Nahinumdom Ka Ba?

Nalingaw ka ba sa pagbasa sa dili pa dugayng mga isyu sa Ang Bantayanang Torre? Kon mao, makaplagan nimong makaiikag ang paghinumdom sa mosunod:

◻ Nganong kita makasalig sa pagpili ni Jehova sa mga tawo nga mogiya sa iyang katawhan?

Namili si Jehova alang sa pipila ka responsibilidad ug mga tawo nga adunay mga hiyas nga gikinahanglan sa paggiya sa iyang katawhan sa dalan nga buot niya nga maoy ilang pagalaktan sa usa ka partikular nga higayon.​—8/15, panid 14.

◻ Unsay atong makat-onan gikan sa kasinatian ni Jonas?

Sobra ra kaayo si Jonas nga naghunahuna sa iyang kaugalingon ug wala kaayo maghunahuna sa uban. Magkat-on kita gikan kang Jonas pinaagi sa pagbutang sa atong kaugalingon ug sa atong kaugalingong mga pagbati nga ikaduha.​—8/15, panid 19.

◻ Diha sa unsang paagi ikaingon nga ang “ngalan ni Jehova maoy usa ka malig-ong torre”? (Proverbio 18:10)

Ang pagdangop sa ngalan sa Diyos nagpasabot ug pagsalig kang Jehova mismo. (Salmo 20:1; 122:4) Kini nagkahulogan ug pagsuportar sa iyang pagkasoberano, pagtuboy sa iyang mga kasugoan ug mga prinsipyo, pagbaton ug pagtuo sa iyang mga saad, ug paghatag kaniyag eksklusibong debosyon. (Isaias 50:10; Hebreohanon 11:6)​—9/1, panid 10.

◻ Sa unsang paagi ang metodo ni Pablo sa pagsangyaw atubangan sa dungganong mga tawo nagtagana ug panig-ingnan alang kanato?

Sa pagpakigsulti kang Haring Agripa, si Pablo nagmaampingon, nga nagpasiugda sa mga punto nga siya ug si Agripa nagkauyon. Sa susama, kinahanglang atong ipasiugda ang positibong mga bahin sa maayong balita, nga magpasiugda sa mga paglaom nga komong gihuptan. (1 Corinto 9:22)​—9/1, panid 31.

◻ Kinsay nagpahimulos sa pailob ni Jehova?

Tungod sa pailob ni Jehova, karong adlawa minilyon pa ang gihatagan ug higayon nga maluwas latas sa “adlaw ni Jehova.” (2 Pedro 3:9-15) Ang iyang pailob nagtugot usab sa matag usa kanato sa ‘pagpadayon sa pagpanglimbasog sa atong kaugalingong kaluwasan uban ang kahadlok ug pagpangurog.’ (Filipos 2:12)​—9/15, panid 20.

◻ Unsa ka bililhon ang Septuagint nga hubad sa Bibliya?

Kining hubara dayag nga nalangkit sa pagpakaylap ug kahibalo bahin kang Jehova nga Diyos ug sa iyang Gingharian uban ni Jesu-Kristo ingong Hari. Pinaagi sa Septuagint, ang hinungdanong patukoranan napahimutang alang sa nagsultig-Grego nga mga Hudiyo ug mga Hentil sa unang siglo aron dawaton ang maayong balita sa Gingharian.​—9/15, panid 30.

◻ Unsay gitudlo kanato sa sambingay sa usikang anak mahitungod sa Diyos?

Una, nga si Jehova maoy “maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran.” (Exodo 34:6) Ikaduha, nga siya “andam sa pagpasaylo” sa dihang ang kausaban sa kasingkasing nagtaganag pasikaranan sa pagpakitag kaluoy. (Salmo 86:5)​—10/1, mga panid 12, 13.

◻ Kanus-a man matuman ang gisaad sa Isaias 65:21-​25 nga malinawong mga kahimtang?

