Ang Nagahupot-sa-Integridad nga Nasod

Buksi ang mga ganghaan . . . aron ang matarong nga nasod nga nagahupot sa matinumanong kagawian makasulod.”​—ISAIAS 26:2.

 1. Nganong katingad-an tingali ang pahayag ni Isaias mahitungod sa usa ka “matarong nga nasod”?

KARONG adlawa, anaa ang tanang matang sa mga nasod. Ang pipila maoy mga demokrasya, ang pipila maoy mga pagmandong diniktador. Ang pipila dato, ang pipila pobre. Managsama sila sa usa ka butang: Ang tanan maoy bahin sa kalibotan nga ang diyos mao si Satanas. (2 Corinto 4:4) Tungod niini, ang mga pulong ni Isaias basin katingad-anan alang sa pipila sa dihang siya nag-ingon: “Buksi ninyo ang mga ganghaan, aron ang matarong nga nasod nga nagahupot sa matinumanong kagawian makasulod.” (Isaias 26:2) Usa ka matarong nga nasod? Oo, adunay usa ka matarong nga nasod, sanglit ang tagna nagpunting sa paglungtad niana sa atong adlaw. Sa unsang paagi mailhan kining talagsaong nasod?

 2. Unsa “ang matarong nga nasod”? Giunsa nato pagkahibalo?

² Sa hubad sa New World Translation sa Isaias 26:2, ang nasod giingong “nagahupot sa matinumanong kagawian.” Ang King James Version (panaplin) naghubad sa bersikulo, “ang matarong nga nasod nga nagahupot sa mga kamatuoran.” Kanang duha maoy haom nga mga kahubitan. Ngani, ang matarong nga nasod daling mailhan tungod kay kini ang bugtong nasod sa yuta nga nagpasakop kang Kristo ang Hari, busa dili bahin sa kalibotan ni Satanas. (Juan 17:16) Sa maong kahimtang, ang mga membro niini nailhan tungod sa ‘padayong paghupot sa ilang maayong panggawi taliwala sa mga nasod.’ Gisunod nila ang estilo-sa-kinabuhi nga naghimaya sa Diyos. (1 Pedro 2:12) Dugang pa, bisan diin sila sa kalibotan, sila maoy bahin sa “ang kongregasyon sa buhing Diyos, usa ka haligi ug tukod sa kamatuoran.” (1 Timoteo 3:15) Kay nagapaluyo sa kamatuoran, gisalikway nila ang paganong mga pilosopiya nga gitudlo sa Kakristiyanohan, ug sila naglaban sa “walay-sambog nga gatas nga iya sa pulong”​—ang Pulong sa Diyos, ang Bibliya. (1 Pedro 2:2) Dugang pa, sila madasigong nagwali sa maayong balita sa Gingharian “sa tibuok kalalangan ilalom sa langit.” (Colosas 1:23) May pagduhaduha ba nga kining nasora gisakpan sa mga nahibilin sa “Israel sa Diyos,” ang kongregasyon sa dinihogang mga Kristohanon? Wala gayod!​—Galacia 6:16.

Ang Nasod Natawo

 3. Ibatbat kon sa unsang paagi natawo “ang matarong nga nasod.”

³ Kanus-a man natawo “ang matarong nga nasod”? Ang sinugdanan niini gitagna diha sa basahon ni Isaias. Sa Isaias 66:7, 8, atong mabasa: “Sa wala pa siya [Sion] mosugod pagbati aron sa pagpanganak siya nanganak na. Sa wala pa niya masinati ang mga kasakitan sa pagpanganak, siya nanganak na sa usa ka batang lalaki. . . . Ang Sion mibati na sa mga pagbati aron sa pagpanganak ingon man nanganak sa iyang mga anak nga lalaki.” Labing talagsaon, ang Sion, ang langitnong organisasyon sa Diyos, nanganak na “sa usa ka batang lalaki” sa wala pa siya mag-antos sa mga pagbati aron sa pagpanganak. Niadtong 1914 ang Mesiyasnong Gingharian gipanganak sa mga langit. (Pinadayag 12:5) Human niadto, mas daghan ug mas daghang nasod ang nalangkit sa unang gubat sa kalibotan, ug ang dinihogang mga Kristohanon nag-antos ug grabeng kasakitan ug paglutos. Sa kataposan, sa tuig 1919, ang espirituwal nga nasod, ang “batang lalaki,” gipanganak sa yuta. Sa ingon ang Sion ‘nanganak sa iyang mga anak nga lalaki’​—ang dinihogang mga membro sa bag-ong “matarong nga nasod”​—ug kini sila naorganisar alang sa kanunay-nagauswag nga buluhatong pagpanaksi.​—Mateo 24:3, 7, 8, 14; 1 Pedro 2:9.

