Ang Ubang mga Karnero ug ang Bag-ong Pakigsaad

“Ang mga langyaw . . . , silang tanan nga nagabantay sa igpapahulay aron dili magpanamastamas niini ug nagahawid sa akong pakigsaad, ako usab silang dad-on ngadto sa akong bukid nga balaan.”​—ISAIAS 56:​6, 7.

 1. (a) Sumala sa panan-awon ni Juan, unsay nalampos samtang gipugngan ang mga hangin sa paghukom ni Jehova? (b) Unsang talagsaong panon ang nakit-an ni Juan?

SA IKAUPAT nga panan-awon sa basahong Pinadayag, nakit-an ni apostol Juan nga gipugngan ang malaglagong mga hangin sa paghukom ni Jehova samtang ang pagtimre sa tanang membro sa “Israel sa Diyos” gikompleto pa. Sila ang unang panalanginan pinaagi ni Jesus, ang pangunang bahin sa binhi ni Abraham. (Galacia 6:​16; Genesis 22:​18; Pinadayag 7:​1-4) Sa mao rang panan-awon, nakit-an ni Juan ang “usa ka dakong panon sa katawhan, nga walay tawong makaihap, gikan sa tanang kanasoran ug mga tribo ug katawhan ug mga dila . . . , sa makusog nga tingog nagasigig singgit, nga nag-ingon: ‘Ang kaluwasan utang namo sa atong Diyos, nga naglingkod sa trono, ug sa Kordero.’” (Pinadayag 7:​9, 10) Sa pag-ingon, “Ang kaluwasan utang namo . . . sa Kordero,” ang dakong panon nagpakita nga gipanalanginan usab sila pinaagi sa Binhi ni Abraham.

 2. Kanus-a motungha ang dakong panon, ug sa unsang paagi nailhan kini?

² Kining dakong panon nailhan na niadtong 1935, ug karong adlawa mokabat kinig kapin ug lima ka milyon. Kay gipatikan aron makalabang-buhi sa dakong kasakitan, ang mga membro niini pagabulagon alang sa kinabuhing walay kataposan iniglain ni Jesus sa “mga karnero” gikan sa “mga kanding.” Ang mga Kristohanong iya sa dakong panon nahiapil sa “ubang mga karnero” sa ilustrasyon ni Jesus sa mga panon sa karnero. Naglaom sila nga mabuhing walay kataposan sa usa ka paraisong yuta.​—Mateo 25:​31-46; Juan 10:​16; Pinadayag 21:​3, 4.

 3. Unsay kalainan sa dinihogang mga Kristohanon ug sa ubang mga karnero kon bahin sa bag-ong pakigsaad?

³ Alang sa 144,000, ang panalangin sa Abrahamikong pakigsaad ipaigo pinaagi sa bag-ong pakigsaad. Ingong mga sumasalmot sa maong pakigsaad, sila “nailalom sa dili-takos nga kalulot” ug ‘nailalom sa balaod labot kang Kristo.’ (Roma 6:​15; 1 Corinto 9:21) Busa, ang 144,000 ka membro sa Israel sa Diyos lang ang tukmang makaambit sa mga emblema panahon sa Memoryal sa kamatayon ni Jesus, ug uban kanila lang gihimo ni Jesus ang iyang pakigsaad alang sa usa ka Gingharian. (Lucas 22:​19, 20, 29) Ang mga membro sa dakong panon maoy dili mga sumasalmot sa bag-ong pakigsaad. Bisan pa niana, sila nakig-uban sa Israel sa Diyos ug nagpuyo uban nila diha sa ilang “yuta.” (Isaias 66:8) Busa makataronganon ang pag-ingong sila usab nailalom sa dili-takos nga kalulot ni Jehova ug nailalom sa balaod labot kang Kristo. Bisan pag dili mga sumasalmot sa bag-ong pakigsaad, sila mga benepisyaryo niini.

