Kapitulo 15
Antitipikal, Modernong-Adlawng Edom Pagawagtangon
KARONG adlawa ang kalibotan labi pa kaayong armado kay sukad masukad. Nameligro ug dako ang kalungtaran mismo sa katawhan tungod sa nukleyar nga armas sa kanasoran. Nan, unsay pag-isip sa Maglalalang sa tawhanong banay, si Jehova nga Diyos, sa kahimtang? Kini yanong gipahayag sa kapitulo 34 sa tagna ni Isaias, nga gibuksan sa mga pulong:
2 “Umari kamo sa duol, kamong mga nasod, sa pagpatalinghog; ug kamong mga nasod, pamati. Papamatia ang yuta ug ang nagapuno niini, ang mabungahong yuta ug ang tanang abot niini. Kay si Jehova adunay kasuko batok sa tanang nasod, ug kapungot batok sa tanan nilang kasundalohan. Kinahanglang iyang ihatag sila sa kalaglagan; kinahanglang iyang ihatag sila sa pagpatay. Ug ang ilang mga pinatay igasalibay sa gawas; ug mahitungod sa ilang mga patay nga lawas, ang ilang baho moutbo; ug ang mga bukid mangatunaw tungod sa ilang dugo. Ug ang tanang kasundalohan sa mga langit mangadunot. Ug ang mga langit [dili-epektibong tawhanong mga kagamhanan] pagalukoton, sama sa usa ka linukot nga basahon; ug ang ilang kasundalohan ngatanan mahanaw, sama sa kadahonan nga malaya ug mangalarag gikan sa punoan sa parras ug sama sa nalarag nga igos gikan sa kahoyng igira.” (Isaias 34:1-4) Usa gayod ka daotang tagna!
3 Ang Maglalalang sa uniberso dunay pakiglalis batok sa kanasoran karong adlawa. Kana ang hinungdan ang kanasoran giawhag sa pagpamati sa gipasukad-sa-Bibliya nga mensahe nga iyang gipamantala sa tibuok kalibotan sukad 1919. Angay silang mamati sa iyang igasulti pinaagi sa iyang mga Saksi. Apan ang kiling sa mga hitabo sa kalibotan nagapamatuod nga wala nila buhata kana, ug ang iyang mga Saksi wala isipang ugdang sa kanasoran, kinsa mipalabi sa Hiniusang Kanasoran ug dili sa langitnong Gingharian diha sa mga kamot sa iyang gientronong Anak, ang “Prinsipe sa Pakigdait.”
Tagna ni Isaias Batok sa Edom
4 Ang usa ka elemento nga sa linain responsable nagalihok sa taliwala sa mga nasod karong adlawa. Kanang elementoha gihulagwayan sa nasod sa Edom, nga ginganlang tino sa maong tagna. Ang mga Edomhanon maoy mga kaliwat ni Esau, kinsa nagbaligya sa iyang katungod sa pagkapanganay ngadto sa iyang kaluhang igsoon, si Jacob, ilis sa “tinapay ug sa sinabawan nga balatong.” Maoy niadtong higayona nga si Esau gitawag Edom, nga nagkahulogang “Pula.” (Genesis 25:24-34) Tungod kay siya gipulihan ni Jacob sa bililhong katungod sa pagkapanganay, si Esau nahupong sa pagdumot sa iyang kaluhang igsoon. Ang Edom nahimong dili-mahupay nga kaaway sa karaang nasod sa Israel, o Jacob, bisan pag sila mga nasod sa kaluhang managsoon. Tungod sa maong pagkontra sa katawhan sa Diyos, ang Edom nakaagom sa angay nga kapungot ni Jehova, ang Diyos sa Israel, ug Iyang gihukom ang walay-kataposang pagkapuo sa Edom. Kining balaang determinasyon gipahayag sa mga pulong sa manalagnang si Isaias:
5 “Kay sa mga langit ang akong espada malumok. Tan-awa! Ibabaw sa Edom kini manaog, ug ibabaw sa katawhan nga akong gihatag sa kalaglagan diha sa hustisya. Si Jehova adunay usa ka espada; kini mapuno gayod sa dugo; kini magmadanlog sa tambok, sa dugo sa mga nating laking karnero ug sa mga laking kanding. Kay si Jehova adunay usa ka paghalad sa Bozrah [labing iladong siyudad sa Edom], ug sa usa ka dakong pagpatay sa yuta sa Edom.”—Isaias 34:5, 6.