 4. Nganong ang matarong nga nasod sa Diyos kinahanglang makigbisog aron mahuptang padayon ang integridad?

⁴ Sukad sa sinugdanan niini, kining nasora miatubang ug grabeng mga pagsulay sa iyang integridad. Ngano? Sa dihang natawo ang langitnong Gingharian, si Satanas ug ang iyang mga demonyo gitambog sa yuta gikan sa langit. Usa ka kusog nga tingog mimantala: “Karon napahinabo na ang kaluwasan ug ang gahom ug ang gingharian sa atong Diyos ug ang awtoridad sa iyang Kristo, tungod kay ang magsusumbong sa atong mga igsoon gikatambog na, kinsa nagasumbong kanila adlaw ug gabii atubangan sa atong Diyos! Ug sila nakadaog kaniya tungod sa dugo sa Kordero ug tungod sa pulong sa ilang pagpanaksi, ug wala nila higugmaa ang ilang mga kalag bisan sa atubangan sa kamatayon.” Si Satanas nasuko pag-ayo sa maong kausaban sa mga kahimtang ‘ug nakiggubat sa mga nahibilin sa binhi [sa babaye], nga nagasunod sa mga sugo sa Diyos ug may buluhaton sa pagpanaksi bahin kang Jesus.’ Kay nag-atubang sa mga pag-atake ni Satanas, ang dinihogang mga Kristohanon mibarog nga malig-on. Hangtod niining adlawa, ang madasigong mga membro sa matarong nga nasod sa Diyos nagpadayag ug pagtuo diha sa nagalukat nga dugo ni Jesus ug nagpadayon sa paghatag kang Jehova ug tubag alang sa dakong tigtamay pinaagi sa paghupot sa integridad “bisan sa atubangan sa kamatayon.”​—Pinadayag 12:1, 5, 9-12, 17; Proverbio 27:11.

 5. Unsang maayong tinamdan sa modernong-adlawng mga Saksi ang nakatabang kanila sa paghupot sa integridad?

⁵ Niadtong 1919, sa dihang misugod ang modernong-adlaw nga pagpanaksi sa Gingharian sa Diyos, ang mga Estudyante sa Bibliya, sumala sa pagtawag niadto sa mga Saksi ni Jehova, maoy diyutay ra apan lig-on ug pagtuo. Sila nahimong patukoranang mga membro sa ‘usa ka lig-ong siyudad, nga ang kaluwasan gipahimutang ingong mga paril ug kuta.’ Ang ilang pagsalig maoy diha kang “Ja Jehova [kinsa] mao ang Bato sa mga panahong walay tino.” (Isaias 26:1, 3, 4) Sama kang Moises sa karaan, sila nagmantala: “Igapahayag ko ang ngalan ni Jehova. Ihatag ninyo ang pagkadako ngadto sa atong Diyos! Ang Bato, hingpit ang iyang buhat, kay ang tanan niyang mga dalan maoy hustisya. Usa ka Diyos nga matinumanon, nga kaniya walay inhustisya; matarong ug matul-id siya.”​—Deuteronomio 32:3, 4.

 6. Sa unsang paagi gipanalanginan ni Jehova ang iyang katawhan niining kataposang mga adlaw?

⁶ Sukad niadto, ang mga ganghaan sa kahikayan sa Gingharian sa Diyos nagpabilin nga dakong abli samtang ang mga nahibilin sa 144,000 dinihogang mga Kristohanon unang gitigom ug karon ang usa ka dakong panon sa “ubang mga karnero” nagaduyog sa pagpahayag sa mga katuyoan sa Gingharian ni Jehova. (Juan 10:16) Busa, masadyaong ikapahibalo kini: “Gidugangan mo ang nasod; Oh Jehova, gidugangan mo ang nasod; gihimaya mo ang imong kaugalingon. Gipaabot mo sa halayo ang tanang utlanan sa yuta.” (Isaias 26:15) Samtang surbihon nato ang umahan sa kalibotan karong adlawa, atong makita nga tinuod gayod kanang mga pulonga! Pinaagi sa gahom sa balaang espiritu, ang pagsaksi bahin sa umaabot nga Gingharian ni Kristo gikahatag na “hangtod sa kinalay-ang bahin sa yuta.” (Buhat 1:8) Ang gidak-on sa maong pag-uswag mahimong masukod gikan sa 1994 Tuig sa Pag-alagad nga Taho sa mga Saksi ni Jehova sa Tibuok Kalibotan, nga makita sa mga panid 12 hangtod 15.

