Kon Unsay Pagabation sa mga Kristohanon Bahin sa Kagawasan

ANG mga Kristohanon supak sa “kagawasan” nga nagasalikway sa pagbulot-an nga maayong pagkagamit. Ngano? Tungod kay sa pagkatinuod kini dili magpahigawas​—kini mag-ulipon. Ang usa ka yanong panig-ingnan tingali maghulagway niini.

Ang usa ka batan-on maglagot sa pagbulot-an sa iyang mga ginikanan, kinsa magdili kaniya sa pagtabako ug pag-inom sa alkoholikong ilimnon. Siya, nga wala magpabili nga ang ilang pagbulot-an gigamit alang sa iyang kaayohan, mangandoy sa kagawasan. Sa pagkahingkod na niya sa edad ug sa pagbiya sa panimalay, sa kataposan iyang makab-ot ang kagawasan nga kanunay niyang gitinguha. Apan katuigan sa ulahi, tapos mahimong sobra ka hinabako ug hapit nang maalkoholiko, mandoan siya sa iyang doktor nga tungod sa mga hinungdang maylabot sa panglawas kinahanglang moundang siya sa pagtabako ug pag-inom. Siya malisdan sa pagbuhat niini. Ang iyang kagawasan misangpot sa pagkagiyan, sa kaulipnan.

Kagawasan Gikan sa Absolutong Pagbulot-an

Ang pagbulot-an sa Diyos maoy absoluto ug gipasukad sa iyang pagka-Maglalalang. Kini nagahatag kaniyag katungod sa paghukom alang sa iyang mga linalang kon unsa ang hustong pamatasan, kon unsay moral ug kon unsay imoral. Ang maong mga sukdanan, nga gitukod sa kaayohan sa katawhan, tin-awng gipahayag sa Bibliya. “Ayaw kamo pagpalimbong,” kini nagaingon. “Ang mga makihilawason, ang mga tigsimbag diyosdiyos, ang mga lalaking gitipigan alang sa dili-kinaiyanhong mga katuyoan, ang mga lalaking nagahigda uban sa mga lalaki, ang mga kawatan, ang mga tawong dalo, ang mga palahubog, ang mga mapasipalahon, ang mga tikasan dili magapanunod sa gingharian sa Diyos.”​—1 Corinto 6:9, 10.

Ilabina niining maalamon-sa-kalibotan, maartihong ika-20ng siglo nga ang tawo nagasulay sa pagpahigawas sa iyang kaugalingon gikan nianang moral nga mga latid. Apan, bisan pa sa gitawag kagawasan, siya dili makapahigawas sa iyang kaugalingon gikan sa mga sangpotanan sa pagbuhat sa butang ginabatbat sa Diyos nga maoy sala. Inay mahigawas, ang maong mga tawo nangahimong mga ulipon sa ilang kaugalingong mga tinguha, mga kaulag, ug mga pagbating mainiton, sumala sa tin-awng gipakita ni Jesus sa pag-ingon: “Ang matag mamumuhat sa sala maoy ulipon sa sala.”​—Juan 8:34; tan-awa usab ang Roma 6:16.

Kagawasan Gikan sa Relatibong Pagbulot-an

Ang opisyales sa gobyerno dunay katungod sa pagpadapat sa pagbulot-an sulod sa nasod, ang mga ginikanan sulod sa panimalay, ang mga magtutudlo sulod sa sistema sa tunghaan, ug ang Kristohanong mga ansiano sulod sa kongregasyon. Hinuon, ang pagbulot-an relatibo lamang. Pananglitan, ang absolutong pagbulot-an ni Jehova, kinsa nagasugo nga basahon sa iyang mga alagad ang iyang Pulong ug makigtigom sa mga Kristohanon, palabihon kay sa relatibong pagbulot-an sa bana nga tingali magbaod nga dili buhaton sa iyang asawa ang bisan hain niining mga butanga.​—Buhat 5:29.

Apan, sa pag-ila sa relatibong pagbulot-an sa gobyerno, ang mga Kristohanon dili makaentra sa mga kalihokan sa kagawasan sa pagpukan nianang pagbulot-ana. Sila dili makatugot sa sibil nga pagkamasupilon tungod lamang kay dili sila mouyon sa polisa sa gobyerno, ni sila makadasig sa pagpugong sa mga buhis ingong paagi sa pagprotesta batok sa pila ka polisa. “Ang nagasupak sa pagbulot-an nagasupak sa kahikayan sa Diyos,” matud ni apostol Pablo, nga midugang: “Kadtong nagasupak niini magadawat ug hukom sa ilang kaugalingon.”​—Roma 13:1-4.

