Gamita sa Tukma ang Kristohanong Kagawasan
ANG mga Kristohanon “gitawag alang sa kagawasan,” apan sila gipasidan-ang dili “gamiton kini nga kagawasan ingong tigpukaw alang sa unod.” (Galacia 5:13; 1 Pedro 2:16) Makapasubo gayod kon gamitong sayop sa Kristohanon ang Kristohanong kagawasan aron maulipon na usab! Atong palandongon ang usa ka pananglitan.
Daghang relihiyosong tawo natudloang ang pag-inom ug alkoholikong ilimnon maoy sala. Ang tukmang kahibalo sa Bibliya magpagawas kaniya gikan niining sayop nga ideya, sanglit ang ginatunglo sa Bibliya mao ang paghubog dili ang pag-inom. (Itandi ang Salmo 104:14, 15 sa 1 Corinto 6:10 ug 1 Pedro 4:3.) Busa karon ang maong nahigawas nga Kristohanon tingali mobating libre sa pagpahimulos sa panagsang pag-inom. Apan kon mosugod siya sa “paggamit niini nga kagawasan ingong tigpukaw alang sa unod,” mahimong masobrahan niya kana, nga maugmad ang pagkamasaligon sa alkohol, nga mahimo pang ulipon niana.
Busa, tapos mahigawas sa bakak nga mga pagtuo bahin sa kalingawan, sinina ug pamostura, o sosyal nga kagawian, ang Kristohanon dili mangahas sa pagbalhin ngadto sa laing pagpasobra: paggugol ug labihang panahon o salapi sa mga butang nga sa nangagi gidili apan gitugot na karon. Kini mao unyay pag-abusar sa Kristohanong kagawasan. Kini mahimong magbatog seryosong sangpotanan.
Isangyaw ang Paglaom sa Kagawasan
Sukad ilabina sa pagkatukod sa Mesiyanikong Gingharian sa Diyos sa 1914 nga ang iyang saad nga “ang kalalangan mismo pagawson gikan sa pagkaulipon sa kadunotan ug magbaton sa mahimayaong kagawasan sa mga anak sa Diyos” tuling nagpadulong sa katumanan. (Roma 8:21) Gipagawas na ni Kristo ang mga langit gikan sa impluwensiya ni Satanas. (Pinadayag 12:7-12) Sa dili madugay iyang laglagon ang Dakong Babilonya, nga nag-ulipon sa tawo pinaagi sa relihiyosong kabakakan. Unya panahon sa gubat sa Diyos sa Har–Mageddon, iyang pagawson ang katawhan gikan sa dili-hingpit tawhanong mga gobyerno pinaagi sa pagdugmok kanila nga kana sila mangahanaw. (Daniel 2:44; Pinadayag 18:21; 19:11-21) Iya ganing pagawson ang mga tawo gikan sa pangunang tigpaluyo sa pagkaulipon dihang si Satanas himoong dili makalihok, dili na makaarang sa “paglimbong sa kanasoran hangtod matapos ang usa ka libo ka tuig.”—Pinadayag 20:2, 3.
Sa pagkatapos sa iyang Usa ka Libo ka Tuig nga Pagmando, si Kristo bug-os nang makapagawas sa tawo gikan sa tanang daotang epekto nga misangpot sa unang kalihokan sa kagawasan balik sa Eden. Ang gidaugdaog nga rasanhong mga grupo mahigawas na unya gikan sa malupigon o mapihigong pagtratar. Ang kababayen-an mahigawas na unya gikan sa madaugdaogong paggahom sa lalaki. Ang mga tawong masakiton mahigawas na unya sa sakit. Ang mga tigulang mahigawas na unya gikan sa makapaluya nga mga epekto sa pagkatigulang. Ug, katingalahan sa mga katingalahan, ang mga tawong nagbalata mahigawas na unya gikan sa kaguol, tungod kay ang ilang mga minahal nga namatay mahigawas sa lubnganan!—Pinadayag 20:13–21:5; tan-awa usab ang Salmo 146:5-10.
Pinaagi sa pagsangyaw niining balaang mensahe sa kagawasan, ang mga Saksi ni Jehova karong adlawa nagagamit sa ilang kaugalingong Kristohanong kagawasan sa mapuslanong paagi. Pagkamubog panan-aw nga sila mopaluyo sa tawhanong mga kalihokan sa kagawasan, nga, sa kinamaayohan makapatungha lamag diyutay nga kahupayan ug nga, sa pagkamatuod, magalubog sa paglaom sa tinuod nga kagawasan.
Hunahunaa kini: Ikaw may higayon nga mabuhi aron makasinatig kagawasan nga labi pang dako kay sa kagawasan nga gihisgotan ni Patrick Henry. Dugang pa, ikaw may higayon sa pagtagamtam sa mga panalangin niana tapos sa Armageddon, hangtod sa kahangtoran!