Hinumdomi ang Kristohanong mga Prinsipyo

SA DIHANG mosugod sa pagtungha ang usa ka bata, apil sa unang mga butang iyang matun-an mao ang pagbasa ug pagsulat. Kining bililhong mga ulohan nagaandam kaniya alang sa mas abanteng materyal, sama sa social studies, siyensiya, ug mga pinulongan. Kon ang bata dili makabatog bug-os nga pagsabot sa pagbasa ug pagsulat, madaot ang tibuok niyang umaabot nga edukasyon.

May pagkaamgid ang pagkat-on kon unsaon sa pagsimba sa Diyos. Sa dihang motuon kita sa Bibliya, atong masayran nga dunay daghang paninugdang mga kamatuoran, o mga prinsipyo nga kinahanglang mahanas. Sa dihang kini atong masabtan, kita makapadayon ngadto sa mas laglom nga mga butang. Ugaling, kon kita dili bug-os makasabot ug makatuo niining unang mga prinsipyo, madepektoso ang atong pagsimba. Dili kita makahimog maayong mga desisyon, ug ang atong pagtuo daling matarog.

Ang paninugdang mga prinsipyo sa Bibliya dili lisod sabton. (Tan-awa ang tsart.) Bisan pa niana, sila dili lamang karaang mga panultihon o mga butang nga makaikag sa pangutok. Sila maoy buhi, bililhong mga kamatuoran, ug ang maalamong mga Kristohanon makatuon sa paghigugma kanila. Si Jehova nagaingon: “Hatagig pagtagad ang akong mga pulong. Ikiling ang imong igdulongog sa akong mga pulong. Hinaot sila dili mahilayo gikan sa imong mga mata. Tipigi sila sa tunga sa imong kasingkasing. Kay sila kinabuhi niadtong makakaplag kanila ug kahimsog sa ilang unod.”—Proverbio 4:20-22; Ezekiel 18:19, 20, 23.

Ugaling, bisan pa sa kahinungdanon niining mga prinsipyoha, si Jesus nagpasidaan nga diyutay ra ang makasabot ug magsunod kanila. Siya miingon: “Masigpit ang pultahan ug mapig-ot ang dalan nga padulong sa kinabuhi, ug diyutay ra ang mga nakatultol niini.” (Mateo 7:14) Kini dili tungod kay ang mga prinsipyo daw natago. Buot ni Jehova ang mga lalaki ug mga babaye magsunod niana ug sa ingon magapanunod sa kinabuhi. (2 Pedro 3:9) Gipahinabo niyang masulat ang kaalam, kahibalo, ug pagsabot diha sa Bibliya, nga kaylap mabatonan sa tanan. Ug ang iyang mga Saksi nagadasig sa ilang mga silingan sa pagpangita niining nagahatag-kinabuhing impormasyon. Niining paagiha, sa literal, “ang matuod nga kaalam mismo nagasinggit sa dalan.” (Proverbio 1:20; 2:1-9) Apan adunay ubang mga puwersang nagalihok.

Ginabutaan ni Satanas ang mga mata sa kadaghanang tawo sa matuod nga mga prinsipyo. (2 Corinto 4:4) Dugang pa, ang espiritu sa tawo sa pagkaindependente nagahimo niya sa pagpalabi nga molakaw sa iyang kaugalingong dalan inay mosalig sa usa ka Labaw nga Gahom alang sa giya. Sa adlaw ni apostol Pablo, bisan ang pipila nga nakakat-on sa paninugdang mga prinsipyo nahikalimot na niana. Busa, siya misulat: “Nagkinahanglan na usab kamo nga may magatudlo kaninyo sukad sa sinugdan sa paninugdang mga butang sa balaang mga pahayag sa Diyos.”​—Hebreohanon 5:12.

Dugang pa, si Jesus nagpasidaan: “Daghan ang moingon kanako nianang adlawa, ‘Ginoo, Ginoo, wala ba kami managna sa imong ngalan, ug magpagulag mga demonyo sa imong ngalan, ug maghimog daghang gamhanang buhat sa imong ngalan?’ Bisan pa niana ako magaingon kanila: Wala ako makaila kaninyo! Pahawa kamo gikan kanako, kamong mga magbubuhat sa kalapasan.” (Mateo 7:22, 23) Nganong ang mga tawo nga nagahunahunang sila nagaalagad kang Jesus gisalikway? Kay ang ilang “gamhanang mga buhat” wala ipasukad sa mga prinsipyo sa Bibliya. Kini samag sila nagasulat sa pagtuon sa kasaysayan o siyensiya nga wala usa magtuon sa pagbasa. Ang ilang mga buhat depektoso, wala ipasikad sa kamatuoran. Busa, sila maoy “mga magbubuhat sa kalapasan.”

