Ang Napasig-uling Katawhan ni Jehova Nagadayeg Kaniya sa Tibuok Yuta
“Akong ihatag sa mga katawhan ang kausaban ngadto sa putli nga pinulongan, aron silang tanan motawag sa ngalan ni Jehova.”—SOFONIAS 3:9.
1. Nganong ang mga mensahe sa kalaglagan natuman batok sa Juda ug sa ubang mga nasod?
PAGKAPUWERSADO sa mga mensahe sa paghukom nga gidasig ni Jehova si Sofonias sa pagpahayag! Ang maong mga mensahe sa kalaglagan miabot batok sa nasod sa Juda ug sa kaulohan niini, ang Jerusalem, tungod kay ang mga pangulo ug ang mga tawo sa katibuk-an wala magtuman sa kabubut-on ni Jehova. Ang kasikbit nga mga nasod, sama sa Pilistia, Moab, ug Ammon, makaagom usab sa kasuko sa Diyos. Ngano man? Tungod sa ilang kasiglohan nang mabangis nga pagbatok sa katawhan ni Jehova. Sa mao gihapong katarongan, ang gahom sa kalibotan nga Asirya pagalaglagon, nga dili na gayod pagatukoron pag-usab.
2. Kinsa ang dayag nga gipatungnan sa Sofonias 3:8?
2 Apan, dihay pipila ka matarong nga mga tawo sa karaang Juda. Nagpaabot sila sa pagpahamtang sa paghukom sa Diyos batok sa mga daotan ug dayag nga maoy gipatungnan sa mga pulong: “‘Magpadayon kamo sa paghulat kanako,’ nagaingon si Jehova, ‘hangtod sa adlaw nga ako motindog alang sa mga inagaw, kay ang akong hudisyal nga hukom mao ang pagtigom sa kanasoran, aron tapokon ko ang mga gingharian, aron ibubo kanila ang akong mahukmanong pagsaway, ang tanan kong nagsilaob nga kasuko; kay pinaagi sa kalayo sa akong kasibot ang tibuok yuta pagalamyon.’”—Sofonias 3:8.
“Usa ka Putli nga Pinulongan” Alang Kang Kinsa?
3. Unsang mensahe sa paglaom nga gidasig si Sofonias sa pagpahayag?
3 Oo, gipahayag ni Sofonias ang mga mensahe ni Jehova sa kalaglagan. Apan ang manalagna gidasig usab sa paglakip sa maanindot nga mensahe sa paglaom—usa ka mensahe nga makapahupay kaayo alang niadtong nagmatinumanon kang Jehova. Sumala sa girekord sa Sofonias 3:9, si Jehova nga Diyos miingon: “Unya akong ihatag sa mga katawhan ang kausaban ngadto sa putli nga pinulongan, aron silang tanan motawag sa ngalan ni Jehova, aron moalagad kaniya abaga sa abaga.”
4, 5. (a) Unsay mahitabo sa mga daotan? (b) Kinsay nakabenepisyo niini, ug ngano?
4 May mga tawo nga dili pagahatagan sa putli nga pinulongan. Ang tagna naghisgot kanila, nga nag-ingon: “Kuhaon ko gikan sa imong taliwala ang imong nagmalipayon nga mga mapahitas-on.” (Sofonias 3:11) Busa ang mga mapahitas-on nga nagtamay sa kasugoan sa Diyos ug naghimog daotan pagalaglagon. Ug kinsay makabenepisyo niini? Ang Sofonias 3:12, 13 nag-ingon: “Ipabilin ko [Jehova] gayod sa imong taliwala ang usa ka katawhan nga mapainubsanon ug maaghop, ug sila modangop sa ngalan ni Jehova. Kon bahin sa mga nanghibilin sa Israel, sila dili mohimog daotan, ni mosultig bakak, ni may makaplagan sa ilang baba nga usa ka dila nga malinglahon; kay sila mokaon ug mohigda, ug walay magahadlok kanila.”
