Kapitulo Diyes
“Usa ka Panahon sa Maayong Kabubut-on”
1, 2. (a) Unsang panalangin ang napahimuslan ni Isaias? (b) Kinsay nalangkit sa matagnaong mga pulong nga nasulat sa unang katungang bahin sa Isaias kapitulo 49?
ANG tanang matinumanong mga tawo dugay nang nagpahimulos sa pag-uyon ug panalipod sa Diyos. Apan dili lang si Jehova magpataka ug hatag sa iyang maayong kabubut-on. Ang usa ka tawo kinahanglang mahimong takos nianang way-ingon nga panalangin. Si Isaias maoy usa nga takos niana. Siya nagpahimulos sa pag-uyon sa Diyos ug gigamit ni Jehova ingong usa ka instrumento aron ipahibalo ang Iyang kabubut-on ngadto sa uban. Usa ka pananglitan niini nahitala diha sa unang katungang bahin sa kapitulo 49 sa tagna ni Isaias.
2 Kining mga pulonga matagnaong gipunting ngadto sa binhi ni Abraham. Sa unang katumanan, ang maong binhi mao ang nasod sa Israel, nga naggikan ni Abraham. Bisan pa niana, ang kadaghanan sa mga pulong tin-awng mapadapat ngadto sa dugay-nang-gilaoman nga Binhi ni Abraham, ang sinaad nga Mesiyas. Ang dinasig nga mga pulong mapadapat usab ngadto sa espirituwal nga mga igsoon sa Mesiyas, kinsa mahimong bahin sa espirituwal nga binhi ni Abraham ug sa “Israel sa Diyos.” (Galacia 3:7, 16, 29; 6:16) Kining bahina sa tagna ni Isaias nagbatbat ilabina sa espesyal nga relasyon nga naglungtad tali kang Jehova ug sa iyang minahal nga Anak, si Jesu-Kristo.—Isaias 49:26.
Tinudlo ug Gipanalipdan ni Jehova
3, 4. (a) Unsang pagpaluyo ang nabatonan sa Mesiyas? (b) Kang kinsa nakigsulti ang Mesiyas?
3 Ang Mesiyas nagpahimulos sa maayong kabubut-on o pag-uyon sa Diyos. Si Jehova naghatag kaniya sa awtoridad ug sa mga kredensiyal nga gikinahanglan aron sa pagtuman sa iyang tinudlong-buluhaton. Nan, nahiangay nga ang umaabot nga Mesiyas moingon: “Pamati kanako, Oh kamong kapuloan, ug patalinghog, kamong nasodnong mga pundok sa halayo. Si Jehova nagtawag kanako gikan mismo sa tiyan. Gikan sa kahiladmang mga bahin sa akong inahan siya naghisgot sa akong ngalan.”—Isaias 49:1.
4 Ang Mesiyas dinhi nagpunting sa iyang mga pulong ngadto sa mga katawhan gikan sa “halayo.” Bisan kon ang Mesiyas gisaad alang sa Hudiyong katawhan, ang iyang ministeryo maoy alang sa panalangin sa tanang nasod. (Mateo 25:31-33) Ang “kapuloan” ug ang “nasodnong mga pundok,” bisan pag walay pakigsaad uban ni Jehova, angayng magpatalinghog sa Mesiyas sa Israel tungod kay siya gipadala aron sa pagdalag kaluwasan alang sa tanang tawo.
5. Sa unsang paagi ang Mesiyas ginganlan na bisan sa wala pa siya mahimugso ingong usa ka tawo?
5 Ang tagna nag-ingon nga nganlan ni Jehova ang Mesiyas sa dili pa siya mahimugso ingong usa ka tawo. (Mateo 1:21; Lucas 1:31) Dugay na sa wala pa siya matawo, si Jesus ginganlang “Kahibulongang Magtatambag, Diyos nga Gamhanan, Amahang Walay Kataposan, Prinsipe sa Pakigdait.” (Isaias 9:6) Ang Immanuel, lagmit nga maoy usa ka ngalan sa anak nga lalaki ni Isaias, misangpot usab nga usa ka matagnaong ngalan sa Mesiyas. (Isaias 7:14; Mateo 1:21-23) Bisan ang ngalan nga pinaagi niana ang Mesiyas mailhan—Jesus—gitagna na sa wala pa siya matawo. (Lucas 1:30, 31) Kining ngalana nagagikan sa Hebreohanong pulong nga nagkahulogang “Si Jehova Maoy Kaluwasan.” Tin-aw, si Jesus dili usa ka tinudlo-sa-kaugalingon nga Kristo.
