HASUHASAN

Usa ka galamiton nga mahimong paburoton ug pahiyoson, una sa pagsuyop ug hangin pinaagi sa usa ka balbula, unya ibuga kini agi sa usa ka tubo. Aron ang mga hudno mabugahan ug hangin, mas maayong gamiton ang hasuhasan kay sa paypay lamang, o sa kinaraang paagi sa pagtayhop pinaagig buhoan nga mga tangbo ug sa igtatayhop nga mga tubo nga gigamit usab niini nga katuyoan. Ang paghimog hasuhasan simple lang: Ang usa ka samag sako nga gipahiluna sa usa ka bayanan o sanggaanan itaod sa usa ka tubo nga gidugtong sa hudno, nga lagmit kini nga tubo maoy puthaw, o tangbo nga gibulitan ang tumoy ug dili-masunog nga yutang-kulonon. Ang demano nga mga hasuhasan mapuslanon sa gagmayng hudno; apan sa dagkong hudno nga init kaayo, ang duha ka hasuhasan nga tindakan sa tiil mao ang gigamit, nga ang matag usa niini anaa sa ilalom sa matag tiil sa nagtindak niini kinsa magpulipuli sa pagbomba niini, una ang usa ka tiil ug dayon ang laing tiil, nga sa matag higayon magbira sa kordon aron mapuno na usab ug hangin ang mihiyos nga hasuhasan. Aron padayon nga mabugahan kining dagkong mga hudno, gamiton sa duha ka tawo ang duha ka paris nga hasuhasan. Ang Hebreohanong pulong alang sa hasuhasan maoy map·puʹach, nga naggikan sa lintunganayng pulong nga na·phachʹ, nga nagkahulogang ‘huyop.’ (Gen 2:7) Kini nga galamiton kas-a ra nga espesipikong gihisgotan diha sa Kasulatan (Jer 6:29), bisan tuod lagmit nga kini mao usab ang gitumong diha sa Isaias 54:16 ug Ezequiel 22:​20, 21. Niini nga mga teksto ang mga paghisgot maoy mahulagwayon, ug ang mga ilustrasyon maoy binase sa mga pamaagi nga gigamit sa pagdalisay sa mga metal.​—Tan-awa ang PAGDALISAY, TIGDALISAY.