5 Usa ka matinumanon nga nanghibilin sa karaang Juda ang nakabenepisyo. Ngano? Tungod kay milihok sila uyon sa mga pulong: “Pangitaa ninyo si Jehova, kamong tanang maaghop sa yuta, nga nagbuhat sa Iyang hudisyal nga hukom. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”—Sofonias 2:3.
6. Unsay nahitabo sa unang katumanan sa tagna ni Sofonias?
6 Sa unang katumanan sa tagna ni Sofonias, gisilotan sa Diyos ang walay pagtuo nga Juda pinaagi sa pagtugot sa Babilonyanhong Gahom sa Kalibotan nga mopukan kaniya ug mobihag sa iyang katawhan sa 607 W.K.P. Ang pipila, apil ang manalagnang si Jeremias, wala patya, ug ang uban nagmatinumanon kang Jehova diha sa pagkabihag. Sa 539 W.K.P., gipukan ang Babilonya sa mga Medianhon ug mga Persianhon ilalom ni Haring Ciro. Mga duha ka tuig sa ulahi, si Ciro nagpakanaog ug balaod nga nagtugot sa Hudiyong nanghibilin sa pagbalik sa ilang yutang natawhan. Sa ngadtongadto, ang templo sa Jerusalem natukod pag-usab, ug gipasig-uli ang pagkasaserdote aron sa pagtudlo sa mga tawo sa Balaod. (Malaquias 2:7) Busa gihatagan ni Jehova ug kauswagan ang napasig-uling nanghibilin—basta sila magmatinumanon.
7, 8. Ngadto kang kinsa nga ang matagnaong mga pulong sa Sofonias 3:14-17 mapadapat, ug nganong mao kanay imong tubag?
7 Mahitungod niadtong makapahimulos sa maong pagkapasig-uli, si Sofonias nanagna: “Panghugyaw kamo sa kalipay, Oh anak nga babaye sa Zion! Paninggit kamo sa kasadya, Oh Israel! Pagmaya ug pagsadya sa bug-os nga kasingkasing, Oh anak nga babaye sa Jerusalem! Gikuha ni Jehova ang mga paghukom gikan kanimo. Iyang giabog ang imong kaaway. Ang hari sa Israel, si Jehova, anaa sa imong taliwala. Ikaw dili na mahadlok sa katalagman. Nianang adlawa kini ang igaingon sa Jerusalem: ‘Ayaw kahadlok, Oh Zion. Hinaot dili maluya ang imong mga kamot. Si Jehova nga imong Diyos anaa sa imong taliwala. Ingong Usa nga gamhanan, siya magaluwas. Siya magsadya tungod kanimo uban ang pagmaya. Siya maghilom sa iyang gugma. Siya magmalipayon tungod kanimo uban ang paghugyaw sa kalipay.’”—Sofonias 3:14-17.
8 Kanang matagnaong mga pulong nagtumong sa nanghibilin nga gitigom gikan sa pagkabihag sa Babilonya ug gipabalik sa yuta sa ilang katigulangan. Gipatin-aw kini sa Sofonias 3:18-20, diin atong mabasa: “‘Ang mga nag-antos sa kaguol tungod kay wala moanha sa panahon sa imong pista tigomon ko [Jehova]; sila wala moanha kanimo, tungod sa pagpas-an sa kaulawan gumikan kaniya. Ania ako molihok batok sa tanan nga nagsakit kanimo, nianang panahona; ug luwason ko siya nga nagtakiang, ug tigomon ko siya nga gipatibulaag. Ug himoon ko sila nga usa ka pagdayeg ug usa ka ngalan sa tibuok yuta sa ilang kaulawan. Nianang panahona pasudlon ko kamo, sa panahon sa akong pagtigom kaninyo. Kay himoon ko kamo nga usa ka ngalan ug usa ka pagdayeg taliwala sa tanang katawhan sa yuta, sa dihang tigomon ko pagbalik ang mga nabihag kaninyo atubangan sa inyong mga mata,’ nagaingon si Jehova.”
