Si Jehova Mahigugmaon sa Hustisya
“Ako, si Jehova, nahigugma sa hustisya.”—ISAIAS 61:8.
1, 2. (a) Unsay kahulogan sa mga pulong “hustisya” ug “inhustisya”? (b) Unsay giingon sa Bibliya bahin kang Jehova ug sa iyang hiyas sa hustisya?
ANG hustisya gibatbat ingong ‘hiyas nga dili-mapihigon ug makiangayon, paggawi uyon sa moral nga katul-id ug pagkamaayo.’ Ang inhustisya naglakip sa pagkadili-makiangayon, pagkadili-mapihigon, pagkadaotan, pagsakit sa uban sa wala lamay hinungdan.
2 Duolag 3,500 ka tuig kanhi, si Moises misulat mahitungod sa Soberano sa Uniberso, si Jehova: “Ang tanan niyang dalan hustisya. Usa ka Diyos sa pagkamatinumanon, nga kaniya walay inhustisya.” (Deuteronomio 32:4) Paglabay sa kapig pito ka siglo, ang Diyos nagpasulat kang Isaias niining inspiradong mga pulong: “Ako, si Jehova, nahigugma sa hustisya.” (Isaias 61:8) Unya sa unang siglo, si Pablo mipatugbaw: “Aduna bay inhustisya sa Diyos? Dili gayod unta kana mahitabo!” (Roma 9:14) Ug sa mao ra gihapong siglo, si Pedro mipahayag: “Tinong naila ko nga ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:34, 35) Oo, “si Jehova mahigugmaon sa hustisya.”—Salmo 37:28; Malaquias 3:6.
Naglabi ang Inhustisya
3. Sa unsang paagi misugod ang inhustisya sa yuta?
3 Pangitaon kaayo ang hustisya karong panahona. Lagmit kitang mabiktima ug mga inhustisya diha sa tanang hut-ong sa katilingban—sa atong gitrabahoan, sa eskuylahan, sa mga transaksiyon sa mga awtoridad, ug sa ubang mga paagi—bisan pa gani sa pamilya. Hinuon, dili bag-o ang maong mga inhustisya. Nahitabo ang mga inhustisya sa tawhanong pamilya sa dihang mirebelde ug nakasala ang una natong mga ginikanan, kay gisibahan sa rebelyoso nga espiritung linalang nga nahimong si Satanas nga Yawa. Ang mga prinsipyo sa hustisya gilapas ni Adan, Eva, ug ni Satanas dihang gigamit nila sa sayop nga paagi ang talagsaong kagawasan sa pagpili nga gihatag ni Jehova kanila. Ang resulta sa ilang sayop nga mga buhat mao ang hilabihang pag-antos ug kamatayon sa tanang tawo.—Genesis 3:1-6; Roma 5:12; Hebreohanon 2:14.
4. Unsa na ka dugay nga ang inhustisya nahimong bahin sa kasaysayan sa tawo?
4 Sulod sa mga 6,000 ka tuig sukad pa sa rebelyon didto sa Eden, ang inhustisya naglungtad na sa tawhanong katilingban. Madahom gayod nato kini tungod kay si Satanas mao ang diyos niining kalibotana. (2 Corinto 4:4) Siya usa ka bakakon ug ang amahan sa bakak, tigpasipala ug magsusupak kang Jehova. (Juan 8:44) Kanunay siyang nagbuhat ug grabeng mga inhustisya. Pananglitan, tungod usab sa daotang impluwensiya ni Satanas sa wala pa ang Lunop sa adlaw ni Noe, ang Diyos nagpahayag nga “ang pagkadaotan sa tawo dagaya diha sa yuta ug ang matag kiling sa mga hunahuna sa iyang kasingkasing daotan lamang sa tanang panahon.” (Genesis 6:5) Kanang kahimtanga naglungtad gihapon sa panahon ni Jesus. Siya miingon: “Igo na sa matag adlaw ang iyang kaugalingong pagkadaotan,” nga nagtumong sa makapaguol nga mga suliran niini, sama sa inhustisya. (Mateo 6:34) Busa ang Bibliya tukmang nag-ingon: “Ang tibuok kalalangan duyog nga nagpadayon sa pag-agulo ug anaa sa kasakitan hangtod karon.”—Roma 8:22.