“Mga Langyaw” ug “ang Israel sa Diyos”

4, 5. (a) Sumala kang Isaias, unsang grupoha ang mag-alagad kang Jehova? (b) Sa unsang paagi ang Isaias 56:​6, 7 natuman diha sa dakong panon?

⁴ Si propetang Isaias misulat: “Ang mga langyaw nga mitipon kang Jehova aron pag-alagad kaniya ug paghigugma sa ngalan ni Jehova, aron mahimong mga alagad niya, silang tanan nga nagabantay sa igpapahulay aron dili magapanamastamas niini ug nagahawid sa akong pakigsaad, ako usab silang dad-on ngadto sa akong bukid nga balaan ug papagmayaon ko sila sulod sa akong balayng ampoanan. Ang ilang tibuok nga mga halad-nga-sinunog ug ang ilang mga halad pagadawaton ibabaw sa akong halaran.” (Isaias 56:​6, 7) Sa Israel, kini nagpasabot nga ang “mga langyaw,” mga di-Israelinhon, makasimba kang Jehova​—pinaagi sa paghigugma sa iyang ngalan, pagsunod sa mga kondisyon sa Balaodnong pakigsaad, pagbantay sa Igpapahulay, ug pagtanyag ug mga halad sa templo, ang “balayng ampoanan” sa Diyos.​—Mateo 21:13.

⁵ Sa atong adlaw, “ang mga langyaw nga mitipon kang Jehova” mao ang dakong panon. Kini sila nag-alagad kang Jehova nga nakig-uban sa Israel sa Diyos. (Zacarias 8:23) Sila nagtanyag sa samang dalawatong mga halad nga sama sa Israel sa Diyos. (Hebreohanon 13:​15, 16) Sila nagsimba diha sa espirituwal nga templo sa Diyos, sa iyang “balayng ampoanan.” (Itandi ang Pinadayag 7:15.) Nagbantay ba sila sa senemanang Igpapahulay? Ang mga dinihogan o ang ubang mga karnero wala sugoa sa pagbuhat niini. (Colosas 2:​16, 17) Bisan pa niana, si Pablo miingon ngadto sa dinihogang Hebreohanong mga Kristohanon: “Adunay nagapabilin nga usa ka pagpahulay sa igpapahulay alang sa katawhan sa Diyos. Kay ang tawo nga nakasulod na sa kapahulayan sa Diyos nakapahulay na usab mismo gikan sa iyang kaugalingong mga buhat, sama sa gibuhat sa Diyos gikan sa iyang kaugalingon nga mga buhat.” (Hebreohanon 4:​9, 10) Kadtong mga Hebreohanon misulod niining “pagpahulay sa igpapahulay” sa nagpailalom sila sa “pagkamatarong sa Diyos” ug mipahulay gikan sa pagpaningkamot sa pagpakamatarong sa ilang kaugalingon pinaagi sa mga buhat sa Balaod. (Roma 10:​3, 4) Ang dinihogang Hentil nga mga Kristohanon nagpahimulos sa samang pagpahulay pinaagi sa pagpailalom sa ilang kaugalingon sa pagkamatarong ni Jehova. Ang dakong panon miduyog kanila sa maong pagpahulay.

