Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Aw, sulayi kon makatubag ka ba sa mosunod nga mga pangutana:

• Nganong makatuo kita nga tinuod nga dapit ang tanaman sa Eden?

Ang Bibliya naghisgot niini ingong tinuod nga dapit, nga naghatag ug pipila ka detalye bahin niini. Ang duha sa mga suba nga gihisgotan sa asoy nag-agos gihapon karon. Ang mga tumotumo o sugilanon sagad dili maghatag ug mga detalye nga ingon niana. Si Jesus, ang labing kasaligang Saksi, naghisgot kang Adan ug Eva ingong tinuod nga mga persona.—1/1, panid 5-6, 9.

• Nahibalo ba ang Diyos nga si Adan ug Eva makasala?

Wala. Gihatagan sila ni Jehova ug intelihensiya ug kagawasan, nga tungod niana sila makapili kon mosunod ba sila sa Diyos o dili. Bisag may katakos sa pagkahibalong daan, ang Diyos wala maggamit niana sa kanunay.—1/1, panid 13-15.

• Gigamit ba sa matuod nga mga Kristohanon ang ngalan sa Diyos ingong anting-anting?

Ang ubang tawo nag-isip sa usa ka butang o simbolo ingong anting-anting nga manalipod kanila, apan dili ingon niana ang pag-isip sa katawhan sa Diyos sa iyang ngalan. Sila misalig kang Jehova ug naningkamot sa pagbuhat sa iyang kabubut-on, sa ingon sila midangop sa ngalan sa Diyos. (Sof. 3:12, 13)—1/15, panid 5-6.

• Kinsa sa Israel ang nakabenepisyo sa kahikayan sa pagpanghagdaw?

Ang tanan. Kini nagdasig nga magmakugihon ang mga kabos, kinsa kinahanglang manghagdaw. Ang uban usab nadasig nga magmahinatagon ug mosalig sa panalangin sa Diyos.—2/1, panid 15.

• Nganong gisalikway ni Jehova si Haring Saul?

Si Saul angay untang maghulat sa propeta sa Diyos nga maoy motanyag sa halad, apan ang hari mapangahasong naghimo sa maong paghalad. Sa ulahi, wala niya tumana ang sugo nga patyon ang mga kaaway.—2/15, panid 22-23.

• Sa unsang paagi ikapakita nato nga atong gidumtan ang pagkamalapason?

Atong likayan ang sobrang pag-inom ug alkoholikong mga ilimnon, likayan ang okultismo, ug sundon ang pasidaan ni Jesus batok sa imoralidad. Pananglitan, atong likayan ang pornograpiya ug mga panghanduraw nga mamugna tungod niana. (Mat. 5:27, 28) Usab, dili kita makig-uban sa mga napalagpot sa kongregasyon.—2/15, panid 29-32.

• Unsay nakapatalagsaon sa nakaplagan sa mga arkeologo nga karaang mga balay sa putyokan sa modernong-adlawng Israel?

Ang mga arkeologo nakadiskobre ug kapin sa 30 ka balay sa putyokan, diin gibanabana sa mga eskolar nga kini nagpatunghag mga tunga sa toneladang dugos kada tuig. Kini nagpakita nga dunay namuhig putyokan sa yuta nga giingon sa Diyos nga “nagaagay sa gatas ug dugos.” (Ex. 3:8)—3/1, panid 15.

• Sa unsang paagi si Jeremias samag usa ka kahoy nga “gitanom sa daplin sa mga tubig, nga nagpakuyanap sa iyang mga gamot”? (Jer. 17:7, 8)

Siya wala mohunong sa pagpamunga; ni magpaimpluwensiya sa mga mabiaybiayon. Hinunoa, siya minunot sa Tuboran sa nagahatag-ug-kinabuhi nga tubig, nga nagtuman sa gisugo sa Diyos kaniya.—3/15, panid 14.

• Unsay gipasabot ni Jesus sa misulti siya kang Marta nga pipila ra ka butang ang gikinahanglan o usa lang? (Luc. 10:41, 42)

Si Jesus wala magtawag kang Marta nga materyalistiko tungod sa pag-andam ug daghang potahe; ni magbalewala sa iyang kahago. Hinunoa, iya lamang gipasiugda kon unsay angayng unahon. Wala pahimusli ni Marta ang talagsaong kahigayonan nga mapalalom ang iyang pagtuo.—4/1, panid 12-13.

• Unsa ang pipila ka ilegal nga paagi sa paghusay kang Jesus?

Walay husay nga gihimo sa korte aron sa pagpahigawas. Bakak nga mga saksi ang gigamit. Gihusay ang kaso sa gabii. Usa ra ka adlaw ang paghusay.—4/1, panid 20.