Pagkanapasig-uli sa Kusog, nga Walay Pagkaluya
“Siya magahatag ug gahom niadtong maluya; ug kaniya nga walay kabaskog nagadugang siya ug kusog.”—ISAIAS 40:29.
1, 2. Sa unsang paagi imong ikailustrar kon unsay gikausahan sa mga Kristohanon sa mga magdadagan sa maraton?
SA BUNTAG sa Oktubre 1984, ang panon sa katawhan nga duolan sa 16,000 ka maglulumba mibaha sa kadalanan sa pagsugod sa Maraton sa New York City. Ang daoganan maoy mga 26.2 ka milya (42.2 km) ang kalay-on. Kadtong tagsaong kainit sa tinghunlak nakaluya sa kusog sa mga magdadagan ug nasulayan ang ilang pagkamalahutayon. Ang lumba maoy usa ka makakapoyng panglimbasog bisan sa labing maayong mga magdudula. Nautas ang daghang magdadagan ug miundang sa lumba; hapit 2,000 wala makatapos. Kadtong milampos nakabuntog sa malisod kaayong mga kahimtang.
2 Ang mga Kristohanon, apil usab sa lumba. Ang ganti? Kinabuhing walay kataposan. Ug kaamgid sa magdadagan sa maraton, kinahanglang manglimbasog sila hangtod sa kataposan. Gikinahanglan ang pagkamalahutayon. Kinahanglang magpabilin ang kusog ug likayan ang kakapoy. Ang atong lumba sa kinabuhi dili sama sa mubo nga pagdagan apan, sama sa usa ka layong distansiya nga pagdagan. Si Pablo namulong ngadto sa iyang kaubang mga Kristohanon sa Corinto: “Wala ba kamo masayod nga sa lumba ang tanang mga magdadagan modagan, apan usa lamang ang makadawat sa ganti? Busa dagan sa ingon aron inyong makab-ot kini.” (1 Corinto 9:24) Ang paagi sa pagdagan sa mga Kristohanon inubanan gayod sa dakong panglimbasog.—Lucas 13:24.
3. Sa unsa lamang paagi makapadayon ang mga Kristohanon sa paso hangtod nga ilang matapos ang lumba?
3 Apan tingali matingala ka: ‘Kinsay makapadayon niana nga pagdagan hangtod sa kataposan sa lumba?’ Walay bisan usa kanato pinaagi sa atong kaugalingong kusog. Aron makab-ot ang ganti, kinahanglang mokuha kitag kusog diha sa Tuboran sa dakong kusog, si Jehova nga Diyos.—Job 36:22; Salmo 108:13.
Si Jehova—Ang Tuboran sa Dakong Kusog
4. Sumala kang propetang Isaias, nganong makasalig kita sa katakos ni Jehova sa paglig-on sa iyang mga alagad?
4 Si Jehova sa walay duhaduha makahatag kalig-on sa iyang mga alagad. Pinaagi sa baba sa iyang manalagnang si Isaias, naghisgot ang Labing Makagagahom sa pagkawalay kinutoban sa Iyang mga katakos ug sa pagkadili-hitupngan sa Iyang gamhanong mga buhat. “Ihangad sa itaas ang inyong mga mata ug tan-awa,” Siya miingon. “Kinsay nagbuhat niini? Ang Usa nga nagadala niini sa ilang panon sa tinagdaghan, siya nagatawag sa tagsatagsa sa ilang ngalan. Tungod sa kadako sa iyang gahom, ug sa iyang pakakusgan sa kagahom, walay usa kanila ang nawala. . . . Wala ba ikaw makaila o wala ba ikaw makadungog? Si Jehova, ang Maglalalang sa kinatumyan sa yuta, maoy Diyos sa walay kataposan. Dili siya maluya o kapuyan. Walay makatukib sa iyang salabotan.”—Isaias 40:26-28.
5, 6. Paghatag mga pananglitan sa ebidensiya sa dakong kusog ni Jehova.
5 Gikan sa may kataposan ngadto sa walay kataposan, ang pasundayag sa gahom sa paglalang katingalahan! Pananglitan, tagda ang mga bloke nga niini ang tanang butang, lakip kanato, gigama—ang mga atomo. Hilabihan kaayo sila ka gamitoy nga ang usa ka tulo sa tubig adunay 100 ka bilyon bilyong atomo (Amerikanhong sistema sa pag-ihap). Apan, katingalahan, sulod nianang uyok sa mga atomo mao ang enerhiya nga may igong kusog sa pagpagawas, sa usa ka higayon, ug dakong pagbuto nga makabangag sa yuta ug 32 ka andana nga giladmon ug un-kuwarto sa usa ka milya nga gisangkaron.