 6. Sa unsang paagi ang ubang mga karnero karong adlawa naghawid sa bag-ong pakigsaad?

⁶ Dugang pa, ang ubang mga karnero naghawid sa bag-ong pakigsaad sama nga ang mga langyaw sa kakaraanan naghawid sa Balaodnong pakigsaad. Sa unsang paagi? Dili pinaagi sa pagkahimong mga sumasalmot niini kondili pinaagi sa pagpailalom sa mga balaod nga nalangkit niini ug nakabatog kaayohan gikan sa mga kahikayan niini. (Itandi ang Jeremias 31:​33, 34.) Sama sa ilang dinihogang mga kauban, ang ubang mga karnero nakabaton sa balaod ni Jehova nga sinulat ‘diha sa ilang kasingkasing.’ Sila dulot nga nahigugma ug nagbantay sa mga sugo ug mga prinsipyo ni Jehova. (Salmo 37:​31; 119:97) Sama sa dinihogang mga Kristohanon, sila nakaila kang Jehova. (Juan 17:3) Unsa na man ang pagtuli? Mga 1,500 ka tuig sa wala pa himoa ang bag-ong pakigsaad, giaghat ni Moises ang mga Israelinhon: “Kinahanglang inyong tulion ang yamis sa inyong mga kasingkasing.” (Deuteronomio 10:​16; Jeremias 4:4) Bisan pag ang pinugos nga unodnong pagtuli nahanaw na duyog sa Balaod, ang mga dinihogan ug ang ubang mga karnero kinahanglang ‘magtuli’ sa ilang mga kasingkasing. (Colosas 2:11) Sa kataposan, si Jehova nagpasaylo sa kasaypanan sa ubang mga karnero pinasukad sa kang Jesus nga inulang “dugo sa pakigsaad.” (Mateo 26:​28; 1 Juan 1:​9; 2:2) Ang Diyos wala magsagop kanila ingong espirituwal nga mga anak, sama sa iyang gihimo sa 144,000. Apan siya nagpahayag sa ubang mga karnero nga matarong, sa diwa nga si Abraham gipahayag nga matarong ingong higala sa Diyos.​—Mateo 25:​46; Roma 4:​2, 3; Santiago 2:23.

 7. Unsang palaaboton ang nabuksan alang sa ubang mga karnero karong adlawa, kinsa gipahayag nga matarong nga sama kang Abraham?

⁷ Alang sa 144,000, ang pagkagipahayag nga matarong nagbukas sa dalan sa ilang pagkabaton sa paglaom nga magmando uban kang Jesus sa langitnong Gingharian. (Roma 8:​16, 17; Galacia 2:16) Alang sa ubang mga karnero, ang pagkagipahayag nga matarong ingong mga higala sa Diyos nagtugot kanila sa paghambin sa paglaom sa kinabuhing walay kataposan diha sa paraisong yuta​—pinaagi kaha sa paglabang-buhi sa Armagedon ingong bahin sa dakong panon o pinaagi sa ‘pagkabanhaw sa mga matarong.’ (Buhat 24:15) Pagkatalagsaong pribilehiyo nga makabaton sa maong paglaom ug pagkahimong higala sa Soberano sa uniberso, nga mahimong “usa ka dinapit diha sa [iyang] tolda”! (Salmo 15:​1, 2) Oo, ang mga dinihogan ug ang ubang mga karnero gipanalanginan sa kahibulongang paagi pinaagi ni Jesus, ang Binhi ni Abraham.

Mas Dakong Adlaw sa Pagtabon sa Sala

 8. Unsay gilandongan sa mga halad sa Adlaw sa Pagtabon sa Sala ubos sa Balaod?

⁸ Sa naghisgot sa bag-ong pakigsaad, gipahinumdoman ni Pablo ang iyang mga magbabasa sa tinuig nga Adlaw sa Pagtabon sa Sala ubos sa Balaodnong pakigsaad. Niadtong adlawa, gitanyag ang separadong mga halad​—ang usa alang sa saserdotehanong tribo ni Levi ug ang lain alang sa 12 ka di-saserdotehanong mga tribo. Kini dugay nang gipatin-aw ingong naglandong sa dakong halad ni Jesus nga makahatag ug kaayohan sa 144,000 nga may langitnong paglaom ug sa minilyong adunay yutan-ong paglaom.a Gipakita ni Pablo nga sa katumanan, ang mga kaayohan sa halad ni Jesus ipadapat pinaagi sa mas dakong Adlaw sa Pagtabon sa Sala ubos sa bag-ong pakigsaad. Ingong Hataas nga Saserdote sa maong mas dakong adlaw, gihatag ni Jesus ang iyang hingpit nga kinabuhi ingong usa ka halad sa pagtabon sa sala aron maangkon ang “kaluwasang walay kataposan” alang sa mga tawo.​—Hebreohanon 9:​11-24.

