Kapitulo Bayente-singko
Ang Hari ug ang Iyang mga Prinsipe
1, 2. Unsay ikasulti bahin sa teksto sa Linukot nga Basahon ni Isaias sa Patayng Dagat?
SA HINAPOS sa katuigang 1940, nakaplagan ang usa ka talagsaong hugpong sa linukot nga mga basahon sa mga langob nga didto sa duol sa Patayng Dagat, sa Palestina. Nailhan kini nga Linukot nga mga Basahon sa Patayng Dagat ug gituohang nasulat sa usa ka panahong tali sa 200 W.K.P. ug 70 K.P. Labing ilado niini mao ang linukot nga basahon ni Isaias nga sinulat sa Hebreohanon diha sa lig-on nga panit sa hayop. Halos kompleto ang maong linukot nga basahon, ug ang teksto o sinulat niini gamay kaayog kalainan sa iya sa mga manuskrito sa tekstong Masoretic nga may petsa nga mga 1,000 ka tuig sa ulahi. Busa, ang linukot nga basahon nagpadayag sa tukma nga pagpasa sa teksto sa Bibliya.
2 Usa ka himatikdang bahin sa Linukot nga Basahon ni Isaias sa Patayng Dagat mao nga ang seksiyon nga karon nailhang Isaias kapitulo 32 gimarkahan ug “X” nga gisulat sa usa ka eskriba diha sa panaplin. Wala kita mahibalo kon nganong gisulat sa eskriba ang maong marka, apan kita nahibalo gayod nga adunay linaing butang sa maong bahin sa Balaang Bibliya.
Pagmando Alang sa Pagkamatarong ug Hustisya
3. Unsang administrasyon ang gitagna diha sa mga basahon ni Isaias ug sa Pinadayag?
3 Ang Isaias kapitulo 32 nagsugod pinaagi sa usa ka kulbahinam nga tagna nga talagsaong nagakatuman sa atong adlaw: “Tan-awa! Usa ka hari magahari alang sa pagkamatarong; ug mahitungod sa mga prinsipe, sila magmando ingong mga prinsipe alang sa hustisya.” (Isaias 32:1) Oo, “Tan-awa!” Kining maong pagpahayag magpahinumdom sa susamang pagpahayag nga makita sa kataposang matagnaong basahon sa Bibliya: “Ang Usa nga naglingkod sa trono miingon: ‘Tan-awa! Ginabag-o ko ang tanang butang.’” (Pinadayag 21:5) Ang mga basahon sa Bibliya nga Isaias ug Pinadayag, nga gisulat nga may kal-ang nga mga 900 ka tuig, nagpadayag sa makapadasig nga kabatbatan bahin sa usa ka bag-ong administrasyon—“usa ka bag-ong langit,” nga gilangkoban sa Hari, si Kristo Jesus, nga naentrono sa mga langit sa 1914, ug sa 144,000 kaubang-magmamando nga “gipalit gikan sa mga tawo”—nga duyog sa “usa ka bag-ong yuta,” usa ka tibuok-yuta, nahiusa nga tawhanong katilingban.a (Pinadayag 14:1-4; 21:1-4; Isaias 65:17-25) Kining tibuok nga kahikayan naposible tungod sa halad lukat ni Kristo.
4. Unsang dugokan sa bag-ong yuta ang anaa karon?
4 Human makakita diha sa panan-awon sa kataposang pagpatik niining 144,000 kaubang-magmamando, si apostol Juan mitaho: “Nakita ko, ug, tan-awa! usa ka dakong panon sa katawhan, nga walay tawong makaihap, gikan sa tanang kanasoran ug mga tribo ug katawhan ug mga dila, nga nagbarog atubangan sa trono ug atubangan sa Kordero.” Ania ang dugokan sa bag-ong yuta—usa ka dakong panon nga karon mokabat ug minilyon, kinsa natigom sa kiliran sa diyutay, kadaghanan tigulang nang mga nahibilin sa 144,000. Kining dakong panon molabang-buhi sa kusog-nagsingabot nga dakong kasakitan ug sa Paraisong yuta kuyogan sa binanhaw nga mga matinumanon ug sa binilyon nga uban pa nga hatagag higayon sa pagpasundayag ug pagtuo. Ang tanang mohimo sa ingon panalanginan ug kinabuhing walay kataposan.—Pinadayag 7:4, 9-17.