6 Ang yuta sa mahunahunaon-sa-pagpatay nga nasod sa Edom kinahanglang malumok sa ilang kaugalingong dugo pinaagi sa “espada” ni Jehova. Ang Edom nagpuyo sa habog, bukid nga rehiyon. (Jeremias 49:16) Busa sa pagpahinabo sa usa ka pagpatay nianang yutaa, sa mahulagwayon si Jehova makaingon nga siya nagbakyaw sa iyang espada sa paghukom “diha sa mga langit.” Ang Edom armado kaayo, ug ang iyang kasundalohan naglibotlibot sa abot-langit nga kabukiran sa pagpanalipod sa nasod batok sa mga manunulong. Busa ang kasundalohan sa Edom haom gitawag “ang kasundalohan sa mga langit.” Apan ang gamhanang Edom wala mohatag ug tabang sa iyang kaluhang igsoong nasod, ang Israel, sa giatake kini sa kasundalohan sa Babilonya. Hinunoa, ang Edom nagkalipay nga makitang mapukan ang gingharian sa Juda ug nag-awhag pa gani sa mga tiglaglag niini. (Salmo 137:7) Ang pagluib sa Edom miabot sa punto nga gigukod niya ang mga tawong nangalagiw alang sa ilang mga kinabuhi ug itugyan sila ngadto sa kaaway. (Obadias 10-14) Ang mga Edomhanon nagplano sa pagbanos sa gibiyaang yuta sa mga Israelinhon, nga nagpahayag nga mapasigarbohon batok kang Jehova.—Ezekiel 35:10-15.
7 Nahikalimtan ba ni Jehova, ang Diyos sa karaang Israel, ang maong dili-inigsoong paggawi sa bahin sa mga Edomhanon ngadto sa iyang piniling katawhan? Wala. Kana ang hinungdang ang kasingkasing sa Diyos naghambin sa katuyoan sa “usa ka adlaw sa pagpanimalos” ug sa “usa ka tuig sa pagbalos” ingong bayad tungod sa kadaotang gibuhat ngadto sa iyang yutan-ong organisasyon, nga gitawag Sion. Matud sa tagna: “Kay si Jehova adunay usa ka adlaw sa panimalos, usa ka tuig sa pagbalos tungod sa kasong legal [atubangan sa Hukmanan sa Uniberso] tungod sa Sion.”—Isaias 34:8; Ezekiel 25:12-14.
8 Wala madugay tapos sa paglaglag sa Jerusalem, si Jehova misugod sa pagpahayag sa iyang matarong nga panimalos ibabaw sa mga Edomhanon pinaagi sa hari sa Babilonya, si Nabukodonosor. (Jeremias 25:8, 15, 17, 21) Sa dihang ang kasundalohan sa Babilonya misulod sa Edom, walay makaluwas sa mga Edomhanon! Gipukan sa kasundalohan sa Babilonya ang mga Edomhanon gikan sa ilang batoong habog nga kabukiran. Kadto “usa ka tuig sa pagbalos” diha sa Edom. Sumala sa gitagna ni Jehova pinaagi sa laing manalagna: “Tungod sa kapintasan ngadto sa imong igsoong si Jacob, ikaw mahupong sa kaulawan, ug ikaw pagaputlon sa panahong walay katinoan. . . . Sa paaging imong kining gibuhat, kini pagabuhaton kanimo. Ang matang sa imong pagtagad mobalik sa ibabaw sa imong kaugalingong ulo.”—Obadias 10, 15.