6. Sa unsang paagi ang baba sa Mesiyas sama sa usa ka mahait nga espada, ug sa unsang paagi siya gitagoan?
6 Ang matagnaong mga pulong sa Mesiyas nagpadayon: “Ug iyang gihimo ang akong baba nga sama sa usa ka mahait nga espada. Sa anino sa iyang kamot iya akong gitagoan. Ug siya inanayng naghimo kanako nga usa ka pinasinaw nga pana. Iya akong gitagoan sa iyang kaugalingong udyongan.” (Isaias 49:2) Sa miabot ang panahon nga ang Mesiyas ni Jehova mosugod sa iyang yutan-ong ministeryo sa 29 K.P., ang mga pulong ug mga lihok ni Jesus nagpamatuod gayod nga samag mahait, pinasinaw nga mga hinagiban, nga makalagbas sa mga kasingkasing sa iyang mga tigpatalinghog. (Lucas 4:31, 32) Ang iyang mga pulong ug mga lihok nagpukaw sa kapungot sa dakong kaaway ni Jehova, si Satanas, ug sa iyang mga ahente. Sukad sa panahon sa pagkatawo ni Jesus, gipaninguha ni Satanas nga kuhaon ang Iyang kinabuhi, apan si Jesus nahisama sa usa ka pana nga gitagoan sa kaugalingong udyongan ni Jehova.a Makasalig siya sa panalipod sa iyang Amahan. (Salmo 91:1; Lucas 1:35) Sa tinudlong panahon, gihatag ni Jesus ang iyang kinabuhi alang sa katawhan. Apan ang panahon moabot sa dihang siya molakaw ingong usa ka gamhanang langitnong manggugubat nga armado sa lahing diwa, nga may mahait nga espada nga nagagula sa iyang baba. Niining panahona, ang mahait nga espada naghawas sa awtoridad ni Jesus aron sa pagpahayag ug pagpatuman sa mga paghukom batok sa mga kaaway ni Jehova.—Pinadayag 1:16.
Ang mga Pagbudlay sa Alagad sa Diyos Dili Makawang
7. Kang kinsa mapadapat ang mga pulong ni Jehova sa Isaias 49:3, ug ngano?
7 Karon si Jehova nagsulti niining matagnaong mga pulong: “Ikaw mao ang akong alagad, Oh Israel, ikaw ang akong pakitaan sa akong katahom.” (Isaias 49:3) Si Jehova nagtawag sa nasod sa Israel ingon nga iyang alagad. (Isaias 41:8) Apan si Jesu-Kristo maoy pangunang Alagad sa Diyos. (Buhat 3:13) Walay usa sa mga linalang sa Diyos ang makapabanaag sa “katahom” ni Jehova nga mas maayo kay kang Jesus. Busa, bisan pag sa literal gipunting sa Israel, kining mga pulonga matuod nga ikapadapat kang Jesus.—Juan 14:9; Colosas 1:15.
8. Unsay sanong sa kaugalingong katawhan sa Mesiyas kaniya, apan kang kinsa nagsalig ang Mesiyas sa paghukom sa iyang kalamposan?
8 Apan, dili ba tinuod nga si Jesus gitamay ug gisalikway sa kadaghanan sa iyang kaugalingong katawhan? Oo. Sa katibuk-an, ang nasod sa Israel wala modawat kang Jesus ingong dinihogang Alagad sa Diyos. (Juan 1:11) Ang tanang nahimo ni Jesus samtang dinhi sa yuta basin mopatim-aw nga gamayg bili, nga way-bili pa alang sa iyang mga katalirongan. Kining daw kapakyasan sa iyang ministeryo sunod nga gipaila sa Mesiyas: “Maoy sa walay kapuslanan nga ako nagbudlay. Alang sa dili tinuod ug sa kakawangan akong gihurot ang akong kusog.” (Isaias 49:4a) Kining mga pahayaga wala isulti tungod kay ang Mesiyas naluya. Tagda kon unsay sunod niyang gisulti: “Sa pagkamatuod ang akong paghukom anaa kang Jehova, ug ang akong balos anaa sa akong Diyos.” (Isaias 49:4b) Ang kalamposan sa Mesiyas pagahukman, dili sa mga tawo, kondili sa Diyos.
9, 10. (a) Unsa ang tinudlong-buluhaton sa Mesiyas gikan ni Jehova, ug unsang mga resulta ang iyang nakab-ot? (b) Sa unsang paagi ang mga Kristohanon karong adlawa madasig sa mga kasinatian sa Mesiyas?
9 Si Jesus sa panguna interesado sa pag-uyon o maayong kabubut-on sa Diyos. Diha sa tagna, ang Mesiyas nag-ingon: “Karon si Jehova, ang Usa nga nag-umol kanako gikan sa tiyan ingon nga iyahang alagad, miingon nga akong dad-on ug balik si Jacob kaniya, aron nga ngadto kaniya ang Israel matigom. Ug himayaon ako sa mga mata ni Jehova, ug ang akong Diyos mahimong akong kusog.” (Isaias 49:5) Ang Mesiyas mianhi aron pabalikon ang mga kasingkasing sa mga anak sa Israel ngadto sa ilang langitnong Amahan. Ang kadaghanan dili mosanong, apan ang pipila mosanong. Bisan pa niana, ang iyang matuod nga mga balos anaa kang Jehova nga Diyos. Ang iyang kalamposan ginasukod, dili sa tawhanong mga termino, kondili sumala sa kaugalingong mga sukdanan ni Jehova.
