy kahimtang sa hunahuna nga niini atong gihatagag pangunang politikanhong pagkamaunongon ang usa ka bahin sa tawhanong banay . . . bisan unsa pay sangpotanan niini diha sa kinabag-ang tawhanong kaliwatan.” Ang awtor nga si Ivo Duchacek miingon: “Ang nasyonalismo nakabahin sa katawhan sa dili pagtagad sa usag usa.” Ang Sekretaryo-Heneral niadto sa HK si U Thant miingon: “Ang kadaghanang mga suliran nga atong giatubang karon maoy tungod sa, o sa resulta sa, sayop nga mga tinamdan . . . Taliwala niini mao ang pagtulon-an sa hiktin nga nasyonalismo—‘akong nasod, husto o sayop.’” Ang iladong taga Argentina nga magsusulat si Jorge Luis Borges miingon nga ang nasyonalismo “mao ang kontra-bida sa tanang kadaotan. Kini nakabahin sa katawhan, kini nakadaot sa maayong bahin sa tawhanong kinaiyahan, kini nagatultol sa dili-managsamang pag-apod-apod sa bahandi.” Mahitungod kang Jesu-Kristo, ang iyang baroganan tin-awng gipahayag diha sa Juan 18:33, 36 sa iyang tubag sa pangutana ni Pilato: “Ikaw ba ang hari sa mga Hudiyo?” Si Jesus mitubag: “Ang akong gingharian dili bahin niining kalibotana.”—ED.

Kakulangan sa Tubig

Palihog pagpadalag 200 ka kopya sa inyong gula “Are We Running Out of Water?” (Nobyembre 22, 1986) Pagkatukma sa panahon niining materyala bahin sa tubig, ug pagkahinungdanon! Salamat sa inyong Pagmata! alang niining labing delikadong kahimtang.

W. J. K., Tinipong Bansa

Simpleng Tambal sa Ulser?

Akong gigamit ang tambal nga tubig gikan sa panid 31 sa inyong Pebrero 22, 1984, nga gula. Mga bulan nang nagtomar ako ug Tagamet ug wala gayod mawala ang problema sa akong tiyan o bisan sa pagkunhod sa sakit. Miundang ako sa pag-inom sa tambal ug miinom ug puno nga 16 ka onsa nga tubig sumala sa gidaghanon nga gihisgotan sa inyong artikulo ug sa matag panahon nga sakitan ako. Inig-inom nako sa tubig, mawala dayon ang sakit sa pipila lang ka minuto. Sa mubong panahon wala na ako motomar pa ug mga pangontra sa pangaslom, ug sa pipila ka bulan giundang ko kining paagiha sa pagtambal. Halos dili ako makatuo nga makaayo ang ingon ka simpleng tambal nga walay bayad!

C. G., Tinipong Bansa

Ang artikulo nga gipunting mao ang taho bahin sa linain nga editoryal ni Dr. F. Batmanghelidj nga migula sa Hunyo 1983, gula sa “Journal of Clinical Gastroenterology.” Ang “Pagmata!” dili morekomendar ug usa ka porma sa tambal nga mas maayo kay sa uban apan nagapatik ug mga artikulo nga sama niini sa paghatag lamang ug impormasyon sa among mga magbabasa. Wala kami magdasig sa tanang mga pasyente sa ulser sa pagbulag gikan sa ilang giresitang medisina alang niining yanong tambal sa ulser, apan nalipay kami sa pag-ingon nga ang uban nakapahimulos gikan sa maong impormasyon.—ED.