Kapitulo 21
Ang Tanaman sa Eden—Napasig-uli—sa Tibuok Kalibotan
ANG tanaman sa Eden niadto maoy “usa ka paraiso sa kalipay,” ug niana nga diwa kini ipasig-uli. (Genesis 2:8, Douay Version) Limitadong bahin lamang sa yuta ang luna sa orihinal nga Paraiso. Apan gimbut-an ni Jehova nga ang mga utlanan niini ipakaylap paggawas, sa tibuok nga palibot, sa nagakadakong tawhanong pamilya hangtod molukop ang Paraiso sa tibuok yuta ug sul-oban kana sa tagsaong natural nga katahom. (Genesis 1:26-28; 2:8, 9, 15) Ang mga pulong ni Jesus sa misimpatiya nga mamumuhat ug daotan nga namatay tapad kaniya diha sa Kalbaryo nagpasalig sa tawo nga siya banhawon dihang mapasig-uli na ang Paraiso, ug unya iyang makita ang makalipayng kausaban sa talan-awon sa yuta. (Lucas 23:43) Sama sa unsa ang talan-awon sa napasig-uling Paraiso sa yuta? Sa unsang paagi lahi kini gikan sa orihinal nga tanaman sa Eden?
2 Diha sa matahom nga mga tagna sa mahimayaong mga butang nga anaa sa unahan, may makita kitang butang nga nakulang gikan sa napasig-uli, tibuok-kalibotang Paraiso. Unsa man kana? Kini mao ang “kahoy sa kahibalo sa maayo ug sa daotan” nga anaa sa “taliwala sa tanaman.” (Genesis 2:17; 3:3) Dayag nga usa lamang kini ka kahoy. Makataronganon ba ang paghunahuna nga diha sa tunga sa napasig-uli, tibuok-yuta nga tanaman sa Eden adunay sama niining kahoya nga diha niini adunay pagdili sa Diyos? Dili. Nagkinahanglag daghang panahon sa pagbiyahe sa mga tawo ngadto sa halayong mga suuk sa yuta sa pag-adto sa lokasyon sa maong kahoy diha sa Tungang Silangan aron makakaon sa bunga gikan niini sa pagsupak sa Labing Hataas nga Diyos.
3 Dugang pa, dili na makita diha sa maong lugar ang usa ka bitin nga “makasulti” nga manapit niadtong moduol sa kahoy sa pagkaon sa matahom tan-awong bunga aron supakon lamang ang mga sugo sa Diyos. Ug walay bisan unsang dili-makitang daotang espiritu nga momaniobra sa bitin ug sa pagpakita nga daw makasulti kini ug nga manapit sa tumatan-aw sa pagrebelde batok sa Diyos pinaagi sa pagsagop ug dalan sa pagbatok sa Maglalalang, nga may makamatayng mga sangpotanan.
4 Dili, ang presensiya sa dili makitang espiritu nga linalang nga nagpaluyo sa “makasulti” nga bitin balik didto sa tanaman sa Eden mawala sa Milenyal nga Pagmando sa “Prinsipe sa Pakigdait,” si Jesu-Kristo. Ang daotang usa, si Satanas nga Yawa, bug-os nga gaposon tapos sa Armageddon. Ang Pinadayag 20:2, 3 nagsugilon kanato nga dakpon sa “Prinsipe sa Pakigdait” ang “karaang serpenti, nga mao ang Yawa ug Satanas,” ug gaposon siya ug itambog ngadto sa bung-aw sulod sa usa ka libo ka tuig.
Tinuod nga Kalinaw ug Kasegurohan Diha sa Napasig-uling Paraiso
5 Pagkatasaong kalinaw ug kasegurohan ang mosunod! Mahanaw na ang impluwensiya ug paghari ni Satanas ibabaw sa katawhan ingong “magmamando sa kalibotan”! (Juan 14:30) Lakip sa mga panon sa mga demonyo ni Satanas nga ihulog sa bung-aw, ang yuta sa kataposan mawad-an na sa tanang matang sa espiritismo, okultismo, ug mahika-negra—oo, sa tanang matang sa demonismo, nga gikaligotgotan ni Jehova.—Deuteronomio 18:10-12.