9 Kini nagapasibaw usab sa tinamdan ni Jehova ngadto sa antitipikal modernong-adlawng Edom. Kinsa ba kana? Aw, sa ika-20ng siglo, kinsay nanguna sa pagpasipala ug paglutos sa mga alagad ni Jehova? Dili ba ang apostatang Kakristiyanohan pinaagi sa garboso niining klero nga matang? Oo! Ang Kakristiyanohan, ang dominyo sa bakak nga Kristiyanidad, nagbayaw sa iyang kaugalingon ngadto sa kahabogon sa kabukiran diha sa kahikayan niining kalibotana. Siya usa ka hataas nga bahin sa organisasyon sa sistema sa mga butang sa katawhan, ug ang iyang mga relihiyon mao ang dominanteng bahin sa Dakong Babilonya. Apan gihukom ni Jehova ang “usa ka tuig sa pagbalos” batok sa antitipikal, modernong-adlawng Edom tungod sa mangil-ad nga panggawi batok sa iyang katawhan, ang iyang mga Saksi.
Usa ka Dulnganan nga Sama sa Iya sa Edom
10 Samtang atong hisgotan ang dugang bahin sa maong tagna ni Isaias, ikabutang nato sa hunahuna ang Kakristiyanohan karong adlawa: “Ang iyang mga suba mahimong salong, ug ang iyang abog mahimong asupre. Sa gabii o sa adlaw kini dili mapalong; sa panahong walay katinoan ang aso niini padayong magautbo.” (Isaias 34:9, 10) Ang yuta sa Edom sa ingon gihulagway nga nahimong uga kaayo nga maorag ang iyang mga suba giagayan sa salong ug maorag ang mga abog niini asupre, ug dayon kining modilaab nga mga substansiya giduslitan.—Itandi ang Pinadayag 17:16.
11 Nagpadayon ang tagna ni Isaias: “Gikan sa kaliwatan ngadto sa kaliwatan kini mauga; hangtod sa kahangtoran walay moagi kaniya. Ug ang talabong ug ang heriso magapanag-iya kaniya, ug ang mga ngiwngiw ug mga uwak magapuyo niini; ug iyang buklaron ibabaw niini ang panukod sa pagkawalay sulod ug ang mga tonton sa kamingawan. Ang mga hamili—walay mausa didto nga ilang pagatawgon sa pagkahari mismo, ug ang iyang mga prinsipe ang tanan mawalay kapuslanan. Sa ibabaw sa iyang mga palasyo motungha ang mga tunok, ang mga kadyapa ug ang mga sampinit sa iyang mga kinutaang dapit; ug siya mahimong pinuy-anan sa mga ihalas nga iro, ang nataran sa mga avestruz. Ug ang mga mananap nga ihalas sa mga dapit nga mamala makigtagbo sa mga hayop nga nagauwang, ug bisan ang kanding nga ihalas manawag sa iyang kauban. Oo, didto ang ananangkil magpahayahay ug mangitag kapahulayan. Didto ang halas mosalag ug mangitlog.”—Isaias 34:10-15.
12 Ang Edom mahimong usa ka yuta sa “kawalay sulod” alang sa mga tawo. Kadto mahimong kamingawan nga ang ihalas lamang nga mga mananap, mga langgam, ug mga halas ang anaa niana. Ang maong uga nga kahimtang sa yuta magpadayon, kay ang bersikulo 10 nagaingon, “hangtod sa kahangtoran.” Walay pagpasig-uli sa unang mga pumuluyo niini.—Obadias 18.
13 Pagkamakalilisang nga kahimtang ang gilandongan niini alang sa modernong-adlawng katumbas sa Edom—ang Kakristiyanohan! Siya nagpamatuod nga dakong kaaway ni Jehova nga Diyos, kansang mga Saksi mapintason niyang gilutos. Busa ang maong umaabot nga paglaglag kaniya una pa sa Armageddon gitagna diha sa “basahon ni Jehova.” (Isaias 34:16) Sa tino, kining “basahon ni Jehova” mao ang iyang mga libro sa kuwenta, nga nagatalaid sa mga utang nga iyang silngon niadtong iyang mga kaaway ug mga nagdaugdaog sa iyang katawhan. Ang nahisulat diha sa “basahon ni Jehova” mahitungod sa karaang Edom natuman, ug kini nagagarantiya nga ang tagna ingong mapadapat sa Kakristiyanohan, ang modernong-adlawng Edom, susamang matuman.
