Hupting Padayon ang Imong Kahadlok Kang Jehova
“‘Ako usa ka dakong Hari,’ si Jehova sa mga panon nagaingon, ‘ug ang akong ngalan mahimong makalilisang taliwala sa kanasoran.’”—MALAQUIAS 1:14.
“USA ka pahayag: Ang pulong ni Jehova mahitungod sa Israel pinaagi ni Malaquias.” (Malaquias 1:1) Kining mubo, makapatandog nga mga pulong mao ang sinugdan sa basahong Malaquias sa Bibliya. Sa Bibliya ang usa ka pahayag kasagarang usa ka pagsaway sa pagkadaotan. Kini matuod gayod sa kaso sa basahong Malaquias uban ang pintok ug kusganong mensahe niini ngadto sa nasod sa Israel. Ang atong paghisgot niini mopasiugda sa panginahanglan nga atong huptang padayon ang atong kahadlok kang Jehova ug ang atong gugma kaniya.
1, 2. (a) Unsang gamhanang mensahe ang nasulod sa basahong Malaquias? (b) Unsang pagtulon-an ang gitagana sa unang mga pulong sa mensahe ni Jehova?
2 Ang unang duha ka bersikulo sa basahon nagataganag pagtulon-an sa pagpanambag. Gipasaligan ni Jehova ang iyang mga mamiminaw sa iyang tinguha sa pagtabang kanila: “‘Gihigugma ko kamo,’ si Jehova nagaingon.” Pagkamapasaligon, makalipayng introduksiyon alang sa mga tawong matinud-anog kasingkasing sa malinapasong Israel. Ang mensahe nagpadayon: “Ug kamo nagaingon: ‘Sa unsang paagi ikaw nahigugma kanamo?’ ‘Dili ba si Esau igsoon ni Jacob?’ nagaingon si Jehova. ‘Apan gihigugma ko si Jacob, ug gidumtan si Esau; ug sa kataposan akong gihimo ang iyang kabukiran nga usa ka awaaw ug ang iyang panulondon nga alang sa mga irong ihalas sa kamingawan.’”—Malaquias 1:2, 3.
3. Unsa ang mga hinungdan sa mga pagbati ni Jehova kang Jacob ug kang Esau?
3 Nganong gihigugma ni Jehova si Jacob ug, sa ulahi, ang mga kaliwat ni Jacob, ang mga Israelinhon? Kadto tungod kay si Jacob mahadlokon sa Diyos ug siya nagtahod sa iyang mahadlokon-sa-Diyos nga mga ginikanan. Si Esau, sa laing bahin, maoy tawong hakog, nga walay kahadlok sa Diyos. Gawas pa, wala siyay pagtahod sa iyang mga ginikanan, kinsa nagbaton sa hinatag-Diyos, kinaiyanhong katungod sa pagdahom sa iyang pagkamasinugtanon. Tukma, gihigugma ni Jehova si Jacob apan gidumtan si Esau. Kini usa ka pasidaan kanato. Kinahanglang likayan gayod nato nga mawad-an sa kahadlok sa Diyos ug mahimong materyalistiko sama kang Esau, kinsa nagtinguha lamang sa pagtagbaw sa iyang unodnong mga pangibog.—Genesis 26:34, 35; 27:41; Hebreohanon 12:16.
4, 5. (a) Unsay epekto sa paagi sa kinabuhi ni Jacob ug Esau diha sa ilang mga kaliwat? (b) Sa unsang paagi maapektahan unta niadto ang mga Israelinhon?
4 Maingong ang dalan ni Jacob nahimong panalangin sa iyang mga kaliwat, ang mga Israelinhon, ang dalan usab ni Esau nahimong tukmang kaatbang alang sa iyang mga kaliwat, ang mga Edomhanon. Ang mga Edomhanon wala makatagamtam sa panalangin ni Jehova. Hinunoa, tungod sa ilang mapintasong pagsupak sa iyang katawhan sa tugon, naagoman nila ang pagdumot ni Jehova. Sila napildi sa kasundalohan ni Nabukodonosor ug sa ulahi sa mga Arabiano. Sa kataposan, sumala sa gitagna ni Jehova, ang mga Edomhanon nahanaw ingong usa ka nasod.—Obadias 18.