6 Ang kalalangan sa mga mananap dili na unya mohatag kadaot o mahimong hulga sa tanang pomuluyo sa napasig-uling Paraiso. Ibalik sa Diyos sa ubos nga mga linalang ang ilang nawalang kahadlok sa mga tawo. Busa makapaabot kita sa matahom nga pagkahubit sa kinabuhi sa mananap nga gipadayag sa Isaias 11:6-9 nga may literal nga katumanan sa panahon sa Milenyal nga Pagmando sa “Prinsipe sa Pakigdait”:
7 “Ang lobo mopuyo uban sa nating karnero, ug ang leopardo mohigda uban sa nating kanding, ug ang nating baka ug ang nating leon ug ang matambok nga mananap manag-ipon sila; ug ang usa ka bata nga gamay maoy magmando kanila. Ug ang baka ug ang oso managsibsib; ug ang ilang mga nati manag-ipon sa paglubog. Ug ang leon mosibsib sa kompay sama sa torong baka. Ug ang bata nga masuso magadula sa lungag sa sawa, ug ang bata nga linutas mokuot sa langub sa halas nga bahion. Dili nila pagadaoton ni pagagub-on ang tibuok ko nga bukid nga balaan; kay ang yuta mapuno sa kahibalo kang Jehova ingon sa tubig nga nagatabon sa dagat.”
8 Nagkasumpaki ang Diyos sa iyang kaugalingon sa pagdasig ug ingon nga tagna nga may espirituwal nga kahulogan lamang ug dili ipakita kining mga butanga diha sa aktuwal sa yutan-ong kinabuhi. Sa susama, ang Isaias 65:25 nagsulti kanato: “Ang lobo ug ang nating karnero managsalo sa pagsibsib, ug ang leon mokaon sa dagami sama sa baka nga toro; ug ang abog mahimong kalan-on sa bitin.” Nagpasabot ba kini sa kalaglagan sa espisye sa bitin gikan sa tibuok yuta nga tanaman sa Eden? Dili, ang matagnaong pulong nga “abog” ang kalan-on sa bitin nagkahulogan nga ang mga sakop sa espisye sa mga mananap nga nagkamang dili na gayod mahimong hulga sa kinabuhi ug maayong panglawas sa tawhanong mga linalang. Sila moila nga ang mga tawo mao ang ilang agalon nga maoy momando ibabaw sa tanang butang nga nagalihok diha sa yuta, sama sa kahimtang ni Adan diha sa tanaman sa Eden sa dihang iyang ginganlan ang tanang mga mananap nga walay kahadlok.—Genesis 2:19, 20; Oseas 2:18.
9 Ang katahom ug pagkadagaya sa tibuok-kalibotan nga tanaman sa Eden sobra pa sa atong mahanduraw. Apan naghatag kanato ang Bibliya ug matagnaong paghubit mahitungod niini diha sa ika-65 nga salmo, nga gipahayag ngadto sa Diyos. Sa lakbit, kining salmoha nag-ingon: “Mibalik ka sa imong pagtagad sa yuta, aron imong hatagan kini ug kadagaya; imong gipatambok kini. Ang suba sa Diyos napuno sa tubig. Nagatagana ikaw ug trigo kanila, kay giandam mo sa ingon ang yuta.” Wala na unyay hulaw nianang panahona, kondili, “mga ulan”! (Salmo 65:1, 9-13) Aduna unyay dagayang kalan-on alang sa tanang mga pomuluyo sa yuta.
