Ikaw Makabenepisyo sa Bag-ong Pakigsaad

 1. Unsa ang duha ka sugo nga gituman ni Jeremias?

DUHA ka butang ang gisugo ni Jehova kang Jeremias. Ang una mao ang ‘pagluka ug paggun-ob, ug paglaglag ug paglumpag.’ Ang ikaduha mao ang ‘pagtukod ug pagtanom.’ Gituman sa manalagna ang unang sugo pinaagi sa pagyagyag sa pagkadaotan sa magarbohong mga Hudiyo, nga nagpahayag sa paghukom sa Diyos kanila ug sa Babilonya. Apan lakip sa mga tagna ni Jeremias ang paglaom alang sa umaabot. Iyang gitagna ang pagtukod ug pagtanom sumala sa kon unsay katuyoan sa Diyos. Pananglitan, gituman ni Jeremias ang ikaduhang sugo sa dihang iyang gipunting nga ang mga Hudiyo ipasig-uli ngadto sa ilang yutang-natawhan.—Jer. 1:10; 30:17, 18.

 2. Nganong gisilotan ni Jehova ang iyang katawhan, ug sa unsang gidak-on?

² Ang pagmantala ni Jeremias bahin sa kapasig-ulian wala magpasabot nga gipaundayonan lang sa Diyos ang iyang katawhan o nga iyang gikompromiso ang iyang sukdanan sa hustisya. Sa pagkatinuod, iyang gisilotan ang masukihong mga Hudiyo. (Basaha ang Jeremias 16:17, 18.) Sa adlaw ni Jeremias, diyutay ra sa Jerusalem ang “nagbuhat sa hustisya” o “nagtinguha sa pagkamatinumanon,” ug ang pailob ni Jehova naupos na. Siya miingon: “Gikapoyan na ako sa pagbasol.” (Jer. 5:1; 15:6, 7) Ang maong mga Hudiyo “mibalik sa mga kasaypanan sa ilang mga katigulangan, ang mga una, nga midumili sa pagtuman” sa mga pulong ni Jehova. Dugang pa, ilang gipasuko ang Diyos tungod sa ilang pagpanapaw sa bakak nga mga diyos. (Jer. 11:10; 34:18) Si Jehova magtul-id ug magkastigo pa gani sa iyang katawhan “sa hustong paagi.” Tungod niana, ang pipila mahimong makaamgo sa ilang kabuangan ug mobalik kaniya.—Jer. 30:11; 46:28.

 3. Nganong angay nimong hatagag pagtagad ang tagna bahin sa bag-ong pakigsaad?

³ Pinaagi kang Jeremias ang Diyos nagtagna ug usa ka bag-ong pakigsaad nga makahatag ug mas daghan ug malungtarong mga kaayohan. Kon hisgotan ang nasulat nga mga tagna ni Jeremias, may katarongan gayod kita nga hatagag pagtagad ang positibong bahin, nga mao ang bag-ong pakigsaad. Kini ang gipuli sa pakigsaad nga gihimo uban sa Israel human sa Pagpanggula, nga ang tigpataliwala niadto mao si Moises. (Basaha ang Jeremias 31:31, 32.) Sa dihang gisugdan ni Jesu-Kristo ang Panihapon sa Ginoo, iyang gihisgotan ang maong bag-ong pakigsaad, busa angay gayong maikag kita niini. (Luc. 22:20) Ang maong pakigsaad gihisgotan ni apostol Pablo sa dihang nagsulat siya ngadto sa mga Hebreohanon. Iyang gikutlo ang tagna ni Jeremias ug gipasiugda ang kahinungdanon sa bag-ong pakigsaad. (Heb. 8:7-9) Apan unsa ba gayod ang bag-ong pakigsaad? Nganong gikinahanglan man kini? Kinsay mga nalangkit niini, ug sa unsang paagi makabenepisyo ka niini? Atong tan-awon.