5-7. Unsa ang papel sa gitagnang “mga prinsipe” diha sa panon sa Diyos?
5 Bisan pa niana, samtang naglungtad ang punog-pagdumot nga kalibotan karon, ang mga sakop sa dakong panon magkinahanglag panalipod. Sa dakong sukod kini gitagana sa “mga prinsipe” nga “magmando . . . alang sa hustisya.” Pagkatalagsaong kahikayan! Kining maong “mga prinsipe” dugang gibatbat diha sa makapadasig nga mga pulong sa tagna ni Isaias: “Ang matag usa mahimong sama sa usa ka tagoanang dapit gikan sa hangin ug usa ka salipdanang dapit gikan sa bagyo, sama sa mga sapa sa tubig sa usa ka mamala nga yuta, sama sa landong sa usa ka dako kaayong bato sa usa ka umaw nga yuta.”—Isaias 32:2.
6 Sa pagkakaron niining panahon sa tibuok-kalibotang kasakitan, gikinahanglan ang “mga prinsipe,” oo, mga ansiyano nga ‘magatagad . . . sa tibuok nga panon,’ nga magaatiman sa mga karnero ni Jehova ug magapadapat sa hustisya nga nahiuyon sa matarong nga mga prinsipyo ni Jehova. (Buhat 20:28) Ang maong “mga prinsipe” kinahanglang makakab-ot sa mga kuwalipikasyon nga gipadayag sa 1 Timoteo 3:2-7 ug Tito 1:6-9.
7 Sa iyang dakong tagna nga nagbatbat sa makapasakit nga “katiklopan sa sistema sa mga butang,” si Jesus miingon: “Tinoa nga dili kamo malisang.” (Mateo 24:3-8) Nganong ang mga sumusunod ni Jesus dili malisang sa makuyawng mga kahimtang sa kalibotan karon? Usa ka katarongan mao nga ang “mga prinsipe”—dinihogan man sila o “ubang mga karnero”—maunongong magapanalipod sa panon. (Juan 10:16) Maisogon nilang atimanon ang ilang mga kaigsoonang lalaki ug babaye, bisan atubangan sa makalilisang nga mga hitabo sama sa etnikong mga gubat ug sa pagpanglaglag sa usa ka rasa sa katawhan. Diha sa kabos-sa-espirituwal nga kalibotan, tinoon nila nga ang magul-anong mga kalag magmabaskogon sa makapalig-ong mga kamatuoran sa Pulong sa Diyos, ang Bibliya.
8. Sa unsang paagi ginabansay ug ginapaalagad ni Jehova ang “mga prinsipe” nga sakop sa ubang mga karnero?
8 Sulod sa miaging 50 ka tuig, ang “mga prinsipe” nadayag. Ang “mga prinsipe” uban sa ubang mga karnero ginabansay ingon nga nagakaugmad nga “pangulo” nga matang nga human sa dakong kasakitan, ang mga may-katakos sa ilang taliwala maandam aron itudlo sa pag-alagad diha sa katungdanang administratibo sa “bag-ong yuta.” (Ezequiel 44:2, 3; 2 Pedro 3:13) Pinaagi sa pagtaganag espirituwal nga giya ug pangpabaskog samtang manguna sila diha sa pag-alagad sa Gingharian, sila magpamatuod nga “sama sa landong sa usa ka dako kaayong bato,” nga nagdalag kahupayan alang sa panon diha sa natad sa pagsimba niini.b
9. Unsang mga kahimtang ang nagpakita nga gikinahanglan ang “mga prinsipe” karon?
9 Niining makuyawng kataposang mga adlaw sa daotang kalibotan ni Satanas, ang nagpahinungod nga mga Kristohanon nagkinahanglan gayod sa maong panalipod. (2 Timoteo 3:1-5, 13) Naghaguros ang kusog nga hangin sa bakak nga doktrina ug sa tinuis nga propaganda. Nagdahunog ang mga bagyo diha sa dagway nga mga gubat tali ug sulod sa mga nasod ingon man ang laktod nga mga atake batok sa matinumanong mga magsisimba ni Jehova nga Diyos. Sa usa ka kalibotang nauga tungod sa espirituwal nga hulaw, gikinahanglan kaayo sa mga Kristohanon ang agos sa tubig sa lunsay, walay-sambog nga kamatuoran aron pagtagbaw sa ilang espirituwal nga kauhaw. Ikalipay, si Jehova nagsaad nga ang iyang nagamandong Hari, pinaagi sa iyang dinihogang mga igsoon ug sa mapaluyohong “mga prinsipe” nga maoy bahin sa ubang mga karnero, motaganag pagdasig ug giya alang sa mga masulub-on ug mga naluya niining panahon sa panginahanglan. Sa ingon tinoon ni Jehova nga molungtad kon unsay matarong ug matul-id.