Dalawaton ba ang Imong Pagsimba?

Makatino ba kita nga si Jesus dili moingon kanato sa usa ka adlaw, ‘Pahawa gikan kanako, ikaw nga magbubuhat sa kalapasan’? Oo, kon ang atong pagsimba bug-os nga gipasukad sa mga prinsipyo sa Bibliya. Kana mahimo, kon atong gisusi pag-ayo ang Bibliya, ilabina ang mga pulong ni Jesus. Si Jesus nagsubay gayod sa masigpit, mapig-ot nga dalan sa kinabuhi​—ngani, siya mao “ang dalan ug ang kamatuoran ug ang kinabuhi.” (Juan 14:6) Kon ipadapat nato ang iyang mga pulong ug sundon pag-ayo ang iyang mga lakang, kita magasubay sa samang dalan.​—Juan 6:68; 1 Pedro 2:21.

Ang unang mga sumusunod ni Jesus naglakaw usab nianang masigpit, mapig-ot nga dalan sa kinabuhi. Busa, sa dihang si Jesus namatay iyang gitugyan sa ilang mga kamot ang buluhaton sa pagtudlo sa uban sa pagsimba ang Diyos. Nagpasidaan usab siya nga siya mobalik ug modahom nga sila manubag bahin sa kon giunsa nila paggawi sa panahon nga wala siya.​—Mateo 24:46; 25:14-23; 28:19, 20.

Sa kadugayan, ang gidaghanon niadtong nag-angkong nagsunod kang Kristo miuswag nga nakaabot sa ginatos ka milyon. Apan sa kadaghanang kaso, ang pagsimba niining dagko kaayong mga panon wala ipasukad sa mga prinsipyo sa Bibliya. Busa, sa dihang gipalingkod si Jesus ingong langitnong Hari sa 1914 ug dayon ‘miabot’ aron manudya niadtong nag-angkong iyang mga sumusunod, unsay iyang nakaplagan? Ang milyonmilyong nag-angkong Kristohanon nakigbugno sa labing makalilisang nga gubat sa kasaysayan sa tawo hangtod niadtong puntoha.

Oo, ang kinabag-an sa “mga Kristohanon” naglihok nga bug-os supak sa paninugdang mga prinsipyo sa Bibliya. Bisan pa niana, may usa ka pundok sa matuod nga mga Kristohanon nga naningkamot gayod sa pagsunod sa diyosnong mga prinsipyo ug nagtudlo usab niana ngadto kang bisan kinsa nga mamati sa nabuang-sa-gubat nga kalibotan. Sila gitigom ug sa wala madugay giduyogan sa usa ka dakong panon sa mga tawong samag kaisipan. (Mateo 24:31; Pinadayag 7:4, 9, 10) Sila nagasunod gihapon sa nagahatag-kinabuhing mga prinsipyo, nga nagatug-an sa uban mahitungod sa talagsaong mga katuyoan sa Diyos, nga nagkahiusa ingong usa ka panon, ug naningkamot nga magpahiuyon ngadto sa “hingpit nga kabubut-on sa Diyos.”​—Roma 12:2.

Usa ka Bililhong Kasulatanhong Prinsipyo

Kini dili sayon. Sa usa ka butang, kining matuod nga mga Kristohanon kinahanglang makigbisog sa ilang dili-hingpit, makasasalang kinaiyahan. Ug sila nagapuyo sa usa ka kalibotan nga bug-os supak sa mga sukdanan ug mga prinsipyo nga ilang gipaningkamotan sa pagsunod. Ngani, si apostol Juan miingon: “Ang tibuok kalibotan nahiluna sa gahom sa usang daotan.” (1 Juan 5:19) Kana ang hinungdan ang matuod nga mga magsisimba sa Diyos karong adlawa kinahanglang maghinumdom gayod sa usa ka bililhong prinsipyo nga gipatin-aw ni Jesus: “Sila [mga Kristohanon] dili bahin sa kalibotan.”​—Juan 17:16.