5 Ang mga paghukom sa Diyos sa Edom nagsugod una pa sa adlaw ni Malaquias. Sa unsang paagi naapektahan niadto ang mga Israelinhon? Gisultihan sila ni Jehova: “Ang inyong mga mata mismo makakita niini, ug kamo mismo magaingon: ‘Hinaot si Jehova mapadako ibabaw sa teritoryo sa Israel.’” (Malaquias 1:5) Latas sa kasiglohan, nakita sa Israel pinaagi sa “kaugalingong mga mata” niini ang gugma nga nabatonan ni Jehova alang niini ingong usa ka nasod.
Ipadayag sa Atong mga Lihok Kon Kaha Kita Nahadlok sa Diyos
6. Unsa ang sumbong ni Jehova batok sa mga Israelinhon?
6 Ang pahayag nagpadayon: “‘Ang usa ka anak, sa iyang bahin, nagapasidungog sa usa ka amahan; ug ang usa ka sulugoon, sa iyang dakong agalon. Busa kon ako usa ka amahan, hain man ang pasidungog alang kanako? Ug kon ako usa ka dakong agalon, hain man ang kahadlok alang kanako?’ Si Jehova sa mga panon nagaingon kaninyo, Oh mga saserdote nga nagatamay sa akong ngalan.” (Malaquias 1:6; Exodo 4:22, 23; Deuteronomio 32:6) Si Jehova nagtul-id sa mga Israelinhon, nagtagana kanila, ug nanalipod kanila, sama ra sa usa ka amahan sa iyang anak. Unsay tukma niyang gidahom ingong balos? Nga pasidunggan ug kahadlokan. Ang nasod, apil ang mga saserdote, napakyas sa paghimo niini, apan nagpadayag hinuon sa kawalay-pagtahod sa ngalan ni Jehova, ug nagtamay niini. Sila nahimong “mabudhiong mga anak.”—Jeremias 3:14, 22; Deuteronomio 32:18-20; Isaias 1:2, 3.
7. Unsay gibati sa mga Israelinhon bahin sa maong sumbong, ug unsay tubag ni Jehova kanila?
7 Ang mga Israelinhon nangutana: “Sa unsang paagi kami nagatamay sa imong ngalan?” Si Jehova mapasiugdahong mitubag: “‘Pinaagi sa paghalad sa akong halaran sa mahugaw nga tinapay.’ Ug kamo nagaingon: ‘Sa unsang paagi kami nagahugaw kanimo?’ Sa inyong pag-ingon: ‘Ang lamesa ni Jehova maoy talamayon man.’ Ug dihang kamo magahalad ug usa ka hayop nga buta: ‘Kini dili daotan.’ Ug sa dihang kamo magahalad sa usa ka hayop nga piang o daot: ‘Kini dili daotan.’ ‘Palihog, dad-a kana ngadto sa inyong gobernador. Malipay ba siya kanimo, o dawaton ka kahang maluluton?’ si Jehova sa mga panon nagaingon.”—Malaquias 1:6-8.
8. Unsay gipaila sa mga Israelinhon pinaagi sa ilang mga lihok?
8 Ang usa makahanduraw sa usa ka Israelinhong manan-aw sa iyang panon sa kahayopan ug malalangong mopili sa hayop nga buta o piang aron ihalad kang Jehova. Sa maong paagi siya daw nagahimo sa usa ka halad ug bisan pa niana mahakogong nagatipig sa labing maayong kahayopan alang sa iyang kaugalingon. Dili siya mangahas sa pagbuhat niana ngadto sa gobernador! Apan gihimo kana sa mga Israelinhon kang Jehova—nga daw dili siya makakita sa ilang pagkamalalangon ug panglimbong. Tukma, si Jehova nangutana kanila, “Hain ba ang inyong kahadlok kanako?” Pinaagi sa ilang mga pulong, sila tingali miangkong nahadlok kang Jehova, apan ang ilang mga lihok tin-awng nagpaila sa laing butang.—Deuteronomio 15:21.