6 Sa pikas tumoy sa sukod sa timbangan, palandonga ang adlaw. Kining higanteng nukleyar nga halingan, nga bilyonbilyong tonilada ang gibug-aton, naghatag kainit sa atong sistema solar. Gisugnoran kini sa enerhiya nga gikan sa gagmitoyng mga atomo. Bisag ang tanang kinabuhi sa yuta—mga tanom, hayop, ug mga tawo—nagasalig sa enerhiya nga ginabuga nianang higanteng planta sa enerhiya sa langit, gamayng bahin lamang sa gidaghanon sa enerhiya sa adlaw ang moabot sa yuta. Ug, igo na kana sa pagpabuhi sa kinabuhi sa yuta. Diha sa iyang librong Astronomy, ang astronomong si Fred Hoyle misulat: “Ang gamay kaayong bahin sa enerhiya sa Adlaw nga mahulog sa Yuta—gibanabana nga may mga lima ka bahin sa usa ka gatos ka bahin sa milyon milyon—maoy mga 100,000 ka pilo nga mas dako pa kay sa tanang enerhiya nga gigamit sa mga industriya sa kalibotan.”
7. Unsay atong bation kang Jehova tapos makapamalandong sa gahom nga makita diha sa iyang kalalangan?
7 Bisan pa, ang adlaw maoy usa lamang sa bilyonbilyong mga bitoon nga naglangkob sa atong galaksiyang Milky Way—ug hunahunaa lang nga kini maoy medium-size lamang nga bitoon. Dugang pa, gibanabana sa mga astronomo nga adunay duolan sa 100,000,000,000 ka galaksiya sa nailhang uniberso. Makalipong kining palandongon, dili ba? Dili ikatingala nga ang tawong si Job, tapos nakapalandong kon giunsa ‘pagbuklad [ni Jehova] ang kalangitan sa iyang kaugalingon,’ miingon nga ang Diyos “nagabuhat sa dagkong mga butang nga dili matukib, ug sa katingalahang mga butang nga dili maisip.”—Job 9:8-10.
Si Jehova Makapabaskog Kanimo
8. (a) Kinsa lamang ang bug-os makapahimulos sa gahom ni Jehova, ug ngano? (b) Sa unsang paagi ang saad sa Isaias 40:29-31 makapalig-on sa pagtuo?
8 Ang tinuod nga mga magsisimba ni Jehova libre ug bug-os makaduol niining Tuboran sa dakong kusog nga naglalang ug naghatag kinabuhi sa uniberso. Ang mga alagad ni Jehova ‘mapalig-on pinaagi sa iyang balaang espiritu,’ nga walay angay kahadlokan nga mawad-an sa kusog. (Efeso 3:16; Salmo 84:4, 5) Sa pagkatinuod, ang atong pagkadaog sa lumba sa kinabuhi nagadepende sa bug-os nga pagsalig nga ang gamhanong kamot sa Diyos makapahagurus kanato latas sa daoganan. Siya makapabaskog kanato. Sumala sa gipahayag ni propetang Isaias bahin kang Jehova: “Siya magahatag ug gahom niadtong maluya; ug kaniya nga walay kabaskog magadugang siya ug dakong kusog. Bisan pa ang mga batan-on mangaluya ug makapuyan, ug ang mga batan-on mangatumba, apan kadtong magahulat kang Jehova magapasig-uli sa ilang kusog. Sila manglupad pinaagi sa mga pako ingon sa mga agila. Sila manalagan ug dili makapuyan; sila manlakaw ug dili mangaluya.” (Isaias 40:29-31) Ngani, bisan sa pagbasa na lang niadtong mga pulonga makapalagsik na sa atong espiritu!
9. Sa unsang paagi makatabang kanimo si Jehova sa imong ‘dagkong’ mga suliran?
9 Kon makaatubang ug daw dakong mga suliran nga naghulga sa pagpaluya sa imong kadasig sa tinuod nga pagsimba, tingali bation nimong gamay ka ra kaayo ug dili bililhon. Ayaw kasubo. Dangop ngadto sa imong makagagahom nga langitnong Amahan. Siya magapalig-on ‘sa tanan nga nagahulat kaniya.’ Dili ba ang Maglalalang sa atomo makahatag sa iyang katawhan ug dakong kusog nga may igong kagahom sa pagbalhin niadtong ‘mga bukira’? Siempre makahimo siya!—Marcos 11:23.
