Kinsay Makalingkawas sa “Panahon sa Kasakitan”?

“Ang tagsatagsa nga magatawag sa ngalan ni Jehova mamaluwas.”​—JOEL 2:32.

 1. Sumala kang Daniel ug Malakias, unsa ang mga ilhanan niadtong nahalinya sa kaluwasan sa umaabot nga “panahon sa kasakitan”?

NGA nagtan-aw sa atong adlaw, si propetang Daniel misulat: “Sa tino moabot ang panahon sa kasakitan nga wala pa ipahinabo sukad may usa ka nasod hangtod sa maong panahon. Ug sa maong panahon ang imong katawhan makalingkawas, ang tagsatagsa nga nakaplagang nahisulat sa basahon.” (Daniel 12:1) Pagkamakalipay nga mga pulong! Ang giuyonang katawhan ni Jehova pagahinumdoman niya, sumala sa gipahayag usab sa Malakias 3:16: “Sa maong panahon ang mga nahadlok kang Jehova magsultihanay sa usag usa, ang matag usa sa iyang kauban, ug si Jehova nagpadayon sa pagpamati ug pagpatalinghog. Ug gisugdan sa pagsulat ang usa ka basahon sa handumanan sa iyang atubangan alang niadtong nahadlok kang Jehova ug niadtong naghunahuna sa iyang ngalan.”

 2. Unsay mosangpot sa paghunahuna sa ngalan ni Jehova?

² Ang paghunahuna sa ngalan ni Jehova motultol sa tukmang kahibalo mahitungod kaniya, sa iyang Kristo, ug sa iyang tanang talagsaong mga katuyoan maylabot sa Gingharian. Busa, ang iyang katawhan nakakat-on sa pagtahod kaniya, sa pagsulod sa suod napahinungod nga relasyon uban kaniya, ug sa paghigugma kaniya ‘uban sa bug-os nilang kasingkasing ug sa bug-os nilang salabotan ug sa bug-os nilang kusog.’ (Marcos 12:33; Pinadayag 4:11) Nahimo ni Jehova ang malulutong tagana, pinaagi sa halad ni Jesu-Kristo, aron ang mga maaghop sa yuta makakaplag ug kinabuhing walay kataposan. Mao nga, sila sa kamasaligon makapalanog sa mga pulong sa langitnong panon nga nagdayeg sa Diyos sa panahon sa pagkatawo ni Jesus, nga nag-ingon: “Himaya sa Diyos sa kahitas-an, ug pakigdait sa yuta taliwala sa mga tawong maayo ug kabubut-on.”​—Lucas 2:14.

 3. Sa dili pa makaabot ang pakigdait niining yutaa, unsang paglihok ni Jehova ang kinahanglang mahitabo?

³ Ang maong pakigdait haduol na gayod kay sa gihunahuna sa kadaghanang tawo. Apan kinahanglang moabot una ang pagpatuman sa hukom ni Jehova diha sa usa ka daotang kalibotan. Ang iyang manalagnang si Sofonias mipahayag: “Haduol na ang dakong adlaw ni Jehova. Kini haduol na, ug ginapadali kaayo kini.” Unsa bang matanga sa adlaw kana? Nagpadayon ang tagna: “Ang dahunog sa adlaw ni Jehova mayugtanon. Didto ang usa ka tawong kusgan nagapagawas sa usa ka singgit. Kana nga adlaw maoy usa ka adlaw sa kapungot, usa ka adlaw sa kasakitan ug sa kagul-anan, usa ka adlaw sa bagyo ug sa pagpanglaglag, usa ka adlaw sa kangitngitan ug sa kangiob, usa ka adlaw nga madag-umon ug sa baga nga kangiob, usa ka adlaw sa budyong ug sa pasidaan, batok sa kinutaang mga siyudad ug batok sa habog-ug-eskina nga mga torre. Ug ipahinabo ko ang kasakitan alang sa katawhan, ug sila sa tino magalakaw nga samag mga tawong buta; tungod kay batok man kang Jehova nga sila nakasala.”​—Sofonias 1:14-17; tan-awa usab ang Habakkuk 2:3; 3:1-6, 16-19.