10 Kining pagkadagaya gitagna usab diha sa Isaias 25:6: “Si Jehova sa mga panon magahimo alang sa tanang katawhan, dinhi niining bukira, ug kombira sa matambok nga kalan-on, ug kombira sa bino nga gipundo diha sa mga butanganan ug bino.” Ang pomuluyo sa napasig-uling paraiso mokaon ug matambok nga mga kalan-on nga makalig-on sa kasingkasing sa tawo ug makapasinaw sa nawong. Sila moinom ug bino, nga gipahawot diha sa butangan ug bino ug sinala, nga makalipay sa ilang kasingkasing. (Salmo 104:14, 15) Walay kakulangan sa kalan-on ilalom sa Milenyal nga Pagmando sa “Prinsipe sa Pakigdait”! Hinunoa, dunay “katugob.”—Salmo 72:16.
Kausaban sa Pinulongan ug sa Klima
11 Ang tibuok-kalibotan ba nga Paraiso mag-antos gikan sa kalibganan sa pagbaton ug daghang mga pinulonga? Dili, tungod kay ang “Prinsipe sa Pakigdait” gipunting usab ingong “Makagagahom nga Diyos.” (Isaias 9:6) Busa makahimo siya sa pagbali sa kalibganan sa pinulongan nga nagsugod diha sa Torre sa Babel. (Genesis 11:6-9) Unsa unya ang komung pinulongan sa tanang yutan-ong mga anak sa “Walay Kataposang Amahan”? Ang orihinal nga pinulongan ba sa unang Adan, ang pinulongan nga maoy gihatag ni Jehova kaniya? Malagmit. Kon unsa may mahitabo, ang tanang kababagan sa pinulongan wagtangon. Makahimo ka sa pagbiyahe bisan asa ug makakomunikar sa mga tawo. Makasabot ka kanila, ug sila makasabot kanimo. Usa lamang unya ang pinulongan sa tanang katawhan, ug tukma na lang nga mabatonan ang enterong Bibliya nianang pinulongana. (Itandi sa Sofonias 3:9.) Nianang pinulongana ang tibuok yuta mapuno sa kahibalo ni Jehova “ingon sa tubig nga nagatabon sa dagat.”—Isaias 11:9.
12 Matuman na unya ang mga pulong sa Zacarias 14:9: “Niadtong adlawa mapamatud-an si Jehova nga usa lamang, ug usa ra ang iyang ngalan.” Si Jehova lamang ang pagasimbahon ingon nga mao ang bugtong tinuod nga Diyos. “Niadtong adlawa” sa Gingharian ni Jehova pinaagi sa “Prinsipe sa Pakigdait,” ipadayag sa Diyos ang tukmang paglitok sa iyang ngalan. Unya didto aduna lamay usa ka paagi sa paglitok sa balaang ngalan sa tanan sa yuta. Ang iyang ngalan mahimong usa.
13 Kon unsa unyay klima ug kausaban sa palibot maoy mga butang nga makaikag alang niadtong nagapaabot sa tibuok yutang Paraiso sa “Prinsipe sa Pakigdait.” Usa ka butang ang tino: Ang tibuok yuta himoon nga usa ka matahom nga dapit nga pagapuy-an. Dili na gayod daoton ang Paraiso sa malaglagong mga unos, mga alimpulos, mga tidal wave, urakan, o mga bagyo. Ang hangin, mga balud, ug klima mosunod sa “Prinsipe sa Pakigdait.” (Marcos 4:37-41) Ang tibuok-kalibotang tanaman sa Eden maoy mokontrolar sa klima. Patahomon ang tibuok yuta nga usa ka paraiso sa kalipay, nga diin maoy usa ka malipayong pribilehiyo alang sa tanang katawhan sa pagpuyo nga may kasegurohan sa walay kataposan.
