Duol na ang Adlaw ni Jehova
“Pamatii kini, kamong mga tigulang nga lalaki, ug patalinghogi, kamong tanang pumoluyo sa yuta.”—JOEL 1:2.
1, 2. Tungod sa unsang kahimtang sa Juda nga gidasig ni Jehova si Joel sa pagpamulong sa iyang gamhanang tagna?
“ALAOT ang adlaw; kay ang adlaw ni Jehova duol na, ug sama sa pag-agaw gikan sa Labing Gamhanang Usa kini moabot!” Pagkadramatikanhong pahayag! Kadto ang mensahe sa Diyos sa iyang katawhan nga gipahayag sa iyang propetang si Joel.
2 Kadtong mga pulonga sa Joel 1:15 gisulat sa Juda, lagmit sa mga tuig 820 W.K.P. Ang lunhawng kabungtoran nagpanindot sa yuta niadtong panahona. Dagaya ang prutas ug lugas. Ang mga sibsibanan halapad ug berde. Apan, may butang nga sayop kaayo. Milambo ang pagsimba kang Baal sa Jerusalem ug sa yuta sa Juda. Ang katawhan nagpatuyang sa paghuboghubog atubangan niining bakak nga diyos. (Itandi ang 2 Cronicas 21:4-6, 11.) Tugotan ba ni Jehova kining tanan nga magpadayon?
3. Bahin sa unsa nagpasidaan si Jehova, ug alang sa unsa nga mangandam ang mga nasod?
3 Ang basahon sa Bibliya sa Joel nagtin-aw sa tubag. Bayawon ni Jehova nga Diyos ang iyang pagkasoberano ug balaanon ang iyang balaang ngalan. Ang dakong adlaw ni Jehova haduol na. Ipahamtang na sa Diyos ang paghukom ibabaw sa tanang nasod sa “ubos nga patag ni Jehosafat.” (Joel 3:12) Paandama sila alang sa pagpakiggubat sa Labing Gamhanang Usa, si Jehova. Kita usab nag-atubang sa dakong adlaw ni Jehova. Busa susihon nato pag-ayo ang matagnaong mga pulong ni Joel alang sa atong adlaw ug sa miagi.
Paghugpa sa mga Insekto
4. Unsa ka dako unya ang panghitabo nga gipasidaan ni Joel?
4 Pinaagi sa iyang propeta, si Jehova nag-ingon: “Pamatii kini, kamong mga tigulang nga lalaki, ug patalinghogi, kamong tanang pumoluyo sa yuta. Nahitabo ba kini sa inyong mga adlaw, o bisan sa mga adlaw sa inyong mga katigulangan? Bahin niini suginli ninyo ang inyong kaugalingong mga anak, ug ang inyong mga anak ngadto sa ilang mga anak, ug ang ilang mga anak ngadto sa mosunod nga kaliwatan.” (Joel 1:2, 3) Ang mga ansiyano ug ang tanang katawhan makadahom ug butang nga wala pa mahitabo sa ilang panahon o sa mga adlaw sa ilang katigulangan. Dili gayod kini ordinaryo nga kini igasugilon ngadto sa ikatulong kaliwatan! Unsa man kining talagsaong hitabo? Sa pagsusi, handurawon natong kita mibalik sa adlaw ni Joel.
5, 6. (a) Batbata ang hampak nga gitagna ni Joel. (b) Kinsa ang Tinubdan sa maong hampak?
5 Paminaw! Nadunggan ni Joel ang kagahob sa halayo. Naglugitom ang langit, ug kanang makahahadlok nga kasaba nagkakusog samtang ang kangitngit anaa na sa ibabaw. Dayon ang samag-asong panganod mipaubos. Panon kini sa milyonmilyong insekto. Ug pagkamalaglagon niini! Karon tagda ang Joel 1:4. Ang mga manunulong nga insekto dili lamang ang pak-ang nagalaling mga dulon. Dili kay kana ra! Nangabot, usab, ang gutom nga panon sa nagakamang, way-pakong mga dulon. Gipadpad sa hangin, ang mga dulon kalit nga nangabot, ug ang ilang kinagalkal sama nianang sa mga karo. (Joel 2:5) Gumikan sa ilang kakusog maningaon, ang milyonmilyon kanila mokilab lamang sa paghimo sa tinuod nga paraiso nga usa ka kamingawan.