 4. Unsay nalampos sa pakigsaad sa Balaod?

⁴ Aron masabtan ang bag-ong pakigsaad, angay una natong masayran ang katuyoan sa unang pakigsaad, ang pakigsaad sa Balaod. Kadto nagpalampos ug daghang maayo kaayong mga tumong alang sa nasod nga nagpaabot sa sinaad nga Binhi, nga pinaagi kaniya mapanalanginan ang daghan. (Gen. 22:17, 18) Sa pagdawat sa mga Israelinhon sa pakigsaad sa Balaod, sila nahimong “linaing katigayonan.” Ubos sa maong pakigsaad, ang tribo ni Levi maoy magtaganag mga saserdote alang sa nasod. Sa dihang gihimo ni Jehova ang maong pakigsaad tali kaniya ug sa nasod sa Israel didto sa Bukid sa Sinai, siya naghisgot ug “usa ka gingharian sa mga saserdote ug usa ka balaan nga nasod” apan wala niya ibutyag kon kanus-a ug pinaagi sa unsa kana moabot. (Ex. 19:5-8) Samtang wala pa kana moabot, tin-awng gipakita sa maong pakigsaad nga ang mga Israelinhon dili makatuman sa tanang bahin sa Balaod. Nagpadayag hinuon kana sa ilang mga sala. Busa, ubos sa Balaod, ang mga Israelinhon kinahanglang motanyag kanunay ug mga halad sa pagtabon sa ilang mga sala. Apan dayag nga labaw pa niana ang gikinahanglan, ang usa ka hingpit nga halad nga dili na kinahanglang pagasublion. Oo, gikinahanglan gayod ang permanenteng kapasayloan sa sala.—Gal. 3:19-22.

 5. Nganong gitagna ni Jehova ang bag-ong pakigsaad?

⁵ Busa atong masabtan kon nganong, bisag balido pa ang pakigsaad sa Balaod, ang Diyos nag-inspirar kang Jeremias sa pagtagnag laing pakigsaad, ang bag-ong pakigsaad. Tungod sa iyang gugma ug kalulot, buot ni Jehova nga dili lang kay usa ka nasod ang makabaton ug permanenteng tabang. Pinaagi ni Jeremias, ang Diyos miingon bahin niadtong mahimong sakop niining umaabot nga pakigsaad: “Akong pasayloon ang ilang kasaypanan, ug dili ko na hinumdoman ang ilang sala.” (Jer. 31:34) Bisag kanang saara gihimo sa adlaw ni Jeremias, kini nagtaganag talagsaong paglaom alang sa tanang tawo. Sa unsang paagi?

6, 7. (a) Unsay gibati sa pipila bahin sa ilang pagkamasalaypon? (b) Nganong ang pagpamalandong sa bag-ong pakigsaad makapadasig kanimo?

⁶ Kita dili pa hingpit ug sagad kita makaamgo niini. Makita kini sa usa ka brader nga nakigbisog sa usa ka dakong personal nga problema. Siya mikomento: “Sa dihang mabuhat nako kana pag-usab, maguol kaayo ko. Ako maghunahuna nga ako dili na gayod mapasaylo tungod sa akong nabuhat. Malisdan ko sa pag-ampo. Akong sugdan kini sa pag-ingon, ‘Jehova, wala ko masayod kon dunggon ba nimo kini nga pag-ampo, apan . . . ’” Ang pipila nga nakasinati niana o kaha nakahimog sala mibati nga morag may “bagang panganod” nga nakaali sa ilang mga pag-ampo sa Diyos. (Lam. 3:44) Ang uban gihasol sa ilang hunahuna tungod sa ilang nangaging buhat nga daotan. Bisan gani ang sulondang mga Kristohanon makasultig mga butang nga ilang basolan sa ulahi.—Sant. 3:5-10.