Usa ka Bag-ong Kinatas-ang Ihap sa mga Magmamantala

 7, 8. (a) Unsa ang ebidensiya nga ang katawhan sa Diyos ‘naglugway sa mga pisi sa ilang tolda’? (b) Sa pagtan-aw sa 1994 Tuig sa Pag-alagad nga Taho, unsang mga bahin nga imong makita nga ‘nagapauswag sa ilang mga utlanan’ sa talagsaong paagi?

⁷ Tagda ang pipila ka dagkong punto niining tahoa. Ang kinatas-ang ihap sa mga magmamantala sa Gingharian diha sa kanataran nakaabot ug 4,914,094! Pagkamakaukyab ang pagtan-aw sa mapinadayonong pagkatigom sa “dakong panon . . . gikan sa tanang nasod ug mga tribo ug mga katawhan ug mga pinulongan, nga nagatindog atubangan sa trono ug atubangan sa Kordero, nga nagbiste sa maputing mga biste”! Oo, kini sila usab nagpamatuod nga mga nagahupot sa integridad. “Gilabhan nila ang ilang mga biste ug gipaputi sila sa dugo sa Kordero,” kay giisip nga matarong tungod sa pagpadayag ug pagtuo diha sa halad lukat ni Jesus.​—Pinadayag 7:9, 14.

⁸ Ilabina sukad sa 1919, ang sugo gihatag ngadto sa organisasyon ni Jehova: “Himoa nga labi pang luag ang dapit sa imong tolda. Ug ipabuklad nila ang mga panapton sa tolda sa imong dakong tabernakulo. Ayaw pagpugong. Patas-i ang mga pisi sa imong tolda, ug lig-ona ang mga lagdok sa imong tolda.” (Isaias 54:2) Ingong sanong, ang buluhatong pagsangyaw nagpadayon nga walay kunhod, bisan sa yelohang Yukon, nga kasikbit sa Alaska, diin ang agwantador nga grupo sa mga payunir miantos sa mga temperatura nga mahimong mous-os ngadto sa -45 grado ngadto -50 grado Sentigrado sulod sa daghang semana sa usa ka panahon. Sa katuigang bag-o pa ang mga panon mas kusog nga nagahugop nganha sa nagahupot-sa-integridad nga nasod ni Jehova. Ang mga ganghaan nabuksan nga dako pa aron sa pagdawat kanila nga gikan sa Asianhong kayutaan nga gawas sa Kakristiyanohan, gikan sa kanhing Komunistang mga bulwarte, gikan sa daghang Aprikanhong kayutaan, ug gikan sa Katolikong mga dominyo, sama sa Italya, Espanya, Portugal, ug Amerika del Sur. Ang nanglalin nga mga tawo nag-abli sa laing natad. Pananglitan, sa Inglaterra ang mga Saksi nagaatiman sa mga panginahanglan sa 13 ka langyawg-pinulongan nga etnikong mga pundok.

“Padayong Buhata Kini”

 9. (a) Unsay gipaila sa 1994 nga tumatambong sa Memoryal? (b) Unsa ang pipila ka nasod nga may talagsaong tag-as nga mga tumatambong sa Memoryal?