6 Nagadasdas usab ang mga hantatawo—mga ulod sa anunugba ug mga alibangbang. Ang panonpanon sa gutom nga mga hantatawo makakaon sa mga dahon sa pananom sa tagsatagsa, sa kada dahon, hangtod ang mga tanom halos nahutdan na sa mga dahon niini. Ug kadaghanan sa ilang salin, kaonon sa mga dulon. Ug sa salin sa mga dulon, ang kusog-managan nga mga uk-ok seguradong motilok niini. Apan matikdi kini: Sa Joel kapitulo 2, bersikulo 11, ang Diyos nagpaila sa panon sa dulon ingong “iyang militaryong gahom.” Oo, siya ang Tinubdan sa hampak sa dulon nga maglaglag sa yuta ug magpahinabog grabeng gutom. Kanus-a? Una pa “ang adlaw ni Jehova.”
“Pagmata, Kamong mga Palahubog”!
7. (a) Unsa ang kahimtang sa relihiyosong mga lider sa Juda? (b) Sa unsang paagi ang mga lider sa Kakristiyanohan karon anaa sa kahimtang nga susama nianang sa relihiyosong mga lider sa Juda?
7 Usa ka daotag-dungog nga panon, ang relihiyosong mga lider sa Juda maoy gipuntirya sa dihang ang sugo gipamulong: “Pagmata, kamong mga palahubog, ug panghilak; ug pagminatay, kamong tanang palainom ug bino, gumikan sa tam-is nga bino, kay kini gikuha gikan sa inyong baba.” (Joel 1:5) Oo, ang espirituwal nga mga palahubog sa Juda giingnan sa “pagmata,” aron mahuwasan sa kahubog. Apan ayawg hunahunaa nga kini maoy karaang kasaysayan lamang. Sa pagkakaron, una pa sa dakong adlaw ni Jehova, ang klero sa Kakristiyanohan mahulagwayong hubog sa tam-is nga bino nga wala silay pagpakabana niining sugoa gikan sa Labing Hataas. Kadako sa ilang kapugwat sa dihang sila pukawon gikan sa ilang espirituwal nga kalango sa dako ug makalilisang nga adlaw ni Jehova!
8, 9. (a) Sa unsang paagi gibatbat ni Joel ang mga dulon ug ang epekto sa ilang hampak? (b) Karong adlawa, kinsay gihawasan sa mga dulon?
8 Tan-awa kanang dakong panon sa dulon! “May usa ka nasod nga mitungas nganhi sa akong yuta, kusganon ug dili maisip. Ang mga ngipon niini maoy mga ngipon sa usa ka leyon, ug kini may mga apapangig sa usa ka leyon. Iyang gidaot ang akong paras, ug gibali ang akong kahoy nga higuera. Iya gayong gipanitan kini ug gisalibay kini. Ang mga sanga niini nangaputi. Pagbakho, ingon sa usa ka ulay nga binaksan sa sako tungod sa tag-iya sa iyang pagkabatan-on.”—Joel 1:6-8.
9 Tagna ba lamang kini bahin sa “usa ka nasod” sa mga dulon, usa ka hugpa sa dulon, nga nanulong sa Juda? Dili, may labaw pa niana. Sa Joel 1:6 ug Pinadayag 9:7, ang katawhan sa Diyos gihawasan sa mga dulon. Ang modernong-adlawng panon sa dulon walay lain kondili ang militaryong puwersa sa dinihogang mga dulon ni Jehova, nga karon giduyogan sa mga 5,600,000 sa “ubang mga karnero” ni Jesus. (Juan 10:16) Dili ka ba malipay nga mahimong bahin niining dakong pundok sa mga magsisimba ni Jehova?