9. Unsay reaksiyon sa mga saserdote sa gibuhat sa mga tawo?
9 Unsa ang reaksiyon sa mga saserdote sa maong talamayong mga halad? Sila miingon: “Kini dili daotan.” Gipakamatarong nila ang daotang dalan sa mga Israelinhon. Busa bisan pag ang mga binihag nga namalik gikan sa Babilonya madasigong misugod sa pagpasig-uli sa matuod nga pagsimba, sa ulahi sila nahimong danghag, garboso, ug matarong-sa-kaugalingon. Nawad-an sila sa ilang kahadlok kang Jehova. Busa, ang ilang pag-alagad sa templo nahimong bugalbugal, ug ilang gisaulog ang mga pangilin sa pormalistikong paagi.—Malaquias 2:1-3; 3:8-10.
10. (a) Unsang halad ang buot ni Jehova karong adlawa? (b) Sa unsang paagi lamang ang atong halad mauyonan ni Jehova?
10 Ang pipila tingali motutol: ‘Kini dili mapadapat kanato; kita wala na maghalad ug mga hayop.’ Apan kita may laing matang sa halad nga igahalad. Matikdi ang dinaliang hangyo ni Pablo: “Hangyoon ko kamo tungod sa mga kaluoy sa Diyos, mga igsoon, nga inyong itanyag ang inyong mga lawas nga usa ka halad nga buhi, balaan, dalawaton sa Diyos, usa ka balaang pag-alagad uban sa inyong gahom sa pangatarongan.” (Roma 12:1) Ang halad nga buot ni Jehova karong adlawa mao ikaw! Nga mao, ang imong mga kusog, mga kahinguhaan, ug mga katakos. Ang atong halad makabaton lamang sa iyang pag-uyon kon kini mao ang atong kinamaayohan. Ang paghalad kang Jehova sa mga salin, sama sa piang, daot nga halad, tinong magaapektar sa atong relasyon kaniya.
11. Unsang pagsusi ang angay himoon sa matag nagpahinungod nga alagad ni Jehova?
11 Bisan pag ang uban tingali moingon, sa pagkamatuod, “Kini dili daotan,” kita nahibalo kon unsay pagbati ni Jehova niana. Busa, mabinantayon natong susihon ang “halad” sa “balaang pag-alagad” nga atong ginahalad, nga nagaapil sa atong bahin sa pagsangyaw, personal nga pagtuon, pag-ampo, ug pagtambong sa mga tigom. Natagbaw ka ba nga ikaw nagahalad kang Jehova sa imong kinamaayohan, o kana ba salin lamang? Anaa ang kapeligrohang malangkit kaayo sa kalingawan o lulinghayaw sa hinapos-sa-semana nga ang usa walay panahon o kusog sa pagsangyaw sa maayong balita sa Gingharian ug pagtambong sa mga tigom. Ang tibuok natong paagi sa kinabuhi, atong adlaw-adlawng pagkinabuhi, apil ang mga tinamdan ug mga motibo, angay malangkit sa halad nga atong ginahalad kang Jehova. Himoa nga kini ang kinamaayohan!
Pag-ila sa Matuod nga mga Nahadlok sa Diyos
12. Unsang tambag ang karon gihatag?
12 “Ug karon,” nagaingon ang tagna, “palihog, pahumoka ang nawong sa Diyos, aron kita iyang pakitaag kaluoy.” (Malaquias 1:9) Giawhag ni Jehova ang mga Israelinhon sa pagbuhat kon unsay matarong, pagpakitag tukmang kahadlok sa Diyos, ug paghalad kaniya sa butang takos niya. Kinahanglang buhaton nato ang sama karong adlawa. Pinaagi lamang sa pagtuman sa mga kinahanglanon ni Jehova nga atong maangkon ug mahuptang padayon ang iyang pag-uyon.