 9. Kay anaa sa bag-ong pakigsaad, unsay dawaton sa Hebreohanong dinihogang mga Kristohanon?

⁹ Daghang Hebreohanong mga Kristohanon sa unang siglo sa gihapon maoy “masiboton sa [Moisesnong] Balaod.” (Buhat 21:20) Nan, tukmang si Pablo nagpahinumdom kanila: “[Si Jesus] usa ka tigpataliwala sa usa ka bag-ong pakigsaad, aron nga, tungod kay nahitabo man ang usa ka kamatayon alang sa ilang kagawasan pinaagi sa lukat gikan sa mga kalapasan ilalom sa unang pakigsaad, ang mga gipangtawag makadawat sa saad sa walay-kataposang panulundon.” (Hebreohanon 9:15) Ang bag-ong pakigsaad nagpagawas sa Hebreohanong mga Kristohanon gikan sa daang pakigsaad, nga nagpadayag sa ilang pagkamakasasala. Tungod sa bag-ong pakigsaad, sila makadawat sa “saad sa walay-kataposang [langitnong] panulondon.”

10. Tungod sa unsa nga ang mga dinihogan ug ubang mga karnero nagpasalamat sa Diyos?

¹⁰ “Ang tanan” nga “nagapasundayag ug pagtuo sa Anak” makabatog kaayohan sa halad lukat. (Juan 3:​16, 36) Si Pablo miingon: “Ang Kristo gitanyag makausa alang sa tanang panahon aron sa pagpas-an sa mga sala sa daghan; ug sa ikaduhang higayon nga siya mopakita kini mao unyay bulag sa sala ug ngadto kanilang matinuorong nagapangita kaniya alang sa ilang kaluwasan.” (Hebreohanon 9:28) Karong adlawa, kadtong madasigong nagapangita kang Jesus naglakip sa buhi pang dinihogang mga Kristohanon nga iya sa Israel sa Diyos ug ang minilyong naglangkob sa dakong panon, kinsa nakabaton usab ug walay-kataposang panulondon. Ang duruha ka matang nagpasalamat sa Diyos tungod sa bag-ong pakigsaad ug tungod sa nagahatag-kinabuhing mga panalangin nga nalangkit niini, lakip ang mas dakong Adlaw sa Pagtabon sa Sala ug ang ministeryo sa Hataas nga Saserdote, si Jesus, diha sa langitnong Labing Balaan.

Puliki sa Sagradong Pag-alagad

11. Tungod kay ang mga tanlag nahinloan na pinaagi sa halad ni Jesus, unsay malipayong ginabuhat sa mga dinihogan ug sa ubang mga karnero?

¹¹ Sa iyang sulat ngadto sa mga Hebreohanon, gipasiugda ni Pablo ang labaw nga bili sa halad ni Jesus diha sa kahikayan sa bag-ong pakigsaad kon itandi sa mga halad tungod sa sala ubos sa daang pakigsaad. (Hebreohanon 9:​13-15) Ang mas maayong halad ni Jesus makahimo sa ‘paghinlo sa atong mga tanlag gikan sa patayng mga buhat aron nga kita makahatag ug sagradong pag-alagad ngadto sa buhing Diyos.’ Alang sa Hebreohanong mga Kristohanon, ang “patayng mga buhat” naglakip sa “mga kalapasan ilalom sa daang pakigsaad.” Alang sa mga Kristohanon karong adlawa, kana naglakip sa mga salang nahimo sa nangagi nga tinuod nga gihinulsolan ug gipasaylo na sa Diyos. (1 Corinto 6:​9-11) Kay nahinloan na ang mga tanlag, ang dinihogang mga Kristohanon naghatag ug “sagradong pag-alagad ngadto sa buhing Diyos.” Ug kana matuod usab sa dakong panon. Kay nahinloan na sa ilang mga tanlag pinaagi sa “dugo sa Kordero,” sila anaa sa dakong espirituwal nga templo sa Diyos, nga “nagahatag kaniya ug sagradong pag-alagad adlaw ug gabii.”​—Pinadayag 7:​14, 15.