10. (a) Unsang mga butang ang makapaluya sa Kristohanong magdadagan? (b) Unsay gitinguha ni Satanas nga buhaton diha kanimo?
10 Sa laing bahin, ang ubang mga Kristohanon tingali gikapoy na kaayo sa adlaw-adlaw nga pakigbisog sa mga kapit-osan sa kalibotan nga dayag nga nagsalikway sa Kristohanong mga prinsipyo nga tungod niana bation nila ang pagkaluya o sa paghunong sa lumba sa kinabuhi. Ang sakit, kausaban sa panalapi, mga problema sa pamilya, pag-inusara, o ubang kalisdanan moresulta usab ug pagkaluya sa buut. Ug ang pagkaluya sa buut daling makapaluya sa Kristohanong kalig-on, sama sa alindangang kainit nga daling makahupas sa kusog sa magdadagan sa maraton. Ang dakong Kaaway, si Satanas nga Yawa, mogamit niining mga butanga sa pagsulay sa pagbungkag sa imong integridad ingong alagad ni Jehova. (1 Pedro 5:8) Ayaw tugoti nga buhaton kana sa Yawa! Dangop sa Maglalalang niadtong panon sa langitnong mga galaksiya sa pagbag-o sa imong espirituwal nga tagana sa kusog. Si Jehova makalig-on kanimo.—Salmo 37:17; 54:4.
11. Unsay atong makat-onan sa paagi ni David sa pag-atubang sa mga kakulian?
11 Kon mag-atubang ug mga problema, nakita kanunay ni David si Jehova nga usa ka tuboran sa bag-ong kusog. Napabaskog pinaagi sa balaang espiritu, si David nakahimo sa ‘pagkatkat’ sa tanang balabag. Siya miingon: “Kay uban kanimo makahasmag ako ug mga kaaway; ug pinaagi sa akong Diyos ako makakatkat ug kuta.” Si David usab mipahayag: “Pinaagi sa Diyos atong mabatonan ang dakong kusog, ug iyang tamakan ang atong mga kaaway.” (Salmo 18:29; 60:12) Makahimo si Jehova niini kanimo.
Sukli ang Espirituwal nga Kaluya
12. (a) Nganong kinahanglang hupayon dayon ang espirituwal nga kakapoy? (b) Unsa ang mga timailhan sa espirituwal nga kakapoy? (c) Unsang mga tagana ang gihimo ni Jehova sa pagpabaskog niadtong naluya sa espirituwal?
12 Kinahanglang abtik kita sa pagmatikod sa mga timaan sa espirituwal nga kakapoy ug sa pagbuntog dayon kanila. Ngano? Tungod kay kadto lamang pipila nga ‘manglimbasog pag-ayo sa pagsulod agi sa masigpit nga pultahan,’ o kadtong mga magdadagan nga makalabang sa daoganan, ang makabaton sa ganti sa kinabuhing dayon. (Lucas 13:24; Filipos 3:12, 13) Tukia ang nagaubang kahon nga nag-ulohang “Pipila ka Paagi sa Pagbuntog sa Espirituwal nga Kaluya.” May nakita ka bang mga timailhan diha sa imong kaugalingon o sa membro sa pamilya? Kon mao, paghimo dayon ug mga lakang sa paghimog mga pagpasibo. Palagsika ug balik ang imong espirituwalidad pinaagi sa pagkuhag kusog gikan sa nalistang mga tagana ni Jehova.
13, 14. (a) Unsang mga panig-ingnan ang makatabang sa pagpasig-uli sa atong espirituwal nga kusog? (b) Sa unsang paagi ang tambag sa dugay nang alagad ni Jehova makatabang kanatong makapabilin sa lumba?
13 Imong mabuntog ang kiling sa pagkakapoy pinaagi sa pagsundog sa mga panig-ingnan sa madaogong mga alagad sa Diyos sa rekord sa Bibliya. Dihay daghan, mga lalaki ug babaye, mga batan-on ug tigulang, nga nakalahutay hangtod sa kataposan. Pagbasa bahin kanila diha sa mga kasulatan sama sa Hebreohanon 11:4-40. Maingon man, sa modernong panahon kita adunay daghang minahal nga mga igsoong lalaki ug babaye nga nagpadayon sa pag-alagad kang Jehova sa walay pagkakapoy.