13 Kon wala ang tukmang kahadlok sa Diyos, ang atong pag-alagad kaniya basin himoon ingon nga pasundayag lamang ug tungod sa mahakogong ganansiya. Matikdi giunsa pagsukna ni Jehova ang Israelinhong mga saserdote bahin sa ilang pag-alagad sa templo: “‘Kinsa usab sa inyong taliwala ang magatak-op sa mga pultahan? Ug dili ninyo sugaan ang akong halaran—sa walay kapuslanan. Ako walay kalipay kaninyo,’ si Jehova sa mga panon nag-ingon, ‘ug ako walay kalipay sa gasa gikan sa inyong kamot.’” (Malaquias 1:10) Ay, oo, ang mga saserdote tua didto nga nagtuman sa katungdanan sa templo, nga nagtak-op sa mga pultahan sa sangtuwaryo, nagsuga sa mga halaran. Apan kadto wala nila buhata sa walay kapuslanan. Sila nagtinguha sa mga hatag ug mga hiphip gikan sa mga Israelinhon nga nanganha sa paghimog mga halad sa templo. Si Jehova wala malipay niadto, ug siya dili malipay karon, sa pag-alagad nga ginahimo lamang tungod sa mahakogong ganansiya. Kini mangil-ad alang kaniya.
14. Nganong anaa kanunay ang panginahanglan sa pagbantay batok sa kadalo?
14 Ang panginahanglan nga magbantay batok sa kahakog ug kadalo wala matibhangi sa atong adlaw. Sa masubsob ang Kasulatan nagapasidaan kanato batok sa kadalo, nga nagaingong ang mga tawong dalo dili uyonan ni Jehova. (1 Corinto 6:10; Efeso 5:5) Sa pagtuman sa atong ministeryo, hinaot ang atong gugma ug kahadlok kang Jehova magapahilayo kanato sa pagtuman niana tungod lamang sa mahakogong ganansiya. Angay natong langkaton dayon ang maong mga hilig nga basin motungha sa atong kasingkasing. Ang mga ansiano ug mga ministeryal nga alagad ilabinang gipasidan-an nga dili mahimong “dalo sa malimbongong ganansiya.” (Tito 1:7; 1 Timoteo 3:8; 1 Pedro 5:2) Ang pipila tingali motuyo sa pag-ugmad sa mga relasyon uban lamang sa mga igsoong makatabang kanila sa materyal nga paagi, nga mosangpot sa pagkamay-pinalabi ug pagpanuko sa pagtambag kanila. Dili gayod nato buot mahisama sa dalo nga mga saserdote sa Israel nga nagtinguhag mga hatag ug mga hiphip gikan sa ilang kaubang mga Israelinhon.
15. (a) Giunsa pagpaila ni Malaquias nga aduna unyay mga nahadlok kang Jehova sa tanang bahin sa yuta? (b) Unsang laing kasulatan ang nagapaluyo niini?
15 Karong adlawa, kon si Jehova mosukna, “Hain ba ang kahadlok kanako?” may katawhan bang makatubag, ‘Ania kami, ang mga nahadlok kanimo’? Labing tino! Kinsa man? Ang matinumanong mga saksi ni Jehova, nga hikaplagan sa tanang bahin sa yuta. Kining internasyonal nga grupo sa katawhan ug ang buluhatong ilang pagabuhaton gitagna sa Malaquias 1:11: “‘Kay gikan sa pagsilang sa adlaw hangtod sa pagsalop niini ang akong ngalan mahimong dako taliwala sa mga nasod, ug . . . pagahimoon ang usa ka halad sa akong ngalan, bisan ang usa ka gasang mahinlo; tungod kay ang akong ngalan mahimong dako taliwala sa mga nasod,’ si Jehova sa mga panon nagaingon.”—Tan-awa usab ang Salmo 67:7; Isaias 33:5, 6; 41:5; 59:19; Jeremias 32:39, 40.
