Gitudloan sa Pagbuhat sa Kabubut-on ni Jehova
“Tudloi ako sa pagbuhat sa imong kabubut-on, tungod kay ikaw mao ang akong Diyos.”—SALMO 143:10.
1, 2. (a) Kanus-a kita angayng matudloan, ug uban sa unsang realistikanhong panglantaw? (b) Nganong hinungdanon kaayo nga matudloan ni Jehova?
SA MATAG adlaw nga buhi ug aktibo ang usa ka tawo, siya katudloan ug butang nga hinungdanon. Tinuod kana sa imong bahin, ug tinuod kini sa uban. Apan unsay mahitabo inigkamatay? Dili na mahimo nga matudloan ug bisan unsa o makakat-on niana nga kahimtang. Ang Bibliya tin-aw nga nag-ingon nga ang mga patay “walay nahibaloan nga bisan unsa.” Walay kahibalo sa Sheol, ang komon nga lubnganan sa katawhan. (Ecclesiastes 9:5, 10) Nagpasabot ba kini nga ang atong pagkanatudloan, pagkuhag kahibalo, maoy kawang? Kana nagadepende kon unsay gitudlo kanato ug kon sa unsang paagi gigamit nato kana nga kahibalo.
2 Kon kita gitudloan lamang kon unsay kalibotanon, wala kitay dumalayong kaugmaon. Apan, makalilipay nga minilyon sa katawhan sa tanang kanasoran ang ginatudloan sa kabubut-on sa Diyos nga may panglantaw sa kinabuhing walay kataposan. Ang pasukaranan niini nga paglaom nagadepende sa pagkanatudloan ni Jehova, ang Tuboran sa nagahatag-kinabuhing kahibalo.—Salmo 94:9-12.
3. (a) Nganong ikaingon nga si Jesus mao ang unang estudyante sa Diyos? (b) Unsang pasalig ang atong nabatonan nga ang mga tawo pagatudloan ni Jehova, ug uban ang unsang resulta?
3 Ang panganay nga Anak sa Diyos, ingong Iyang unang estudyante, gitudloan sa pagbuhat sa kabubut-on sa iyang Amahan. (Proverbio 8:22-30; Juan 8:28) Sa baylo, gipakita ni Jesus nga tinagpulo ka libo sa katawhan ang pagatudloan sa iyang Amahan. Unsa ang mga palaaboton niadtong nakakat-on gikan sa Diyos? Si Jesus miingon: “Kini nahisulat diha sa mga Propeta, ‘Ug silang tanan tudloan ni Jehova.’ Ang matag usa nga nakadungog gikan sa Amahan ug nakakat-on moari kanako. . . . Sa pagkamatuod gayod ako magaingon kaninyo, Siya nga nagatuo adunay kinabuhing walay-kataposan.”—Juan 6:45-47.
4. Sa unsang paagi ang minilyon sa katawhan naapektohan sa diyosnong pagtulon-an, ug unsang palaaboton ang ilang nabatonan?
4 Si Jesus nagkutlo gikan sa Isaias 54:13, nga nagtumong sa simbolikong babaye sa Diyos, ang langitnong Zion. Kanang tagnaa may partikular nga kapadapatan sa iyang mga anak, ang 144,000 nga inanak-sa-espiritung mga tinun-an ni Jesu-Kristo. Ang nahibilin niadtong espirituwal nga mga anak maoy aktibo karong adlawa, nga nanguna sa tibuok-yutang programa sa pagpanudlo. Tungod niini, milyonmilyong uban nga naglangkob sa “dakong panon” nakabenepisyo usab gikan sa pagkanatudloan ni Jehova. Sila adunay talagsaong palaaboton sa pagkakat-on nga dili na gayod makasinatig kamatayon. Sa unsang paagi? Aw, sila nahalinya nga makalabang-buhi sa kusog-nagsingabot nga “dakong kasakitan” ug sa pagpahimulos sa kinabuhing walay kataposan sa paraiso sa yuta.—Pinadayag 7:9, 10, 13-17.
Mas Dakong Pagpasiugda sa Pagbuhat sa Kabubut-on sa Diyos
5. (a) Unsa ang tinuig nga teksto sa 1997? (b) Unsay angay natong bation bahin sa pagtambong sa Kristohanong mga tigom?
