SUGNOD

Sa literal, “pagkaon” alang sa kalayo. (Isa 9:​5, 19; Eze 15:4) Ang uling (Isa 47:14; Ju 18:18), kahoy (Jos 9:27; Isa 44:14-16; Jer 7:18), tikog (Job 41:20), sampinit (Ecc 7:6), ingon man ang paras (Eze 15:6), maoy lakip sa mga sugnod nga espesipikong gihisgotan sa Bibliya. Dugang pa, ang lana sa olibo mao ang sagad nga gigamit ingong pangpasiga sa mga lampara. (Ex 27:20; Mat 25:​3, 4) Ang kahoy o ang uling niini lagmit mao ang pangunang sugnod sa mga Israelinhon. Ingong pangpainit ang uling sagad nga halingon diha sa usa ka bagahan. (Jer 36:22) Sa ubang mga higayon kini halingon nga dili gamitag bagahan, sa walay duhaduha sama niadtong gihimo ni Jesu-Kristo human sa iyang pagkabanhaw sa dihang siya nagluto ug pamahaw ibabaw sa hinaling nga uling.​—Ju 21:​9, 10; tan-awa ang ULING.

Aron ihulagway ang kagrabe sa paglikos sa Jerusalem, si Ezequiel gisugo sa paggamit ug kinalibang sa tawo ingong sugnod, apan sa dihang siya midumili, si Jehova mitugot kaniya nga mogamit na lang ug kinalibang sa baka. (Eze 4:​8, 12-15) Bisan tuod ang uga nga kinalibang sa baka sa pagkakaron gigamit sa pipila ka tawo sa Tungang Sidlakan tungod sa kanihit sa kahoy, kini wala gayod magpasabot nga kini naandang gigamit sa mga Israelinhon, ilabina nga ang karaang Palestina mas bagag kakahoyan kay sa pagkakaron.