⁹ Ang laing dakong punto sa tinuig nga taho mao ang tumatambong sa Memoryal. Sa dayon na siyang mamatay, gisugdan ni Jesus ang Memoryal nga nagahandom sa iyang kamatayon ug giingnan ang iyang mga sumusunod: “Padayong buhata kini sa paghandom kanako.” (1 Corinto 11:24) Makapahinam sa 1994 ang pagtan-aw sa 12,288,917​—nga mas daghan pa kay sa dobleng gidaghanon sa aktibong mga magmamantala​—nga nagkatigom sa pagsunod nianang sugoa, ingong mga umalambit kaha o mga maniniid. Sa pila ka kayutaan ang proporsiyon sa mga tumatambong sa Memoryal ngadto sa mga magmamantala mas taas pa. Ang 4,049 ka magmamantala sa Estonia, Latvia, ug Lituania nalipay nga dihay 12,876 nga mitambong sa Memoryal, kapin sa tulo ka pilo sa gidaghanon sa mga magmamantala. Ug sa Benin, ang 16,786 nga tumatambong sa Memoryal naghawas sa halos lima ka pilo sa gidaghanon sa mga magmamantala. Usa ka kongregasyon sa mga 45 ka magmamantala may mitambong nga 831!

10. (a) Unsang responsabilidad ang gipahimutang kanato sa taas nga tumatambong sa Memoryal? (b) Batbata kon unsay mahimong mahitabo sa dihang ang usa nga mitambong sa Memoryal makadawat ug dugang tabang.

¹⁰ Ang mga Saksi ni Jehova malipay nga daghan kaayong interesadong tawo ang miduyog kanila nianang maayong okasyon. Karon buot nilang motabang kanila nga dugang mouswag sa ilang pagsabot ug gugma sa kamatuoran. Ang pipila basin mosanong nga sama kang Alla sa Rusya. Si Alla nagtuon uban sa usa ka espesyal-payunir nga igsoong babaye apan wala kaayo mouswag, mao nga gihunong ang pagtuon. Bisan pa niana, gidawat ni Alla ang usa ka imbitasyon nga motambong sa Memoryal. Ang maong tigom, nga dako kaayog kahulogan, nakapahingangha pag-ayo kaniya. Sa iyang pagpauli sa balay, siya naglabay sa iyang tanang larawan ug miampo kang Jehova alang sa panabang. Duha ka adlaw sa ulahi ang payunir nga igsoong babaye miduaw kang Alla sa pagsusi kon unsay iyang gikahimut-an sa Memoryal. Misangpot ang usa ka mabungahong panaghisgot. Nasugdan na usab ang pagtuon ni Alla. Sa wala madugay siya nagpakig-ambit na sa buluhatong pagsangyaw. Kining kasinatiana nagpakita sa bili sa mga pagduaw aron pagsusi niadtong mitambong sa Memoryal. Daghan ang lagmit mosanong nga sama kang Alla.

“Dili Talikdan ang Atong mga Panagkatigom”

11-13. (a) Unsa ang bahin sa matinumanong kagawian sa matarong nga nasod? (b) Nganong ang matuod nga mga Kristohanon kinahanglang motambong sa mga tigom?

¹¹ Ang Memoryal mao ang labing hinungdanong tigom sa kalendaryo sa mga Saksi ni Jehova, apan dili gayod kini lamang ang bugtong nga tigom. Matag semana ang mga Saksi ni Jehova nagtigom sa pagsugot sa mga pulong ni apostol Pablo: “Tagdon nato ang usag usa aron sa pagpasibot sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug labi pa gayod nga ingon samtang inyong nakita nga ang adlaw nagakaduol na.” (Hebreohanon 10:24, 25) Sila nakig-uban sa matarong nga nasod ni Jehova nga nailhan tungod sa matinumanong kagawian niini. Ang matinumanong kagawian naglakip sa matinumanong pagtambong sa mga tigom.

¹² Kini dayag nga nasabtan pag-ayo sa Pilipinas, diin ang aberids nga tumatambong sa tibuok nasod sa mga tigom sa Dominggo maoy 125 porsiento sa gidaghanon sa mga magmamantala. Kini nasabtan usab pag-ayo sa usa ka grupo sa mga Saksi ug mga tawong interesado sa Argentina. Sila nagpuyo ug mga 20 kilometros ang kalayo gikan sa Kingdom Hall. Bisan pa niana, ang magtatan-aw sa sirkito nagtaho nga gawas sa mga kaso sa pagkaadunay-sakit, walay usa kanila ang sukad mipalta sa mga tigom. Sila mobiyahe sulod sa upat ka oras pinaagi sa karomata o magkabayo, ug panahon sa tingtugnaw sila mobiyahe sa pagpauli latas sa mangitngit nga kagabhion.