5 Sa 1997, sa kapin sa 80,000 ka kongregasyon sa tibuok yuta, ang mga Saksi ni Jehova maghinumdom gayod sa pangbukas nga mga pulong sa Salmo 143:10: “Tudloi ako sa pagbuhat sa imong kabubut-on.” Kana mao unya ang tinuig nga teksto sa 1997. Kanang mga pulonga, nga dayag ipakita sa mga Kingdom Hall, magsilbing usa ka pahinumdom nga ang usa ka talagsaong dapit sa pagdawat ug diyosnong edukasyon maoy diha sa mga tigom sa kongregasyon, diin kita makapakig-ambit sa nagpadayong programa sa pagtudlo. Sa dihang makig-uban sa atong mga igsoon sa mga tigom aron tudloan sa atong Dakong Instruktor, kita mahimong mobati sama sa gibati sa salmista, nga misulat: “Nalipay ako sa pag-ingon nila kanako: ‘Mangadto kita sa balay ni Jehova.’”—Salmo 122:1; Isaias 30:20.
6. Diha sa mga pulong ni David, unsay angay natong dawaton?
6 Oo, kita nagtinguha nga matudloan sa pagbuhat sa kabubut-on sa Diyos imbes sa kabubut-on sa atong kaaway ang Yawa o sa kabubut-on sa dili-hingpit nga mga tawo. Busa, sama kang David, ginadawat nato ang Diyos nga atong ginasimba ug ginaalagaran: “Kay ikaw mao ang akong Diyos. Ang imong espiritu maoy maayo; hinaot kini motultol kanako sa dalan sa pagkamatarong.” (Salmo 143:10) Imbes tinguhaon nga makig-uban sa mga tawong dili-matinud-anon, gusto ni David sa dapit diin gibuhat ang pagsimba kang Jehova. (Salmo 26:4-6) Tungod sa espiritu sa Diyos nga nagtultol sa iyang mga lakang, si David nakalakaw diha sa mga dalan sa pagkamatarong.—Salmo 17:5; 23:3.
7. Sa unsang paagi naglihok ang espiritu sa Diyos diha sa Kristohanong kongregasyon?
7 Ang Dakong David, si Jesu-Kristo, nagpasalig sa mga apostol nga ang balaang espiritu magtudlo kanila sa tanang butang ug magpahinumdom kanila sa tanang butang nga gisulti niya kanila. (Juan 14:26) Gikan sa Pentekostes padayon, si Jehova progresibong nagbutyag sa “lawom nga mga butang sa Diyos” nga nasulod diha sa iyang nasulat nga Pulong. (1 Corinto 2:10-13) Kini gibuhat niya pinaagi sa makitang agianan nga gitawag ni Jesus “ang kasaligan ug mabuot nga ulipon.” Kini nagtagana ug espirituwal nga pagkaon nga ginahisgotan diha sa programa sa pagtudlo sa mga kongregasyon sa katawhan sa Diyos sa tibuok-yuta.—Mateo 24:45-47.
Gitudloan sa Kabubut-on ni Jehova Diha sa Atong mga Tigom
8. Nganong ang pagpakig-ambit sa Pagtuon sa Bantayanang Torre hinungdanon kaayo?
8 Ang materyal sa senemanang Pagtuon sa Bantayanang Torre sa kongregasyon subsob nga naghisgot sa pagpadapat sa mga prinsipyo sa Bibliya. Kini tinong motabang kanato sa pagsagubang sa mga kabalaka sa kinabuhi. Sa ubang mga pagtuon ang lalom espirituwal nga mga kamatuoran o mga tagna sa Bibliya ginahisgotan. Pagkadaghan gayod sa gitudlo kanato sa maong mga pagtuon! Sa daghang kayutaan ang mga Kingdom Hall puno sa mga tumatambong sa panahon niini nga mga tigom. Bisan pa sa ubay-ubayng mga nasod, mius-os ang mga tumatambong sa tigom. Sa imong hunahuna, unsa kahay hinungdan? Lagmit bang gitugotan sa uban ang sekular nga trabaho nga mobabag sa ilang hiniusang pagtambong nga regular “sa pagpasibot sa paghigugma ug sa maayong mga buhat”? O basin kaha daghang oras ang gigugol sa sosyal nga mga kalihokan o sa pagtan-aw ug telebisyon, nga naghimong puliki kaayo sa ilang eskedyul nga makatambong sa tanang tigom? Hinumdomi ang dinasig nga sugo sa Hebreohanon 10:23-25. Dili ba ang hiniusang panagkatigom alang sa diyosnong instruksiyon labi pang hinungdanon karon samtang atong “nakita nga ang adlaw nagakaduol na”?