9. Sa unsang paagi si Jehova nakahatag ug kahimayaan sa iyang ngalan maylabot sa Juda?
9 Handurawa ang katingala sa kasikbit nga mga nasod kinsa mga kaaway sa katawhan sa Diyos! Ang mga molupyo sa Juda gibihag sa gamhanang Babilonya, nga wala gayoy paglaom nga hatagan ug kagawasan. Dugang pa, nahimong awaaw ang ilang yuta. Apan, pinaagi sa gahom sa Diyos sila gipasig-uli ngadto sa ilang yutang natawhan human sa 70 ka tuig, samtang ang kaawayng mga nasod nagpaingon sa pagkalumpag. Pagkadakong kahimayaan ang nahatag ni Jehova sa iyang ngalan pinaagi sa pagpabalik pag-usab sa matinumanong nanghibilin! Gihimo niya sila nga “usa ka ngalan ug usa ka pagdayeg taliwala sa tanang katawhan.” Pagkadakong kadayeganan kang Jehova ug niadtong nagdala sa iyang ngalan ang maong kapasig-ulian!
Nabayaw ang Pagsimba Kang Jehova
10, 11. Kanus-a mahitabo ang dakong katumanan sa tagna ni Sofonias bahin sa pagpasig-uli, ug sa unsang paagi nahibaloan nato kini?
10 Ang laing pagpasig-uli nahitabo sa unang siglo sa Komong Panahon, sa dihang gitigom ni Jesu-Kristo ang nanghibilin sa Israel sa matuod nga pagsimba. Kadto maoy pagtan-aw daan sa umaabot, kay ang dakong katumanan sa pagpasig-uli mahitabo pa sa umaabot. Ang tagna ni Miqueas nag-ingon: “Mahitabo sa kaulahiang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa kabukiran, ug kini igatuboy gayod ibabaw sa kabungtoran; ug ngadto niini magaganayan ang katawhan.”—Miqueas 4:1.
11 Kanus-a kini mahitabo? Sama sa giingon sa tagna, “sa kaulahiang bahin sa mga adlaw”—oo, panahon niining “kataposang mga adlaw.” (2 Timoteo 3:1) Mahitabo kini sa dili pa matapos ang daotang sistema sa mga butang karon samtang ang mga nasod nagsimba pa sa bakak nga mga diyos. Ang Miqueas 4:5 nag-ingon: “Ang tanang katawhan, sa ilang bahin, magalakaw ang tagsatagsa sa ngalan sa iyang diyos.” Ug komosta ang matuod nga mga magsisimba? Ang tagna ni Miqueas nagtubag: “Apan kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa walay kataposan.”
12. Sa unsang paagi nabayaw ang matuod nga pagsimba niining kataposang mga adlaw?
12 Busa, niining kataposang mga adlaw ‘ang bukid sa balay ni Jehova lig-ong natukod ibabaw sa tumoy sa kabukiran.’ Ang natuboy nga matuod nga pagsimba kang Jehova napasig-uli, lig-ong natukod, ug nabayaw ibabaw sa bisan unsa ug sa tanang ubang mga matang sa relihiyon. Ingon sa gitagna usab ni Miqueas, “ngadto niini magaganayan ang katawhan.” Ug kadtong nagatuman sa matuod nga relihiyon “magalakaw sa ngalan ni Jehova nga [ilang] Diyos hangtod sa panahong walay tino, bisan hangtod sa walay kataposan.”
13, 14. Kanus-a kining kalibotana misulod sa “kaulahiang bahin sa mga adlaw,” ug unsay nagakahitabo sukad niadto maylabot sa matuod nga pagsimba?
13 Ang mga hitabo sa katumanan sa tagna sa Bibliya nagpamatuod nga kining kalibotana anaa na sa “kaulahiang bahin sa mga adlaw”—sa kataposang mga adlaw niini—sa tuig 1914. (Marcos 13:4-10) Ang kasaysayan nagpakita nga si Jehova nagsugod sa pagtigom sa matinumanong nanghibilin sa mga dinihogan nga adunay langitnong paglaom ngadto sa matuod nga pagsimba. Kini gisundan sa pagtigom sa ‘dakong panon . . . gikan sa tanang kanasoran ug mga tribo ug mga katawhan ug mga pinulongan’—kadtong dunay paglaom nga mabuhi sa walay kataposan dinhi sa yuta.—Pinadayag 7:9.
