Kapitulo 19
Ang Umaabot nga “Gubat sa Dakong Adlaw sa Diyos nga Makagagahom sa Tanan”
ANG kanasoran sa kataposan nakaabot na sa panahong ilang giobligar ang Diyos nga Makagagahom sa Tanan sa pagsulat sa talagsaong kataposan sa “basahon sa mga Gubat ni Jehova.” (Numeros 21:14) Kanang literal nga basahon maoy usa ka talaan sa mga gubat nga gibugno ni Jehova alang sa iyang katawhan. Lagmit kadto nabasa ni Moises. Ang basahon tingali nagsugod sa malamposong pakiggubat ni Abraham batok sa mga hari nga nagbihag kang Lot, nga si Jehova nakigbugno dapig kang Abraham. (Genesis 14:1-16, 20) Sa dili na madugay karon, “ang basahon sa mga Gubat ni Jehova” mahidangat sa dakong tayuktok uban ang gidugang nga bag-ong kapitulo—ang asoy sa iyang labing mahimayaong kadaogan. Kana unya mao “ang gubat sa dakong adlaw sa Diyos nga Makagagahom sa Tanan” sa Armageddon, ang kataposan niining sistema sa mga butang. (Pinadayag 16:14, 16) Ang tibuok nga “basahon” mopadayag nga ang Diyos nga Makagagahom sa Tanan wala gayod mapildi sa usa ka away, o gubat.
2 Matuod, gikan sa sinugdanan sa Kakristiyanohan hangtod karon, gipanalipdan ni Jehova ang iyang katawhan sa paagi nga lahi sa militaryong mga gubat. Si Jehova nga Diyos wala gayod makig-away dapig sa iyang Kristohanong mga saksi sama sa iyang pagpakig-away dapig sa Israel ilalom sa Moisesnong Kasugoan. Apan ang panahon moabot sa dili na madugay sa dihang sa militaryong paagi siya makig-away dapig sa iyang mahinalarong mga alagad sa modernong panahon. Unsay mohagit sa maong gubat sa Armageddon?
3 Una pa mosilaob ang gubat sa Diyos, ang Dakong Babilonya, ang imperyo sa kalibotan sa bakak nga relihiyon, malaglag na. Si Satanas nga Yawa ug ang dili-relihiyosong politikanhong mga tiglaglag sa Dakong Babilonya mayugot sa kamatuorang ang mga Saksi ni Jehova mao lamang unya ang bugtong relihiyosong grupo nga magpabilin. Ang mga magmamando sa kalibotan dili unya makakab-ot sa ilang tumong sa usa ka walay-diyos nga kalibotan. Busa, sa maong panahon, abante ngadto sa bug-os nga pag-atake sa mga magsisimba ni Jehova, kansang unibersohanong pagkasoberano wala nila pagtuohi ug ilang ginasuklan! Sa ingon sila sa pagkamatuod makig-away unya batok sa Diyos.—Pinadayag 17:14, 16; itandi ang Buhat 5:39.
“Si Jehova sa mga Panon” Mopadayon sa Militaryong mga Kalihokan
4 Si Satanas nga Yawa, ang simbolikong Gog sa Magog, maoy tigpaluyo sa maong pag-atake sa katawhan ni Jehova. Dihang gamiton ni Gog ang iyang ateyistang mga panon sa pag-atake sa katawhan ni Jehova, sa paggun-ob ug sa paglaglag kanila, si Jehova mobalda ug makig-away dapig sa iyang katawhan, ingon sa gitagna sa Ezekiel 38:2, 12, 18-20. Ang sanong ni Jehova gitagna usab sa Zacarias 14:3: “Si Jehova tinong moasdang ug makig-away batok niadtong mga nasod sama sa adlaw sa iyang pagpakiggubat, sa adlaw sa gubat.” Sa maong paagi ang Diyos sa Bibliya mohatag ug pamatuod sa tanang modernong kanasoran nga siya sa gihapon usa ka Diyos nga Manggugubat, sama ra nga siya mao sa mga adlaw sa karaang Israel, sa dihang, sumala sa nahitala sa Hebreohanong Kasulatan, siya gibatbat ingong “si Jehova sa mga panon” sa 260 ka beses.—Salmo 24:10; 84:12.