10. Unsay epekto sa hampak sa dulon diha sa Juda?
10 Sa Joel 1:9-12, mabasa nato ang mga epekto sa hampak sa dulon. Ang sunodsunod nga paghugpa nagpahinabog bug-os nga kalaglagan sa yuta. Kay nakulangan sa lugas, bino, ug lana, ang di-matinumanong mga saserdote dili na makapadayon sa ilang mga buluhaton. Bisan ang yuta nagbakho, kay ang mga dulon nagdaot sa mga lugas niini, ug ang mga bungahoy nawad-an sa bunga niini. Kay nalarag na ang kaparasan, wala nay bino alang niadtong mga palainom ug bino ni Baal kinsa usab maoy espirituwal nga mga palahubog.
“Pukpoka ang Inyong mga Dughan, Kamong mga Saserdote”
11, 12. (a) Kinsay nangangkon nga mga saserdote sa Diyos karon? (b) Sa unsang paagi naapektahan ang relihiyosong mga lider sa Kakristiyanohan sa modernong-adlaw nga hampak sa dulon?
11 Paminawi ang mensahe sa Diyos alang niadtong badlonganong mga saserdote: “Baksi ang inyong kaugalingon, ug pukpoka ang inyong mga dughan, kamong mga saserdote. Pagminatay, kamong mga ministro sa halaran.” (Joel 1:13) Sa unang katumanan sa tagna ni Joel, ang Levitikanhong mga saserdote nag-alagad sa halaran. Apan komosta sa kataposang katumanan? Karong adlawa, ang klero sa Kakristiyanohan nagbatog awtoridad nga mag-alagad sa halaran sa Diyos, nangangkon nga iyang mga ministro, iyang “mga saserdote.” Bisan pa niana, unsay nagakahitabo karon nga ang modernong-adlawng mga dulon sa Diyos nagadasdas?
12 Sa dihang makita sa “mga saserdote” sa Kakristiyanohan ang katawhan ni Jehova nga nagalihok ug makadungog sa ilang pasidaan sa langitnong paghukom, sila magsalimuang. Ilang pukpokon ang ilang mga dughan sa kasakit ug kapungot sa malaglagong epekto sa mensahe sa Gingharian. Ug sila magminatay samtang sila biyaan sa ilang mga panon. Sanglit ang ilang sibsibanan nangaupaw na, pasagding magpalabay sila sa kagabhion nga magsul-ob ug sako, nga managbakho sa ilang pagkahapay. Sa dili madugay, kawad-an usab sila sa ilang mga trabaho! Sa pagkatinuod, giingnan sila sa Diyos nga magbakho sa tibuok gabii sanglit ang ilang kataposan haduol na.
13. Ang Kakristiyanohan ba sa katibuk-an maayog pagsanong sa pasidaan ni Jehova?
13 Sumala sa Joel 1:14, ang ilang bugtong paglaom nagdepende sa paghinulsol ug pagtuaw “ngadto kang Jehova alang sa tabang.” Makadahom ba kita nga ang tibuok klerong matang sa Kakristiyanohan modangop kang Jehova? Siyempre dili! Ang mga indibiduwal taliwala kanila mosanong tingali sa pasidaan ni Jehova. Apan ang nalunosan sa espirituwal nga kahimtang niining relihiyosong mga lider ug ilang mga parokyano ingong usa ka matang magpadayon. Si propeta Amos nagtagna: “‘Tan-awa! Moabot ang mga adlaw,’ nagaingon ang Soberanong Ginoo nga si Jehova, ‘ug magpadala ako ug kagutom ngadto sa yuta, kagutom, dili sa tinapay, ug kauhaw, dili sa tubig, kondili sa pagpatalinghog sa mga pulong ni Jehova.” (Amos 8:11) Sa laing bahin, pagkamapasalamaton nato sa dagayang espirituwal nga piyesta nga mahigugmaong ginatagana sa Diyos pinaagi sa “kasaligan ug mabuot nga ulipon”!—Mateo 24:45-47.