9. (a) Sa unsang paagi ang Tigom sa Pag-alagad nagsangkap kanato sa ministeryo? (b) Unsay angay natong tinamdan bahin sa pagpanaksi?
9 Usa sa atong labing dagkong mga kaakohan mao ang pag-alagad ingong mga ministro sa Diyos. Ang Tigom sa Pag-alagad gidisenyo sa pagtudlo kanato kon sa unsang paagi matuman nato kini nga epektibo. Kita makakat-on kon unsaon pagduol sa mga tawo, kon unsay isulti, ang reaksiyon kon adunay paborableng pagsanong, ug bisan sa kon unsay himoon sa dihang isalikway sa mga tawo ang atong mensahe. (Lucas 10:1-11) Samtang gihisgotan ug gipasundayag ang epektibong mga paagi niining senemanang tigom, kita nasangkapan ug maayo sa pag-abot sa mga tawo dili lamang sa dihang nagaadto sa balay ug balay kondili usab sa dihang nagasangyaw sa kadalanan, sa mga parkingan, sa nagsakay ug publikong transportasyon, sa mga landingan, sa mga dapit komersiyal, o sa mga tunghaan. Nahiuyon sa atong hangyo, “Tudloi ako sa pagbuhat sa imong kabubut-on,” buot natong pahimuslan ang matag higayon sa pagbuhat ingon sa giawhag sa atong Agalon: ‘Palamdaga ang inyong kahayag atubangan sa mga tawo, aron sila . . . makahatag ug himaya sa inyong Amahan nga anaa sa mga langit.’—Mateo 5:16.
10. Sa unsang paagi matabangan gayod nato ang ‘mga takos’?
10 Sa maong mga tigom sa kongregasyon, kita gitudloan usab sa paghimog mga tinun-an sa uban. Sa dihang makita ang interes o makapahimutang ug literatura, ang atong tumong sa pagbalik duaw mao ang pagsugod ug mga pagtuon sa Bibliya sa balay. Sa diwa, kini susama sa ‘pag-estar uban sa mga takos’ sa mga tinun-an aron magtudlo kanila sa mga butang nga gisugo ni Jesus. (Mateo 10:11; 28:19, 20) Kay nakabaton sa ekselenteng mga tabang, sama sa librong Kahibalo nga Motultol sa Kinabuhing Walay Kataposan, kita gayod nasangkapan pag-ayo sa pagtuman nga bug-os sa atong ministeryo. (2 Timoteo 4:5) Matag semana samtang motambong ka sa Tigom sa Pag-alagad ug sa Tunghaan sa Teokratikanhong Ministeryo, paningkamoti nga masabtan ug dayon gamiton ang makatabang nga mga punto nga morekomendar kanimo ingong usa sa igong kuwalipikadong mga ministro sa Diyos, nga nagatuman sa iyang kabubut-on.—2 Corinto 3:3, 5; 4:1, 2.
11. Sa unsang paagi gipasundayag sa uban ang pagtuo diha sa mga pulong nga makita sa Mateo 6:33?
11 Kabubut-on sa Diyos nga kita ‘magpadayon sa pagpangita pag-una sa gingharian ug sa iyang pagkamatarong.’ (Mateo 6:33) Suknaa ang imong kaugalingon, ‘Sa unsang paagi ikapadapat ko kini nga prinsipyo kon ang gipangayo sa akong [o sa akong kapikas nga] sekular nga trabaho mobabag sa pagtambong sa tigom?’ Daghang hamtong sa espirituwal ang mihimog mga lakang sa pagpakigsulti sa ilang mga amo bahin niana. Usa ka bug-os panahong ministro naghangyo sa iyang amo nga nagkinahanglan siya ug panahon nga walay trabaho matag semana aron makatambong sa mga tigom sa kongregasyon. Ang amo miuyon sa hangyo. Apan kay buot masayod kon unsay nagkahitabo sa mga tigom, siya mihangyo nga motambong. Didto siya nakadungog ug pahibalo bahin sa umaabot nga distritong kombensiyon. Tungod niini, gihikay sa amo ang pagtambong sa tibuok adlaw sa kombensiyon. Unsang leksiyon ang makuha nimo gikan niini nga pananglitan?