Si Jehova dili magpugos sa mga tawo sa pag-alagad kaniya, apan kadtong mopalabi sa pagbuhat niana kinahanglang mohimog pila ka ugdang nga desisyon. Pananglitan, kinahanglang dawaton nila ang kamatuoran nga sila dili gayod mahimong bantog niining kalibotana. (Mateo 24:9) Ang disipulong si Santiago nagpasidaan: “Si bisan kinsa . . . nga buot mahimong higala sa kalibotan nagahimo sa iyang kaugalingon nga kaaway sa Diyos.” (Santiago 4:4) Ug si apostol Pablo miingon: “Unsa may pakig-ubanay sa pagkamatarong ug pagkamalapason?” ug “Unsa may pakig-ambitay sa usa ka tawong matinuohon sa usang dili matinuohon?” Dayon iyang gikutlo ang mga pulong mismo ni Jehova: “Panggula kamo gikan kanila, ug bumalag kamo gikan kanila, . . . ug ayaw na kamo paghikap sa butang mahugaw.”​—2 Corinto 6:14-17; Efeso 5:11.

Sa unsang paagi kita ‘makabulag sa atong kaugalingon’? Hinuon, dili pinaagi sa paggawas sa atong kaugalingon sa lawasnon gikan sa kalibotan. Apan makalipay kita nga ‘mayugohan nga dili managsama uban sa mga dili magtutuo.’ Makalikay kita sa ‘daotang mga pakig-uban, nga makadaot sa mapuslanong mga batasan.’ (1 Corinto 15:33) Ug kita makabulag sa atong kaugalingon gikan sa espiritu sa kalibotan, ang espiritu sa matinguhaon sa kaugalingong kaayohan, pagkalimbongan, materyalismo, ug natarantar nga pagpangagpas sa kalingawan. (2 Timoteo 3:1-5) Ang makalipayng pagdasig gihatag niadtong nagabulag sa mga pangibog niining kalibotana: “Siya nga nagabuhat sa kabubut-on sa Diyos nagapabilin sa walay kataposan.”​—1 Juan 2:15-17.

Kadtong Nagasunod sa Paninugdang mga Prinsipyo

Posible ba karong adlawa ang pagsunod sa mga prinsipyo sa Bibliya ug pagsubay sa masigpit nga dalan nga padulong sa kinabuhi? Oo, bisan ang mga bata makahimo niana. Pananglitan, duha ka bata sa Brazil maayo kaayog gawi sa eskuylahan nga gihangyo sa ilang magtutudlo nga moanha ang ilang inahan ug mohisgot sa hinungdan. Gisaysay sa inahan nga tungod kadto kay sila nagsunod sa mga prinsipyo sa Bibliya bahin sa pagkamasinugtanon sa mga ginikanan ug sa ubang may awtoridad. (Efeso 6:1-3) Sa pagkatapos sa yugto sa pag-eskuyla, sila gitagaag higayon sa pagsaysay ngadto sa tibuok klase sa mga kaayohan gumikan nianang diyosnong dalan.

Si Jesus nagpahayag sa prinsipyo: “Bisan pag ang usa ka tawo adunay kadagaya ang iyang kinabuhi dili magagikan sa mga butang iyang nabatonan.” (Lucas 12:15) Ang usa ka mauswagong doktor sa Hapon nakakat-on niini ug, sa katingala sa iyang mga kauban, nagpadapat niana. Gibiyaan niya ang iyang dakog-sapi nga posisyon ug miadto sa usa ka gamayng lungsod diin siya makatabang sa espirituwal nga paagi sa mga tagalungsod. Kadtong pagsakripisyo sa materyal nga kaayohan wala maghikaw kaniya sa iyang kalipay. Hinunoa, siya ug ang iyang asawa karon may labawng kalipay sa pagdala sa Pulong sa kinabuhi ngadto sa uban.