5. Nganong naglabi man ang mga inhustisya sa atong panahon kay sukad masukad?
5 Busa, ang daotang mga hitabo nga resulta sa grabeng mga inhustisya nagkahitabo sa tibuok kasaysayan sa tawo. Labi pang daotan ang kahimtang karon kay sukad masukad. Ngano? Tungod kay sulod sa daghang dekada, kining presenteng dili-diyosnong sistema sa mga butang anaa na sa iyang “kataposang mga adlaw,” ug kini nakasinatig “mga panahong lisod sagubangon” samtang nagsingabot ang kataposan niini. Gitagna sa Bibliya nga niining yugtoa sa kasaysayan, ang mga tawo mahimong “mahigugmaon sa ilang kaugalingon, magmahigugmaon sa salapi, mapagawalon, mapahitas-on, mapasipalahon, . . . dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo.” (2 Timoteo 3:1-5) Kining daotang mga batasan moresulta sa tanang matang sa inhustisya.
6, 7. Unsang grabeng mga inhustisya ang naagoman sa katawhan karon?
6 Sa miaging usa ka gatos ka tuig, nahitabo ang mas daghang inhustisya kay sukad masukad. Usa ka hinungdan mao nga mas daghang gubat ang misilaob sa maong mga katuigan. Pananglitan, ang banabana sa pipila ka historyano mao nga sa Gubat sa Kalibotan II lamang, mikabat ug mga 50 ngadto 60 ka milyon ang namatay, nga ang kadaghanan mga sibilyan—inosente nga kalalakin-an, kababayen-an, ug kabataan. Pagkatapos sa maong gubat, milyonmilyon pa ang namatay sa nagkalainlaing gubat, nga kadaghanan mga sibilyan gihapon. Gipasamot ni Satanas ang maong mga inhustisya tungod kay siya nasuko pag-ayo, kay siya nahibalo nga hapit na ang iyang bug-os nga kapildihan sa mga kamot ni Jehova. Kini ang gitagna sa Bibliya: “Ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.”—Pinadayag 12:12.
7 Ang gasto karon sa kasundalohan kada tuig sa tibuok yuta mokabat nag duolan sa usa ka trilyong dolyares. Milyonmilyong tawo ang nag-ilaid sa kakabos, busa napahimuslan unta pag-ayo ang maong salapi kon kana gigamit pa sa mga kalihokan nga wala malangkit sa gubat. Duolag usa ka bilyong tawo ang kulag pagkaon samtang ang uban nagkinabuhi sa kabuhong. Sumala sa usa ka taho sa Hiniusang Kanasoran, mga lima ka milyong bata ang mamatay kada tuig gumikan sa epekto sa gutom. Pagkagrabeng inhustisya! Unya, tagda usab ang daghang inosenteng namatay tungod sa aborsiyon. Ang gibanabanang gidaghanon maoy gikan sa 40 ngadto sa 60 ka milyon kada tuig sa tibuok kalibotan! Pagkangilngig nga inhustisya!
8. Sa unsang paagi lamang mabatonan sa katawhan ang matuod nga hustisya?
8 Wala pay nakaplagang mga solusyon ang tawhanong mga magmamando karon alang sa bug-at nga mga suliran nga nagsakit sa katawhan ug ang kahimtang dili gayod moarang-arang pinaagi sa paningkamot sa mga tawo. Gitagna sa Pulong sa Diyos nga sa atong panahon “ang mga tawong daotan ug mga impostor mosamot pa kangil-ad, nga nagapahisalaag ug nahisalaag.” (2 Timoteo 3:13) Ang inhustisya nahimo nang dakong bahin sa kinabuhi sa adlaw-adlaw nga kini dili na malangkat sa mga tawo. Ang Diyos lamang sa hustisya ang makalangkat niini. Siya lamang ang makalaglag kang Satanas, sa mga demonyo, ug sa daotang mga tawo.—Jeremias 10:23, 24.