 4. Kinsa karong adlawa nagadawat sa imbitasyon nga ilhon ug alagaron ang Diyos?

⁴ Ikalipay, milyonmilyon karong adlawa nagadawat sa imbitasyon nga ilhon ug alagaron ang Diyos. Mahitungod sa mga dinihogang Kristohanon, nga gipasulod sa bag-ong pakigtugon, kini natagna: “‘Sila nga tanan makaila kanako, gikan sa labing ubos kanila bisan hangtod sa labing dako kanila,’ nagaingon si Jehova.” (Jeremias 31:34) Sila maoy nanguna sa modernong-adlawng buluhaton sa pagpanaksi. Ug karon samtang dugang ug dugang sakop sa dinihogang nahibilin nakatapos sa ilang yutan-ong pagkinabuhi, ang “dakong panon” sa “ubang mga karnero” nanggula sa ‘paghatag sa Diyos ug balaang pag-alagad sa adlaw ug gabii’ diha sa iyang samag-templo nga kahikayan. (Pinadayag 7:9, 15; Juan 10:16) Ikaw ba usa nga nagtagamtam niining dako kaayong pribilehiyo?

Kon sa Unsang Paagi Nangabot ang “Tilinguhaong mga Butang”

 5, 6. Sa dili pa pagauyogon hangtod sa kalaglagan ang tanang kanasoran, unsang nagaluwas nga buluhaton ang mahitabo?

⁵ Tagdon nato karon ang Haggeo 2:7, diin si Jehova nagatagna mahitungod sa iyang espirituwal nga balay sa pagsimba. Siya nagaingon: “Pagauyogon ko ang tanang kanasoran, ug mangabot ang tilinguhaong mga butang sa tanang kanasoran; ug akong pun-on sa himaya kining balaya.” Ang mga tagna sa Bibliya nagpakita nga ang ‘pag-uyog sa kanasoran’ nagatumong sa pagpatuman sa hukom ni Jehova diha sa kanasoran. (Nahum 1:5, 6; Pinadayag 6:12-17) Mao nga, ang paglihok ni Jehova nga gitagna sa Hageo 2:7 mosangko sa mga nasod nga pagauyogon sa pagkahanaw​—nga mangalaglag. Apan unsa na man “ang tilinguhaong mga butang sa tanang kanasoran”? Kinahanglan bang sila maghulat nianang pangkataposang makapalaglag nga pag-uyog aron sila mangabot? Dili.

⁶ Ang Joel 2:32 nagaingon nga “ang tagsatagsa nga magatawag sa ngalan ni Jehova mamaluwas; kay didto unya sa Bukid sa Sion ug sa Jerusalem ang mga nakalingkawas, sumala sa giingon ni Jehova, ug taliwala sa mga nakalabang-buhi, si kinsa ginatawag ni Jehova.” Si Jehova nagpaggula kanila, ug sila nagatawag sa iyang ngalan nga may pagtuo diha sa halad ni Jesus una pa sa masangkoong pag-uyog sa dakong kasakitan. (Itandi ang Juan 6:44; Buhat 2:38, 39.) Ikalipay, ang bililhong dakong panon, nga karon mokabat ug kapin sa upat ka milyon, ‘nangabot’ sa balay sa pagsimba ni Jehova sa paghulat sa iyang ‘pag-uyog sa tanang kanasoran’ sa Armageddon.​—Pinadayag 7:9, 10, 14.

 7. Unsay nalangkit sa ‘pagtawag sa ngalan ni Jehova’?

⁷ Sa unsang paagi kanang mga nakalabang-buhi nagatawag sa ngalan ni Jehova? Ang Santiago 4:8 nagahatag kanatog usa ka ilhanan, nga nagaingon: “Pakigsuod kamo sa Diyos, ug siya makigsuod kaninyo. Panghunaw sa inyong mga kamot, kamong mga makasasala, ug putlia ang inyong mga kasingkasing, kamong mga maduhaduhaon.” Sama sa dinihogang nahibilin nga maoy nanguna sa dalan, kadtong nagalaom nga maapil sa dakong panon sa mga makalabang-buhi sa Armageddon kinahanglang molihok dayon. Kon naglaom ka nga makalabang-buhi, kinahanglan nga ikaw moinom ug daghan gikan sa makapaputli nga Pulong ni Jehova ug ipadapat ang iyang matarong nga mga sukdanan sa imong kinabuhi. Kinahanglang magpahinungod ka dayon sa imong kinabuhi kang Jehova, nga pasimbolohan kana pinaagig bawtismo sa tubig. Ang imong pagtawag kang Jehova diha sa pagtuo nag-apil usab sa pagsaksi dapig kaniya. Busa, sa Roma kapitulo 10, mga bersikulo 9 ug 10, si Pablo misulat: “Kon sa dayag ikaw magpahayag sa maong ‘pulong pinaagi sa imong kaugalingong baba,’ nga si Jesus Ginoo, ug magtuo diha sa imong kasingkasing nga ang Diyos nagbanhaw kaniya gikan sa patay, ikaw mamaluwas. Kay pinaagi sa kasingkasing ang usa magtuo alang sa pagkamatarong, apan pinaagi sa baba ang usa magahimog dayag nga pagpahayag alang sa kaluwasan.” Unya, sa bersikulo 13, ang apostol nagkutlo sa tagna ni Joel, nga nagpasiugda nga “ang tagsatagsa nga magatawag sa ngalan ni Jehova mamaluwas.”