10 Karong adlawa, ang mga sumusunod ni Jesus usahay mobating sila nagabudlay sa walay kapuslanan. Sa pipila ka dapit, ang mga resulta sa ilang ministeryo daw way-bili kon itandi sa kadako sa trabaho ug kabudlay nga gigamit. Bisan pa niana, sila nag-antos, kay nadasig sa panig-ingnan ni Jesus. Sila mapalig-on usab sa mga pulong ni apostol Pablo, kinsa misulat: “Tungod niana, akong hinigugmang mga igsoon, magmalig-on, dili matarog, nga kanunayng puliki diha sa buluhaton sa Ginoo, nga nahibalo nga ang inyong paghago dili makawang may kalabotan sa Ginoo.”—1 Corinto 15:58.
“Kahayag sa mga Nasod”
11, 12. Sa unsang paagi ang Mesiyas maoy “kahayag sa mga nasod”?
11 Sa tagna ni Isaias, si Jehova nagdasig sa Mesiyas pinaagi sa pagpahinumdom kaniya nga ang pagka-Alagad sa Diyos dili “gamay lamang nga butang.” Si Jesus ‘magpatindog sa mga tribo ni Jacob ug magdalag balik sa mga gipanalipdan sa Israel.’ Si Jehova dugang nagpatin-aw: “Ikaw gihatag ko usab ingon nga kahayag sa mga nasod, aron ang akong kaluwasan mahimong hangtod sa kinatumyan sa yuta.” (Isaias 49:6) Sa unsang paagi si Jesus naglamdag sa mga katawhan “hangtod sa kinatumyan sa yuta” sa dihang ang iyang yutan-ong ministeryo gihimo lamang sa Israel?
12 Gipakita sa talaan sa Bibliya nga ang iya sa Diyos nga “kahayag sa mga nasod” wala mapalong sa pagbiya ni Jesus sa yuta. Mga 15 ka tuig human sa pagkamatay ni Jesus, ang mga misyonaryong si Pablo ug Bernabe nagkutlo sa tagna sa Isaias 49:6 ug nagpadapat niana ngadto sa mga tinun-an ni Jesus, ang iyang espirituwal nga mga igsoon. Sila nagpatin-aw: “Si Jehova nagsugo kanamo niining mga pulonga, ‘Gitudlo ko ikaw ingon nga kahayag sa mga nasod, aron ikaw mahimong usa ka kaluwasan hangtod sa kinatumyan sa yuta.’” (Buhat 13:47) Una pa sa iyang kamatayon, natino ni Pablo nga ang maayong balita sa kaluwasan nakaabot dili lamang sa mga Hudiyo kondili “sa tibuok kalalangan ilalom sa langit.” (Colosas 1:6, 23) Karong adlawa, ang mga nahibilin sa dinihogang mga igsoon ni Kristo nagpadayon niining buluhatona. Nga gipaluyohan sa “usa ka dakong panon” nga mokabat sa milyonmilyon, sila nagsilbing “kahayag sa mga nasod” diha sa kapig 230 ka nasod sa tibuok kalibotan.—Pinadayag 7:9.
13, 14. (a) Unsang reaksiyon ngadto sa buluhatong pagsangyaw ang nasagubang sa Mesiyas ug sa iyang mga sumusunod? (b) Unsang pagbalit-ad sa mga kahimtang ang nahitabo?
13 Si Jehova napamatud-an gayod nga mao ang kusog sa luyo sa iyang Alagad nga Mesiyas, sa dinihogang mga igsoon sa Mesiyas, ug sa tanang sakop sa dakong panon si kinsa, kauban nila, nagpadayon sa buluhatong pagwali sa maayong balita. Matuod, sama kang Jesus, ang iyang mga tinun-an nag-atubang sa pag-ayad ug pagsupak. (Juan 15:20) Apan sa iyang gitakdang panahon, si Jehova kanunayng magpahinabo nga mabalit-ad ang mga kahimtang aron luwason ug gantihan ang iyang maunongong mga alagad. Mahitungod sa Mesiyas, kinsa “tinamay diha sa kalag” ug “gikasilagan sa nasod,” si Jehova nagsaad: “Ang mga hari makakita ug tinong manindog, ug ang mga prinsipe, ug sila mangyukbo, tungod kang Jehova, kinsa kasaligan, ang Balaang Usa sa Israel, nga nagpili kanimo.”—Isaias 49:7.