⁷ Kitang tanan dili angayng maghunahuna nga dili na gayod kita makabuhat ug daotan. (1 Cor. 10:12) Bisan si apostol Pablo nasayod nga siya masayop. (Basaha ang Roma 7:21-25.) May kalabotan niini, angayng hinumdoman ang bag-ong pakigsaad. Ang Diyos misaad nga ang pangunang bahin sa bag-ong pakigsaad mao nga siya dili na mahinumdom sa mga sala. Dili gayod matupngan ang benepisyo niini! Ang pagtagna niana nakapadasig gayod kang Jeremias, ug kita usab madasig samtang dugang kitang makakat-on bahin sa bag-ong pakigsaad ug makasabot kon sa unsang paagi makabenepisyo kita niini.

8, 9. Unsay gisakripisyo ni Jehova aron mahimo ang pagpasaylo sa sala?

⁸ Sa dihang mas mailhan nimo si Jehova, anam-anam gayod nimong masabtan kon unsa siya ka maluloton ug maluloy-on sa dili-hingpit nga mga tawo. (Sal. 103:13, 14) Sa pagtagna sa bag-ong pakigsaad, gipasiugda ni Jeremias nga si Jehova “magpasaylo sa ilang kasaypanan” ug dili na mahinumdom sa sala. (Jer. 31:34) Imong mahanduraw nga si Jeremias lagmit naghunahuna kon unsaon kana paghimo ni Jehova. Hinuon iyang nasabtan nga sa paghisgot sa bag-ong pakigsaad, ang Diyos nagpasabot nga adunay usa ka kasabotan o kontrata tali Kaniya ug sa mga tawo. Pinaagi sa maong pakigsaad, tumanon ni Jehova kon unsay iyang gipatagna ni Jeremias, apil ang kapasayloan. Aduna pay mga detalye nga kinahanglang paaboton kon unsay dugang ipadayag sa Diyos bahin sa iyang katuyoan, lakip na kon unsay himoon sa Mesiyas.

⁹ Lagmit nakakita ka ug mga ginikanan kansang mga anak gipagustohan lang ug wala magdisiplina kanila. Sa imong hunahuna, ingon ba niana si Jehova? Dili gayod! Kini tin-awng makita sa dihang gipatuman na ang bag-ong pakigsaad. Inay magpapas lamang sa mga sala, gipadapat gayod sa Diyos ang iyang sukdanan sa hustisya pinaagi sa pagtaganag legal nga pasikaranan sa pagpasaylog mga sala, ug dako ang sakripisyo nga iyang gihimo niini. Masabtan nimo kini kon imong matikdan ang gisulat ni Pablo sa dihang naghisgot siya sa bag-ong pakigsaad. (Basaha ang Hebreohanon 9:15, 22, 28.) Si Pablo naghisgot ug “pagkagawas pinaagi sa paglukat” ug miingon nga “gawas kon igaula ang dugo walay mahitabo nga pagpasaylo.” Sa bag-ong pakigsaad, kining gihisgotan nga dugo wala magtumong sa mga torong baka o mga kanding nga gihalad sumala sa Balaod. Sa pagkatinuod, ang bag-ong pakigsaad nahimong balido tungod sa dugo ni Jesus. Pinasukad nianang hingpit nga halad, si Jehova permanenteng ‘makapasaylo sa kasaypanan ug sala.’ (Buh. 2:38; 3:19) Apan kinsay mahimong bahin niining bag-ong pakigsaad ug makabatog kapasayloan? Dili ang Hudiyohanong nasod. Si Jesus miingon nga ang Diyos magsalikway sa mga Hudiyo, kadtong naghalad ug mga hayop sumala sa Kasugoan, ug nga Siya moliso ngadto sa laing nasod. (Mat. 21:43; Buh. 3:13-15) Kana mao “ang Israel sa Diyos,” nga gilangkoban sa mga Kristohanong dinihogan sa balaang espiritu. Sa yanong mga pulong, ang pakigsaad sa Balaod maoy tali sa Diyos ug sa kinaiyanhong Israel, samtang ang bag-ong pakigsaad maoy tali kang Jehova nga Diyos ug sa espirituwal Israel, diin si Jesus mao ang Tigpataliwala niana.—Gal. 6:16; Roma 9:6.

