Diha sa ikaduhang matagnaong panan-awon, usa ka kanding nga laki ang nakita nga “migula gikan sa salopanan sa adlaw [ang kasadpan] diha sa nawong sa tibuok kalibotan,” nga matulin kaayo nga sa ingon “kini wala motugkad sa yuta.” Kini miadto sa duhay-sungay nga karnero nga laki nga diin ang manulonda nagaingon “nga mao ang mga hari sa Media ug sa Persia.” Ang kanding nga laki “miduol sa karnero nga laki ug gibunggo ang duha ka sungay niini.” Si Daniel gisultihan: “Ang balhiboong kanding nga laki mao ang hari sa Gresya.”—Daniel 8:5-8, 20, 21.

Ang mga Tagna Natuman

Sa tingpamulak sa 334 W.K.P., misulod si Alejandro sa Asia diha sa Dardanelles (ang karaang Hellespont) nga may 30,000 ka sundalong naglakaw ug 5,000 ka sundalong nangabayo. May katulinon nga sama sa simbolikong upat ug pako nga leopardo o sa kanding nga daw wala motugkad sa yuta, iyang gisilhig ang mga teritoryo sa imperyo sa Persia—50 ka pilong gidak-on sa iyang kaugalingong gingharian! Siya ba “magahari uban sa dakong gahom ug magabuhat sumala sa iyang kabubut-on”? Ang kasaysayan nagatubag.

Diha sa Granicus River sa amihanang-kasadpang suok sa Asia Minor (modernong Turkey) nadaog ni Alejandro ang iyang unang gubat batok sa mga Persianhon. Niadtong tingtugnaw iyang nadaog ang kasadpan sa Asia Minor. Sa pagkasunod nga tinghunlak diha sa Issus sa habagatang-sidlakang suok sa Asia Minor, bug-os niyang giparot ang mga sundalong Persianhon nga gibanabanang may tunga ka milyong mga lalaki, ug ang dakong hari, si Dario III sa Persia, mikalagiw, gibiyaan ang iyang pamilya sa mga kamot ni Alejandro.

Inay gukdon ang mikalagiw nga mga Persianhon, mimartsa si Alejandro pahabagatan diha sa daplin sa dagat sa Mediteraneo, gidaog ang mga base nga gigamit sa gamhanang mga barko sa gubat sa Persia. Ang siyudad nga isla sa Tiro misukol sulod sa pito ka bulan. Sa kataposan, gigamit ang kagun-oban sa daan dakong siyudad nga gilumpag ni Nabucodonosor, naghimo si Alejandro ug agianan paingon sa isla nga siyudad. Ang mga nabilin nianang maong agianan makita gihapon karong adlawa, nga nagapamatuod sa katumanan sa tagna ni Ezekiel nga ang abog sa Tiro ilabay ngadto sa dagat.—Ezekiel 26:4, 12.

Ang tanang tumong sa plano ni Philip natuman ug misobra pa, apan wala pa matapos si Alejandro. Samag usa ka tulin nga molihok nga kanding nga laki, mibalik siya sa amihanang-sidlakan, agi sa Palestina ug mitungas paingon sa Tigris River. Didto, sa tuig 331 W.K.P., naengkuwentro niya ang mga Persianhon sa Gaugamela, dili layo gikan sa mga kagun-oban sa kaulohan niadto sa Asiria, ang Nineve. Napildi sa 47,000 ka sundalo ni Alejandro ang naorganisar pag-usab nga 1,000,000 ka sundalong Persianhon. Mikalagiw si Dario III ug sa ulahi gipatay sa iyang kaugalingong katawhan.

Nahupong sa kadaogan, mipaingon si Alejandro sa habagatan ug nailog ang kaulohan sa tingtugnaw sa Persia, ang Babilonya. Nasikop usab niya ang mga kaulohan sa Susa ug Persepolis, gikuha ang dakong tinipig nga bahandi sa Persia ug gisunog ang dakong palasyo ni Xerxes. Sa kataposan, ang kaulohan sa Ecbatana nahulog kaniya. Dayon gipildi niining tulin nga magdadaog ang nabilin sa mga teritoryo sa Persia, miabot bisan pa sa halayong sidlakan ngadto sa Indus River sa modernong-adlawng Pakistan. Sa tino, ang Gresya nahimong ikalimang dakong mga gahom sa kasaysayan sa Bibliya.