14 Sa ulahi si apostol Pablo nagsulat ngadto sa mga Kristohanon sa Filipos bahin sa maong gitagnang pagbalit-ad sa mga kahimtang. Gibatbat niya si Jesus ingong usa nga gipakaulawan diha sa usa ka kahoy sa pagsakit apan unya gibayaw sa Diyos. Si Jehova mihatag sa iyang Alagad sa “usa ka labaw nga katungdanan ug malulotong naghatag kaniya sa ngalan nga labaw sa tanang uban pa nga ngalan, aron nga sa ngalan ni Jesus moluhod ang tanang tuhod.” (Filipos 2:8-11) Ang matinumanong mga sumusunod ni Kristo napasidan-an nga sila usab pagalutoson. Apan sama sa Mesiyas, sila gipasaligan sa maayong kabubut-on ni Jehova.—Mateo 5:10-12; 24:9-13; Marcos 10:29, 30.
“Panahon nga Ilabinang Dalawaton”
15. Unsang linain nga “panahon” ang gihisgotan sa tagna ni Isaias, ug unsay gipasabot niini?
15 Ang tagna ni Isaias nagpadayon uban ang pahayag nga hinungdanon gayod. Si Jehova nagsulti sa Mesiyas: “Sa usa ka panahon sa maayong kabubut-on ako mitubag kanimo, ug sa usa ka adlaw sa kaluwasan ako mitabang kanimo; ug ako nagpadayon pagpanalipod kanimo aron akong ikahatag ka ingong usa ka pakigsaad alang sa katawhan.” (Isaias 49:8a) Ang susamang tagna nahitala sa Salmo 69:13-18. Ang salmista naghisgot sa “usa ka panahon sa maayong kabubut-on,” nga nagagamit sa pamulong nga “usa ka panahon nga dalawaton.” Kining mga terminoha nagpasabot nga ang maayong kabubut-on ug panalipod ni Jehova ihatag sa linain nga paagi apan sa usa lamang ka tino ug temporaryong yugto.
16. Unsa ang panahon sa maayong kabubut-on ni Jehova alang sa karaang Israel?
16 Kanus-a ba kanang maong panahon sa maayong kabubut-on? Sa orihinal nga kahimtang, ang mga pulong maoy bahin sa usa ka tagna sa pagpasig-uli ug nagtagna sa pagpauli sa mga Hudiyo gikan sa pagkadestiyero. Ang nasod sa Israel nakasinatig usa ka panahon sa maayong kabubut-on sa dihang sila nakahimo sa ‘pagpahiuli sa maayong kahimtang sa yuta’ ug pagpanag-iya pag-usab sa ilang “biniyaang mga kabilin.” (Isaias 49:8b) Sila dili na “mga binilanggo” sa Babilonya. Panahon sa ilang pagpanaw sa pagpauli, gitino ni Jehova nga sila dili na “gutomon” o “uhawon,” ni ang “naglagiting nga kainit o ang adlaw mohampak kanila.” Ang natibulaag nga mga Israelinhon nagpanon sa pagpauli ngadto sa ilang yutang-natawhan “gikan sa halayo . . . , gikan sa amihanan ug gikan sa kasadpan.” (Isaias 49:9-12) Bisan pa sa maong unang makapaukyab nga katumanan, ang Bibliya nagpakitang adunay gilugwayang mga pagpadapat niining tagnaa.
17, 18. Unsang panahon sa maayong kabubut-on ang gitudlo ni Jehova panahon sa unang siglo?
17 Una, sa panahong natawo si Jesus, ang mga manulonda nagmantala sa pakigdait ug maayong kabubut-on, o pag-uyon, sa Diyos alang sa mga tawo. (Lucas 2:13, 14) Kining maayong kabubut-on gitanyag, dili ngadto sa mga tawo sa katibuk-an, kondili ngadto lamang niadtong nagpasundayag ug pagtuo kang Jesus. Sa ulahi gibasa ni Jesus sa publiko ang tagna sa Isaias 61:1, 2 ug gipadapat kana sa iyang kaugalingon ingong ang magmamantala sa “dalawatong tuig ni Jehova.” (Lucas 4:17-21) Si apostol Pablo naghisgot kang Kristo ingong nakadawat sa linaing panalipod ni Jehova sa mga adlaw sa iyang pagkatawhanon. (Hebreohanon 5:7-9) Busa kining panahon sa maayong kabubut-on mapadapat ngadto sa pag-uyon sa Diyos kang Jesus panahon sa iyang kinabuhi ingong usa ka tawo.