5 Inig-abot sa “dakong adlaw sa Diyos nga Makagagahom sa Tanan,” kana mao unya ang panahon sa “ang gubat” nga maoy magtimaan nianang adlawa. Si Jehova mosenyas sa iyang Mariskal de Kampo o Field Marshall, si Jesu-Kristo. Sa ngalan ni Jehova, siya ug ang langitnong mga panon sa mga tinagpulo ka libong manulonda moasdang sa pagpakig-away, nga maorag nagasakay sa mga kabayo sa panggubatan. (Judas 14, 15) Sama sa usa ka koresponsal sa gubat, si apostol Juan nagahatag kanatog abanteng asoy sa dakong kadaogan nga maangkon sa Mariskal de Kampo ni Jehova sa “gubat sa dakong adlaw sa Diyos nga Makagagahom sa Tanan”:
6 “Nakita ko nga naabli ang langit, ug, tan-awa! dihay usa ka maputi nga kabayo. Ug ang nagkabayo niana gitawag Matinumanon ug Matuod, ug siya nagahukom ug nagapakiggubat sa pagkamatarong. Ang iyang mga mata maoy kalayo nga nagasiga, ug diha sa iyang ulo ang daghang purongpurong . . . Usab, ang mga panon sa langit nagsunod kaniya nga nagkabayo sa mga kabayong maputi, ug sila nasul-oban sa maputi, mahinlo, pino nga lino. Ug migula gikan sa iyang baba ang hait hataas nga espada, aron maoy iyang itigbas sa kanasoran, ug siya magapastol kanila pinaagi sa olisi nga puthaw. Iyang pagatamakan usab ang pigsanan sa parras sa kapungot sa Diyos nga Makagagahom sa Tanan. Ug sa iyang panggawas nga biste, bisan diha sa iyang paa, siya may ngalan nga nahisulat, Hari sa mga hari ug Ginoo sa mga ginoo.”—Pinadayag 19:11-16.
7 Ang harianong Mariskal de Kampo, si Jesu-Kristo, maoy manguna sa langitnong mga panon sa madaogong pag-asdang batok sa tanang giipong kaaway sa Armageddon. Iyang himoon ang maong natad-panggubatan nga usa ka dakong pigsanan sa parras! Sanglit ang Hari sa mga hari “magatamak usab sa pigsanan sa kapungot sa Diyos nga Makagagahom sa Tanan,” kini nagpasabot nga ang kanasoran bug-os nga mapigsat. Sila igabubo samag hinog nga mga ubas ngadto sa labihan kadakong “pigsanan sa ubas,” diin “ang kapungot sa Diyos nga Makagagahom sa Tanan” ipaagom kanila nga makapadugmok kanila. Ang langitnong mga panon moduyog sa pagtamak sa “dakong pigsanan sa ubas sa kasuko sa Diyos.”—Pinadayag 14:18-20.
8 Ang mga Saksi ni Jehova sa yuta dili mobakyaw sa “espada” batok sa mga panon ni Gog, apan si Jehova maoy mobakyaw. Kini maoy iyang away! Ug sa maong panahon sa kataposan ang kanasoran niining mauswagon sa siyentipikanhong paagi nga kalibotan makakita kaniya nga moaway! Pamati samtang iyang gibatbat ang iyang mga taktika sa pakiggubat: “‘Ako magapatawag sa usa ka espada batok kaniya [Gog] sa tibuok ko nga kabukiran,’ nagaingon ang Soberanong Ginoo si Jehova. ‘Ug ang espada sa matag usa mahimong batok sa iyang igsoong lalaki. Ug ako magahukom kaniya, pinaagi sa kamatay ug sa dugo; ug paulanan ko siya sa ulan nga makapabaha ug sa mga yelo, kalayo ug asupre ug ang iyang mga pundok ug ang daghang mga katawhan nga magauban kaniya. Ug ako magapadako sa akong kaugalingon ug magabalaan sa akong kaugalingon ug magapaila sa akong kaugalingon sa atubangan sa mga mata sa daghang nasod; ug sila makaila nga ako mao si Jehova.’”—Ezekiel 38:21-23.
Balaang mga Hinagiban Gamiton Batok sa Kaaway
9 Ingong mga hinagiban sa gubat, ibakyaw ni Jehova ang mga puwersa sa kalalangan: ang ulan nga makapabaha, mga ulan sa yelo nga makapatay ang gidak-on, mga bunok sa nagasiga nga kalayo ug asupre, mga tubod sa tubig gikan sa kahiladman sa yuta, ug ang kidlat. Sa pagkidlap sa galamiton sa Diyos sa pagpatay sa iyang mga kaaway, ang silaw mahimong kusog kaayo sa maadlaw ug sa magabii nga ang kinaiyanhong adlaw ug bulan maorag dili na kinahanglan ingong kahayag. Kini unya mahisamag sila wala maglihok, nga wala mag-obra ingong mga magdadala sa kahayag apan pasagdang ang dan-ag nga mga missile ni Jehova magpasundayag sa gahom niini sa pagdan-ag. (Habacuc 3:10, 11) Si Jehova adunay dagayang kinaiyanhong katingalahang puwersa nga iyang magamit sa pagpakig-away.—Josue 10:11; Job 38:22, 23, 29.