10. (a) Kinsa ang “turok” alang kang David? (b) Sa unsang paagi ang mga tawo makabenepisyo sa “turok”?

¹⁰ Si Jeremias naghulagway sa Usa nga moabot, ang Mesiyas, ingong ang “turok” alang kang David. Haom kana. Bisag samtang nag-alagad pa si Jeremias ingong manalagna, ang harianong kaliwatan sa banay ni David giputol na. Apan, ang tuod niini wala mamatay. Sa gitakdang panahon, si Jesus natawo sa banay ni Haring David. Siya matawag nga “Si Jehova Mao ang Atong Pagkamatarong,” nga nagpasiugda nga gihatagan sa Diyos ug dakong pagtagad ang pagkamatarong. (Basaha ang Jeremias 23:5, 6.) Gitugotan ni Jehova nga ang iyang bugtong Anak mag-antos ug mamatay dinhi sa yuta. Unya si Jehova, uyon sa hustisya, makapadapat sa bili sa halad lukat sa “turok” alang kang David ingong pasikaranan sa pagpasaylo. (Jer. 33:15) Tungod niini, ang pipila ka tawo ikapahayag na nga “matarong alang sa kinabuhi” ug madihogan sa balaang espiritu, ug sila mahimong sakop sa bag-ong pakigsaad. Ingong dugang ebidensiya sa pagkamahunahunaon sa Diyos sa pagkamatarong, ang uban nga dili bahin sa maong pakigsaad makabenepisyo ug nakabenepisyo na gayod niini, sumala sa atong makita.—Roma 5:18.

11. (a) Unsay gisulatan sa balaod sa bag-ong pakigsaad? (b) Nganong ang “ubang mga karnero” maikag sa balaod sa bag-ong pakigsaad?

¹¹ Gusto ba nimong masayran ang ubang talagsaong mga bahin sa bag-ong pakigsaad? Ang usa ka dakong kalainan tali sa bag-ong pakigsaad ug sa Moisesnong Balaod mao ang gisulatan niana. (Basaha ang Jeremias 31:33.) Ang Napulo ka Sugo sa pakigsaad sa Balaod gisulat diha sa mga papan nga bato, nga sa kadugayan nahanaw ra. Kasukwahi niana, si Jeremias nagtagna nga ang balaod sa bag-ong pakigsaad igasulat diha sa kasingkasing sa mga tawo, ug kana magmalungtaron. Kadtong sakop sa bag-ong pakigsaad, ang dinihogang mga Kristohanon, nagpabili gayod niining maong balaod. Komosta kadtong dili sakop sa bag-ong pakigsaad, ang “ubang mga karnero,” nga naglaom nga mabuhing walay kataposan sa yuta? (Juan 10:16) Sila usab nalipay sa balaod sa Diyos. Sa diwa, sila susama sa langyaw nga mga pumoluyo sa Israel, kinsa midawat ug nakabenepisyo sa Moisesnong Balaod.—Lev. 24:22; Num. 15:15.

12, 13. (a) Unsa ang balaod sa bag-ong pakigsaad? (b) Ubos sa “balaod ni Kristo,” nganong dili ka mobating napugos sa pag-alagad sa Diyos?