Apan unsa na man kon dili makataronganon ang usa ka opisyal sa gobyerno ug abusahan niya ang iyang pagbulot-an? Unsa na man kon siya maglupig sa mga indibiduwal o dili-bantog nga mga minoriya? Ang tambag sa Bibliya mao: “Kon makakita ka nga daugdaogon ang usa nga kabos ug sa mabangisong pag-agaw sa hustisya ug sa pagkamatarong sa usa ka lalawigan, ayaw kahibulong sa maong butang, kay ang usa nga labi pang hataas nagasud-ong.” (Ecclesiastes 5:8) Tingali posible ang pag-apelar ngadto sa hataas pang pagbulot-an o korte sa gobyerno. Apan bisan pag dili mabatonan ang hustisya nianang paagiha, ang mga alagad sa Diyos makasalig nga, “kon bahin ni Jehova, ang iyang mga mata nagalibotlibot sa tibuok yuta sa pagpakita sa iyang kusog alang niadtong kang kansang kasingkasing hingpit ngadto kaniya.”​—2 Cronicas 16:9.

Susama ang kahimtang sa usa ka pamilya. Kon abusahan sa mga bana o mga amahan ang ilang pagbulot-an, makatino kitang sa kadugayan tul-iron sa Diyos ang maong mga butang, nga dili motugot nga ang inhustisya maglungtad diha sa iyang matarong bag-ong sistema nga duol nang moabot. Kasamtangan, ang Kristohanong mga babaye ug mga anak nagapadayon sa pagtahod sa prinsipyo sa Kristohanong pagkaulo, bisan pag kini usahay abusahan. Ilang ginapabilhang kana wala tuyoa sa pagtamay kondili gilaraw sa pagtino nga adunay kalinaw ug panaghiusa sulod sa pamilya ug sa Kristohanong kongregasyon.​—1 Corinto 11:3.

“Kagawasan” Gikan sa Pagbulot-an Sulod sa Kongregasyon

Bahin sa pagkaulo diha sa Kristohanong kongregasyon, ang Pulong sa Diyos nagaingon: “Magmasinugtanon kamo niadtong nagapanguna sa inyong taliwala ug magpasakop kamo, kay sila nagabantay sa inyong mga kalag ingon nga sila magahatag ug husay.” (Hebreohanon 13:17) Bisan tuod kining pagbulot-an sa mga ansiano maoy relatibo, bisan pa niana kana gitugyan kanila sa Diyos pinaagi sa iyang balaang espiritu. Sa ingon kini gihatag sa labi pang laktud nga paagi kay sa relatibong pagbulot-an nga gitugyan ngadto, pananglitan, sa opisyales sa gobyerno.​—Buhat 20:28.

Gibati sa pipila nga ang mga lagda ug mga instruksiyon nga giluwatan sa makitang organisasyon sa Diyos mapig-oton kaayo, nga dili mohatag ug igong kagawasan sa tagsatagsa. Tungod niana sila mihunong sa pagpakig-uban sa mga Saksi ni Jehova; sila dili na buot magpasakop niadtong nagabantay sa ilang mga kalag. Bisan pag ang maong mga tawo lagmit nagaisip sa ilang kaugalingon nga nahigawas, ang ilang “kagawasan,” sa pagkamatuod, nag-ulipon pag-usab kanila ngadto sa bakak relihiyosong mga pagtuo ug mga tulomanon.

Ang matuod nga mga Kristohanon nagatahod sa pagbulot-an, ang absolutong pagbulot-an sa Diyos ug ang relatibong pagbulot-an sa mga tawo. Kining tukmang pag-isip sa pagbulot-an nagapugong kanila sa paggamit nga sayop sa Kristohanong kagawasan nga gihatag kanila sa kahibalo sa kamatuoran.

[Blurb sa panid 6]

Ang pagbulot-an sa Diyos absoluto ug gipasukad sa iyang pagka-Maglalalang

[Blurb sa panid 6]

Ang mga Kristohanon dili morebelde batok sa gobyerno tungod sa mga polisa nga alang niana kini manubag sa Diyos

[Blurb sa panid 7]

Ang matuod nga mga Kristohanon nagatahod sa pagbulot-an, ang absolutong pagbulot-an sa Diyos ug sa relatibong pagbulot-an sa mga tawo

[Mga Letrato sa panid 7]

Pagbayad balik ngadto sa sekular nga pagbulot-an

Pag-ila sa relatibong pagbulot-an diha sa kongregasyon

Pagpabili sa Kinalabwang Pagbulot-an, si Jehova nga Diyos