10 Sa umaabot nga “adlaw sa away,” si Jehova mogamit usab sa kamatay ug sa “hampak.” Ang manalagnang si Zacarias misulat mahitungod niini: “Kini mao unya ang hampak nga igahampak ni Jehova sa tanang katawhan nga makiggubat batok sa Jerusalem: May pagkaut-ot sa unod sa usa, samtang siya nagatindog; ug ang mga mata mismo sa usa mangadunot samtang anaa sa ilang mga luyak, ug ang dila mismo sa usa madunot sa iyang baba.”—Zacarias 14:12.
11 Kon kaha literal o dili “ang hampak,” kini magatak-om sa mga baba nga gibuka sa pagpahayag sa makalilisang nga mga panghulga! Ang mga dila madunot! Mawala ang mga gahom sa panan-aw, mao nga ang bangis-ug-mata nga mga tig-atake makaasdang lamang sa binutang paagi. Ang mga mata madunot! Ang kaunoran sa kusgang mga manggugubat maluya samtang nagatindog pa sila—dili samtang sila nagabuy-od sa yuta ingong mga minatay. Ang unod nga nagatabon sa ilang kabukogan madunot!—Itandi ang Habacuc 3:5.
12 “Ang hampak” kalit mohampak sa ilang militaryong mga kampo. Ang nagaandar nga kasangkapan sa pag-atake sa kawalay-mahimo dili moandar! (Zacarias 14:15; itandi ang Exodo 14:24, 25.) Nagapaila kon unsa ka walay pulos unya ang ilang kasangkapang militar mao ang mga pulong sa Zacarias 14:6: “Mahitabo nga niadtong adlawa wala ang bililhong kahayag—ang mga butang mabagtok.” Walay langitnong kahayag sa balaang pag-uyon ang modan-ag ibabaw kanila. Ang artipisyal nga mga suga sa modernong siyensiya dili makahanaw sa kangitngitan sa pagkawalay pag-uyon sa Diyos. Ang mga butang moandar dili na moandar, nga maorag nanggahi sa katugnaw—nga mabagtok.
13 Kining tanan makalilisang gayod! Apan mahidugang sa kalisang mao ang kagubot nga pukawon sa Diyos taliwala sa mga tig-atake. Ang ilang panaghiusa sa paglihok batok sa mga Saksi ni Jehova pagabungkagon. Sama sa mga gladiator o mga mag-aaway nga may makapasulaw nga mga helmet sa ilang mga ulo sulod sa Romanhong arena, sila motigbas sa usag usa nga dili makakita. Ang kagubot nga makapahinabog kamatayon mokuyanap samtang sila magpinatyanay sa usag usa.—Zacarias 14:13.
14 Ang masa nga pagpamatay nianang adlaw sa mga adlaw maoy dako kaayo, kay ang mga manggugubat sa kiliran ni Gog sa maong gubat maoy daghan kaayo. (Pinadayag 19:19-21) Kana usa gayod unya ka tibuok-yutang away, kay walay bahin sa yuta ang makaikyas sa kalaglagan. Dugang pa, kadtong pinatay sa Armageddon dili ibutang sa mga lubong nga may mga lapida sa paghinumdom kanila. Ang mga langgam ug mga mananap sa kapatagan moambit sa mga benepisyo sa kadaogan sa Diyos ug, sa samang panahon, motabang sa paghinlo sa yuta sa daghang patayng lawas nga makatag ibabaw sa yuta samag abono, nga dili hilakan, dili ilubong, nga ayran sa mga maluwas. (Ezekiel 39:1-5, 17-20; Pinadayag 19:17, 18) “Kadtong pinatay ni Jehova” makaangkon sa walay-kataposang daotang dungog sa ilang kaugalingon.—Jeremias 25:32, 33; Isaias 66:23, 24.
