Kinabuhi ug Ministeryo ni Jesus

Upat ka Tinun-an Gitawag

TAPOS sa pagsulay sa pagpatay kang Jesus sa iyang pinuy-anan sa Nazareth, siya mibalhin ngadto sa siyudad sa Capernaum duol sa Dagat sa Galilea. Kadto nagtuman sa laing tagna ni Isaias. Kini mao ang nagtagna nga ang katawhan sa Galilea nga nagpuyo sa daplin sa dagat makakitag dakong kahayag.

Samtang gipadayon ni Jesus ang iyang nagdala-sa-kahayag nga buluhaton sa pagsangyaw sa Gingharian didto, iyang nakaplagan ang upat sa iyang mga tinun-an. Kadto sila nakapanaw uban kaniya sa sa miaging panahon apan namalik sa ilang pagpangisda sa namalik sila sa Judea uban kang Jesus. Lagmit sa maong panahon gipangita sila ni Jesus, sanglit panahon na niadto nga siya may mapinadayonon, regular nga mga katabang nga iyang mabansay sa pagpadayon sa ministeryo tapos siya mamatay.

Busa samtang si Jesus namaybay ug nakakita kang Simon Pedro ug iyang mga kauban nga naghugas sa ilang mga pukot, siya miadto kanila. Siya misakay sa sakayan ni Pedro ug mihangyo kaniya sa pagpalayo sa baybay. Sa nakaabot sila sa layog diyutay, si Jesus milingkod diha sa sakayan ug misugod sa pagtudlo sa mga panon nga didto sa baybayon.

Tapos niadto, si Jesus miingon kang Pedro: “Adto sa dapit nga lalom, ug inyong itaktak ang inyong mga pukot aron makakuhag isda.”

“Magtutudlo,” mitubag si Pedro, “sa tibuok gabii kami nagbudlay ug wala kami nakuha, apan sa imong mando among itaktak ang mga pukot.”

Sa gitaktak ang mga pukot, daghan kaayong isda ang nasikop nga ang mga pukot misugod sa pagkagisi. Sa madali, ang mga tawo misenyas ngadto sa ilang mga kaubanan diha sa usa ka sakayan sa duol nga moadto ug motabang. Sa taudtaod ang ilang mga sakayan napuno sa daghan kaayong isda nga sila misugod sa pagkalunod. Sa pagkakita niadto, si Pedro mihapa sa atubangan ni Jesus ug miingon: “Palay-i ako, tungod kay ako tawong makasasala, Ginoo.”

“Hunong sa pagkahadlok,” mitubag si Jesus. “Sukad karon kamo makakuha sa mga tawo nga buhi.”

Gidapit usab ni Jesus ang igsoon ni Pedro si Andres. “Sumunod kamo kanako,” miawhag siya kanila, “ug himoon ko kamong mga mangingisda sa mga tawo.” Ang ilang mga kauban sa pangisda si Santiago ug si Juan, ang mga anak ni Zebedeo, gidapit sa sama, ug sila, usab, misugot nga walay pagpanuko. Busa silang upat mibiya sa ilang pagpangisda ug nahimong unang upat sa mapinadayonon, regular nga mga sumusunod ni Jesus. Lucas 5:1-11; Mateo 4:13-22; Marcos 1:16-20; Isaias 9:1, 2.

◆ Nganong gitawag ni Jesus ang iyang mga tinun-an sa pagsunod kaniya, ug kinsa ba sila?

◆ Unsang milagro ang nakapahadlok kang Pedro?

◆ Unsang matang sa pagpangisda ang gidapit ni Jesus nga buhaton sa iyang mga tinun-an?