Makataronganon ang Paghunahuna Bahin sa Inhustisya
9, 10. Nganong si Asap naluya sa espirituwal?
9 Sa karaang panahon, bisan ang pipila ka magsusulat sa Bibliya nahibulong kon nganong ang Diyos wala mosalga sa mga kahikayan sa tawo ug magpatungha sa matuod nga hustisya ug pagkamatarong. Tagda, pananglitan ang usa ka tawo sa panahon sa Bibliya. Ang ngalang Asap makita diha sa superskripsiyon sa Salmo 73, nga mahimong nagtumong sa usa ka inilang maghohoni nga Levihanon panahon sa paghari ni David o sa mga maghohoni nga sakop sa banay nga gipangulohan ni Asap. Nagkomposo si Asap ug ang iyang mga kaliwat ug daghang honi nga gigamit sa publikong pagsimba. Bisan pa niana, may panahon nga ang nagkomposo sa maong salmo naluya sa espirituwal. Iyang nakita ang kabuhong sa materyal sa daotang mga tawo, ug iyang namatikdan nga daw nagmatagbawon sila sa ilang kinabuhi, nga walay mga kalisdanan.
10 Atong mabasa: “Nasina ako sa mga hambogiro, sa dihang nakita ko ang kalinaw sa mga tawong daotan. Kay wala silay mga kahapdos sa kamatayon; ug nagbuy-on ang ilang tiyan. Wala gani sila makaagom sa kabalaka sa may-kamatayong tawo, ug wala sila hampaka ingon sa ubang mga tawo.” (Salmo 73:2-8) Apan ngadtongadto, nakaamgo ang magsusulat sa Bibliya nga sayop diay ang maong negatibong panghunahuna. (Salmo 73:15, 16) Gisulayan sa salmista ang pag-usob sa iyang panghunahuna, apan wala siya makasabot sa bug-os kon nganong ang mga daotan morag wala siloti samtang ang mga tawo nga nakiling sa pagkamatarong kasagarang nag-antos.
11. Unsay sa ngadtongadto nasabtan ra sa salmistang si Asap?
11 Sa ngadtongadto, nasabtan ra sa salmista kon unsay sangpotanan sa mga tawong daotan ug nga tul-iron ra gayod ni Jehova ang kahimtang. (Salmo 73:17-19) Si David misulat: “Laom kang Jehova ug bantayi ang iyang dalan, ug siya magabayaw kanimo aron sa pagpanag-iya sa yuta. Sa dihang pagalaglagon ang mga daotan, ikaw makakita niana.”—Salmo 37:9, 11, 34.
12. (a) Unsay katuyoan ni Jehova bahin sa pagkadaotan ug inhustisya? (b) Unsay imong opinyon bahin nianang paagiha sa pagsulbad sa inhustisya?
12 Walay duhaduha nga katuyoan ni Jehova nga wagtangon ang pagkadaotan ug ang mga inhustisya niini gikan sa yuta sa iyang gitakdang panahon. Angay kanang hinumdoman kanunay bisan sa maunongong mga Kristohanon. Laglagon ni Jehova ang mga masupakon sa iyang kabubut-on ug gantihan ang mga nagkinabuhi uyon niini. “Ang iyang mga mata magatan-aw, ang iyang masidlakong mga mata magausisa sa mga anak sa mga tawo. Si Jehova magausisa sa matarong ug sa daotan, ug si bisan kinsa nga nahigugma sa kapintasan ginadumtan gayod sa Iyang kalag. Sa mga daotan magapaulan siya ug mga bitik, kalayo ug asupre ug sa makapagba nga hangin . . . Kay si Jehova matarong; siya nahigugma sa matarong nga mga buhat.”—Salmo 11:4-7.