Gipatahom ang Ngalan ni Jehova
15 Sa ingon, si “Jehova sa mga panon” pinaagi sa iyang Mariskal de Kampo, si Jesu-Kristo, makaangkon sa dili-matapos nga himaya alang sa iyang kaugalingon. Ang labing dakong okasyon sa kasaysayan sa uniberso sa maong panahon malampos na—ang pagbayaw sa unibersohanong pagkasoberano ni Jehova ug ang pagbalaan sa iyang sagradong ngalan. (Ezekiel 38:23; 39:6, 7) Si Jehova unya mohimo sa usa ka ngalan alang sa iyang kaugalingon nga molabaw sa tanan nga gibatbat diha sa “basahon sa mga Gubat ni Jehova” ug sa Hebreohanong Kasulatan sa Balaang Bibliya. (Itandi ang Isaias 63:12-14.) Pagkatahom unya ang ngalan nga himoon ni Jehova alang sa iyang kaugalingon pinaagi sa iyang makalilisang nga kadaogan sa “gubat sa dakong adlaw sa Diyos nga Makagagahom sa Tanan”! Sa masadyaon ang tanang nahigugma nianang ngalana modayeg unya niana sa walay kataposan, nga moawit sa mga pagdayeg niana!
16 Nan, asdang ngadto sa pagpakiggubat, Oh Jehova sa mga panon, uban sa imong harianong Anak si Jesu-Kristo sa imong kiliran! (Salmo 110:5, 6) Pasagding ang imong matinumanong mga saksi sa yuta mahimong malipayong mga saksi sa imong walay-ingon nga kadaogan pinaagi sa imong Hari si Jesu-Kristo sa “gubat sa dakong adlaw sa Diyos nga Makagagahom sa Tanan.” Pasagding ang “dakong panon” malipayong “mogula sa dakong kasakitan” aron mahimong imong yutan-ong mga saksi sa walay kataposan. (Pinadayag 7:14) Ubos sa imong mahigugmaong pag-atiman, pasagding sila maluwas ngadto sa walay-gubat Milenyong Pagmando sa imong madaogong “Prinsipe sa Pakigdait.” Pasagding sila usa ka makitang pamatuod alang sa binanhaw nga mga patay sa kabayawan sa pagkasoberano nga sa tukma maoy imo ibabaw sa tibuok uniberso. Salamat sa pagsulat sa talagsaong kataposan sa “basahon sa mga Gubat ni Jehova.” Sa panahong walay kataposan, pasagding ang maong asoy sa imong walay-ingon nga kadaogan magapabilin sa mga talaan sa kasaysayan sa uniberso!
[Mga Pangutana nga Pagatun-an]
1. (a) Unsa ang iobligar unya sa kanasoran nga ipasulat sa Diyos nga Makagagahom sa Tanan diha sa “basahon sa mga Gubat ni Jehova,” ug unsa ba kanang basahona? (b) Sa unsang gubat kanang basahona makaabot sa talagsaong tayuktok?
2, 3. (a) Sukad sa sinugdanan sa Kakristiyanohan, unsa ang matuod bahin sa pagpakig-away ni Jehova sa militaryong “mga gubat”? (b) Unsay mohagit kang Jehova sa pagpakig-away dapig sa iyang mga alagad sa atong panahon?
4. (a) Unsa ang sanong ni Jehova sa pag-atake ni Gog? (b) Unsay pamatud-an sa maong sanong, nga nahiuyon sa ngalang “Jehova sa mga panon”?
5, 6. (a) Unsang gubat ang mosilaob sa maong panahon, ug kinsay manguna sa langitnong mga panon ngadto sa panggubatan? (b) Unsang asoy ang ginahatag ni apostol Juan bahin sa pagpakiggubat sa langitnong mga panon?
7. Unsay ipasabot sa pagtamak sa simbolikong pigsanan sa kasuko sa Diyos alang sa kanasoran?
8. Giunsa pagbatbat ni Jehova ang iyang mga taktika sa gubat?
9. Unsa ang pipila sa mga hinagibang gamiton ni Jehova batok sa iyang mga kaaway?
10. Sumala sa Zacarias 14:12, unsa pa ang gamiton ni Jehova sa umaabot nga “adlaw sa pakig-away”?
11. Unsay mahitabo dihang “ang hampak” mahitabo sa mga manggugubat nga nagaatake sa katawhan ni Jehova?
12. Sa unsang paagi maapektahan sa “ang hampak” ang militaryong mga kampo ug kasangkapan sa kaaway?
13. Unsay makadugang sa kalisang nga pukawon ni Jehova taliwala sa mga mag-aatake?
14. (a) Unsa ka dako ang pagpamatay sa maong panahon, ug sa unsang paagi ang mga langgam ug ang mga mananap makaambit sa mga benepisyo sa kadaogan ni Jehova? (b) Unsang tinamdan ang batonan sa mga maluwas ngadto “niadtong pinatay ni Jehova”?
15. Unsang talagsaong okasyon ang nalampos na unya, ug unsay epekto niana diha sa ngalan ni Jehova?
16. Tungod sa umaabot nga “gubat sa dakong adlaw sa Diyos nga Makagagahom sa Tanan,” unsang pag-ampo ang gitanyag alang sa “dakong panon”?