18 Bisan pa niana, adunay dugang nga pagpadapat niining tagnaa. Human sa pagkutlo sa mga pulong ni Isaias bahin sa panahon sa maayong kabubut-on, si Pablo nagpadayon sa pag-ingon: “Tan-awa! Karon mao na ang panahon nga ilabinang dalawaton. Tan-awa! Karon mao na ang adlaw sa kaluwasan.” (2 Corinto 6:2) Si Pablo nagsulat niining mga pulonga 22 ka tuig human sa pagkamatay ni Jesus. Sumala sa ebidensiya, sa pagkatawo sa Kristohanong kongregasyon sa Pentekostes sa 33 K.P., gilugwayan ni Jehova ang iyang tuig sa maayong kabubut-on aron malakip ang dinihogang mga sumusunod ni Kristo.
19. Sa unsang paagi makapahimulos ang mga Kristohanon karong adlawa sa panahon sa maayong kabubut-on ni Jehova?
19 Unsa na man ang mga sumusunod ni Jesus karong adlawa nga dili dinihogan ingong mga manununod sa langitnong gingharian sa Diyos? Kadtong may yutan-ong paglaom makapahimulos ba niining dalawatong panahon? Oo. Ang basahong Pinadayag sa Bibliya nagpakitang kini maoy usa ka panahon sa maayong kabubut-on sa bahin ni Jehova alang sa dakong panon nga mogula gikan “sa dakong kasakitan” aron matagamtam ang kinabuhi sa usa ka paraisong yuta. (Pinadayag 7:13-17) Busa, ang tanang Kristohanon makapahimulos niining limitadong yugto diin si Jehova nagatanyag sa iyang maayong kabubut-on ngadto sa dili-hingpit nga mga tawo.
20. Sa unsang paagi malikayan sa mga Kristohanon nga sipyaton ang katuyoan sa dili-takos nga kalulot ni Jehova?
20 Giunhan ni apostol Pablo ang pagmantala sa dalawatong panahon ni Jehova pinaagi sa usa ka pasidaan. Siya nangaliyupo sa mga Kristohanon “nga dili dawaton ang dili-takos nga kalulot sa Diyos ug sipyaton ang katuyoan niini.” (2 Corinto 6:1) Busa, ang mga Kristohanon magpahimulos sa tanang kahigayonan aron pahimut-an ang Diyos ug buhaton ang iyang kabubut-on. (Efeso 5:15, 16) Makaayo kanila ang pagsunod sa tambag ni Pablo: “Pagbantay, mga igsoon, kay basin maugmad diha kang bisan kinsa kaninyo ang daotang kasingkasing nga walay pagtuo pinaagi sa pagpahilayo sa buhi nga Diyos; apan magpadayon sa pagtinambagay ang usag usa sa matag adlaw, samtang matawag pa kini nga ‘Karong adlawa,’ kay basin may si bisan kinsa kaninyo nga magmatig-a tungod sa malimbongong gahom sa sala.”—Hebreohanon 3:12, 13.
21. Unsang makalipay nga pahayag ang nagtapos sa unang bahin sa Isaias kapitulo 49?
21 Sa pagkatapos sa matagnaong mga pulong tali ni Jehova ug sa iyang Mesiyas, gilitok ni Isaias ang malipayong pahayag: “Paghugyaw, kamong mga langit, ug pagmalipayon, ikaw yuta. Magmaya ang mga bukid uban ang singgit sa kasadya. Kay si Jehova naghupay sa iyang katawhan, ug gipakitaan niyag kaluoy ang mga sinakit nga iyang kaugalingon.” (Isaias 49:13) Pagkanindot nga mga pulong sa paghupay alang sa mga Israelinhon sa karaan ug alang sa dakong Alagad ni Jehova, si Jesu-Kristo, ingon man alang sa dinihogang mga alagad ni Jehova ug sa ilang kauban nga “ubang mga karnero” karong adlawa!—Juan 10:16.
Si Jehova Dili Malimot sa Iyang Katawhan
22. Giunsa pagpasiugda ni Jehova nga siya dili gayod malimot sa iyang katawhan?
22 Si Isaias karon nagpadayon sa pagtaho sa mga pahayag ni Jehova. Siya nagtagna nga ang nadestiyerong mga Israelinhon lagmit nga kapoyon ug mawad-ag paglaom. Si Isaias nag-ingon: “Ang Zion nag-ingon: ‘Si Jehova mibiya kanako, ug si Jehova nalimot kanako.’” (Isaias 49:14) Tinuod ba kini? Gibiyaan ba ni Jehova ang iyang katawhan ug gikalimtan sila? Nga nagsilbing tigpamaba ni Jehova, si Isaias nagpadayon: “Malimot ba ang usa ka asawa sa iyang masuso nga sa ingon dili niya kaluy-an ang anak sa iyang tiyan? Bisan kining mga babayhana makalimot, apan ako mismo dili makalimot kanimo.” (Isaias 49:15) Pagkamahigugmaong tubag gikan ni Jehova! Ang gugma sa Diyos alang sa iyang katawhan mas dako kay sa gugma sa usa ka inahan alang sa iyang anak. Siya kanunayng nagahunahuna sa iyang mga alagad nga maunongon. Siya mahinumdom kanila nga samag ang ilang mga ngalan nakulit diha sa iyang mga kamot: “Tan-awa! Diha sa akong mga palad ikaw akong gikulit. Ang imong mga paril anaa kanunay sa akong atubangan.”—Isaias 49:16.