Paghatag ug Pagtagad Ginamit ang mga Mata, mga Igdulungog, ug mga Kasingkasing
10. Unsang mga tagana ang gihimo ni Jehova aron ang iyang katawhan “makakita” ug “makadungog” sa espirituwal nga mga butang?
10 Unsay sanong sa dakong panon ngadto sa teokratikanhong kahikayan ni Jehova? Ang tagna nagpadayon: “Ang mga mata niadtong makakita dili piyongon, ug ang mga dalunggan niadtong makadungog mamati.” (Isaias 32:3) Latas sa katuigan, si Jehova nagtagana aron matudloan ug makadangat sa pagkahamtong ang iyang minahal nga mga alagad. Ang Tunghaan sa Teokratikanhong Ministeryo ug ubang mga tigom nga nagalihok diha sa mga kongregasyon sa mga Saksi ni Jehova sa tibuok kalibotan; ang distrito, nasyonal, ug internasyonal nga mga kombensiyon; ingon man ang linaing pagbansay sa “mga prinsipe” sa pagtagad sa panon uban ang mahigugmaong pag-atiman tanan nakatabang sa pagpalig-on sa nahiusa, tibuok-yutang panag-igsoonay sa minilyon. Bisan kon diin sa yuta ang maong mga magbalantay, ang ilang mga igdulungog ikag nga mamati ug modawat sa mga kausaban sa pagsabot sa mauswagong pulong sa kamatuoran. Tungod sa mga konsensiyang binansay-sa-Bibliya, sila andam kanunay sa pagpamati ug pagsunod.—Salmo 25:10.
11. Nganong ang katawhan sa Diyos karon nagasulti nga masaligon, nga wala magnganga tungod sa kawalay-tino?
11 Unya ang tagna nagpasidaan: “Ang kasingkasing niadtong mga madalidalion kaayo magpalandong sa kahibalo, ug bisan ang dila sa mga nganga magmaabtikon sa pagsulti ug tin-aw nga mga butang.” (Isaias 32:4) Ayaw pagpadalia ang usa sa pagpahayag ug panapos nga mga pulong bahin sa kon unsay matarong ug kon unsay daotan. Ang Bibliya nag-ingon: “Nakakita ka ba ug usa ka tawo nga madalidalion sa iyang mga pulong? Mas may paglaom pa ang usa ka hungog kay kaniya.” (Proverbio 29:20; Ecclesiastes 5:2) Una pa sa 1919, bisan ang katawhan ni Jehova nabulingan sa Babilonyanhong mga ideya. Apan sugod nianang tuiga, naghatag si Jehova ug mas matin-awng pagsabot bahin sa iyang mga katuyoan. Ilang nasayran nga ang mga kamatuorang iyang gipadayag maoy, dili dinalidali, kondili maoy pinalandong pag-ayo, ug sila karon nagsulti uban ang lig-on nga pagtuo, wala magnganga tungod sa kawalay-tino.
“Ang Usa nga Walay Salabotan”