¹² Unsay imong tubag kon pangutan-on ka, ‘Unsa ba ang balaod nga nahisulat diha sa kasingkasing sa dinihogang mga Kristohanon?’ Buweno, kining balaora gitawag usab nga “balaod ni Kristo.” Kini unang gihatag ngadto sa espirituwal nga mga Israelinhon, kadtong sakop sa bag-ong pakigsaad. (Gal. 6:2; Roma 2:28, 29) Ang “balaod ni Kristo” mahimo nimong malangkob sa usa ka pulong: gugma. (Mat. 22:36-39) Sa unsang paagi kining balaora nahisulat diha sa kasingkasing sa mga dinihogan? Ang hinungdanong mga paagi mao ang ilang pagtuon sa Pulong sa Diyos ug ang pag-ampo kang Jehova. Busa, kini nga mga aspekto sa matuod nga pagsimba angayng mahimong regular nga bahin sa kinabuhi sa tanang matuod nga mga Kristohanon, bisan niadtong dili sakop sa bag-ong pakigsaad apan buot makabenepisyo niana.

¹³ Ang “balaod ni Kristo” gitawag nga “hingpit nga balaod nga iya sa kagawasan” ug ang “balaod sa mga tawong may kagawasan.” (Sant. 1:25; 2:12) Daghan ang natawo ubos sa Moisesnong Balaod, apan walay natawo diha sa bag-ong pakigsaad o ubos sa balaod ni Kristo. Walay usa nga nagmasinugtanon sa balaod ni Kristo ang gipugos sa pag-alagad sa Diyos. Hinunoa, sila nalipay sa pagkahibalo nga ang balaod sa Diyos mahimong isulat diha sa mga kasingkasing ug nga mabatonan karon sa mga tawo ang malungtarong mga benepisyo sa pakigsaad nga gitagna ni Jeremias.

14. Kinsay dayag nga makabenepisyo sa bag-ong pakigsaad?

¹⁴ Sa pagkasayod nga ang 144,000 lamang ang sakop sa bag-ong pakigsaad, ang pipila tingali maghunahuna nga kini ra sila ang makabenepisyo niini. Kana lagmit maoy ilang gihunahuna kay ang mga dinihogan mao lamang ang makigbahin sa mga emblema panahon sa tinuig nga Memoryal sa kamatayon ni Kristo, diin ang bino naghawas sa “dugo sa pakigsaad.” (Mar. 14:24) Apan, hinumdomi nga kadtong sakop sa bag-ong pakigsaad mahimong mga kauban ni Jesus ingong “binhi” ni Abraham, nga pinaagi niana ang tanang nasod mapanalanginan. (Gal. 3:8, 9, 29; Gen. 12:3) Pinaagi sa bag-ong pakigsaad, tumanon ni Jehova ang iyang saad nga ang tanang tawo panalanginan pinaagi sa “binhi” ni Abraham.

15. Unsay papel sa mga dinihogan sumala sa gitagna?

¹⁵ Si Jesu-Kristo, ang pangunang bahin sa binhi ni Abraham, nag-alagad ingong Hataas nga Saserdote, ug iyang gitagana ang hingpit nga halad aron mabatonan ang kapasayloan sa kasaypanan ug sala. (Basaha ang Hebreohanon 2:17, 18.) Bisan pa niana, dugay nang gipahayag sa Diyos ang “usa ka gingharian sa mga saserdote ug usa ka balaang nasod.” (Ex. 19:6) Sa kinaiyanhong Israel, ang mga saserdote naggikan sa usa ra ka tribo ug ang mga hari gikan sa laing tribo. Busa sa unsang paagi motungha kining gisaad nga nasod nga mag-alagad ingong mga hari ug saserdote? Gisulat ni apostol Pedro ang iyang unang sulat alang sa mga gibalaan sa espiritu. (1 Ped. 1:1, 2) Iyang gitawag silang “usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya.” (1 Ped. 2:9) Busa, ang dinihogang mga Kristohanon nga sakop sa bag-ong pakigsaad mag-alagad ingong luyoluyong mga saserdote. Hunahunaa kon unsay kahulogan niana! Adlaw-adlaw kitang nakigbisog sa impluwensiya sa sala, nga sa gihapon ‘nagmando ingong hari.’ Kadtong mag-alagad ingong luyoluyong mga saserdote makasinati usab niana. (Roma 5:21) Masayod sila kon unsay bation sa dihang makasala ug sa dihang tulisokon sa tanlag. Busa, uban ni Kristo, makasimpatiya sila kanato samtang atong buntogon ang tendensiya nga makasala.