Ang Bibliya nagaingon: “Ang palahubog ug ulitan modangat sa kawalad-on.” (Proverbio 23:21) Kini tin-aw nga pasidaan batok sa pagkagiyan. Gipasidan-an usab kita batok sa pag-abusat sa mga droga: “Ang mga buhat sa unod mao . . . pagsimbag diyosdiyos, buhat sa espiritismo [phar·ma·kiʹa, “pagdroga” sa orihinal nga Grego].” (Galacia 5:19, 20) Dugang pa, si apostol Pablo miawhag: “Atong hinloan ang atong kaugalingon sa tanang kahugawan sa unod ug espiritu.”​—2 Corinto 7:1.

Ang pagtabako ug paggamit sa ubang makagiyang mga droga tin-awng supak niining mga prisipyoha sa Bibliya ug sa ingon maoy “pagkamalapasaon.” (Mateo 7:23) Si bisan kinsang alagad sa Diyos nga nagahugaw sa ilang kaugalingon pinaagi nianang mga substansiyaha makakaplag nga ang ilang pagsimba dili madawat sa Diyos. Busa, daghang ginatos ka libo ang mihunong na sa paggamit niining mga drogaha, ug ingong sangpotanan, ilang nadawat ang espirituwal ug lawasnong mga kaayohan. Hinuon, dili kanunay sayon ang pagbulag gikan niining mahugawng mga bisyo.

Usa ka batan-ong lalaki sa Michigan, U.S.A., nakakat-on mahitungod sa Diyos ug sa iyang mga prinsipyo gikan sa pila ka ministro nga mianha sa iyang pultahan. Nakaangay siya sa iyang nadungog apan nakaamgo nga ang iyang bisyo sa pagtabakog marijuana ug tabako wala mahiuyon sa pagsimba kang Jehova. Siya miingon: “Wala ako maglisod sa pagbiya sa mga droga, nga gikahimut-an ko. Apan mikabat ug labing menos unom ka bulan sa paghunong sa pagsigarilyo.” Gitabangan siya sa kaubang mga Kristohanon ug pinaagi sa pag-ampo. Karon, nga nagakinabuhig mahinlong kinabuhi sumala sa mga prinsipyo sa Bibliya, siya nagapahimulos sa mahinlong konsensiya, usa ka relasyon uban sa Diyos, ug Kristohanong panag-uban. Ngani, siya nag-ingon nga hangtod nga siya nahimong usa ka Kristohanon, siya wala gayod masayod kon unsa ang usa ka higala.

Ang pagsunod sa matarong nga mga prinsipyo tinuod nga usa ka dalang maalamon. Ug ang kaalam labi pang bililhon kay sa lunsay nga bulawan. Subaya kining dalana mismo, ug kini mohatag ug pagdayeg kang Jehova ug mosangpot sa imong walay-kataposang panalangin.​—Salmo 19:7, 10; Proverbio 16:16.

[Kahon sa panid 27]

Ang mga prinsipyo maoy paninugdang mga kamatuoran o pangunang mga balaod nga gikan niana makuha ang ubang mga kamatuoran o balaod. Ang mosunod mao ang pila ka pananglitan:

□ “Higugmaa si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong hunahuna.”​—Mateo 22:37.

□ “Busa, ang tanang butang nga buot ninyo nga pagabuhaton sa mga tawo kaninyo, inyo usab nga buhaton kanila.”​—Mateo 7:12.

□ “Ang pakighigala sa kalibotan maoy pagpakig-away sa Diyos.”​—Santiago 4:4.

□ “Bisan kon kamo nagakaon o nagainom o nagabuhat sa bisan unsa pa, buhata ang tanang butang alang sa himaya sa Diyos.”​—1 Corinto 10:31.

□ “Apan, kita nga malig-on angay magpas-an sa kahuyangan niadtong dili malig-on, ug dili magpahimuot sa atong kaugalingon.”​—Roma 15:1.

□ “Sa kanunay itanyag nato sa Diyos ang usa ka halad sa pagdayeg, nga mao, ang bunga sa mga ngabil nga nagahimog dayag nga pagpahayag sa iyang ngalan.”​—Hebreohanon 13:15.

□ “Magdinasigay kita sa usag usa sa gugma ug maayong mga buhat, nga dili magbiya sa panagkatigom sa atong kaugalingon.”​—Hebreohanon 10:24, 25.

□ “Ang tawo mabuhi, dili lamang sa tinapay, kondili sa tanang pulong nga nagagula sa baba ni Jehova.”​—Mateo 4:4.