‘Pangitaa, Pangitaa, Pangitaa’

 8. (a) Sumala sa manalagnang si Sofonias, unsay gikinahanglan ni Jehova alang sa kaluwasan? (b) Unsang pasidaan ang gipasabot kanato sa pulong “tingali” sa Sofonias 2:3?

⁸ Sa pagtagad sa basahong Sofonias sa Bibliya, kapitulo 2, mga bersikulo 2 ug 3, atong mabasa kon unsay gikinahanglan ni Jehova alang sa kaluwasan: “Sa dili pa moabot kaninyo ang nagdilaab nga kasuko ni Jehova, sa dili pa moabot kaninyo ang adlaw sa kasuko ni Jehova, pangitaa ninyo si Jehova, kamong tanan nga maaghop sa yuta, kinsa nagtuman sa Iyang hudisyal nga hukom. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.” Matikdi ang pulong “tingali.” Kini dili usa ka kahimtang nga kas-ang naluwas, kanunayng naluwas. Ang atong pagkanatagoan sa maong adlaw nagdepende sa atong pagpadayon sa pagbuhat nianang tulo ka butang. Kinahanglang atong pangitaon si Jehova, pangitaon ang pagkamatarong, ug pangitaon ang pagkamaaghop.

 9. Sa unsang paagi pagagantihan kadtong nagapangita sa pagkamaaghop?

⁹ Kahibulongan, gayod, ang ganti sa pagpangita sa pagkamaaghop! Sa Salmo 37, mga bersikulo 9 hangtod 11, atong mabasa: “Kadtong nagalaom kang Jehova mao ang magapanunod sa yuta. Ug sa makadiyut na lamang, ug ang daotan mawala na . . . Apan ang mga maaghop mismo magapanunod sa yuta, ug sila makakaplag gayod sa ilang tumang kalipay sa kadagaya sa pakigdait.” Ug unsa na man ang mahitungod sa pagpangitag pagkamatarong? Ang bersikulo 29 nagaingon: “Ang mga matarong mismo magapanunod sa yuta, ug sila magapuyo niana sa walay kataposan.” Mahitungod sa pagpangita kang Jehova, ang mga bersikulo 39 ug 40 nagatug-an kanato: “Ang kaluwasan sa mga matarong nagagikan kang Jehova; siya mao ang ilang kuta sa panahon sa kasakitan. Ug si Jehova magatabang kanila ug magatagana kanila sa kaikyasan. Siya magatagana kanila ug kaikyasan gikan sa daotang katawhan ug magaluwas kanila, tungod kay sila mingdangop kaniya.”

10. Kinsa ang ilado sa ilang pagdumili sa pagpangita kang Jehova ug sa pagpangita sa pagkamaaghop?

¹⁰ Ang mga sekta sa Kakristiyanohan napakyas sa pagpangita kang Jehova. Ang ilang klero nagasalikway gani sa iyang bililhong ngalan, nga mapangahasong nagkuha niana gikan sa ilang mga hubad sa Bibliya. Mopalabi sila sa pagsimba sa way-ngalan nga Ginoo o Diyos ug sa pagbalaan sa paganong Trinidad. Dugang pa, ang Kakristiyanohan wala mangita sa pagkamatarong. Daghan sa iyang mga sumusunod nagsunod ug nagpasiugdag matugotong mga estilo sa kinabuhi. Inay mangita sa pagkamaaghop sumala sa giingon ni Jesus, sila nagapasundayag, pananglitan diha sa telebisyon, sa maluho ug sagad imoral nga pagkinabuhi. Ang mga klerigo nagpatambok sa ilang kaugalingon sa kapildihan sa ilang mga panon. Sa mga pulong sa Santiago 5:5, sila “nagkinabuhi sa kaluho sa yuta ug matinguhaon sa unodnong kalipayan.” Samtang nagkaduol na ang adlaw ni Jehova, segurado nga sila makakaplag nga aplikado kanila ang dinasig nga mga pulong: “Ang mahalong mga butang mawalay kapuslanan sa adlaw sa kapungot.”​—Proverbio 11:4.

