Mga Pangutana Gikan sa mga Magbabasa

◼ Ang pakigtugon sa Kasugoan natapos ba sa dihang namatay si Jesus sa kahoy sa pagsakit, ug kanus-a man kana pulihi sa bag-ong pakigtugon?

Daghan ang nangutana niini, nga naghinumdom sa tulo ka hitabo: Ang pagkamatay ni Jesus sa kahoy sa pagsakit sa hapon sa Nisan 14, 33 K.P., pagtanyag niya sa bili sa iyang dugo-sa-kinabuhi sa langit, ug pagbubo niya sa balaang espiritu sa adlaw sa Pentekostes 33 K.P. Sa Kasulatanhon ang pakigtugon sa Kasugoan natapos ug gipulihan sa bag-ong pakigtugon sa panahon sa Pentekostes. Atong tan-awon kon nganong matuod kini.

Si Jehova mitagna nga, sa nahaigong panahon, pulihan niya ang pakigtugon sa Kasugoan sa “usa ka bag-ong pakigtugon” nga makatugot nga ang sala mapasaylo sa bug-os, nga dili posible ubos sa Kasugoan. (Jeremias 31:31-34) Kanus-a man mahitabo ang maong pagpuli?

Ang mas daang pakigtugon, ang pakigtugon sa Kasugoan, kinahanglan unang kuhaon sa dalan ingong nakatuman na sa iyang katuyoan. (Galacia 3:19, 24, 25) Si apostol Pablo misulat: “[Ang Diyos] malulutong nagpasaylo kanato sa tanan natong kalapasan ug nagpapas sa sinulat-sa-kamot nga kasulatan nga batok kanato, nga gilangkoban sa mga kalagdaan ug kanang nahisupak kanato; ug Iyang gikuha kana sa dalan pinaagi sa paglansang niana sa kahoy sa pagsakit.” (Colosas 2:13, 14) Nagkahulogan ba kana nga sa gutlo sa pagkamatay ni Jesus, ang pakigtugon sa Kasugoan gipulihan sa bag-ong pakigtugon?

Wala, kay ang bag-ong pakigtugon pagainagurahan sa dugo sa nahiangay nga halad ug uban sa usa ka bag-ong nasod, ang espirituwal nga Israel. (Hebreohanon 8:5, 6; 9:15-22) Si Jesus gibanhaw sa Nisan 16, ug 40 ka adlaw sa ulahi siya mikayab sa langit. (Buhat 1:3-9) Napulo ka adlaw tapos sa iyang pagkayab, o sa adlaw sa Pentekostes, gibubo ni Jesus ibabaw sa iyang mga tinun-an “ang gisaad nga balaang espiritu” nga iyang nadawat gikan sa iyang Amahan, ug mitungha ang espirituwal nga Israel. (Buhat 2:33) Pinaagi sa Tigpataliwala, si Jesu-Kristo, ang Diyos mihimo sa bag-ong pakigtugon uban sa espirituwal nga Israel.

Tungod niining nagkalambiggit nga mga butang, kanus-a pulihi ang pakigtugon sa Kasugoan sa bag-ong pakigtugon?

Ang usa dili makaingon nga natapos ang Kasugoan sa pagkamatay ni Jesus. Sulod sa 40 ka adlaw tapos sa pagkabanhaw ni Jesus ngadto sa espiritung kinabuhi apan nagpabilin sa yuta, ang iyang mga tinun-an nagbantay pa sa Kasugoan. Dugang pa, ang usa ka hinungdanong bahin sa Kasugoan mao ang pagsulod sa hataas nga saserdote sa Labing Balaan kas-a sa matag tuig. Kana naghulagway sa pagkabanhaw ni Jesus sa mga langit. Didto, sa presensiya sa Diyos, siya, ingong Tigpataliwala sa bag-ong pakigtugon, makatanyag sa bili sa iyang halad lukat. (Hebreohanon 9:23, 24) Kadto nag-abli sa dalan aron ang usa ka bag-ong pakigtugon mainagurahan ingong katumanan sa Jeremias 31:31-34.

Ang bag-ong pakigtugon miepekto sa dihang si Jehova milihok sa iyang pagdawat sa halad lukat. Gibubo niya ang iyang balaang espiritu ibabaw sa matinumanong mga tinun-an ni Jesus aron patunghaon ang usa ka bag-ong nasod, ang espirituwal nga Israel, nga gilangkoban niadtong anaa sa pakigtugon alang sa Gingharian. (Lucas 22:29; Buhat 2:1-4) Kini nagpakita nga gipapas sa Diyos ang pakigtugon sa Kasugoan, nga masambingayong naglansang niana sa kahoy sa pagsakit nga namatyan ni Jesus. Busa natapos ang pakigtugon sa Kasugoan sa dihang ang paglihok, o inagurasyon, sa bag-ong pakigtugon nahitabo sa pagkatawo sa bag-ong nasod, ang espirituwal nga Israel, sa Pentekostes 33 K.P.​—Hebreohanon 7:12; 8:1, 2.

Gawas nianang pangunang tubag sa pangutana, kita makaingon nga ang Diyos wala bug-os motalikod sa kinaiyanhong Israel sa pagkatapos sa pakigtugon sa Kasugoan ug sa dayag nga pagsugod sa bag-ong pakigtugon sa Pentekostes 33 K.P. Pananglitan, sumala sa Abrahamikong pakigtugon, gipakita ni Jehova ang linaing pabor ngadto sa mga Hudiyo, mga proselita, ug mga Samarianhon sulod sa ika-70ng “semana” nga natapos sa 36 K.P. (Genesis 12:1-3; 15:18; 22:18; Daniel 9:27; Buhat 10:9-28, 44-48) Nadugaydugay pa gani nga ang pila ka dinihogang Hudiyong Kristohanon nakapahiuyon sa kamatuorang tapos sa 33 K.P. dili na kinahanglan nga pagabantayan ang Kasugoan; kini atong masabtan gikan sa pangutana nga gidala sa nagmandong lawas sa 49 K.P. (Buhat 15:1, 2) Ang kompletong pagbiya sa Kasugoan sa piho maoy sa 70 K.P., sa dihang nahanaw ang templo ug ang mga rekord sa kabanayan maylabot sa Kasugoan, kay gilaglag sa mga Romano.​—Mateo 23:38.

[Kapsiyon sa panid 31]

Pictorial Archive (Near Eastern History) Est.