16. Sa unsang paagi ang Pinadayag 7:9, 14 makapadasig sa “dakong panon”?

¹⁶ Sa Pinadayag 7:9, 14, ang “dakong panon” gihulagway nga “nagsul-ob ug maputing tag-as nga mga besti,” nga nagpasabot sa usa ka hinlong baroganan atubangan sa Diyos. Aron maluwas sa “dakong kasakitan,” ang dakong panon karon ginatigom. Busa, bisan karon, sila nakabatog matarong nga baroganan atubangan sa Diyos. Sila gipahayag nang matarong ingong mga higala ni Jehova. (Roma 4:2, 3; Sant. 2:23) Pagkadakong kaayohan niana! Kon bahin ka sa dakong panon, makapaneguro ka nga ang Diyos andam motabang kanimo samtang manlimbasog ka nga magpabiling hinlo sa iyang panan-aw.

17. Unsay ipasabot nga dili na “hinumdoman” ni Jehova ang mga sala?

¹⁷ Unsay mahitabo sa mga sala niadtong giuyonan sa Diyos? Sumala sa nahisgotan na, si Jehova miingon pinaagi ni Jeremias: “Akong pasayloon ang ilang kasaypanan, ug dili ko na hinumdoman ang ilang sala.” (Jer. 31:34) Gihimo kini sa Diyos alang sa mga dinihogan pinasukad sa halad ni Jesus. Sa susamang paagi, ang Diyos makapasaylo sa mga sala sa dakong panon pinasukad sa mao ra gihapon nga “dugo sa pakigsaad.” Ang pag-ingon ni Jeremias nga dili na “hinumdoman” sa Diyos ang ilang mga sala wala magpasabot nga Siya malimot ug dili na makahinumdom niana. Hinunoa, nagpasabot kini nga sa dihang si Jehova nakapahamtang na sa nahiangayng disiplina ug nakapasaylo na sa mahinulsolong nakasala, dili na Niya hinumdoman pa ang maong sala. Hunahunaa ang mga sala nga nahimo ni Haring David may kalabotan kang Bat-seba ug Urias. Gidisiplina si David ug iyang giani ang mga sangpotanan sa iyang mga sala. (2 Sam. 11:4, 15, 27; 12:9-14; Isa. 38:17) Bisan pa niana, wala sudyai sa Diyos si David sa maong mga sala hangtod sa hangtod. (Basaha ang 2 Cronicas 7:17, 18.) Sumala sa gipadayag sa bag-ong pakigsaad, sa dihang si Jehova nakapasaylo na sa mga sala pinasukad sa halad ni Jesus, dili na Niya kana hinumdoman pa.—Ezeq. 18:21, 22.

18, 19. Unsa nga leksiyon bahin sa pagpasaylo ang anaa sa bag-ong pakigsaad?

¹⁸ Busa, ang bag-ong pakigsaad nagpasiugda ug usa ka talagsaong aspekto sa mga pagpakiglabot ni Jehova sa makasasala nga katawhan, ang mga dinihogan nga sakop sa pakigsaad ug kadtong may yutan-ong paglaom. Makasalig ka nga kon pasayloon na ni Jehova ang imong mga sala, dili na niya kana hinumdoman. Busa ang matag usa kanato adunay makuhang leksiyon sa saad sa Diyos maylabot sa bag-ong pakigsaad. Suknaa ang imong kaugalingon, ‘Naningkamot ba ko sa pagsundog kang Jehova pinaagi sa dili na pag-ugkat sa mga sala sa uban nga ako nang gipasaylo?’ (Mat. 6:14, 15) Mapadapat kini sa ginagmay ug bug-at kaayong mga sala, sama sa pagpanapaw sa Kristohanong kapikas. Kon pasayloon sa inosenteng kapikas ang naghinulsol nga mananapaw, dili ba angayan nga ‘dili na hinumdoman ang iyang sala’? Tinuod, dili tingali sayon nga kita makalimot sa mga sala, apan usa kini ka paagi nga atong masundog si Jehova.a