¹³ Samtang nagsingabot ang kataposan niining sistemaha, mahimong mas lisod ang kinabuhi, mosamot ang mga suliran, ug basin mahimong mas lisod ang pagtambong nga regular sa mga tigom. Apan ubos nianang mga kahimtanga, labaw pa nga atong gikinahanglan ang espirituwal nga pagkaon ug mainitong pagpakig-uban nga hikaplagan lamang sa maong mga panagkatigom.

“Magmadali Niini”

14. Nganong ang mga Saksi ni Jehova mobating dinalian ang ilang ministeryo, ug unsang mga sangpotanan ang nagpasundayag niini?

¹⁴ Sa miaging tuig, ang Iglesya Katolika sa Italya nagtawag sa buluhaton sa mga Saksi ni Jehova ingong “linuog nga pagpangabig.” Apan, sa pagkatinuod, dili paglinuog ang ginabuhat sa mga Saksi. Hinunoa, ang ilang ministeryo maoy usa ka ekspresyon sa lalom nga gugma alang sa ilang mga silingan. Kini maoy ebidensiya usab sa pagkamasinugtanon ngadto sa mga pulong ni Pablo: “Iwali ang pulong, magmadalion diha niini sa paborableng panahon, sa masamokong panahon.” (2 Timoteo 4:2) Ang pagbati sa pagdali motukmod sa mga Saksi ni Jehova sa pagkahimong masiboton sa ilang ministeryo, sumala sa makita diha sa ilang paggugol sa katibuk-ang gidaghanon nga 1,096,065,354 ka oras sa 1994 diha sa pagsangyaw sa ilang mga silingan, paghimog mga balik-duaw, ug pagdumalag senemanang 4,701,357 ka pagtuon sa Bibliya. Daghan ang nakaarang sa pag-ambit sa payunir nga pag-alagad, nga nagpakitang ang espiritu sa pagpayunir maoy buhi ug aktibo. Ang aberids nga 636,202 ka payunir sa tibuok kalibotan nagpamatuod niini.

15, 16. (a) Sa unsang paagi ang mga batag tigulang nagpasundayag sa espiritu sa pagpayunir? (b) Sa pagtan-aw sa tinagsatagsa ka nasod sa 1994 Tuig sa Pag-alagad nga Taho, asa ka makakitag talagsaong mga gidaghanon sa mga payunir?

¹⁵ Apil sa maong mga payunir ang daghang tin-edyer. Ang pipila sa Tinipong Bansa karon nagaalagad ingong regular nga mga payunir panahon sa hayskul, nga ang mga klasmet mao ang ilang pangunang teritoryo. Ang maong mga batan-on nakadiskobre nga ang pagpayunir mao ang labing maayong paagi sa pagpanalipod sa ilang kaugalingon gikan sa mga droga, imoralidad, ug kapintasan nga naglungtad sa daghang tunghaan sa maong nasod. Daghan pang mga batan-on ang naghimo sa payuniring nga ilang tumong inigkatapos nila sa pagtungha. Si Irina, sa Ukraine, nag-oksilyare payunir sa tanang katuigan sa hayskul aron pag-andam sa iyang kaugalingon sa pagpayunir human sa graduwasyon. Sa nakahuman siya sa pagtungha, ang iyang pamilya mitanyag sa pagtabang sa iyang pinansiyal nga panginahanglan aron siya makahawas kanila diha sa regular payunir nga buluhaton. Sa panginabuhi, ang kahimtang dili sayon sa Ukraine. Apan si Irina nag-ingon: “Nasayod ako nga akong ginabuhat ang usa ka buluhaton nga nagkahulogan ug kinabuhi dili lamang alang kanako kondili alang usab niadtong akong gisangyawan.” Tinuod nga makapahimuot ang pagkakitag daghan kaayong batan-on karong adlawa nga nagahunahuna nga sama kang Irina. Unsa pay mas maayong paagi aron ilang ‘hinumdoman ang ilang Dakong Maglalalang sa mga adlaw sa ilang pagkabatan-ong lalaki ug pagkabatan-ong babaye’?​—Ecclesiastes 12:1.

¹⁶ Ubay-ubayng payunir ang tigulang na. Ang usa nagtaho nga panahon sa ikaduhang gubat sa kalibotan, ang iyang amahan ug igsoong lalaki nangamatay samtang sila nakigbugno diha sa gubat, ug ang iyang inahan ug igsoong babaye gipusil sa usa ka ghetto. Sa ulahi ang iyang anak lalaki namatay. Karon, samtang siya nagkatigulang ug nagkaluya ug nagaantos sa dili-maayong panglawas, si Jehova naghatag kaniya, diha sa Kristohanong kongregasyon, ug labi pang dakong pamilya kay sa usang nawala kaniya. Ug siya nagkalipay sa pagtabang sa uban ingong usa ka regular payunir.