14 Si George, nga nagpuyo sa habagatang bahin sa Tinipong Bansa, maoy usa ka panig-ingnan sa Kristohanong magdadagan nga wala gayod mobatig kaluya. Human sa 50 ka tuig kapin sa lumba sa kinabuhing walay kataposan, malig-on gihapon siya. Unsay tambag ang iyang gihatag kanato?
“Matinuoron akong makaingon, pagpabilin sa organisasyon. Hinumdomi nga si Jesu-Kristo, ingong Tinudlong Usa ni Jehova, ang nagapalakaw sa organisasyon. Busa ayaw pagkaluya sa buut kon adunay suod kanimo nga dili magpabiling maunongon. Kon dunay dili nimo masabtan sa bug-os o malisdan ka sa pagdawat, laomi nga matin-aw ra kini sa ulahi. Giagak kita sa organisasyon ni Jehova hangtod niining puntoha. Laomi kini sa pagtultol kanato ngadto sa Bag-ong Sistema.”—Juan 6:66-68.
15. Kon makapalab-as sa espiritu ang maayong mga panig-ingan, unsay kinahanglan natong buhaton?
15 Sa walay duhaduha adunay pila niining mga minahal sa imong kongregasyon, o mahibalag mo sila diha sa sirkitong mga asembliya. Pakigsulti kanila. Pakisayod kanila. Dugang pa, ang mga panig-ingnan sa ubang mga matinumanon makita sa Yearbook, sa Ang Bantayanang Torre, ug sa ubang mga basahon sa Watch Tower. Basaha kining maong mga asoy. Susiha kon sa unsang paagi makakuha kag kalig-on gikan niadtong mga eksperyensiyaha.
Mga Ansiano—Ipakita nga Kamo mga ‘Tabang sa Pagpalig-on’
16. (a) Sa unsang paagi makatabang ang isigka-Kristohanon aron mapasig-uli ang kusog? (b) Unsay kinahanglang bantayan sa mga ansiano kon maghatag pagdasig ug pagtambag?
16 Ang mga ansiano sa kongregasyon kinahanglang alisto sa pagtabang sa mga membro nga nagpakitag mga timaan sa pagkaluya. Ang Isaias 35:3 naghatag ug maayong tambag sa pag-ingon: “Pabaskoga ang kamot nga maluya, kamo nga katawhan, ug palig-onan ang mga tuhod nga mahuyang.” Apan sa unsang paagi kamong mga ansiano makahimo sa inyong bahin? Una, magmapaniiron. Pangitaa ang tinuod nga hinungdan sa pagkaluya. Paghatag ug praktikal, Kasulatanhong mga sugyot alang nianang tawhana. Apan pagbantay. Buot kang modasig, dili sa pagpaluya sa buut, sa imong mga igsoon.a Busa, ayaw ipugos ang imong konsensiya diha sa uban, o sa pagpugos sa pagsunod sa imong solusyon, o sa pagtawag kaniyang dili hamtong nga Kristohanon kon siya magpanuko sa pagdawat sa imong personal nga hunahuna. Kinahanglang ipasukad sa mga ansiano ang ilang tambag ug pagdasig diha sa Bibliya. Dili sila buot nga mapaluya ang ilang kaubang mga mananagan pinaagi sa paghatag kanila ug walay kapuslanang mga lagda sa kongregasyon.—Itandi ang Mateo 11:28, 29 sa Mateo 23:2-4.
17. Sa unsang paagi masuklan sa mga ansiano ang mga paagi sa Satanas nga gituyo sa pagpaluya sa isigka-Kristohanon?
17 Makapakita ang mga ansiano ug maayong mga panig-ingnan ingong mga sumusunod ni Kristo pinaagi sa pagdayeg sa mga membro sa kongregasyon. Pabatia sila nga tinuod nga gikinahanglan! Ang sistema ni Satanas labi pang andam sa paghimo sa Kristohanon nga dili takos. Niining puntoha sa ilang lumba sa kinabuhi, ang atong mga igsoon nagkinahanglan, dili mga tigsaway, kondili mga higala sa pag-abiba kanila padulong sa kadaogan. Pananglitan, sa napugos ang igsoong babaye sa paghunong sa pagpayoner, ang iyang kasingkasing nagkalayo sa tinguha sa pagbalik sa bug-os panahong pag-alagad. Apan dili siya makahimo tungod sa pinansiyal nga mga sirkumstansiya. Bisan ug maayo ang tuyo sa ansiano, gipangutana siya sa ansiano sa masawayong paagi: “Kanus-a ka mobalik sa pagpayoner?” Natingala siya sa iyang masakit nga tubag: “Kon makabayad na ang akong bana sa abang.” Wala makasabot ang ansiano, apan nahibalo siya sa ulahi, nga ang iyang pagpayoner gisuportahan lamang sa kinitaan sa iyang bana. Apan sa gihatagan siya ug mga trabaho nga kuwestiyonable alang sa usa ka Kristohanon, ang konsensiya sa iyang bana maoy nakatulod kaniya sa pagpangitag laing trabaho. Sa iyang panuigon, dili sayon makita ang trabaho. Busa, mipili na lang siya sa gamayng suweldong trabaho; ug busa napugos ang asawa sa pagtrabaho sa bug-os panahon.
