Miikyas Sila sa Daotang Hari

Gipukaw ni Jose si Maria kay duna siyay importanteng balita. Bag-o lang nagpakita niya sa damgo ang anghel ni Jehova, nga nag-ingon: “Bangon, dad-a ang bata ug ang iyang inahan ug kalagiw ngadto sa Ehipto, ug pabilin didto hangtod moingon ko nga makabalik na mo, kay pangitaon ni Herodes ang bata aron patyon.”—Mateo 2:13.

Nianang gabhiona miikyas dayon si Jose ug Maria kauban ang ilang anak. Tayming kaayo ang ilang pag-ikyas kay nahibaloan ni Herodes nga giilad diay siya sa mga astrologo. Iya man god silang giingnan nga mobalik niya, pero wala na sila mobalik. Puwerteng sukoa ni Herodes. Gusto gihapon niyang ipapatay si Jesus maong nagsugo siya nga patyon ang tanang batang lalaki nga nag-edad ug duha ka tuig paubos nga nagpuyo sa Betlehem ug sa palibot nga mga lugar. Iyang gibase ang kuwentada sa edad nga giingon sa mga astrologo gikan sa Sidlakan.

Makapanglimbawot gayod ang maong pagpamatay sa tanang batang lalaki! Wala ta mahibalo kon pila ka bata ang gipatay, pero ang grabeng paghilak ug pagminatay sa mga inahan nagtuman sa gitagna sa propetang si Jeremias.—Jeremias 31:15.

Nianang higayona, si Jose ug ang iyang pamilya nakaikyas na padulong sa Ehipto ug didto na sila namuyo. Dayon usa ka gabii niana, nagpakita na sab kang Jose ang anghel ni Jehova pinaagig damgo. “Bangon, dad-a sa Israel ang bata ug ang iyang inahan, kay kadtong gustong mopatay sa bata patay na.” (Mateo 2:20) Tungod niini, nakadesisyon si Jose nga mobalik sila sa ilang lugar. Katumanan kini sa usa pa ka tagna sa Bibliya—ang Anak sa Diyos tawgon gikan sa Ehipto.—Oseas 11:1.

Makaingon ta nga gusto ni Jose nga ang iyang pamilya magpuyo sa Judea, tingali duol sa lungsod sa Betlehem, diin sila nagpuyo sa wala pa sila moadto sa Ehipto. Pero iyang nasayran nga ang daotang anak ni Herodes nga si Arquelao mao nay hari sa Judea. Gipadamgo na sab sa Diyos si Jose ug gipasidan-an sa kapeligrohan. Maong si Jose ug ang iyang pamilya mibiyahe paamihanan ug mipuyo sa siyudad sa Nasaret nga sakop sa Galilea, layo sa sentro sa pagsimba sa mga Hudiyo. Dinhi nagdako si Jesus, nga nagtuman sa lain pang tagna: “Siya tawgon nga Nasaretnon.”—Mateo 2:23.