14. Nag-una sa unsa ang hampak sa dulon?
14 Kaniadto ug karon ang hampak sa dulon maoy nag-una sa usa ka butang. Sa unsa? Si Joel tin-awng nagsulti kanato, nga nag-ingon: “Alaot ang adlaw; kay ang adlaw ni Jehova duol na, ug sama sa pagpang-agaw gikan sa Labing Gamhanang Usa kini moabot!” (Joel 1:15) Ang tibuok kalibotang paghugpa sa panon sa dulon sa Diyos karong adlawa tin-awng nagpakita nga ang dako ug makalilisang nga adlaw ni Jehova haduol na. Tino, ang tanang matarong ug kasingkasing nga mga tawo mangandoy nianang linaing adlaw sa panudya sa dihang ang langitnong paghukom ipahamtang batok sa mga daotan ug si Jehova mogulang madaogon ingong Unibersohanong Soberano.
15. Tungod sa alaot nga kahimtang sa yuta, sa unsang paagi misanong kadtong naminaw sa langitnong mga pasidaan?
15 Ingon sa gipakita sa Joel 1:16-20, giputol ang abiyo sa pagkaon sa karaang Juda. Mao usab ang kangaya. Ang mga dapa gibiyaan, ug ang mga kamalig kinahanglang gub-on. Nawad-ag sibsibanan tungod kay gidaot sa mga dulon ang pananom sa yuta, ang mga baka naglaaglaag sa kalibog ug ang mga panon sa karnero nangamatay. Pagkadakong katalagman! Taliwala sa maong mga kahimtang, unsay nahitabo kang Joel? Sumala sa bersikulo 19, siya miingon: “Kanimo, Oh Jehova, ako magatuaw.” Karong adlawa, usab, daghan ang naminaw sa langitnong mga pasidaan ug nagtuaw kang Jehova nga Diyos diha sa pagtuo.
“Ang Adlaw ni Jehova Nagsingabot”
16. Nganong mokurog ang “mga pumoluyo sa yuta”?
16 Paminawi kining sugoa gikan sa Diyos: “Patingoga ang trompeta sa Sion, Oh kamong mga lalaki, ug isinggit ang suliyaw sa gubat diha sa akong balaang bukid. Pakuroga ang tanang pumoluyo sa yuta.” (Joel 2:1) Nganong molihok nga ingon niana? Ang tagna nagtubag: “Kay ang adlaw ni Jehova nagsingabot, kay kini duol na! Adlaw kini sa kangitngit ug kangiob, adlaw sa mga panganod ug mabagang kangiob, sama sa banagbanag sa kabuntagon nga motabon sa kabukiran.” (Joel 2:1, 2) Nalangkit gayod ang pagkadinalian sa dakong adlaw ni Jehova.
17. Sa unsang paagi naapektahan ang yuta ug ang katawhan sa Juda sa hampak sa dulon?
17 Handurawa ang resulta sa panan-awon sa propeta samtang ang way-puas nga mga dulon naghimong biniyaan sa tinuod nga tanaman sa Eden. Pamati sa kahubitan sa panon sa dulon: “Ang ilang dagway ingon sa dagway sa mga kabayo, ug ingon sa mga kabayo mao man ang ilang pagdagan. Sama sa kinagalkal sa mga karo diha sa mga tumoy sa kabukiran sila padayong nagalukso, sama sa dinaguok sa siga sa kalayo nga nagalamoy sa uhot. Sama kini sa usa ka gamhanang katawhan, nga nangasdang sa natad sa panggubatan. Tungod niana, ang katawhan maanaa sa hilabihang kasakit. Bahin sa tanang nawong, tino gayod nga kini manglipaghong.” (Joel 2:4-6) Panahon sa hampak sa dulon sa adlaw ni Joel, nagdako ang kapait sa mga magsisimba ni Baal, ug ang panglipaghong sa kabalaka mabanaag sa ilang mga nawong.
18, 19. Sa unsang paagi ang kalihokan sa katawhan sa Diyos karong adlawa sama nianang sa hampak sa dulon?