14 Sukad sa Gubat sa Kalibotan I ug hangtod niining adlawa, ang pagsimba kang Jehova niadtong nagdala sa iyang ngalan nagmauswagon pag-ayo ubos sa iyang pagtultol. Gikan sa pipila ka libo human sa Gubat sa Kalibotan I, ang mga magsisimba ni Jehova karon may gidaghanon na nga mga sayis milyones, nga gitigom diha sa mga 91,000 ka kongregasyon sa 235 ka kayutaan. Matag tuig, kini silang mga magmamantala sa Gingharian mogugol ug kapin sa usa ka bilyong oras sa pagdayeg sa Diyos sa publiko. Tin-aw nga kining mga Saksi ni Jehova mao ang nagtuman sa matagnaong mga pulong ni Jesus: ‘Kining maayong balita sa gingharian igawali sa tibuok gipuy-ang yuta ingong usa ka pagpamatuod ngadto sa tanang kanasoran; ug unya moabot ang kataposan.’—Mateo 24:14.
15. Sa unsang paagi ang Sofonias 2:3 nagakatuman karon?
15 Ang Sofonias 3:17 nag-ingon: “Si Jehova nga imong Diyos anaa sa imong taliwala. Ingong Usa nga gamhanan, siya magaluwas.” Ang espirituwal nga kauswagan nga gitagamtam sa mga alagad ni Jehova niining kataposang mga adlaw maoy direktang resulta sa pagkabaton kaniya diha ‘sa ilang taliwala’ ingong ilang Diyos nga gamhanan sa tanan. Tinuod kini karon sama nga tinuod usab kini sa pagpasig-uli sa karaang Juda sa 537 W.K.P. Busa makita nato kon sa unsang paagi adunay dakong katumanan ang Sofonias 2:3 sa atong panahon sa dihang kini miingon: “Pangitaa ninyo si Jehova, kamong tanang maaghop sa yuta.” Sa 537 W.K.P., ang ‘tanan’ naglakip sa nanghibilin sa mga Hudiyo nga namalik gikan sa pagkabihag sa Babilonya. Karon naghawas kini sa mga maaghop sa tanang kanasoran sa tibuok yuta, kadtong kinsa maayog pagsanong sa tibuok-yuta nga buluhatong pagsangyaw sa Gingharian ug kinsa nagaganayan ngadto sa “bukid sa balay ni Jehova.”
Matuod nga Pagsimba Nagmauswagon
16. Lagmit unsay reaksiyon sa atong mga kaaway ngadto sa pag-uswag sa mga alagad ni Jehova sa modernong panahon?
16 Human sa 537 W.K.P., daghan sa kasikbit nga mga nasod ang nakurat sa pagkapasig-uli sa mga alagad sa Diyos sa matuod nga pagsimba didto sa ilang yutang natawhan. Apan, kana nga pagpasig-uli maoy gamayng bahin lamang. Mahanduraw ba ninyo kon unsay giingon sa pipila—bisan sa mga kaaway sa katawhan sa Diyos—karon nga ilang nakita ang katingalahang pagtubo, pag-uswag, ug pagkusog sa kalihokan sa mga alagad ni Jehova sa modernong panahon? Sa walay duhaduha, ang pipila niini nga mga kaaway mibati sama sa gibati sa mga Pariseo sa dihang ilang nakita nga nagpanon ang mga tawo ngadto kang Jesus. Sila miingon: “Tan-awa! Ang kalibotan nagasunod na kaniya.”—Juan 12:19.