11. Kinsa ang tawo sa kalapasan, ug sa unsang paagi siya nagtipun-og ug dako kaayong pagkasad-an ug dugo?

¹¹ Sa unang siglo K.P., sumala sa giasoy ni apostol Pablo diha sa iyang ikaduhang sulat ngadto sa mga taga-Tesalonica, ang pila ka Kristohanon nahinam, kay naghunahuna nga niadto nahiabot na ang adlaw ni Jehova kanila. Apan nagpasidaan si Pablo nga kinahanglang moabot una ang dakong apostasiya o pagkahulog sa pagtuo, ug igapadayag “ang tawo sa kalapasan.” (2 Tesalonica 2:1-3) Karon, niining ika-20ng siglo, maila nato nga lukop kaayo ang maong apostasiya ug labihan ka malapason sa klero sa Kakristiyanohan sa panan-aw sa Diyos. Panahon niining kataposang mga adlaw sukad sa 1914, napatipun-og sa klero ang dako kaayong pagkasad-an ug dugo pinaagi sa pagpaluyo sa ‘pagsalsal sa mga punta sa daro ngadto sa mga espada.’ (Joel 3:10) Sila nagpadayon usab sa pagtudlo ug bakak nga mga doktrina, sama sa kinaiyanhong imortalidad sa tawhanong kalag, purgatoryo, pagsakit sa impiyernong-kalayo, pagbawtismo ug bata, Trinidad, ug susamang mga butang. Asa sila mobarog unya inigpatuman na ni Jehova sa iyang hudisyal nga hukom? Ang Proverbio 19:5 nagapahayag: “Siya nga nagapahayag ug mga kabakakan dili makalingkawas.”

12. (a) Unsa ang tawhanong “mga langit” ug “yuta” nga pagalaglagon sa dili na madugay? (b) Unsay atong matun-an gikan sa umaabot nga kalaglagan niining daotang kalibotan?

¹² Sa 2 Pedro 3:10, atong mabasa: “Ang adlaw ni Jehova moabot sama sa usa ka kawatan, diin ang mga langit mahanaw uban sa dinaguok, apan kay init kaayo ang mga elemento mangatunaw, ug ang yuta ug ang mga binuhatan niini mapadayag.” Ang hiwing mga pagmando nga nagbukot sa mga tawo samag kalangitan, uban sa tanang elemento nga naglangkob sa dunot tawhanong katilingban karong adlawa, pagasilhigon sa Diyos gikan sa yuta. Ang mga tiggama ug negosyante sa molaglag nga mga hinagiban, mga tikasan, salingkapaw nga mga relihiyonista ug ilang klero, mga tigpasiugdag kahilayan, kapintasan, ug krimen​—silang tanan mahanaw. Sila mangatunaw tungod sa kapungot ni Jehova. Apan sa mga bersikulo 11 ug 12, si Pedro midugang niining pasidaan alang sa mga Kristohanon: “Sanglit kining tanan nga butang sa ingon pagatunawon, unsang matang sa mga tawo angay mamao kamo diha sa balaang mga buhat sa kagawian ug mga binuhatan sa diyosnong pagkamahinalaron, nga nagapaabot ug nagabutang gayod sa hunahuna sa presensiya sa adlaw ni Jehova.”

Si Miguel Molihok!

13, 14. Kinsa ang dakong Tigbayaw sa pagmando ni Jehova, ug sa unsang paagi siya aktibo sukad sa 1914?

¹³ Sa unsang paagi si bisan kinsa makalingkawas sa “panahon sa kasakitan” ni Jehova? Ang Ahente sa Diyos nga motagana ug kaikyasan mao ang arkanghel Miguel, kansang ngalan nagkahulogan nga “Kinsa ang Sama sa Diyos?” Nan, haom nga siya ang Usang magabayaw sa pagmando ni Jehova, nga magatuboy kang Jehova ingong bugtong matuod nga Diyos ug may-katungod Soberanong Ginoo sa tibuok uniberso.