16. Unsa ang lainlaing kahulogan sa gikan sa pagsilang sa adlaw hangtod sa pagsalop sa adlaw, ug sa unsang paagi kini ginatuman?
16 Pagkatukmang si Malaquias dinhi naghisgot sa dakong buluhatong ginahimo sa atong adlaw tungod sa pagsangyaw sa maayong balita sa tibuok yuta. (Mateo 24:14; Pinadayag 14:6, 7) Ang gikan sa pagsilang sa adlaw hangtod sa pagsalop sa adlaw, sa geograpikanhong diwa, nagkahulogang gikan sa silangan ngadto sa kasadpan. Bisan kon diin kita motan-aw sa yuta karong adlawa, atong hikaplagan ang mga nahadlok kang Jehova nga nagabuhat sa iyang kabubut-on. Ang gikan sa pagsilang sa adlaw hangtod sa pagsalop sa adlaw nagkahulogan usab nga tibuok adlaw. Oo, ang pagdayeg kanunayng ginahalad sa mahadlokon-sa-Diyos nga mga alagad. Sumala sa gisaad ni Jehova, ang iyang ngalan ginapahayag sa tibuok yuta niadtong tinuod nga nahadlok kaniya.—Exodo 9:16; 1 Cronicas 16:23, 24; Salmo 113:3.
Hupting Padayon ang Tukmang Kahadlok sa Diyos
17. Unsa ang mahimong sangpotanan sa pagkawala sa atong pagtahod kang Jehova ug sa atong kahadlok kaniya?
17 Niadtong mapakyas sa pagtahod ug pagkahadlok kang Jehova, ang pagsimba ug pag-alagad mahimong kabug-at. Si Jehova miingon ngadto sa mga Israelinhon: “Kamo nagapasipala kanako pinaagi sa pag-ingon: ‘Ang lamesa ni Jehova mahugaw, ug ang bunga niini talamayon, ang pagkaon niini.’ Ug kamo nagaingon, ‘Tan-awa! Pagkamakalaay!’” (Malaquias 1:12, 13) Kini matuod usab sa panahon nato karon. Alang niadtong nawad-an sa kahadlok kang Jehova, ang mga tigom, pagsangyaw sa kanataran, ug ubang Kristohanong buluhaton mahimong kabug-at.
18. Matag karon ug unya, unsay nahitabo sa pipila sa modernong-adlawng mga alagad sa Diyos?
18 Matikdi giunsa kana sila pagbatbat sa The Watchtower sa Enero 1, 1937: “Niadtong mga dili matinumanon ang pribilehiyo sa pag-alagad sa Diyos pinaagi sa pagpatungha sa mga bunga sa gingharian sa atubangan sa uban, sumala sa gisugo sa Ginoo, nahimo na lamang nga makalaay nga seremonyas ug pormalidad, nga wala maghatag kanilag higayon nga mabantog sa panan-aw sa mga tawo. Ang pagdala sa mensahe sa gingharian sa balay-balay sa pinatik nga dagway, ug pagtanyag niini ngadto sa katawhan, makauulaw kaayo alang nianang mga nagpakaimportante-sa-kaugalingon. Sila walay kalipay niana . . . Busa sila nagaingon, ug nagapadayon sa pag-ingon: ‘Kining pagdalag mga libro mao lamay pagpamaligyag libro. Pagkamakalaay kini nga trabaho!’” Bisan karong adlawa anaa kadtong si kinsa, matag karon ug unya, malaayan sa pagsangyaw sa kanataran ug hagoan sa pagtambong sa mga tigom. Kini mao ang mahitabo dihang kita mawad-an sa atong kahadlok kang Jehova ug, duyog niana, atong gugma kaniya.