12. Kinsa ‘ang mga walay salabotan’ karon, ug sa unsang paagi sila nakulangan sa pagkamahinatagon?
12 Dayon ang tagna ni Isaias nagpahayag sa panag-atbang: “Ang usa nga walay salabotan dili na tawgon nga mahinatagon; ug kon bahin sa tawong walay prinsipyo, siya dili ikaingon nga hamili; tungod kay ang usa nga walay salabotan mosulti ug kawalay-salabotan lamang.” (Isaias 32:5, 6a) Kinsa “ang usa nga walay salabotan”? Nga daw alang sa pasiugda, si Haring David kaduha naghatag sa tubag: “Ang usa nga walay salabotan nag-ingon diha sa iyang kasingkasing: ‘Walay Jehova.’ Sila migawi sa ikadaot, sila migawi nga dulumtanan sa ilang binuhatan. Walay nagabuhat ug maayo.” (Salmo 14:1; 53:1) Siyempre, ang hugot nga mga ateyista nag-ingon nga walay Jehova. Sa pagkatinuod, mao usab ang “mga utokan” ug uban nga nagagawi nga samag walay Diyos, kay nagtuo nga sila dili manubag kang bisan kinsa. Ang kamatuoran wala nianang mga tawhana. Walay pagkamahinatagon sa ilang mga kasingkasing. Sila walay maayong balita bahin sa gugma. Kasukwahi sa tinuod nga mga Kristohanon, sila hinayan sa pagtagana alang sa mga nanginahanglan nga anaa sa kasakitan o bug-os mapakyas sa pagtagana.
13, 14. (a) Sa unsang paagi ang modernong-adlawng mga apostata nagbuhat sa kon unsay makadaot? (b) Unsay gisulayan sa mga apostata sa paghikaw gikan sa mga gigutom ug mga giuhaw, apan unsa unya ang kataposang sangpotanan?
13 Daghan sa maong mga walay salabotan nagdumot niadtong manlalaban sa kamatuoran sa Diyos. “Ang iyang kasingkasing magbuhat sa kon unsay makadaot, aron sa pagbuhat sa apostasya ug sa pagsulti batok kang Jehova sa kon unsay masukihon.” (Isaias 32:6b) Tinuod gayod kini bahin sa modernong-adlawng mga apostata! Sa ubay-ubayng mga nasod sa Uropa ug Asia, ang mga apostata nakig-anib sa ubang mga kaaway sa kamatuoran, nga nagsultig lunlon kabakakan ngadto sa mga awtoridad, nga ang tumong maoy did-an o pig-otan ang mga Saksi ni Jehova. Sila nagpadayag sa espiritu sa “daotan nga ulipon,” nga bahin kaniya si Jesus mitagna: “Kon ugaling moingon kanang daotan nga ulipon diha sa iyang kasingkasing, ‘Nalangan ang akong agalon,’ ug mosugod pagbun-og sa iyang mga isigkaulipon ug mokaon ug moinom uban sa mga nailhang palahubog, ang agalon nianang ulipona moabot sa adlaw nga wala niya dahoma ug sa takna nga wala siya mahibalo, ug magasilot kaniya sa labihang kagrabe ug pahatan siya sa iyang bahin uban sa mga salingkapaw. Didto unya ang iyang pagdanguyngoy ug ang pagkagot sa iyang mga ngipon.”—Mateo 24:48-51.
14 Kasamtangan, ang apostata nagpahinabo “nga mahaw-ang ang kalag sa usa nga gigutom, ug bisan ang usa nga giuhaw iyang ipahinabong dili makainom.” (Isaias 32:6c) Ang mga kaaway sa kamatuoran mosulay paghikaw sa mga tawong gigutom sa kamatuoran sa espirituwal nga pagkaon, ug sila mosulay pagpugong sa mga giuhaw sa pag-inom sa makapabaskog nga tubig sa mensahe sa Gingharian. Apan ang kataposang sangpotanan mao unya ang gipahayag ni Jehova ngadto sa iyang katawhan pinaagi sa lain pa niyang manalagna: “Sila makig-away gayod batok kanimo, apan sila dili makadaog batok kanimo, kay ‘Ako magauban kanimo,’ mao ang giingon ni Jehova, ‘aron sa pagluwas kanimo.’”—Jeremias 1:19; Isaias 54:17.
15. Kinsa karon ilabina ang “tawong walay prinsipyo,” ug unsang “bakak nga mga sulti” ang ilang gipasiugda, ug unsay sangpotanan?
15 Sukad sa tungatungang katuigan sa ika-20ng siglo, ang imoralidad sa dayag dili na mabangbang diha sa kayutaan sa Kakristiyanohan. Ngano? Gitagna ang usa ka hinungdan: “Kon bahin sa tawong walay prinsipyo, ang iyang mga galamiton maoy daotan; siya naghatag ug tambag alang sa mga buhat sa malaw-ayng panggawi, aron sa pagdaot sa mga sinakit pinaagig bakak nga mga sulti, bisan pa sa dihang ang usa ka kabos mosulti sa matarong.” (Isaias 32:7) Ingon nga katumanan niining mga pulonga, daghan sa klero ang nagsagop ilabina sa matinugotong tinamdan bahin sa una-kaminyoong pakigsekso, pag-ipon-ipon sa mga dili minyo, homoseksuwalidad—sa pagkatinuod, ‘pakighilawas ug tanang matang sa kahugawan.’ (Efeso 5:3) Busa, sila ‘nagdaot’ sa ilang mga panon pinaagi sa ilang bakak nga mga pulong.