Ingong nahiusang mga magsisimba ni Jehova diha sa sa espirituwal nga paraiso karong adlawa, ang mga dinihogan ug kadtong sa “ubang mga karnero” nakatagamtam na karon sa hinatag-sa-Diyos nga pakigdait. (Juan 10:16) Ug ang maong pakigdait moabot pa ngadto sa pisikal nga Paraiso, sa dihang ‘matuman ang kabubut-on sa Diyos sa tibuok nga yuta, maingon man sa langit.’ Nianang panahona ang mga pulong ni manalagnang Isaias bug-os nga matuman. (Mateo 6:10)​—10/15, panid 24.

◻ Nganong saulogon sa mga Kristohanon ang mga anibersaryo sa kasal apan dili ang mga adlawng natawhan?

Ang Bibliya wala magdaot sa kaminyoon. Kini maoy bug-os usa ka pribadong butang kon kaha ang mga Kristohanon mopili sa pagsaulog sa usa ka anibersaryo sa kasal, nga naghinumdom sa kangaya nianang hitaboa ug sa ilang determinasyon nga maningkamot aron molampos ingong magtiayon. Apan, ang mga pagsaulog sa adlawng natawhan nga natala sa Bibliya mao lamang kadtong sa mga pagano, ug ang maong mga pagsaulog nalangkit sa mabangis nga mga hitabo.​—10/15, panid 30, 31.

◻ Sa ilustrasyon ni Pablo nga natala sa 1 Corinto 3:12, 13, unsay gihawasan sa “kalayo,” ug sa unsa kinahanglan magmatngon ang tanang Kristohanon?

Dunay usa ka kalayo nga atubangon natong tanan sa kinabuhi​—mga pagsulay sa atong pagtuo. (Juan 15:20; Santiago 1:2, 3) Ang tanang atong tudloan sa kamatuoran pagasulayan. Kon minantinil ang atong pagtudlo, lagmit dunay makapasubong mga sangpotanan, ingon sa gipasidaan ni Pablo. (1 Corinto 3:15)​—11/1, panid 11.

◻ Sa unsang paagi si Noe ‘naglakaw uban sa matuod nga Diyos’? (Genesis 6:9)

Si Noe naglakaw uban sa Diyos sa pagkaagi nga iyang gituman kon unsay gisugo kaniya sa Diyos nga pagabuhaton. Tungod kay gideboto niya ang iyang kinabuhi sa pagtuman sa kabubut-on sa Diyos, natagamtam ni Noe ang usa ka mainit, suod nga relasyon uban sa Diyos.​—11/15, panid 10.

◻ Unsang mga kahigayonan ang gibuksan alang kanato sa atong pagkawalay-kasayoran sa eksaktong panahon nga ipahamtang sa Diyos ang panimalos diha sa daotan?

Kini naghatag kanato ug higayon sa pagpamatuod nga ato gayod nga gihigugma si Jehova ug buot maglakaw sa iyang mga dalan hangtod sa hangtod. Kini nagpakita usab nga kita maunongon sa Diyos ug may pagsalig sa iyang paagi sa pag-atiman sa mga butang. Dugang pa, nagtabang kini kanato sa pagpabiling mabinantayon ug matukawon sa espirituwal. (Mateo 24:42-44)​—11/15, panid 18.

◻ Unsay kahulogan sa pagbutang ug pagtuo “sa ngalan sa Anak sa Diyos”? (1 Juan 5:13)

Kini nagkahulogag pagsunod sa tanang sugo ni Kristo, lakip sa iyang sugo nga “maghigugmaay sa usag usa.” (Juan 15:14, 17) Ang gugma nagtinguha sa paghimog maayo alang sa uban. Kini magwagtang sa tanang rasanhon, relihiyoso, ug sosyal nga pagpihig.​—12/1, panid 7.

◻ Nganong ang mga Saksi ni Jehova ‘ginadumtan’? (Mateo 10:22)

Ang mga Saksi ni Jehova dili-makataronganong ginadumtan tungod sa mao ra gihapong mga rason nga gilutos ang unang mga Kristohanon. Una, ang mga Saksi ni Jehova molihok sumala sa ilang relihiyosong mga tinuohan sa mga paagi nga naghimo kanilang dili popular sa uban. Ikaduha, sila maoy gipuntirya sa bakak nga mga akusasyon—bug-os nga kabakakan ug tinuis nga mga pagpahayag sa ilang mga tinuohan.​—12/1, panid 14.