17, 18. Sa unsang paagi ang matag usa kanato, payunir man o dili, makapakita sa espiritu sa pagpayunir?

¹⁷ Hinuon, dili ang tanan makapayunir. Si Jehova malipay nga modawat sa atong tibuok nga ikapulo, ang labing maayo nga atong ikahalad, bisan unsa man kini sa atong linaing kahimtang. (Malakias 3:10) Sa pagkatinuod, kitang tanan makaugmad sa espiritu niining masibotong mga payunir ug makahimo sa bisan unsang itugot sa atong mga kahimtang sa pagpauswag sa pagsangyaw sa maayong balita.

¹⁸ Pananglitan, sa Australia, ang Abril 16 gigahin ingong usa ka espesyal nga adlaw alang sa pagsangyaw sa kadalanan. Kadto gisuportahan pag-ayo sa managsamang mga magmamantala ug mga payunir, ingon nga nadayag sa bag-ong kinatas-ang gidaghanon sa magmamantala nga 58,780 alang nianang bulana. Dugang pa, 90,000 ka mas daghang magasin ang napanagtag kay sa samang bulan sa miaging tuig. Panahon sa espesyal nga adlaw, usa ka igsoong babaye ang nakapahimutang ug mga magasin sa usa ka lalaki, ug samtang nagsulat sa iyang ngalan ug adres aron masunod ang interes, iyang nadiskobrehan nga sila paryente diay! Misangpot nga sila manag-agaw nga wala magkakita sa usag usa sulod sa 30 anyos. Kadto gayod naghatag ug mga higayon sa malipayon kaayong mga balik-duaw!

Paghupot sa Integridad Hangtod sa Kataposan

19. Nganong hinungdanon nga ang matarong nga nasod ni Jehova maghupot sa integridad hangtod gayod sa kataposan?

¹⁹ Hinungdanon gayod nga ang tanan sa matarong nga nasod sa Diyos maghupot sa integridad samtang ang kalibotan ni Satanas nagtinga na. Sa dili na madugay, ang balaang nasod ni Jehova makabati sa panawag: “Lakaw, akong katawhan, sulod sa inyong kinasulorang mga lawak, ug tak-opi ang inyong mga ganghaan sa inyong luyo. Magtago ka sa makadiyut hangtod nga moagi ang paghukom.” Kining sad-an-sa-dugong kalibotan sa way-sipyat moatubang sa balaang paghukom. “Kay, tan-awa! Si Jehova moabot gikan sa iyang dapit sa pagpaningil sa kasaypanan sa molupyo sa nasod batok kaniya, ug ang nasod magyagyag gayod sa iyang pag-ula sa dugo ug dili na magtabon sa iyang mga pinatay.” (Isaias 26:20, 21) Hinaot ang matag usa kanato mobarog nga malig-on ingong usa ka nagahupot-integridad nga Kristohanon nga nakig-uban sa matarong nga nasod ni Jehova. Unya kita magsadya nga mahidangat sa kinabuhing walay kataposan sa yutan-on o langitnong dominyo sa Gingharian ni Kristo.

Nahinumdom Ka Ba?

◻ Kanus-a natawo “ang matarong nga nasod”?

◻ Nganong ang katawhan sa Diyos nagkinahanglag pag-agwanta niining kataposang mga adlaw?

◻ Unsay gipasundayag sa taas nga gidaghanon sa mga magmamantala ug sa mga oras nga nagugol sa ministeryo nga makita sa 1994 Tuig sa Pag-alagad nga Taho?

◻ Nganong ang pagtambong sa mga tigom hinungdanon kaayo samtang nagsingabot kining kalibotana sa iyang kataposan?

◻ Nganong ang tanang nakig-uban sa matarong nga nasod sa Diyos kinahanglang maghupot sa integridad?

[Chart sa panid 12-15]

1994 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN

(Tan-awa ang tomo)

[Hulagway sa panid 18]

Ang mga tighupot sa integridad sa matarong nga nasod ni Jehova mahidangat sa kinabuhing walay kataposan diha sa kahingpitan