¹⁴ Talagsaon kaayong mga panghitabo ang gibatbat sa Pinadayag kapitulo 12, mga bersikulo 7 hangtod 17, mahitungod sa “adlaw sa Ginoo” sukad sa 1914! (Pinadayag 1:10) Ang arkanghel Miguel nagtambog sa mabudhiong si Satanas gikan sa langit nganhi sa yuta. Sa ulahi, sumala sa gibatbat sa Pinadayag kapitulo 19, mga bersikulo 11 hangtod 16, ang usang gitawag “Matinumanon ug Matuod” ‘magatamak sa pug-anan sa bino sa kasuko sa kapungot sa Diyos nga Makagagahom sa Tanan.’ Kining gamhanan langitnong manggugubat ginganlang “Hari sa mga hari ug Ginoo sa mga ginoo.” Sa kataposan, ang Pinadayag kapitulo 20, mga bersikulo 1 ug 2, nagsugid mahitungod sa usa ka dakong manulonda nga nagtambog kang Satanas sa kahiladman ug nagbilanggo kaniya didto sulod sa usa ka libo ka tuig. Dayag, kining tanan nga kasulatan nagapunting sa usa ka Tigbayaw sa pagkasoberano ni Jehova, ang Ginoong Jesu-Kristo, si kinsa gibutang ni Jehova diha sa iyang mahimayaong langitnong trono niadtong 1914.

15. Sa unsang espesyal nga paagi nga si Miguel sa dili na madugay “motindog”?

¹⁵ Si Miguel “nagtindog” na, sumala sa gipahayag sa Daniel 12:1, alang sa katawhan ni Jehova sukad gayod sa pagpalingkod kaniya ingong Hari niadtong 1914. Apan sa dili na madugay si Miguel “motindog” sa espesyal kaayong diwa​—ingong Ahente ni Jehova nga magahanaw sa tanang pagkadaotan gikan sa yuta ug ingong Manluluwas sa tibuok-yutang kapunongan sa katawhan sa Diyos. Kon unsa unya ka dako ang maong “panahon sa kasakitan” gipaila sa mga pulong ni Jesus sa Mateo 24:21, 22. “Unya adunay dakong kasakitan nga wala pa mahitabo sukad sa sinugdanan sa kalibotan hangtod karon, wala, ni mahitabo pa pag-usab. Sa pagkamatuod, gawas kon pamub-on ang maong mga adlaw, walay unod ang maluwas; apan tungod sa mga pinili ang maong mga adlaw pamub-on.”

16. Unsang unod ang pagaluwason panahon sa dakong kasakitan?

¹⁶ Pagkamalipayon nato nga ang pila ka unod mamaluwas nianang panahona! Dili, dili sama sa masukolong mga Hudiyo nga wala makagawas sa Jerusalem niadtong 70 K.P., nga ang pipila kanila gidalang mga ulipon ngadto sa Roma. Hinunoa, kadtong makalingkawas sa “panahon sa kataposan” mao unyay susama sa Kristohanong kongregasyon nga nakakagiw na gikan sa Jerusalem sa dihang ang kataposang paglikos nagsugod. Sila mahimong kaugalingong katawhan sa Diyos, ang milyonmilyon sa dakong panon kauban sa mga dinihogan nga tingali mahibilin pa sa yuta. (Daniel 12:4) Ang dakong panon “nanggula sa dakong kasakitan.” Ngano? Kay “sila naglaba sa ilang hatag-as nga mga biste ug nagpaputi niana sa dugo sa Kordero.” Sila nagtuo sa nagatubos nga gahom sa giulang dugo ni Jesus ug nagapasundayag sa maong pagtuo pinaagi sa maunongong pag-alagad sa Diyos. Bisan karon, si Jehova, “ang Usang naglingkod sa trono,” nagabuklad sa iyang mapanalipdanong tolda ibabaw kanila, samtang ang Kordero, si Kristo Jesus, nagaalima ug nagagiya kanila ngadto sa mga tuboran sa mga tubig sa kinabuhi.​—Pinadayag 7:14, 15.

17. Sa unsang paagi ang dakong panon nadasig ilabina sa paglihok aron pagatagoan panahon sa umaabot nga adlaw sa kasakitan?