18 Walay makasanta sa hapsay, way-pagkaluyang mga dulon. Sila nanagan “samag kusgang mga lalaki” ug nangatkat pa ganig mga paril. Kon ‘pipila kanila mangapukan gumikan sa mga udyong, ang uban mopadayon.’ (Joel 2:7, 8) Pagkatin-aw nga matagnaong paghulagway sa presenteng-adlaw nga panon sa mahulagwayong mga dulon sa Diyos! Karong adlawa, usab, ang panon sa dulon ni Jehova nagpadayon sa pagdasdas. Walay “paril” sa pagsupak ang makababag kanila. Dili nila ikompromiso ang ilang integridad ngadto sa Diyos apan andam sa pag-atubang sa kamatayon, sama sa linibong mga Saksi kinsa ‘nangapukan gumikan sa mga udyong’ tungod sa pagdumili sa pagsaludo kang Hitler panahon sa rehimeng Nazi sa Alemanya.
19 Ang modernong-adlawng panon sa dulon sa Diyos naghatag ug bug-os nga pamatuod diha sa “siyudad” sa Kakristiyanohan. (Joel 2:9) Gihimo nila kana sa tibuok kalibotan. Nanagpangatkat gihapon sila sa tanang kababagan, nanagpanulod sa minilyong kabalayan, nanuol sa mga tawo diha sa dalan, nakigsulti kanila pinaagi sa telepono, ug nagkontak kanila sa bisan unsang paagi nga posible samtang ilang giwali ang mensahe ni Jehova. Sa pagkatinuod, sila nakapanagtag ug binilyong publikasyon sa Bibliya ug managtag pag daghan, daghan pa diha sa ilang way-hunong nga ministeryo—sa publiko man o sa balaybalay.—Buhat 20:20, 21.
20. Kinsa ang nagpaluyo sa modernong-adlaw nga mga dulon, ug uban sa unsang mga resulta?
20 Gipakita sa Joel 2:10 nga ang dako kaayong panon sa mga dulon samag panganod nga makatabon sa adlaw, bulan, ug mga bituon. (Itandi ang Isaias 60:8.) May pagduhaduha ba kon kinsa ang anaa sa likod niining militaryong puwersa? Milabaw sa kagahob sa mga insekto, atong madunggan kining mga pulonga sa Joel 2:11: “Si Jehova mismo mamulong sa atubangan sa iyang militaryong puwersa, kay ang iyang kampo hilabihan ka daghan. Kay malig-on siya nga nagatuman sa iyang pulong; kay ang adlaw ni Jehova dako ug makalilisang kaayo, ug kinsa ang makapabilin niana?” Oo, si Jehova nga Diyos nagapadala sa iyang militaryong puwersa sa mga dulon karon—una pa sa iyang dakong adlaw.
“Si Jehova Dili Hinayan”
21. Unsay mosangpot sa dihang “ang adlaw ni Jehova moabot ingon sa usa ka kawatan”?
21 Sama kang Joel, si apostol Pedro naghisgot bahin sa dakong adlaw ni Jehova. Siya misulat: “Ang adlaw ni Jehova moabot ingon sa usa ka kawatan, diin ang mga langit motaliwan uban ang nagasagitsit nga kabanha, apan ang mga elemento kay hilabihan kainit mangatunaw, ug ang yuta ug ang mga buhat diha niana mahikyad.” (2 Pedro 3:10) Ubos sa impluwensiya ni Satanas nga Yawa, ang daotang gobyernohanong “mga langit” nagmando ibabaw sa “yuta,” nga mao, ang katawhan nga nahilayo sa Diyos. (Efeso 6:12; 1 Juan 5:19) Kining simbolikong mga langit ug yuta dili makalahutay sa kainit sa langitnong kasuko sa dakong adlaw ni Jehova. Hinunoa, pulihan kini sa “bag-ong mga langit ug usa ka bag-ong yuta nga atong ginapaabot sumala sa iyang saad, ug niini nila magapuyo ang pagkamatarong.”—2 Pedro 3:13.
22, 23. (a) Sa unsang paagi mosanong kita sa maluluy-ong pagpakita ni Jehova ug pailob? (b) Sa unsang paagi mosanong kita sa pagkaduol na sa adlaw ni Jehova?