¹⁹ Atong mapadapat kini nga leksiyon nga gipasiugda sa bag-ong pakigsaad bisan sa usa nga napalagpot apan naghinulsol ug napasig-uli na. Komosta kon siya nakapahinabo kanimog dakong kadaot o kaha nagdaot sa imong dungog? Karon siya gidawat nag balik sa kongregasyon. Unsa kahay epekto sa Jeremias 31:34 diha sa atong panghunahuna ug reaksiyon? Pasayloon ba nato ang nakasala ug dili na balikbalikon paghisgot ang iyang daotang buhat? (2 Cor. 2:6-8) Sa pagkatinuod, kana angay gayong ipadapat sa matag-adlawng pagkinabuhi sa tanan nga nagpabili sa bag-ong pakigsaad.

20. Sa unsang paagi ang imong tinamdan lahi sa kadaghanan sa adlaw ni Jeremias?

²⁰ Sa adlaw ni Jeremias, daghang Hudiyo ang samag nag-ingon: “Si Jehova dili magbuhat ug maayo, ug siya dili magbuhat ug daotan.” (Sof. 1:12) Bisag nahibalo sila kon kinsa si Jehova ug unsa ang iyang mga hiyas, ilang gihunahuna nga Siya dili mohimog aksiyon ug nga Siya wala magdahom nga sila angayng mosunod sa bisan unsang mga sukdanan. Hinuon, nahibalo ka nga ang tanan makita sa Diyos. Ikaw adunay pagtahod ug kahadlok sa Diyos ug buot gayod nimong molikay sa pagbuhat ug daotan. (Jer. 16:17) Sa samang panahon, nahibalo ka nga si Jehova maayo kaayo nga Amahan. Iyang makita ang atong maayong mga buhat, makita man kana sa uban o dili.—2 Cron. 16:9.

21, 22. Nganong dili na kinahanglang sultihan ka nga: ‘Ilha si Jehova’?

²¹ Ang usa ka hinungdanong bahin sa bag-ong pakigsaad mao kini: “Ibutang ko ang akong balaod sa sulod nila, ug isulat ko kini sa ilang kasingkasing. Ug ako mahimong ilang Diyos, . . . Ug sila dili na magtudlo ang matag usa sa iyang isigkaingon ug ang matag usa sa iyang igsoon, nga mag-ingon, ‘Ilha ninyo si Jehova!’ kay silang tanan makaila man kanako.” (Jer. 31:33, 34) Gipakita sa mga dinihogan sa yuta karon nga ang balaod sa Diyos anaa sa sulod nila. Gihigugma nila ang mga kamatuoran nga anaa niini, inay nga mosalig sa mga pagtulon-an sa tawo. Ug malipayon silang nagpakig-ambit sa kahibalo sa Bibliya uban niadtong naglangkob sa dakong panon. Busa kadtong may yutan-ong paglaom nakaila usab ug nahigugma kang Jehova. Kinabubut-on silang nagpasakop sa iyang pagtultol ug nagsalig sa iyang mga saad. Lagmit usa ka kanila. Nailhan mo siya ingong Persona ug aduna kay personal nga relasyon kaniya. Pagkadakong kaayohan niana!

²² Sa unsang paagi ka napalig-on sa imong relasyon kang Jehova? Walay duhaduha nga may nahinumdoman kang mga higayon nga gibati nimong gitubag niya ang imong mga pag-ampo. Pinaagi sa maong mga kasinatian, mas milalom ang imong pagpabili kon unsang matanga siya sa Diyos. Gibati tingali nimo nga iya kang gitabangan sa paghinumdom ug usa ka teksto nga nakatabang kanimo nga masagubang ang kalisdanan. Pabilhi ang maong mga kasinatian. Samtang padayon kang magtuon sa iyang Pulong, mouswag ang imong kahibalo bahin kaniya, ug kana nga kaayohan padayon nimong mapahimuslan.