18. Sa unsang paagi ang mga ansiano mahimong “tabang sa pagpalig-on”?
18 Sumala sa makita nga eksperyensiya, masabot ba nato nga magpanuko ang mga ansiano sa pagtambag sa isigka-Kristohanon? Dili. Hinunoa, kon gikinahanglan ang tambag o pagdasig, kinahanglang sabton sa mga ansiano ang aktuwal nga mga kahimtang sa ilang mga igsoon ug dili lamang sa pagtan-aw sa panagway sa atubangan. (Santiago 2:15, 16) Niining paagiha, ang mga ansiano mahimong “tabang sa pagpalig-on” sa ilang kongregasyon.—Colosas 4:11.
19. Unsay imong mahimo sa pagtabang sa mga payoner aron dili maluya?
19 Ang nagatubong gidaghanon sa mga magmamantala sa Gingharian miuswag ug mga regular payoner na karon. Ang abiba sa panon makadasig sa mga magdadagan sa maraton aron mapasig-uli ang kusog. Busa unsay imong ginahimo sa pag-abiba paingon sa kadaogan sa mga payoner sa inyong kongregasyon? Gihimo ni Doug ug Joanne ang bug-os panahong pag-alagad ingong ilang karera sa kinabuhi. Makapaluya gayod sa buut kon pangutan-on sila sa uban, “Kanus-a man kamo manganak?” o, “Kanus-a pa kamo magpahimutang?” Apan, unsay mahitabo kon hatagan sila sa kaubang mga Saksi ug moral nga pagpaluyo pinaagi sa pag-ingon, “Ipadayon ang maayong buhat. Nalipay kami sa pagbaton kaninyo ingong mga payoner sa atong kongregasyon”? Buweno, dili lamang nga ilang malikayan ang espirituwal nga kakapoy kondili sila matabangan sa paglupad sama sa mga agila sa ilang payoner nga pag-alagad!—Itandi sa Isaias 40:31.
Kon sa Unsang Paagi Mapasig-uli ang Kusog sa mga Payoner
20, 21. Sa unsang paagi napasig-uli ang kusog sa uban nga anaa sa bug-os panahong pag-alagad?
20 Pamatia kining migtiayon, si Frederick ug Marian. Nahibalo sila kon unsaon sa pagpasig-uli sa kusog. Ang duha mga misyonero nga nag-alagad sa nasod sa Sentral Amerika, ug ang duha kapin na sa ilang 70 nga panuigon. Ang bana nagsugod sa iyang misyonero nga pag-alagad sa 1946, ang asawa sa 1950. Unsay nakapadayon nila sa pag-alagad kang Jehova? Si Frederick mitubag: “Dugang pa sa paghigugma kang Jehova ug sa tinguha sa pagtabang sa ubang tawo, ang pagbutang diha sa hunahuna sa tumong sa kinabuhing walay kataposan.” Ang iyang asawa mitubag nga ‘ang mga saad sa Diyos mao ang nakapalahutay kanamo.’ Sa unsang paagi nga dili sila bation ug kaluya? “Bisan unsa pay imong asaynment,” ang bana mitambag, “magmaokupado ka niana.” Ang asawa misugyot sa “pagpadayon sa teokratikong buluhaton” ug midugang: “Sa magkatigulang ka, dili nimo mahimo ang tanang butang nga gusto nimong buhaton. Mapikal ako niana, apan ipahayag ko kana kang Jehova diha sa pag-ampo.” Mitapos si Frederick uban niining maayong tambag: “Mag-ampo kami matag gabii ug mangaliyopo kang Jehova sa pagtabang kanamo.”—1 Pedro 4:7.