16. Unsay makapalipay sa tinuod nga mga Kristohanon?
16 Sa kasukwahi, pagkamakapabaskog ang katumanan sa sunod nga mga pulong sa manalagna! “Kon bahin sa mahinatagon, maoy alang sa dagayang mga butang nga siya naghatag ug tambag; ug dapig sa dagayang mga butang siya motindog.” (Isaias 32:8) Si Jesus mismo nagdasig sa pagkamahinatagon sa miingon siya: ‘Panghatag kamo, ug ang mga tawo manghatag kaninyo. Ilang igabubo sa inyong mga sabakan ang hustong takos, dinasok, tinantan ug nagaawas. Kay sa takos nga inyong ginatakos, sila mobalos sa pagtakos nganha kaninyo.’ (Lucas 6:38) Si apostol Pablo mipunting usab sa mga panalangin nga moabot sa mga mahinatagon sa miingon siya: ‘Ibutang sa hunahuna ang mga pulong sa Ginoong Jesus, sa dihang siya mismo miingon, “Adunay labaw nga kalipay sa paghatag kay sa pagdawat.’’’ (Buhat 20:35) Ang tinuod nga mga Kristohanon malipay, dili tungod sa pagkabaton ug materyal nga bahandi o pagkainila sa katilingban, kondili tungod sa pagkamahinatagon—sa samang paagi nga ang ilang Diyos, si Jehova, maoy mahinatagon. (Mateo 5:44, 45) Ang ilang labing dakong kalipay anaa sa pagbuhat sa kabubut-on sa Diyos, sa mahinatagong pagbudlay sa ilang kaugalingon aron ipahibalo sa uban ‘ang mahimayaong maayong balita sa malipayon nga Diyos.’—1 Timoteo 1:11.
17. Kinsa karon ang sama sa “walay-kabalaka nga mga anak nga babaye” nga gitumong ni Isaias?
17 Ang tagna ni Isaias nagpadayon: “Kamong mga babaye nga anaa sa kahayahay, tindog, pamati sa akong tingog! Kamong walay-kabalaka nga mga anak nga babaye, paminaw sa akong pulong! Sulod sa usa ka tuig ug pipila ka adlaw kamong mga walay-kabalaka samokon, tungod kay ang pagpamupo sa ubas matapos apan walay pagpamupo sa bunga nga moabot. Pangurog, kamong mga babaye nga anaa sa kahayahay! Mangasamok kamo, kamong mga walay-kabalaka!” (Isaias 32:9-11a) Ang tinamdan sa maong mga babaye mahimong magpahinumdom kanato bahin niadtong nangangkon karon nga nag-alagad sa Diyos apan dili masiboton sa pag-alagad kaniya. Kana sila anaa sa mga relihiyon sa “Dakong Babilonya, ang inahan sa mga bigaon.” (Pinadayag 17:5) Pananglitan, ang mga membro sa mga relihiyon sa Kakristiyanohan maoy sumala gayod sa pagbatbat ni Isaias sa maong “mga babaye.” Sila “anaa sa kahayahay,” nga walay-kabalaka bahin sa paghukom ug kasamok nga molimin kanila sa dili madugay.