19. Sa unsang paagi kita makapadayon sa pagpasundayag sa atong pagpabili sa mga tagana ni Jehova?
19 Ang paghupot nga padayon sa kahadlok kang Jehova maghimo kanatong mapaubsanon sa iyang atubangan ug mapabilhon sa kanunay sa tanang iyang ginabuhat alang kanato. Kon kaha anaa sa gamayng pundok sa usa ka balay o dakong panagkatigom sa tinagpulo ka libo sa usa ka estadyum, kita mapasalamaton kang Jehova tungod sa pribilehiyong mahauban sa atong Kristohanong mga igsoon. Atong ipakita ang atong pagkamapasalamaton pinaagi sa pagtambong didto ug pagdasig sa uban nga presente ngadto sa “gugma ug maayong mga buhat” pinaagi sa atong makapalig-ong kabildohay ug sa mga komento nato panahon sa mga tigom. (Hebreohanon 10:24, 25) Kon ugaling atong pribilehiyo ang paghatag ug mga bahin sa mga tigom, atong likayan ang paglangan sa preparasyon sa kataposang gutlo, nga magdalidali sa paghan-ay sa mga ideya. Ayaw gayod isipa ang maong mga asaynment ingong butang kasagaran. Kana sila maoy balaang mga pribilehiyo, ug ang paagi sa atong pag-atiman niana maoy laing ilhanan kon sa unsang paagi kita nagatahod ug nahadlok kang Jehova.
20. (a) Unsay dili gayod nato hikalimtan? (b) Sa unsang konklusyon kita mahidangat?
20 Pagkamakapasubo ang sangpotanan alang niadtong nawad-an sa kahadlok sa Diyos! Sila walay pagpabili sa dili-takos nga pribilehiyo sa pagbatog relasyon uban sa Soberano sa uniberso. “‘Ako usa ka dakong Hari,’ si Jehova sa mga panon nagaingon, ‘ug ang akong ngalan mahimong makalilisang taliwala sa kanasoran.’” (Malaquias 1:14; Pinadayag 15:4) Hinaot dili gayod kita malimot niana. Hinaot ang matag usa kanato mahisama sa salmista nga miingon: “Ako usa ka kauban sa tanang nahadlok kanimo.” (Salmo 119:63) Tapos sa paghisgot niining butanga, kita mahidangat sa samang konklusyon sa iya ni Solomon sa miingon siya: “Kahadloki ang matuod nga Diyos ug bantayi ang iyang mga sugo. Kay kini mao ang tibuok nga katungdanan sa tawo. Kay ang matuod nga Diyos mismo magahukom sa tanang matang sa buhat maylabot sa tanang tinagoang butang, kon kaha kini maayo o daotan.”—Ecclesiastes 12:13, 14.
Mga Pagtulon-an Gikan sa Basahong Malaquias—
◻ Nganong ang mga Israelinhon angay mahadlok kang Jehova?
◻ Sa unsang paagi ang atong mga lihok nagapakitang kita tinuod nahadlok kang Jehova?
◻ Unsay nagapamatuod nga adunay mga nahadlok kang Jehova sa tibuok yuta karong adlawa?
◻ Nganong kinahanglang atong huptang padayon ang tukmang kahadlok sa Diyos?
13. (a) Kon walay kahadlok sa Diyos, sa unsang lit-ag kita mahimong mahulog? (b) Sa unsang paagi naapektahan sa kadalo ang Israelinhong mga saserdote?
[Blurb sa panid 18]
Gikan sa pagsilang sa adlaw hangtod sa pagsalop sa adlaw, ang ngalan ni Jehova mahimong dako
[Hulagway sa panid 17]
Gitamay sa mga Israelinhon si Jehova pinaagi sa paghalad sa mga hayop nga buta, piang, o daot