17. Unsay giingon sa usa ka magsusulat bahin sa mga Saksi ni Jehova, ug unsang pagtubo ang ilang naeksperyensiyahan?
17 Diha sa iyang librong These Also Believe, si Propesor Charles S. Braden nag-ingon: ‘Literal nga gikobrehan sa mga Saksi ni Jehova ang yuta sa ilang pagsangyaw. Mahimong ikaingon gayod nga walay laing relihiyosong pundok sa kalibotan ang nagpasundayag ug dakong kasibot ug pagkamalahutayon diha sa pagsulay sa pagpakaylap sa maayong balita sa Gingharian kay sa mga Saksi ni Jehova. Kining maong kalihokan dakog kalagmitan nga magpadayong mouswag.’ Husto gayod siya! Sa dihang gisulat niya kadtong mga pulonga 50 ka tuig kanhi, duolan lamang sa 300,000 ka Saksi ang nagsangyaw sa tibuok kalibotan. Unsa kahay iyang ikaingon karon, sa dihang mga 20 ka pilo nianang gidaghanona—mga sayis milyones—ang nagsangyaw sa maayong balita?
18. Unsa ang putli nga pinulongan, ug ngadto kang kinsa kini gihatag sa Diyos?
18 Pinaagi sa iyang manalagna, ang Diyos nagsaad: “Akong ihatag sa mga katawhan ang kausaban ngadto sa putli nga pinulongan, aron silang tanan motawag sa ngalan ni Jehova, aron moalagad kaniya abaga sa abaga.” (Sofonias 3:9) Niining kataposang mga adlaw, ang mga Saksi ni Jehova mao ang nagtawag sa ngalan ni Jehova, nga nahiusang nag-alagad kaniya diha sa dili-mabugto nga bugkos sa gugma—oo, “abaga sa abaga.” Sila mao ang gihatagan ni Jehova sa putli nga pinulongan. Kining putli nga pinulongan naglakip sa hustong pagsabot sa kamatuoran bahin sa Diyos ug sa iyang mga katuyoan. Si Jehova lamang ang makatagana niining maong pagsabot pinaagi sa iyang balaang espiritu. (1 Corinto 2:10) Ngadto kang kinsa gihatag niya ang iyang espiritu? Ngadto lamang sa “nagasugot kaniya ingon nga magmamando.” (Buhat 5:32) Ang mga Saksi ni Jehova lamang ang andam sa pagsugot sa Diyos ingong Magmamando sa tanang butang. Maoy hinungdan nga sila ang nakadawat sa espiritu sa Diyos ug nagsulti sa putli nga pinulongan, ang kamatuoran bahin kang Jehova ug sa iyang kahibulongang mga katuyoan. Ilang gigamit ang putli nga pinulongan sa pagdayeg kang Jehova sa tibuok yuta sa dako ug nagatubong gidaghanon.
19. Unsay nalangkit sa pagsulti sa putli nga pinulongan?
19 Ang pagsulti sa putli nga pinulongan naglangkit dili lamang sa pagtuo sa kamatuoran ug pagtudlo niini ngadto sa uban kondili pagpahiuyon usab sa batasan sa usa diha sa mga balaod ug mga prinsipyo sa Diyos. Ang dinihogang mga Kristohanon maoy nanguna sa pagpangita kang Jehova ug pagsulti sa putli nga pinulongan. Hunahunaa kon unsay nahimo! Bisan tuod ang mga dinihogan mikunhod sa gidaghanon nga ubos sa 8,700, mga sayis milyones pang uban ang nagsundog sa ilang pagtuo pinaagi sa pagpangita kang Jehova ug sa pagsulti sa putli nga pinulongan. Kini sila mao ang nagtubong gidaghanon sa dakong panon gikan sa tanang kanasoran nga nagpasundayag ug pagtuo sa halad lukat ni Jesus, naghatag ug balaang pag-alagad diha sa yutan-ong sawang sa espirituwal nga templo sa Diyos, ug makalabang-buhi sa “dakong kasakitan” nga hapit nang moabot batok niining daotang kalibotan.—Pinadayag 7:9, 14, 15.