14 Wala na unyay rason sa paghilak ug kaguol! Ang matagnaong Pulong ni Jehova nagpasalig kanato: “Ang balongbalong sa Diyos anaa uban sa mga tawo, ug siya magapuyo ipon kanila ug sila mahimong iyang katawhan. Ug ang Diyos magpakig-uban kanila. Ug iyang pagapahiran ang tanang luha gikan sa ilang mga mata, ug ang kamatayon wala na, ug wala na usab unyay pagminatay, ni paghilak, ni kasakit, kay ang unang mga butang nangagi na.”—Pinadayag 21:3, 4.
15 Ang kalangitan mao ang trono sa Diyos, ug ang yuta mao ang iyang tumbanan sa tiil. (Isaias 66:1) Busa dili mopuyo ang Diyos sa yuta sa literal nga diwa. Apan siya makig-uban sa katawhan. Sa panahon sa Usa ka Libo ka Tuig nga Pagmando, si Jehova makig-uban sa mga tawo sa hawasnong paagi sa iyang gihimayang Anak, si Jesu-Kristo. Pagkatukma nga ang presensiya ni Jehova pagahawasan sa iyang “Prinsipe sa Pakigdait”! Makapahinumdom kini sa mga pulong sa Isaias 7:14 mahitungod sa ngalan nga aplikado sa Mesiyas—Emmanuel. Kanang ngalana nagkahulogang “Ang Diyos Uban Kanato.” (Mateo 1:23) Pagkamakalipay nga, pinaagi sa iyang pinalanggang Anak, ang Diyos “magapuyo” uban sa katawhan! Unya mga luha sa kalipay ang mogawas sa atong mga mata samtang makita nato ang katingalahang mga milagro nga himoon niining “Makagagahom nga Diyos,” ilabina dihang bangonon ang mga minahal sa kinabuhi diha sa pagkabanhaw sa mga kahimtang sa Paraiso. (Buhat 24:15) Kining mga milagroha maoy katingalahang ebidensiya nga ang Diyos nagauban sa katawhan ug nga siya magapahid sa tanang mga luha sa kasubo gikan sa atong mga mata sa walay kataposan.
Usa ka Matahom nga Lugar Diha sa Walay Utlanang Uniberso
16 Ang unang Adan gisugo kon unsaon sa pagsugod sa proyekto sa pagpakaylap sa Paraiso gikan didto sa tanaman sa Eden. Ang pagkab-ot nianang orihinal nga katuyoan sa pagpakaylap niini sa tibuok yuta matuman. Apan ang pagkabanhaw ba sa mga patay maghulat pa hangtod molukop ang Paraiso sa tibuok yuta? Dili. Pananglitan, kadtong mobangon gikan sa unang pagkabanhaw pagabanhawon sa mga bahin sa yuta sa dapit nga adunay mga mga tawong makalabang-buhi sa Armageddon ug nakahimo na sa maong mga dapit nga usa ka paraiso. Samtang nagapadayon pa ang pagkabanhaw sa katawhan, kining mga dapit nga nahimo nang Paraiso ipakaylap hangtod nga sila mag-abot nga mapormang tibuok-yutang Paraiso.
17 Ang umaabot nga Paraiso molabaw sa tanang matahom nga mga parke kun tanaman karon. Sa masilakon, ang tibuok yuta mamulak sama sa malinawong paraiso, usa nga makalipay dili lamang sa mga mata sa nga tawo kondili sa mata sa Maglalalang. Kini unya maoy tibuok yuta nga tanaman sa Eden nga pagadayandayanan sa mga tanom ug mga kahoy—nga matahom nga tan-awon ug magapamungag kalan-on aron makabuhig linalang diha sa kahingpitan. Ang yuta sa walay kataposan magpabiling usa ka matahom nga lugar sa tibuok walay utlanang uniberso ni Jehova. Ug ang tanang nahiusang katawhan dunay walay kataposang obligasyon ug pribilehiyo sa paghimo sa yuta nga usa ka matahom nga dapit.