14 Ang antitipikal nga mga Edomhanon karong adlawa wala magdawat kang Jehova ingong Hari niining panahon sa “konklusyon sa sistema sa mga butang.” Dugang pa, sanglit ang Kakristiyanohan usa ka ilado kaayong bahin sa Dakong Babilonya, siya nahukman nga makaagom sa iyang mga hampak. Siya wala mosunod sa sugo ni Jehova nga “gumula” sa Dakong Babilonya. (Pinadayag 18:4) Wala niya sundoga ang panig-ingnan sa nahibilin sa espirituwal nga mga Israelinhon o sa “dakong panon” sa “ubang mga karnero.”
15 Ang duol nga umaabot sa Kakristiyanohan madulom gayod. Iyang ginabuhat ang tanang iyang maarangan sa paghupay sa iyang politikanhong mga higala ug pagpugong kanila sa pagtigom aron mosulong batok kaniya, sa iyang bug-os nga kalaglagan, apan kana makawang!
16 Sumala sa Pinadayag kapitulo 17 ug 18, ibutang sa Diyos nga Makagagahom sa Tanan, si Jehova, diha sa ilang mga kasingkasing aron ihatag ang ilang politikanhon ug militaryong kusog ngadto sa mapintasong pag-atake sa Dakong Babilonya diha sa tanan niyang relihiyosong sakop, apil ang Kakristiyanohan. Tungod niini mahanaw sa tibuok yuta ang mini nga Kristiyanidad. Ang kahimtang sa Kakristiyanohan mahimo unyang sama sa masulob-ong kahimtang nga gibatbat sa Isaias 34. Siya wala na unya aron makasinati sa bug-os mahukmanong “gubat sa dakong adlaw sa Diyos nga Makagagahom sa Tanan” batok sa kanasoran, kinsa maoy naglaglag sa Dakong Babilonya. Ang antitipikal nga Edom, ang Kakristiyanohan, sa katibuk-an mawala na sa nawong sa yuta, “hangtod sa kahangtoran.”
[Mga Pangutana nga Pagatun-an]
1, 2. Unsay pag-isip sa Maglalalang sa kanasorang armado kaayo, ug unsa ang determinasyon ni Jehova, sumala sa tagna ni Isaias?
3. (a) Sa unsa ang kanasoran giawhag sa pagpatalinghog, ug nganong si Jehova tukmang makasugo kanila? (b) Unsay nagapakita nga ang kanasoran wala mamati?
4, 5. (a) Kinsa ang mga Edomhanon, ug unsang tinamdan ang ilang nabatonan bahin sa ilang kaluhang igsoong nasod, ang Israel? (b) Busa unsay gihukom ni Jehova mahitungod sa Edom?
6. (a) Nganong si Jehova nakasulting iyang gibakyaw ang iyang “espada” batok sa Edom “diha sa mga langit”? (b) Dihang giatake sa Babilonya ang gingharian sa Juda, unsang dili-inigsoong tinamdan ang gipasundayag sa Edom ngadto sa katawhan ni Jehova?
7. Unsay pag-isip sa Diyos sa Israel sa maluibong panggawi sa nasod sa Edom?
8. (a) Kinsa ang gigamit ni Jehova sa pagsilot sa Edom? (b) Unsay gitagna sa manalagnang si Obadias mahitungod sa Edom?
9. Kinsa ang antitipikal modernong-adlaw nga Edom, ug ngano?
10. Giunsa pagbatbat sa Isaias 34:9, 10 ang dangatan sa Edom, apan kang kinsa mapadapat ang tagna karong adlawa?
11, 12. Gikan sa matagnaong kabatbatan nga gihatag sa Isaias 34:10-15, unsay mahitabo sa yuta sa Edom, ug hangtod kanus-a magpadayon ang maong kahimtang sa yuta?
13. Unsay gitagna alang sa Kakristiyanohan diha sa “basahon ni Jehova,” ug unsa, sa tino, kining basahona?
14. Unsay wala dawata sa antitipikal nga mga Edomhanon karong adlawa, ug unsang panig-ingnan sa katawhan ni Jehova ang wala nila masunod?
15, 16. Unsa ang duol nga umaabot sa Kakristiyanohan, sumala sa gitagna diha sa Pinadayag 17 ug 18 ug sa Isaias 34?