¹⁷ Sa pagpangita kang Jehova, sa pagkamatarong, ug sa pagkamaaghop, ang milyonmilyon sa dakong panon kinahanglang dili motugot nga ang ilang unang gugma sa kamatuoran mabugnaw! Kon usa ka sa maong samag-karnero nga mga tawo, unsa ang kinahanglan nimong buhaton? Sumala sa gipahayag sa Colosas kapitulo 3, mga bersikulo 5 hangtod 14, kinahanglang sa bug-os imong “hukason ang daang pagkatawo uban sa mga batasan niini.” Nga magtinguhag balaan nga panabang, panlimbasog nga ‘isul-ob sa imong kaugalingon ang bag-ong pagkatawo, nga gipasukad sa tukmang kahibalo.’ Sa kaaghop, ugmara ug hupting padayon ang kadasig sa pagdayeg kang Jehova ug pagmantala sa iyang dagkong mga katuyoan ngadto sa uban. Sa ingon, ikaw tingali pagatagoan sa “panahon sa kasakitan,” ang adlaw sa “nagdilaab nga kasuko ni Jehova.”

18, 19. Sa unsang paagi ang pagkamainantoson nahimong hinungdanon alang sa kaluwasan?

¹⁸ Kanang adlawa haduol na! Kini nagadali padulong kanato. Ang pagtigom sa mga indibiduwal sa dakong panon nagapadayon na karon sulod sa mga 57 ka tuig. Ubay-ubay niini nila namatay na ug nagapaabot sa ilang pagkabanhaw. Apan kita gipasaligan sa tagna sa Pinadayag nga ingong usa ka pundok ang dakong panon mogula sa dakong kasakitan ingong pinakauyok sa “usa ka bag-ong yuta” nga kapunongan. (Pinadayag 21:1) Tua ka ba unya didto? Kana mahimo, kay si Jesus nagaingon sa Mateo 24:13: “Siya nga nagaantos hangtod sa kataposan mao ang mamaluwas.”

¹⁹ Ang mga kalisdanan nga nasinati sa katawhan ni Jehova niining daang sistema tingali mopadayon sa pag-usbaw. Ug inighapak nianang punog-kagul-anan nga dakong kasakitan, basin ikaw makasinatig mga kalisod. Apan pabilin nga suod kang Jehova ug sa iyang organisasyon. Pabilin nga nagamata! “‘Magpadayon sa pagpaabot kanako,’ nagaingon si Jehova, ‘hangtod sa adlaw sa akong pagtindog alang sa inagaw, kay ang akong hudisyal nga hukom mao ang pagtigom sa kanasoran, aron akong pagatigomon alang kanako ang mga gingharian, aron ibubo kanila ang akong hukom, ang tanan kong nagdilaab nga kasuko; kay pinaagi sa kalayo sa akong kadasig ang tibuok nga yuta pagalamyon.’”​—Sofonias 3:8.

20. Samtang nagsingabot na ang “panahon sa kasakitan,” unsay kinahanglang atong buhaton?

²⁰ Alang sa atong panalipod ug pagdasig, si Jehova sa kamaluluton nagtagana sa iyang katawhan ug “usa ka putling pinulongan,” nga nagalakip sa talagsaong mensahe sa iyang umaabot nga Gingharian, “aron silang tanan magatawag sa ngalan ni Jehova, aron sa pag-alagad kaniya abaga sa abaga.” (Sofonias 3:9) Samtang ang matayuktokon nga “panahon sa kasakitan” nagadali sa pagsingabot, hinaot kita magaalagad uban ang kadasig, nga magatabang sa ubang mga maaghop sa ‘pagtawag sa ngalan ni Jehova’ alang sa kaluwasan.

Nahinumdom Ka Ba?

◻ Unsang lihok ni Jehova ang magauna sa pagdalag pakigdait sa yuta?

◻ Sumala kang Joel, unsay kinahanglang buhaton sa usa aron maluwas?

◻ Sumala kang Sofonias, sa unsang paagi ang mga maaghop mangitag panalipod gikan sa nagdilaab nga kasuko ni Jehova?

◻ Kinsa “ang tawo sa kalapasan,” ug sa unsang paagi siya nagtipun-og sa pagkasad-an ug dugo?

◻ Unsa ka hinungdanon ang pagkamainantoson maylabot sa kaluwasan?