18. Kinsay gisugo nga ‘magbakos ug sakong panapton sa mga balat-ang,’ ug ngano?
18 Nan, ang awhag gipahayag ngadto sa bakak nga relihiyon: “Paghukas kamo ug himoa ang inyong kaugalingon nga hubo, ug pagbakos ug sakong panapton sa mga balat-ang. Tampoka ang inyong dughan sa pagminatay tungod sa tilinguhaong mga uma, tungod sa nagapamungang paras. Sa yuta sa akong katawhan mga sampinit lamang, mga tunokong kahoykahoy ang manungha, kay sila anaa sa tanang balay sa kasadya, oo, ang hilabihan ka masadyaong lungsod.” (Isaias 32:11b-13) Ang pamulong nga “paghukas kamo ug himoa ang inyong kaugalingon nga hubo” daw wala magpasabot sa bug-os nga paghukas. Ang karaang batasan mao ang pagsul-ob ug panggawas nga besti ibabaw sa pang-ilalom nga besti. Ang panggawas nga besti subsob maoy usa ka ilhanan. (2 Hari 10:22, 23; Pinadayag 7:13, 14) Sa ingon ang tagna nagsugo sa mga membro sa bakak nga mga relihiyon nga hukason ang ilang panggawas nga besti—ang ilang nagpakaaron-ingnong ilhanan ingong mga alagad sa Diyos—ug ipuli pagsul-ob ang besti nga sakong-panapton, mga simbolo sa pagbangotan tungod sa ilang umaabot nga paghukom. (Pinadayag 17:16) Walay diyosnong pagkamabungahon ang makita taliwala sa relihiyosong mga organisasyon sa Kakristiyanohan, nga nangangkon nga “hilabihan ka masadyaong lungsod,” o taliwala sa uban pang mga membro sa tibuok-kalibotang imperyo sa bakak nga relihiyon. Ang ilang natad sa kalihokan nagpatunghag “mga sampinit lamang, mga tunokong kahoykahoy” sa pagpasagad ug pag-abandonar.
19. Unsang kahimtang sa apostatang “Jerusalem” ang giyagyag ni Isaias?
19 Kining makapasubong hulagway molukop sa tanang bahin sa apostatang “Jerusalem”: “Ang puloy-anang torre gitalikdan, ang kaguliyang sa siyudad gibiyaan; ang Opel ug ang bantayanang torre nahimong upaw nga kapatagan, sulod sa panahong walay tino ang kasadya sa mga sebra, ang sibsibanan sa mga panon sa kahayopan.” (Isaias 32:14) Oo, bisan ang Opel giapil. Ang Opel maoy habog nga bahin sa Jerusalem nga nagtaganag lig-ong pangdepensang posisyon. Ang pag-ingon nga ang Opel nahimong upaw nga kapatagan nagpadayag sa bug-os nga pagkalaglag alang sa siyudad. Ang mga pulong ni Isaias nagpakitang ang apostatang “Jerusalem”—ang Kakristiyanohan—wala magtukaw sa pagbuhat sa kabubut-on sa Diyos. Kini maoy umaw sa espirituwal, nga halayo sa kamatuoran ug hustisya—hilabihan ka mananapon.
Usa ka Mahimayaong Katugbang!
20. Unsa ang epekto sa pagbubo sa espiritu sa Diyos diha sa iyang katawhan?
20 Unya gipahayag ni Isaias ang makapadasig nga paglaom alang niadtong nagabuhat sa kabubut-on ni Jehova. Ang bisan unsang paglaglag sa kaugalingong katawhan sa Diyos molungtad lamang “hangtod nga nganhi kanato ang espiritu ibubo gikan sa itaas, ug ang kamingawan mahimong prutasan, ug ang prutasan isipon nga usa ka tinuod nga lasang.” (Isaias 32:15) Ikalipay, sukad sa 1919, ang espiritu ni Jehova gibubo nga madagayaon diha sa iyang katawhan, nga nagpasig-uli, ingnon ta, sa nagapamungang prutasan sa dinihogang mga Saksi, nga sundan sa nagakadakong lasang sa ubang mga karnero. Ang kauswagan ug pagtubo mao ang mga kinaiya sa iyang organisasyon sa yuta karon. Diha sa gipasig-uling espirituwal nga paraiso, “ang himaya ni Jehova, ang katahom sa atong Diyos,” gibanaag sa iyang katawhan samtang sila nagamantala sa iyang umaabot nga Gingharian sa tibuok kalibotan.—Isaias 35:1, 2.