20. Unsay anaa sa unahan alang sa matinumanong mga dinihogan ug niadtong naglangkob sa dakong panon?
20 Ang dakong panon pagaagakon ngadto sa matarong nga bag-ong kalibotan sa Diyos. (2 Pedro 3:13) Si Jesu-Kristo ug ang 144,000 nga dinihogan nga nabanhaw ngadto sa langitnong kinabuhi aron mag-alagad ingong mga hari ug mga saserdote uban kaniya maoy maglangkob sa bag-ong nagamandong lawas sa yuta. (Roma 8:16, 17; Pinadayag 7:4; 20:6) Ang mga makalabang-buhi sa dakong kasakitan maghimo sa yuta nga usa ka paraiso ug magpadayon sa pagsulti sa hinatag-sa-Diyos nga putli nga pinulongan. Sa prinsipyo, mapadapat kanila ang mga pulong: ‘Ang tanan nimong mga anak nga lalaki [ug mga anak nga babaye, sa pagkamatuod] mahimong mga tinudloan ni Jehova, ug dagaya unya ang pakigdait sa imong mga anak nga lalaki. Ikaw lig-ong matukod sa pagkamatarong.’—Isaias 54:13, 14.
Kinadak-ang Buluhatong Pagpanudlo sa Kasaysayan
21, 22. (a) Sumala sa gipakita sa Buhat 24:15, kinsay kinahanglang tudloan sa putli nga pinulongan? (b) Unsang dili-hitupngan nga buluhatong pagpanudlo ang pagahimoon dinhi sa yuta ilalom sa pagmando sa Gingharian?
21 Usa ka dako kaayong panon nga hatagan sa kahigayonan nga makakat-on sa putli nga pinulongan didto sa bag-ong kalibotan mao ang gihisgotan sa Buhat 24:15, nga nag-ingon: “Aduna unyay pagkabanhaw sa mga matarong ug sa mga dili-matarong.” Sa nangagi, binilyong tawo nabuhi ug namatay nga walay tukmang kahibalo bahin kang Jehova. Sa mahusay nga paagi, iyang pagabanhawon sila. Ug ang maong mga binanhaw kinahanglang tudloan sa putli nga pinulongan.
22 Pagkadakong pribilehiyo nga makapakigbahin nianang dakong buluhatong pagpanudlo! Kini mao unya ang kinadak-ang buluhaton sa pagpanudlo sa kasaysayan sa tawo. Kining tanan himoon ilalom sa maayong pagmando ni Kristo Jesus diha sa Gingharianong gahom. Ingong resulta, ang katawhan sa kataposan makakita sa katumanan sa Isaias 11:9, nga nag-ingon: “Ang yuta mapuno sa kahibalo ni Jehova maingon sa mga tubig nga nagatabon sa kadagatan.”
23. Nganong makaingon ka nga kita dako kaayo ug pribilehiyo ingong katawhan ni Jehova?
23 Pagkadako sa atong pribilehiyo niining kataposang mga adlaw sa pagpangandam alang nianang maanindot nga panahon sa dihang ang yuta tinuod nga mapuno sa kahibalo ni Jehova! Ug pagkadako sa atong pribilehiyo karon mismo nga mahimong katawhan sa Diyos, kadtong nakaeksperyensiya sa dakong katumanan sa matagnaong mga pulong nga narekord sa Sofonias 3:20! Didto atong makaplagan ang pasalig ni Jehova: “Himoon ko kamo nga usa ka ngalan ug pagdayeg taliwala sa katawhan sa yuta.”
Unsaon Nimo Pagtubag?
• Unsay mga katumanan sa tagna ni Sofonias bahin sa pagpasig-uli?
• Sa unsang paagi ang matuod nga pagsimba nagmauswagon niining kataposang mga adlaw?
• Unsang dakong buluhatong pagpanudlo ang mahitabo sa bag-ong kalibotan?
[Hulagway sa panid 25]
Ang katawhan ni Jehova mibalik sa ilang yutang natawhan sa pagtukod pag-usab sa putli nga pagsimba. Nahibalo ka ba sa kahulogan niana karon?
[Mga hulagway sa panid 26]
Pinaagi sa pagsulti sa “putli nga pinulongan,” ang mga Saksi ni Jehova nagtanyag sa mga tawo sa makapahupayng mensahe sa Bibliya