12. Sa unsang paagi atong gipakitang kita nagbaton sa “bug-os nga kasegurohan sa pagtuo”?

¹² Dugang pa, si Pablo miingon: “Manuol kita uban ang matuod nga kasingkasing diha sa bug-os nga kasegurohan sa pagtuo, kay gikawisikan na man ang atong mga kasingkasing gikan sa usa ka tanlag nga tuman-kadaotan ug ang atong mga lawas gikaligoan na sa hinlong tubig.” (Hebreohanon 10:22) Sa unsang paagi ikapakita nato nga kita nakabaton sa “bug-os nga kasegurohan sa pagtuo”? Giagda ni Pablo ang Hebreohanong mga Kristohanon: “Atong panguptan pag-ayo ang pagpahayag sa dayag bahin sa atong [langitnong] paglaom nga walay pagpalingpaling, kay kasaligan siya nga misaad. Ug tagdon nato ang usag usa aron sa pagpasibot sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug labi pa gayod nga ingon samtang inyong nakita nga ang adlaw nagakaduol na.” (Hebreohanon 10:​23-25) Kon ang atong pagtuo maoy buhi, kita usab dili ‘motalikod sa atong mga panagkatigom.’ Kita magkalipay sa pagdasig sa atong mga igsoon ug madasig nila ngadto sa paghigugma ug sa maayong mga buhat ug mapalig-on alang sa bililhong buluhaton sa pagpahayag sa dayag sa atong paglaom, kon kaha yutan-on o langitnon.​—Juan 13:35.

Ang “Walay-Kataposang Pakigsaad”

13, 14. Sa unsang mga paagi ang bag-ong pakigsaad maoy walay kataposan?

¹³ Unsay mahitabo sa dihang ang kataposan sa 144,000 makaagom na sa ilang langitnong paglaom? Ang bag-ong pakigsaad ba dili na mapadapat? Nianang panahona, wala nay mahibiling membro sa Israel sa Diyos sa yuta. Ang tanang sumasalmot sa pakigsaad didto na unya uban ni Jesus “sa gingharian sa [iyang] Amahan.” (Mateo 26:29) Apan atong mahinumdoman ang mga pulong ni Pablo diha sa iyang sulat ngadto sa mga Hebreohanon: “Ang Diyos sa kalinaw . . . nagbangon gikan sa mga patay sa dakong magbalantay sa mga karnero pinaagi sa dugo sa usa ka walay-kataposang pakigsaad.” (Hebreohanon 13:20; Isaias 55:3) Sa unsang diwa nga ang bag-ong pakigsaad walay kataposan?

¹⁴ Una, lahi sa Balaodnong pakigsaad, kini dili gayod pulihan. Ikaduha, ang mga resulta sa paglihok niini maoy permanente, ingon nga kana matuod sa pagkahari ni Jesus. (Itandi ang Lucas 1:33 sa 1 Corinto 15:​27, 28.) Ang langitnong Gingharian adunay dumalayong dapit diha sa mga katuyoan ni Jehova. (Pinadayag 22:5) Ug ikatulo, ang ubang mga karnero magpadayon sa pagbatog kaayohan gikan sa kahikayan sa bag-ong pakigsaad. Panahon sa Usa ka Libo ka Tuig nga Paghari ni Kristo, ang matinumanong mga tawo magpadayon sa ‘paghatag [kang Jehova] ug sagradong pag-alagad adlaw ug gabii diha sa iyang templo’ sama sa ilang ginabuhat karon. Si Jehova dili na magpatungha pag-usab sa ilang nangaging mga sala nga gipasaylo na pinasukad sa “dugo sa pakigsaad” ni Jesus. Sila magpadayon sa pagtagamtam ug matarong nga baroganan ingong mga higala ni Jehova, ug ang iyang balaod mahisulat pa diha sa ilang mga kasingkasing.