Usa ka Bag-ong Kalibotan nga May Hustisya
13, 14. Nganong motunhay man ang pagkamatarong ug hustisya sa bag-ong kalibotan?
13 Iniglaglag ni Jehova niining walay-hustisya nga sistema sa mga butang nga gigamhan ni Satanas, pulihan Niya kinig usa ka mahimayaong bag-ong kalibotan. Gamhan kini sa langitnong Gingharian sa Diyos, nga gitudlo ni Jesus nga iampo sa iyang mga sumusunod. Ang pagkadaotan ug inhustisya pulihan sa pagkamatarong ug hustisya, kay bug-os nang matubag unya ang pag-ampo: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.”—Mateo 6:10.
14 Ang Bibliya nagpahayag kon unsang matanga sa pagmando ang atong madahom, nga usa ka pagmando nga gipangandoy karon sa tanang tawo nga may matarong nga kasingkasing. Unya ang Salmo 145:16 bug-os nang matuman: “Imong [Jehova nga Diyos] ginabukhad ang imong kamot ug ginatagbaw ang tinguha sa tanang buhing butang.” Dugang pa, ang Isaias 32:1 nag-ingon: “Tan-awa! Usa ka hari [si Kristo Jesus sa langit] magahari alang sa pagkamatarong; ug mahitungod sa mga prinsipe [mga hawas ni Kristo sa yuta], sila magmando ingong mga prinsipe alang sa hustisya.” Mahitungod sa Haring Jesu-Kristo, ang Isaias 9:7 nagtagna: “Sa kadagaya sa prinsipenhong pagmando ug sa pakigdait walay kataposan, ibabaw sa trono ni David ug ibabaw sa iyang gingharian aron kini matukod nga lig-on ug mapatunhay kini pinaagi sa hustisya ug pinaagi sa pagkamatarong, sukad karon ug hangtod sa panahong walay tino. Ang kasibot mismo ni Jehova sa mga panon ang mobuhat niini.” Makita ba nimo ang imong kaugalingon nga nagpuyo ilalom sa maong pagmando nga may hustisya?
15. Unsay himoon ni Jehova alang sa katawhan sa bag-ong kalibotan?
15 Sa bag-ong kalibotan sa Diyos, wala na kitay katarongan sa pagpahayag sa mga pulong sa Ecclesiastes 4:1: “Ako mibalik aron makita ko ang tanang buhat sa pagpanglupig nga ginabuhat ilalom sa adlaw, ug, tan-awa! ang mga luha niadtong mga gilupigan, apan sila walay maghuhupay; ug sa mga nanglupig kanila diha ang gahom, mao nga sila walay maghuhupay.” Tinuod, tungod sa atong dili-hingpit nga mga kaisipan, lisod gayong mahanduraw kon unsa ka kahibulongan ang maong matarong nga bag-ong kalibotan. Wala na unyay pagkadaotan; hinunoa, ang matag adlaw mahupong sa maayong mga butang. Oo, si Jehova magtul-id sa tanang sayop sa paaging wala gayod nato damha. Haom gayod nga si Jehova nga Diyos nag-inspirar kang apostol Pedro sa pagsulat: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.”—2 Pedro 3:13.