18 Ang tanang sakop niining diyosnon tawhanong panimalay hiusang magpuyo nga malinawon ingong mga igsoong lalaki ug babaye sa tanang kaputli, kay sila sa tinuod mahimong mga anak sa “Walay Kataposang Amahan,” ang “Prinsipe sa Pakigdait.” Busa walay mapahitas-on nga mangulo sa kabahin sa mga lalaki ibabaw sa mga babaye, nga ilang mga igsoon. Apan ang nahingpit nga mga babaye motuman sa mga gimbut-an ni Jehova nga Diyos, sama sa iyang gimbut-an kang Eva nga mahimong “usa ka katabang alang” sa iyang hingpit nga bana, si Adan.—Genesis 2:18; tan-awa usab ang 1 Pedro 3:7.
19 Ang talan-awon sa usa ka paraiso nga yuta nga mapuno sa hingpit nga mga lalaki ug mga babaye mopasundayag ngadto sa dili-makitang mga langit ug mas masilakon ug mas matahom kay sa panagway sa yuta dihang unang gilalang, nga niana unyang panahona “ang mga bitoon sa kabuntagon dungang manag-awit, ug ang tanang mga anak sa Diyos mosinggit sa kalipay.” (Job 38:7) Dayon ang Labing Hataas nga Diyos, si Jehova, bug-os nga mabayaw ingon nga mao ang Usa kansang mahimayaong katuyoan dili gayod madaog. Ang tanang pagdayeg ngadto kaniya!
[Mga Pangutana nga Pagatun-an]
1. (a) Sa unsang diwa ipasig-uli ang tanaman sa Eden, ug nganong dili limitado ang luna niini diha sa yuta? (b) Unsay gipadayag sa mga pulong ni Jesus sa mamumuhat ug daotan?
2. (a) Unsa ang anaa sa orihinal nga tanaman sa Eden ang mawala gikan sa tibuok-yuta nga paraiso? (b) Nganong makataronganong dili sulayan sa Diyos ang pagkamasinundanon sa katawhan pinaagi sa usa ka kahoy?
3. Unsa pay mawala gikan sa napasig-uling Paraiso?
4. Nganong dili makita si Satanas nga Yawa sa panahon sa Usa ka Libo ka Tuig nga Pagmando sa “Prinsipe sa Pakigdait”?
5. Diha sa napasig-uling Paraiso, nganong molukop ang tinuod nga kalinaw ug kasegurohan sa tibuok yuta?
6, 7. (a) Nganong dili hulga ang mga mananap sa mga tawo? (b) Unsang tagna mahitungod niini ang makabaton ug literal nga katumanan?
8. Unsay kahulogan sa matagnaong pulong nga “abog” ang kalan-on sa bitin?
9, 10. Unsay gitagna sa Salmo 65 ug Isaias 25:6 mahitungod sa yuta ilalom sa pagmando sa “Prinsipe sa Pakigdait”?
11. Unsang kausaban sa pinulongan ang mahitabo, ug sa unsang paagi maapektohan niini ang katawhan?
12. Sa unsang paagi matuman ang Zacarias 14:9?
13. Nganong ang klima, hangin, ug mga balod dili mahimong hulga sa mga pomuluyo sa yuta?
14, 15. (a) Unsang saad nga natala sa Pinadayag 21:2, 4 ang matuman? (b) Sa unsang paagi magapuyo ang balongbalong sa Diyos diha sa katawhan? (b) Unsang matanga sa paghilak ang pagapahiran sa walay kataposan?
16. Ang pagkabanhaw ba sa patay maghulat pa hangtod nga molkuop ang Paraiso sa tibuok yuta? Ipatin-aw.
17. Unsay gihatag nga paghubit sa tibuok-yuta nga Paraiso?
18. Sa unsang paagi nasayod kita nga ang tanan, mga lalaki ug mga babaye, magpuyo nga malinawon ingong igsoong mga lalaki ug igsoong mga babaye?
19. Ang Paraiso sa yuta mopasundayag ug unsang talan-awon alang niadtong nagapuyo sa dili-makitang langit?