15. Batbata ang relasyon ni Jehova uban sa iyang yutan-ong mga magsisimba diha sa bag-ong kalibotan.

¹⁵ Si Jehova unya makaingon ba bahin niining tawhanong mga alagad: ‘Ako mao ang ilang Diyos, ug sila mahimong akong katawhan’? Oo. “Siya mopuyo uban kanila, ug sila mahimong iyang mga katawhan. Ug ang Diyos mismo magauban kanila.” (Pinadayag 21:3) Sila mahimong “kampo sa mga balaan,” mga hawas sa yuta sa “hinigugma nga siyudad,” ang langitnong pangasaw-onon ni Jesu-Kristo. (Pinadayag 14:​1; 20:​9; 21:2) Kining tanan maposible tungod sa ilang pagtuo sa kang Jesus nga inulang “dugo sa pakigsaad” ug ilang pagpasakop sa langitnong mga hari ug mga saserdote, kinsa samtang dinhi sa yuta mao ang Israel sa Diyos.​—Pinadayag 5:10.

16. (a) Unsang mga posibilidad ang nagpaabot niadtong gibanhaw alang sa yuta? (b) Unsang mga panalangin ang moabot sa kataposan sa usa ka libo ka tuig?

¹⁶ Unsa na man ang mga patay nga gibanhaw sa yuta? (Juan 5:​28, 29) Sila usab dapiton nga “magapanalangin sa ilang kaugalingon” pinaagi kang Jesus, ang Binhi ni Abraham. (Genesis 22:18) Kinahanglan usab nga sila mahigugma sa ngalan ni Jehova, nga magaalagad kaniya, nga magtanyag ug dalawatong mga halad, ug magahatag ug sagradong pag-alagad diha sa iyang balayng ampoanan. Kadtong mohimo niana mosulod sa pahulay sa Diyos. (Isaias 56:​6, 7) Sa kataposan sa usa ka libo ka tuig, ang tanang matinumanon nakakab-ot na ug tawhanong kahingpitan pinaagi sa pag-alagad ni Jesu-Kristo ug sa iyang 144,000 kaubang mga saserdote. Sila unya maoy matarong, dili lamang gipahayag nga matarong ingong mga higala sa Diyos. Sila “modangat sa kinabuhi,” kay bug-os nga nahigawas sa sala ug kamatayong napanunod gikan kang Adan. (Pinadayag 20:​5; 22:2) Pagkatalagsaong panalangin unya kana! Gikan sa atong panglantaw karong adlawa, mopatim-awng ang saserdotehanong buluhaton ni Jesus ug sa 144,000 nalampos na sa maong panahon. Ang mga panalangin sa mas dakong Adlaw sa Pagtabon sa Sala mapadapat na sa bug-os. Dugang pa, si Jesus ‘magatugyan sa gingharian ngadto sa iyang Diyos ug Amahan.’ (1 Corinto 15:24) Aduna unyay kataposang pagsulay alang sa katawhan, ug unya si Satanas ug ang iyang mga demonyo pagalaglagon sa walay kataposan.​—Pinadayag 20:​7, 10.