21 Si Lavonia maoy 67 anyos ug regular payoner na sa miaging 20 ka tuig. Sa miaging tuig lamang, naospital siya sa 15 ka adlaw ug karon may tambal siyang ginainom alang sa iyang kasingkasing. Ang kamatayon sa pila ka membro sa pamilya, lakip sa iyang bana ug sa iyang amahan, nakahatag kaniyag dakong kaguol. Apan nanglimbasog gihapon siya. Sa unsang paagi napasig-uli ang iyang kusog? “Sa tinuod nakatabang ang bug-os nga pakigbahin sa buluhatong pagsangyaw,” siya miingon, “tungod kay sa matag panahon nga makapahayag ako sa uban bahin kang Jehova, mapalayo ang akong mga hunahuna sa akong mga suliran ug nakahatag kanakog kalinaw sa hunahuna ug kalipay nga nakahimo sa kinabuhi nga takos kinabuhian.” Wala usab siyay planong moundang sa pagpayoner apan miingon: “Ang pagtan-aw sa uban nga makakat-on bahin kang Jehova ug sa iyang dagkong mga katuyoan nakahatag kanakog dakong kalipay ug wala gayod ako makahunahuna sa paghunong sa payoner nga pag-alagad.”—Buhat 20:35.
22. Aron makadaog sa lumba sa kinabuhing walay kataposan, unsay atong kinahanglang padayong buhaton?
22 Kon makahimo ba kita sa pagpanglimbasog ingong mga payoner niining puntoha sa kinabuhi o dili, kitang tanan makapabiling suod sa Tuboran sa dakong kusog, si Jehova, ug sa iyang organisasyon. Tugoting magpadayon kita sa pagpasig-uli sa kusog pinaagi sa maunongong pag-alagad sa atong Diyos. Dayon, sama kang Habakuk, kita makaingon: “Si Jehova ang Soberanong Ginoo mao ang akong dakong kalig-on; ug ang akong mga tiil himoon niya nga sama sa mga tiil sa lagsaw.” (Habakuk 3:19) Busa dili kita maluya o makapuyan. Hinumdomi nga ang lumba hapit nang matapos. Haduol na kita sa daoganan!
[Mga footnote]
a Makaikag, ang pulong sa pagdasig diha sa Filipos 2:1 ug Hebreohanon 6:18 nagagikan sa Gregong berbo nga nagkahulogang “paggamit ug malumong pagdasig pinaagi sa mga pulong” o “sa pagkigsulti sa usa, sa positibo, malulutong paagi.”
Mga Pangutana sa Pagrepaso
◻ Kinsa lamang ang libreng makapahimulos sa dakong kusog ni Jehova?
◻ Unsa ang pila ka timaan sa espirituwal nga pagkaluya?
◻ Unsang mga tagana ni Jehova ang makatabang kanato nga mapasig-uli ang kusog?
◻ Sa unsang paagi ang mga ansiano ug ang uban sa kongregasyon makatabang sa mga payoner sa pagpabilin sa “lumba”?
[Kahon sa panid 19]
Pipila ka Paagi sa Pagbuntog sa Espirituwal nga Kaluya
Mga Timailhan sa Kaluya
◻ Kulang sa pagpugong sa pagkaon, pag-inom, ug sa pagpangagpas sa kalingawan
◻ Kulang sa kadasig sa kamatuoran, dili matinagdanong espiritu
◻ Nagahambin ug seryoso ug nagapadayong mga pagduhaduha
◻ Walay pagpakig-uban diha sa mga tigom sa kongregasyon
◻ Kulang sa kadasig ug kalipay sa pag-alagad sa kanataran
◻ Sobra ka hinawayon sa mga ansiano ug sa organisasyon
Mga Tabang sa Paglahutay
◻ Pag-ampo sa panabang pinaagi sa balaang espiritu—Lucas 11:13; Galacia 5:22, 23; 1 Pedro 4:7
◻ Personal nga pagtuon—Salmo 1:1, 2
◻ Pagpalandong sa Kasulatanhong mga butang—Salmo 77:12
◻ Regular nga pagtambong sa mga tigom ug sa mga asembliya—Nehemias 8:1-3, 8, 10;
◻ Regular nga pakigbahin sa pag-alagad sa kanataran—Buhat 20:18-21
◻ Espirituwal nga tabang gikan sa mga ansiano sa kongregasyon, sa magpapanawng mga magtatan-aw—Roma 1:11, 12; Hebreohanon 13:17
[Mga Letrato sa panid 17]
Si Jehova, ang Maglalalang sa uniberso, nagatabang sa iyang mga saksi nga mapasig-uli ang kusog
[Tinubdan]
NASA photos