23. Sa unsang paagi gidasig ni Pablo ang mga Kristohanon sa pagsalig nga si Jehova dili malimot kanila?
23 Sa iyang sulat ngadto sa mga taga-Galacia, si apostol Pablo nag-awhag sa mga Kristohanon: “Dili kita mohunong sa pagbuhat ug maayo, kay sa takdang panahon kita moani kon kita dili molunga.” (Galacia 6:9) Ngadto sa mga Hebreohanon siya misulat sa makapadasig nga mga pulong: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” (Hebreohanon 6:10) Dili gayod kita angayng mobati nga gikalimtan ni Jehova ang iyang katawhan. Sama sa karaang Zion, ang mga Kristohanon adunay maayong katarongan nga magmaya ug mapailobong maghulat kang Jehova. Siya lig-ong nangupot sa mga termino sa iyang pakigsaad ug mga saad.
24. Sa unsang paagi ang Zion mapasig-uli, ug unsang mga pangutana ang iyang isukna?
24 Si Jehova, pinaagi ni Isaias, nagtanyag ug dugang nga paghupay. Kadtong “naglumpag [sa Zion],” ang mga Babilonyanhon kaha o ang apostatang mga Hudiyo, dili na usa ka hulga. Ang “mga anak nga lalaki” sa Zion, ang nadestiyerong mga Hudiyo nga nagpabiling maunongon kang Jehova, “nagdali.” Sila ‘matigom.’ Kay nagdali sa pagpauli sa Jerusalem, ang napasig-uli nga mga Hudiyo mahimong mga pahiyas sa ilang kaulohang siyudad, sama nga ang “usa ka pangasaw-onon” nasul-oban ug “mga pahiyas.” (Isaias 49:17, 18) Ang mga dapit sa Zion “nagun-ob.” Hunahunaa ang iyang katingala sa dihang sa kalit siya adunay daghan kaayong mga molupyo nga ang iyang dapit nga puy-anan daw nahuot. (Basaha ang Isaias 49:19, 20.) Natural lamang, siya nangutana kon diin gikan kining tanang anak: “Ikaw sa tino moingon sa imong kasingkasing, ‘Kinsay nahimong amahan niini nila alang kanako, sanglit ako usa man ka babaye nga namatyan sa mga anak ug baog, nadestiyero ug gidalang binilanggo? Kon bahin niini nila, kinsay nagpadako kanila? Tan-awa! Ako gibiyaang nag-inusara. Kini sila—diin man sila gikan?’” (Isaias 49:21) Pagkamalipayong kahimtang alang sa kanhi awaaw nga Zion!
25. Sa modernong kapanahonan, unsang pagpasig-uli ang nasinati sa espirituwal nga Israel?
25 Kining mga pulonga adunay modernong katumanan. Sa lisod nga katuigan sa unang gubat sa kalibotan, ang espirituwal nga Israel nakasinatig usa ka yugto sa pagkabiniyaan ug pagkabihag. Apan siya napasig-uli ug anaa sa usa ka espirituwal nga paraiso. (Isaias 35:1-10) Sama sa kanhi nalumpag nga siyudad nga gibatbat ni Isaias, siya nalipay—ingnon nato—nga siya naghitak sa masadyaon, aktibong mga magsisimba ni Jehova.
“Usa ka Timaan Alang sa mga Katawhan”
26. Unsang direksiyon ang gihatag ni Jehova alang sa iyang napagawas nga katawhan?
26 Sa matagnaong paagi, si Jehova karon nagdala kang Isaias ngadto sa panahon nga ang Iyang katawhan mapagawas na gikan sa Babilonya. Makadawat ba silag balaang direksiyon? Si Jehova nagtubag: “Tan-awa! Akong iisa ang akong kamot ngadto sa mga nasod, ug ngadto sa mga katawhan akong ipataas ang akong timaan. Ug ilang dad-on ang imong mga anak nga lalaki diha sa sabakan, ug diha sa abaga ilang dad-on ang imong mga anak nga babaye.” (Isaias 49:22) Sa orihinal nga katumanan, ang Jerusalem, kanhi ang sentro sa kagamhanan ug ang puwesto sa templo ni Jehova, mahimong “timaan” ni Jehova. Bisan ang inila ug gamhanang mga tawo sa ubang mga nasod, sama sa “mga hari” ug “mga prinsesa,” mitabang sa mga Israelinhon sa ilang panaw sa pagpauli. (Isaias 49:23a) Ang Persianong mga hari nga Ciro ug Artajerjes Longimanus ug ilang mga panimalay nahilakip sa maong mga mitabang. (Esdras 5:13; 7:11-26) Ug ang mga pulong ni Isaias adunay dugang pa nga pagpadapat.