21. Asa makita karon ang pagkamatarong, kalinaw, ug kasegurohan?
21 Pamati, karon, sa mahimayaong saad ni Jehova: “Sa kamingawan ang hustisya tinong mopuyo, ug sa prutasan ang pagkamatarong mopuyo. Ug ang buhat sa matuod nga pagkamatarong mahimong pakigdait; ug ang pag-alagad sa matuod nga pagkamatarong, kalinaw ug kasegurohan hangtod sa panahong walay tino.” (Isaias 32:16, 17) Maayo gayod ang pagbatbat niini sa espirituwal nga kahimtang sa katawhan ni Jehova karon! Kasukwahi sa kinabag-ang katawhan, kinsa nabahin tungod sa pagdumot, kabangisan, ug tumang kakabos sa espirituwal, ang matuod nga mga Kristohanon sa tibuok yuta nahiusa, bisan pag sila maoy ‘gikan sa tanang nasod ug mga tribo ug mga katawhan ug mga dila.’ Sila nagkinabuhi, nagtrabaho, ug nag-alagad nga nahiuyon sa pagkamatarong sa Diyos, nga nagahimo niana nga masaligon nga magtagamtam, sa kataposan, sa matuod nga pakigdait ug kasegurohan hangtod sa panahong walay tino.—Pinadayag 7:9, 17.
22. Unsay kalainan tali sa kahimtang sa katawhan sa Diyos ug kadtong anaa sa bakak nga relihiyon?
22 Diha sa espirituwal nga paraiso, ang Isaias 32:18 nagakatuman na. Nag-ingon kini: “Ang akong katawhan magapuyo sa malinawong puloy-anang dapit ug sa mga pinuy-anan sa bug-os nga pagsalig ug sa walay pagkatugaw nga mga dapit-pahulayanan.” Apan alang sa mini nga mga Kristohanon, “tinong mag-ulan ug yelo sa dihang mahapay ang lasang ug ang siyudad modangat sa ubos uyamot nga kahimtang.” (Isaias 32:19) Oo, sama sa kusog nga ulan-sa-yelo, ang paghukom ni Jehova naandam paghapak sa mini nga siyudad sa bakak nga relihiyon, nga maghimong walay-pulos sa “lasang” niini sa mga tigpaluyo, nga magpapas kanila hangtod sa hangtod!
23. Unsang tibuok-yuta nga buluhaton ang hapit nang matapos, ug giisip nga unsa kadtong nagapakig-ambit niini?
23 Kining bahina sa tagna gitapos nga nag-ingon: “Malipayon kamo nga nagpugas ug binhi sa daplin sa tanang katubigan, nga nagduso sa mga tiil sa torong baka ug sa asno sa pag-adto didto.” (Isaias 32:20) Ang torong baka ug ang asno maoy mga hayop pang-uma nga gigamit sa karaang katawhan sa Diyos sa pagdaro sa mga uma ug pagpugas ug binhi. Karon, ang katawhan ni Jehova nagagamit ug kasangkapan sa pag-imprenta, elektronik nga mga galamiton, modernong mga tinukod ug sakyanan ug, labaw sa tanan, usa ka nahiusa, teokratikanhong organisasyon aron sa pag-imprenta ug pagpanagtag sa binilyong basahon sa Bibliya. Ang masinugtanong mga magbubuhat nagagamit niining mga instrumentoha sa pagpugas sa mga binhi sa kamatuoran sa Gingharian sa tibuok yuta, sa literal “sa daplin sa tanang katubigan.” Milyonmilyong mahadlokon-sa-Diyos nga mga lalaki ug mga babaye naani na, ug panonpanon pa nagaduyog kanila. (Pinadayag 14:15, 16) Silang tanan pagaisipon gayod nga “malipayon”!
[Mga footnote]
a Ang “hari” diha sa Isaias 32:1 mahimong sa sinugdan nagtumong kang Haring Ezequias. Bisan pa niana, ang pangunang katumanan sa Isaias kapitulo 32 mao ang may kalabotan sa Hari, si Kristo Jesus.
b Tan-awa Ang Bantayanang Torre, Marso 1, 1999, mga panid 13-18, nga gipatik sa Watchtower Bible and Tract Society of New York, Inc.
[Mga hulagway sa panid 331]
Sa mga Linukot nga Basahon sa Patayng Dagat, ang Isaias kapitulo 32 gimarkahan ug “X”
[Mga hulagway sa panid 333]
Matag “prinsipe” maoy sama sa usa ka tagoanang dapit gikan sa hangin, silonganan gikan sa ulan, tubig diha sa desyerto, ug landong gikan sa kainit sa adlaw
[Hulagway sa panid 338]
Ang usa ka Kristohanon makabatog dakong kalipay sa pagpaambit sa maayong balita sa uban