22 Tungod sa tanang presenteng-adlawng mga kabaldahan ug mga pagsulay sa pagtuo, mahimong mawad-an kitag pagsabot sa kadinalian sa atong kapanahonan. Apan samtang ang simbolikong mga dulon nagadasdas sa unahan, daghang tawo ang nagasanong sa mensahe sa Gingharian. Bisan tuod naghatag ang Diyos ug panahon alang niini, kinahanglang dili nato masaypan ang iyang pailob ingon nga pagkahinayan. “Si Jehova dili hinayan labot sa iyang saad, ingon sa pagkahinayan nga giisip sa pipila ka tawo, kondili mapailobon siya kaninyo tungod kay wala siya magatinguha nga adunay malaglag apan nagatinguha nga makakab-ot ang tanan sa paghinulsol.”—2 Pedro 3:9.
23 Samtang kita magahulat sa dakong adlaw ni Jehova, atong itisok sa kasingkasing ang mga pulong ni Pedro nga natala sa 2 Pedro 3:11, 12: “Sanglit kining tanang butanga pagatunawon man, unsa gayong matanga sa mga tawo angay nga kamo mao diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug kanunayng ginahuptan nga duol sa hunahuna ang pagkaanaa sa adlaw ni Jehova, nga pinaagi niini ang mga langit kay nagakalayo maugdaw ug ang mga elemento kay hilabihan kainit mangatunaw!” Kining maong mga buhat ug panggawi tinong naglakip nga kita moduyog sa panon sa dulon ni Jehova pinaagig pagbaton ug makanunayon ug makahuloganong pagpakig-ambit sa pagsangyaw sa maayong balita sa Gingharian una pa moabot ang kataposan.—Marcos 13:10.
24, 25. (a) Unsay imong sanong sa pribilehiyo sa pagpakig-ambit sa buluhaton sa panon sa dulon ni Jehova? (b) Unsang makahuloganong pangutana ang gipatungha ni Joel?
24 Ang panon sa dulon sa Diyos dili mohunong sa iyang buluhaton hangtod nga mahitabo ang dako ug makalilisang nga adlaw ni Jehova. Ang paglungtad mismo niining dili-mapugngang puwersa sa dulon maoy talagsaong pamatuod nga ang adlaw ni Jehova haduol na. Wala ka ba malipay sa pag-alagad taliwala sa dinihogang mga dulon sa Diyos ug sa ilang kaubanan sa kataposang pag-atake una pa ang dako ug makalilisang nga adlaw ni Jehova?
25 Pagkadako unya niana nga adlaw ni Jehova! Dili ikatingala nga ang pangutana gipatungha: “Kinsa ang makapabilin niana?” (Joel 2:11) Kining pangutanaha ug daghang uban pa konsiderahon sa sunod nga duha ka artikulo.
Ikapatin-aw Mo Ba?
◻ Nganong nagpasidaan si Jehova bahin sa hampak sa mga insekto diha sa Juda?
◻ Sa modernong-adlaw nga katumanan sa tagna ni Joel, kinsa ang mga dulon ni Jehova?
◻ Sa unsang paagi ang mga lider sa Kakristiyanohan misanong sa hampak sa dulon, ug sa unsang paagi ang pipila kanila miikyas sa mga sangpotanan niini?
◻ Unsa ka kaylap ang hampak sa dulon panahon sa ika-20ng siglo, ug hangtod kanus-a kini magpadayon?
[Hulagway sa panid 9]
Ang hampak sa insekto maoy nag-una sa usa ka butang nga mas grabe pa
[Credit Line]
Walay bunga nga kahoy: Letrato sa FAO/G. Singh
[Hulagway sa panid 10]
Si Jehova nga Diyos maoy nagpaluyo sa modernong-adlaw nga hampak sa dulon
[Picture Credit Line sa panid 8]
Dulon: Letrato sa FAO/G. Tortoli; duot sa dulon: Letrato sa FAO/Desert Locust Survey