27. (a) Sa mas dakong katumanan, sa unsang “timaan” magpanon ang mga katawhan? (b) Unsay moresulta sa dihang ang tanang nasod mapugos sa pagyukbo ngadto sa pagmando sa Mesiyas?
27 Ang Isaias 11:10 naghisgot bahin sa “usa ka timaan alang sa mga katawhan.” Gipadapat ni apostol Pablo kining mga pulonga kang Kristo Jesus. (Roma 15:8-12) Busa, sa mas dakong katumanan, si Jesus ug ang iyang dinihogan-sa-espiritung kaubang mga magmamando maoy “timaan” ni Jehova nga nganha kanila magpanon ang mga katawhan. (Pinadayag 14:1) Sa gitakdang panahon ang tanang katawhan sa yuta—bisan ang mga magmamandong matang karong adlawa—kinahanglang moyukbo ngadto sa pagmando sa Mesiyas. (Salmo 2:10, 11; Daniel 2:44) Ang resulta? Si Jehova nag-ingon: “Ikaw makaila gayod nga ako mao si Jehova, kang kinsa kadtong mga nagalaom kanako dili mangaulaw.”—Isaias 49:23b.
“Karon ang Atong Kaluwasan Mas Duol Na”
28. (a) Pinaagi sa unsang mga pulong nga si Jehova sa makausa pa nagpasalig sa iyang katawhan nga sila pagawason? (b) Unsang panaad ang nabatonan pa ni Jehova maylabot sa iyang katawhan?
28 Ang pipila niadtong nadestiyero sa Babilonya tingali mahibulong, ‘Posible ba gayod nga pagawason ang Israel?’ Si Jehova nagtagad nianang pangutanaha pinaagi sa pagsukna: “Kadto bang mga kinuha na pagakuhaon gikan sa usa ka tawong gamhanan, o makaikyas ba ang hugpong sa mga binihag gikan sa malupigon?” (Isaias 49:24) Ang tubag maoy oo. Si Jehova nagpasalig kanila: “Bisan ang hugpong sa mga binihag sa tawong gamhanan pagakuhaon, ug kadtong gikuha na sa malupigon makaikyas.” (Isaias 49:25a) Pagkamakahupay nga pasalig! Dugang pa, ang maayong kabubut-on ni Jehova alang sa iyang katawhan naggikan sa lig-ong panaad nga panalipdan sila. Sa tinong mga termino, siya nag-ingon: “Si bisan kinsa nga makig-away batok kanimo ako makig-away, ug ang imong mga anak akong luwason.” (Isaias 49:25b) Ang maong panaad balido gihapon. Sumala sa natala sa Zacarias 2:8, si Jehova nag-ingon ngadto sa iyang katawhan: “Siya nga nagahilabot kaninyo nagahilabot sa kalimutaw sa akong mata.” Tinuod, kita karon nagpahimulos sa usa ka yugto sa maayong kabubut-on nga sulod niining panahona ang mga katawhan sa tibuok yuta adunay kahigayonan sa pagpanon ngadto sa espirituwal nga Zion. Bisan pa niana, matapos ra ang maong yugto sa maayong kabubut-on.
29. Unsang makapasubong palaaboton ang naghulat niadtong modumili sa pagsugot kang Jehova?
29 Unsay mahitabo niadtong magahiong modumili sa pagsugot kang Jehova ug magalutos pa gani sa iyang mga magsisimba? Siya nag-ingon: “Pakan-on ko sa ilang kaugalingong unod kadtong nagdaogdaog kanimo; ug ingon sa tam-is nga bino sila mangahubog sa ilang kaugalingong dugo.” (Isaias 49:26a) Usa ka makapasubong palaaboton! Ang maong magahiong mga magsusupak walay malungtarong kaugmaon. Sila pagalaglagon. Busa, pinaagi sa pagluwas sa iyang katawhan ug pinaagi sa paglaglag sa ilang mga kaaway, si Jehova madayag nga usa ka Manluluwas. “Ang tanang unod mahibalo gayod nga ako, si Jehova, mao ang imong Manluluwas ug imong Manlulukat, ang Gamhanang Usa ni Jacob.”—Isaias 49:26b.