16. Sa unsang paagi natukod na ang “bag-ong mga langit,” ug sa unsang diwa giandam na karon ang “bag-ong yuta”?
16 Sa pagkatinuod, ang “bag-ong mga langit,” ang langitnong kagamhanan sa Diyos diha sa mga kamot ni Kristo, natukod na. Ang maglangkob sa “bag-ong yuta,” ang bag-ong yutan-ong katilingban sa mga tawo nga hilig sa pagkamatarong, ginatigom na niining kataposang mga adlaw. Duolan nag pito ka milyon ang ilang gidaghanon ug anaa sila sa mga 235 ka nasod ug sa mga 100,000 ka kongregasyon. Gitun-an sa maong milyonmilyong tawo ang matarong ug may-hustisya nga mga paagi ni Jehova, ug ingong resulta, sa tibuok kalibotan sila lig-ong nagkahiusa tungod sa ilang Kristohanong gugma. Ang ilang panaghiusa dayag kaayo latas sa kasaysayan sa kalibotan. Kini labaw kaayo kay nianang nasinati sa mga ginsakpan ni Satanas. Ang maong gugma ug panaghiusa maoy pasiuna sa umaabot nga kahibulongang panahon sa bag-ong kalibotan sa Diyos, nga pagamandoan diha sa pagkamatarong ug hustisya.—Isaias 2:2-4; Juan 13:34, 35; Colosas 3:14.
Mapakyas ang Pag-atake ni Satanas
17. Nganong mapakyas gayod ang kataposang pag-atake ni Satanas sa katawhan ni Jehova?
17 Hapit nang moatake si Satanas ug ang iyang mga sumusunod sa mga magsisimba ni Jehova sa paningkamot nga mapapha sila. (Ezequiel 38:14-23) Kana maoy bahin sa gitawag ni Jesus ug “dakong kasakitan nga wala pa sukad mahitabo sukad sa sinugdanan sa kalibotan hangtod karon, ni mahitabo pa pag-usab.” (Mateo 24:21) Molampos ba ang pag-atake ni Satanas? Dili. Gipasaligan kita sa Pulong sa Diyos: “Si Jehova mahigugmaon sa hustisya, ug dili niya pagabiyaan ang mga maunongon kaniya. Sila pagabantayan hangtod sa panahong walay tino, apan ang kaliwat sa mga daotan, sila pagalaglagon gayod. Ang mga matarong magapanag-iya sa yuta, ug siya magapuyo niini hangtod sa kahangtoran.”—Salmo 37:28, 29.
18. (a) Unsa unyay reaksiyon sa Diyos sa umaabot nga pag-atake ni Satanas sa Iyang katawhan? (b) Nganong mapuslanon kanimo ang pagrepaso niining gipasukad-sa-Bibliya nga impormasyon bahin sa kadaogan sa hustisya?
18 Ang pag-atake ni Satanas ug sa iyang mga sumusunod sa mga alagad ni Jehova mao na unya ang kataposang panginsulto. Si Jehova mitagna pinaagi ni Zacarias: “Siya nga nagahilabot kaninyo nagahilabot sa akong kalimutaw.” (Zacarias 2:8) Samag gitulpok ang kalimutaw ni Jehova. Dili siya maglangan sa paglihok ug iyang laglagon ang naghimo niana. Ang mga alagad ni Jehova mao ang labing mahigugmaon, nahiusa, malinawon, masundanon-sa-balaod nga katawhan sa yuta. Ang maong pag-atake kanila dili gayod makataronganon. Dili gayod kana itugot sa dakong “mahigugmaon sa hustisya.” Ang iyang paglihok sa ilang kaayohan moresulta sa dayong kalaglagan sa mga kaaway sa iyang katawhan, sa kadaogan sa hustisya, ug sa kaluwasan sa mga magsisimba sa bugtong matuod nga Diyos. Haduol na gayod ang maong makapahingangha ug kulbahinam nga mga panghitabo!—Proverbio 2:21, 22.
Unsay Imong Tubag?
• Nganong kaylap kaayo ang inhustisya?
• Sa unsang paagi sulbaron ni Jehova ang inhustisya sa yuta?
• Unsay epekto niining atong pagtuon bahin sa kadaogan sa hustisya diha kanimo?
[Hulagway sa panid 23]
Ang pagkadaotan dagsang sa wala pa ang Lunop, ug mao man usab niining “kataposang mga adlaw”
[Hulagway sa panid 24]
Sa bag-ong kalibotan sa Diyos, ang pagkadaotan pulihan sa hustisya ug pagkamatarong