17. Tungod sa pagmaya nga nagpaabot kanato, ang matag usa kanato angay nga magmadeterminado sa pagbuhat sa unsa?

¹⁷ Unsang papel, kon duna man, ang dulaon sa “walay-kataposang pakigsaad” sa kulbahinam nga panahon nga mosugod unya? Dili ato ang pagsulti niana. Ang gipadayag ni Jehova sa pagkakaron igo na sa pagkakaron. Kana makapahingangha gayod kanato. Hunahunaa lamang​—walay-kataposang kinabuhi ingong bahin sa “bag-ong mga langit ug sa usa ka bag-ong yuta”! (2 Pedro 3:13) Hinaot nga walay bisan unsa nga makapaluya sa atong tinguha sa pagpanunod sa maong saad. Ang pagbarog nga malig-on basin dili sayon. Si Pablo miingon: “Kamo nanginahanglan ug pag-agwanta, aron nga, human ninyo mabuhat ang kabubut-on sa Diyos, kamo makadawat sa katumanan sa saad.” (Hebreohanon 10:36) Apan, hinumdoming ang bisan unsang suliran nga pagabuntogon, bisan unsang pagsupak nga pagadag-on, mawalay-bili kon itandi sa pagmaya nga nagpaabot kanato. (2 Corinto 4:17) Busa, hinaot walay-usa kanato “ang matang nga nagapanibog ngadto sa kalaglagan.” Inay hinuon, hinaot atong pamatud-an nga kita mao “ang matang nga adunay pagtuo sa pagtipig nga buhi sa kalag.” (Hebreohanon 10:39) Hinaot nga kitang tanan magbaton ug bug-os nga pagsalig kang Jehova, ang Diyos sa mga pakigsaad, sa dumalayong panalangin sa matag usa kanato.

[Mga footnote]

Nasabtan ba Nimo?

◻ Gawas pa sa dinihogang mga Kristohanon, kinsay gipanalanginan pinaagi sa Binhi ni Abraham?

◻ Sa pagkagipanalanginan pinaagi sa bag-ong pakigsaad, sa unsang paagi ang ubang mga karnero nahisama sa mga kinabig ubos sa daang pakigsaad?

◻ Sa unsang paagi ang ubang mga karnero gipanalanginan pinaagi sa kahikayan sa mas dakong Adlaw sa Pagtabon sa Sala?

◻ Nganong gitawag ni Pablo ang bag-ong pakigsaad nga “walay-kataposang pakigsaad”?

[Kahon sa panid 21]

Sagradong Pag-alagad Diha sa Templo

Ang dakong panon nagsimba kauban sa dinihogang mga Kristohanon diha sa yutan-ong sawang sa dakong espirituwal nga templo ni Jehova. (Pinadayag 7:​14, 15; 11:2) Walay katarongan ang paghinapos nga sila anaa sa usa ka separadong Sawang sa mga Hentil. Sa dihang si Jesus dinhi sa yuta, dihay usa ka Sawang sa mga Hentil sa templo. Hinunoa, sa dinasig-sa-Diyos nga mga plano sa mga templo ni Solomon ug kang Ezequiel, wala ing tagana sa usa ka Sawang sa mga Hentil. Sa templo ni Solomon, dihay usa ka sawang sa gawas diin ang mga Israelinhon ug mga kinabig, mga lalaki ug mga babaye, naghiusa sa pagsimba. Kini mao ang matagnaong sumbanan sa yutan-ong sawang sa espirituwal nga templo, diin nakit-an ni Juan ang dakong panon nga naghatag ug sagradong pag-alagad.

Ugaling lang, ang mga saserdote ug mga Levihanon lamang ang makasulod sa sulod nga sawang, diin nahimutang ang dakong halaran; ang mga saserdote lamang ang makasulod sa Balaan; ug ang hataas nga saserdote lamang ang makasulod sa Labing Balaan. Ang sulod nga sawang ug ang Balaan gisabot nga naglandong sa linaing espirituwal nga kahimtang sa dinihogang mga Kristohanon sa yuta. Ug ang Labing Balaan naghulagway sa langit mismo, diin ang dinihogang mga Kristohanon magadawat ug dili-mamatay nga kinabuhi kauban sa ilang langitnong Hataas nga Saserdote.​—Hebreohanon 10:​19, 20.

[Hulagway sa panid 23]

Tungod sa pagmaya nga nagpaabot kanato, atong ‘batonan ang pagtuo ngadto sa pagtipig nga buhi sa kalag’