30. Unsang mga buhat sa pagluwas ang gihimo ni Jehova alang sa iyang katawhan, ug unsa pay iyang buhaton?
30 Kanang mga pulonga unang napadapat sa dihang gigamit ni Jehova si Ciro aron sa pagpagawas sa Iyang katawhan gikan sa pagkaulipon sa Babilonya. Kana samang napadapat sa 1919 sa dihang gigamit ni Jehova ang iyang naentronong Anak, si Jesu-Kristo, aron sa pagpagawas sa Iyang katawhan gikan sa espirituwal nga pagkaulipon. Busa, ang Bibliya naghisgot nga si Jehova ug si Jesus maoy mga manluluwas. (Tito 2:11-13; 3:4-6) Si Jehova maoy atong Manluluwas, ug si Jesus, ang Mesiyas, maoy iyang “Pangulong Ahente.” (Buhat 5:31) Sa pagkamatuod, ang mga buhat sa pagluwas sa Diyos pinaagi ni Jesu-Kristo maoy kahibulongan. Pinaagi sa maayong balita, si Jehova magapagawas sa mga tawong may matarong nga kasingkasing gikan sa pagkaulipon sa bakak nga relihiyon. Pinaagi sa halad lukat, iyang pagaluwason sila gikan sa pagkaulipon sa sala ug kamatayon. Sa 1919 iyang giluwas ang mga igsoon ni Jesus gikan sa espirituwal nga pagkaulipon. Ug sa kusog-nagsingabot nga gubat sa Armagedon, iyang pagaluwason ang usa ka dakong panon sa matinumanong mga tawo gikan sa kalaglagan nga modangat sa mga makasasala.
31. Unsay angayng pagsanong sa mga Kristohanon sa pagkahimong mga dumadawat sa maayong kabubut-on sa Diyos?
31 Nan, pagkatalagsaong pribilehiyo nga mahimong mga dumadawat sa maayong kabubut-on sa Diyos! Hinaot kitang tanan magagamit nga maalamon niining dalawatong panahon. Ug hinaot kita molihok nga nahiuyon sa pagkadinalian sa atong mga panahon, nga magpatalinghog sa mga pulong ni Pablo ngadto sa mga taga-Roma: “Kamo nasayod sa panahon, nga takna na aron kamo momata gikan sa pagkatulog, kay karon ang atong kaluwasan mas duol na kay sa dihang kita nahimong mga magtutuo. Lawom na kaayo ang kagabhion; ang adlaw nagkaduol na. Busa hukason nato ang mga buhat nga iya sa kangitngit ug isul-ob nato ang mga hinagiban sa kahayag. Ingon sa maadlaw molakaw kita nga may kahapsay, dili sa hudyaka ug sa paghuboghubog, dili sa ginadiling pakigdulog ug sa malaw-ayng panggawi, dili sa panag-away ug sa pangabugho. Kondili isul-ob ang Ginoong Jesu-Kristo, ug ayaw paglaraw daan alang sa mga tinguha sa unod.”—Roma 13:11-14.
32. Unsang mga pasalig ang nabatonan sa katawhan sa Diyos?
32 Si Jehova magpadayon sa pag-uyon niadtong magapatalinghog sa iyang tambag. Hatagan niya silag kusog ug mga katakos nga gikinahanglan aron sa pagtuman sa pagwali sa maayong balita. (2 Corinto 4:7) Gamiton ni Jehova ang iyang mga alagad sama sa iyang paggamit sa ilang Pangulo, si Jesus. Iyang himoon ang ilang baba nga “sama sa usa ka mahait nga espada” aron kini makaabot sa mga kasingkasing sa maaghop uban ang mensahe sa maayong balita. (Mateo 28:19, 20) Iyang panalipdan ang iyang katawhan diha “sa anino sa iyang kamot.” Sama sa “usa ka pinasinaw nga pana,” sila pagatagoan diha “sa iyang kaugalingong udyongan.” Sa pagkatinuod, dili gayod biyaan ni Jehova ang iyang katawhan!—Salmo 94:14; Isaias 49:2, 15.
[Footnote]
a “Si Satanas, kay sa walay duhaduha nakaila kang Jesus ingong Anak sa Diyos ug ang usa nga gitagna nga magsamad kaniya diha sa ulo (Gen 3:15), nagbuhat sa tanan nga iyang maarangan sa paglaglag kang Jesus. Apan, sa gipahibalo ang pagsamkon ni Maria kang Jesus, ang manulondang si Gabriel misulti kaniya: ‘Pagakunsaran ikaw sa balaang espiritu, ug pagalandongan ikaw sa gahom sa Labing Hataas. Tungod niana usab ang matawo pagatawgong balaan, Anak sa Diyos.’ (Luc 1:35) Gipanalipdan ni Jehova ang iyang Anak. Ang mga paningkamot nga laglagon si Jesus sa dihang masuso pa wala molampos.”—Insight on the Scriptures, Tomo 2, panid 868, gipatik sa Watchtower Bible and Tract Society of New York, Inc.
[Hulagway sa panid 138]
Ang Mesiyas maoy sama sa “usa ka pinasinaw nga pana” diha sa udyongan ni Jehova
[Hulagway sa panid 141]
Ang Mesiyas nahimong “kahayag sa mga nasod”
[Hulagway sa panid 147]
Ang gugma sa Diyos alang sa iyang katawhan mas dako kay sa gugma sa usa ka inahan alang sa iyang anak