NIMRIM

[lagmit, Mga Leopardo].

Diha sa mga tagna nga gipunting batok sa Moab, si Isaias ug Jeremias parehong naghisgot sa ‘katubigan sa Nimrim.’ (Isa 15:5-9; Jer 48:​34, 35) Tungod sa katabunok sa palibot nga rehiyon, gituohan sa pipila nga ang katubigan sa Nimrim mao ang Wadi Nimrin, diin ang katubigan niini moagos ngadto sa Jordan sa A sa Patayng Dagat. (Tan-awa ang BET-NIMRA.) Apan, ang pagkahan-ay sa paghisgot niini nga mga dapit diha sa mga tagna daw nagpakita nga kini nahimutang sa H sa Moab. Busa daghan ang mipabor sa pagtuo nga mao kini ang Wadi en-Numeirah, nga moagos ngadto sa HS nga tumoy sa Patayng Dagat nga mga 17 km (11 mi) sa KHK sa Karak. Ang mga tagna nag-ingon nga kining mga tubiga mahimong “biniyaan na lamang,” kaha sa malarawanon nga diwa tungod kay wala nay mamuyo sa maong yuta o tingali tungod kay sap-ongan sa kaawayng kasundalohan ang ilang kasapaan.