23. Sa unsang paagi ang pagkaila kang Jehova makatabang kanimo nga dili na tulisokon sa imong tanlag?

²³ Apan atong masinati karon ang lain pang panalangin nga nalangkit sa bag-ong pakigsaad. Ang pagkahibalo nga si Jehova maoy motaganag kapasayloan sumala sa maong pakigsaad makatabang kanato aron dili na kanunayng tulisokon sa atong tanlag. Pananglitan, ang pipila nga nagpakuha sa ilang gisabak sa wala pa nila masayri ang sukdanan sa Diyos basin mobating sad-an ug masubo kay gituyo nilag patay ang nagtubong bata sa tiyan. Ingon usab niana ang gibati sa uban kay sila nakapatay sa dihang sila miapil sa pagpakiggubat. Ang halad-lukat ni Jesus, nga hinungdanon sa bag-ong pakigsaad, motaganag kapasayloan sa mga tinuod nga naghinulsol. Tungod niana, dili ba angayng makombinsir kita nga kon si Jehova nagpasaylo na sa atong mga sala, kana natapos na? Dili na kita angayng maghunahuna pa sa mga sala nga bug-os nang gipasaylo ni Jehova.

24. Unsang pagdasig ang imong makaplagan sa Jeremias 31:20?

²⁴ Atong makita ang tatawng ebidensiya sa pagpasaylo sa Diyos diha sa Jeremias 31:20. (Basaha.) Mga dekada una pa sa adlaw ni Jeremias, gisilotan ni Jehova ang napulo ka tribo nga amihanang gingharian sa Israel (gihawasan sa Epraim, ang inilang tribo) tungod sa ilang idolatriya. Sila gidestiyero. Bisan pa niana, may dakong gugma ang Diyos sa mga tawo nianang nasora ug gipakitaan silag kaluoy. Iya gihapong gimahal sila ingong “pinangga nga bata.” Sa dihang siya naghunahuna kanila, ang iyang ginhawaan “nagsaba,” nga nagkahulogang natandog ang iyang lalom nga pagbati. Kini nga asoy nga nalambigit sa diwa sa bag-ong pakigsaad nagpakita nga mapinasayloon kaayo si Jehova niadtong naghinulsol sa nangaging buhat nga daotan.

25. Nganong makapasalamat ka kang Jehova tungod sa bag-ong pakigsaad?

²⁵ Ang saad ni Jehova sa pagpasaylo sa mga sala pinaagi sa bag-ong pakigsaad bug-os nang matuman pagkatapos sa Milenyong Pagmando ni Kristo. Uban sa 144,000 nga luyoluyong mga saserdote, ipasig-uli na ni Jesu-Kristo sa kahingpitan ang maunongong mga tawo. Human sa kataposang pagsulay, ang katawhan mahimo na unyang tinuod na gayod nga mga sakop sa pamilya ni Jehova sa tibuok uniberso. (Basaha ang Roma 8:19-22.) Sulod sa daghang siglo, ang tanan nag-agulo tungod sa kabug-at sa sala. Apan, nianang panahona ang tawhanong kalalangan ni Jehova makabaton na sa “mahimayaong kagawasan sa mga anak sa Diyos,” ang kagawasan gikan sa sala ug kamatayon. Busa, magmasaligon nga pinaagi sa mahigugmaong kahikayan sa bag-ong pakigsaad, makabaton kag daghang kaayohan. Ikaw makabenepisyo karon ug hangtod sa hangtod pinaagi sa “turok” alang kang David ug makatagamtam sa “pagkamatarong diha sa yuta.”—Jer. 33:15.