Gitudloan sa Kabubut-on sa Diyos Pinaagi sa Diyosnong mga Ginikanan
12. Aron ang kabataan matudloan sa kabubut-on ni Jehova, unsay angayng himoon sa Kristohanong mga ginikanan nga may pailob ug kalig-on?
12 Apan ang mga tigom sa kongregasyon ug mga kombensiyon dili mao lamang ang tagana aron matudloan sa pagbuhat sa kabubut-on sa Diyos. Ang diyosnong mga ginikanan gisugo sa pagbansay, pagdisiplina, ug pagmatuto sa ilang mga anak sa pagdayeg kang Jehova ug sa pagbuhat sa iyang kabubut-on. (Salmo 148:12, 13; Proverbio 22:6, 15) Ang pagbuhat niana magkinahanglan nga dalhon nato ang atong “mga gagmayng bata” sa mga tigom diin sila ‘makapamati ug makakat-on,’ apan komosta ang pagtudlo kanila sa balaang mga sinulat diha sa balay? (Deuteronomio 31:12; 2 Timoteo 3:15) Daghang pamilya ang mahunahunaong nagsugod sa mga programa sa regular nga pagtuon sa Bibliya sa pamilya, nga nagtugot lamang niini nga mapasagdan o dili mapadayon. Ingon ba niana ang imong kasinatian? Mohinapos ka bang ang rekomendasyon sa pagbatog regular nga pagtuon di-tukma o nga ang imong pamilya lahi kaayo nga kini dili mosaler sa imong kahimtang? Bisan unsa ang kahimtang, kamong mga ginikanan palihog sublia ang maayong mga artikulong “Among Dagayang Espirituwal nga Kabilin” ug “Ang mga Ganti sa Pagkamalahutayon” diha sa Ang Bantayanang Torre sa Agosto 1, 1995.
13. Sa unsang paagi makabenepisyo ang mga pamilya sa paghisgot sa inadlaw nga teksto?
13 Ang mga pamilya gidasig nga himoong batasan ang paghisgot sa inadlaw nga teksto gikan sa Pagsusi sa Kasulatan sa Adlaw-Adlaw. Ang pagbasa lamang sa teksto ug mga komento maayo na, apan ang paghisgot sa teksto ug pagpadapat niana labi pang mapuslanon. Pananglitan, kon hisgotan ang Efeso 5:15-17, ang mga membro sa pamilya makapangatarongan kon sa unsang paagi “magapalit sa nahiangayng panahon” alang sa personal nga pagtuon, sa pagpakig-ambit sa usa ka porma sa bug-os panahong ministeryo, ug sa pag-atiman sa ubang teokratikanhong mga asaynment. Oo, ang usa ka panaghisgot sa pamilya sa inadlaw nga teksto motultol sa usa o sa daghan nga ‘magpadayon sa pagsabot [sa bug-os] kon unsa ang kabubut-on ni Jehova.’
14. Angay unsang matang sa mga magtutudlo ang mga ginikanan sumala sa gipakita sa Deuteronomio 6:6, 7, nga nagkinahanglan sa unsa?
14 Ang mga ginikanan kinahanglang mahimong masibotong mga magtutudlo sa ilang mga anak. (Deuteronomio 6:6, 7) Apan dili lamang kini yanong pagmaymay o pagsugo sa ilang mga anak. Ang amahan ug inahan nagkinahanglan usab nga mamati, aron mahibalog maayo kon unsa ang gikinahanglang pagabatbaton, ipatin-aw, iilustrar, o sublion. Sa usa ka Kristohanong pamilya, ang mga ginikanan nag-awhag sa libreng komunikasyon pinaagi sa pagdasig sa ilang mga anak sa pagsukna ug mga pangutana bahin sa mga butang nga wala nila hisabti o nagpahinabog kabalaka. Sa ingon nasayran nilang ang tin-edyer nga anak nga lalaki naglisod sa pagsabot nga si Jehova walay sinugdanan. Ang mga ginikanan nakagamit sa impormasyon gikan sa mga publikasyon sa Watch Tower Society nga nagpakitang ang panahon ug wanang gidawat ingong walay kataposan. Kana nag-ilustrar sa punto, ug kini nakatagbaw sa ilang anak nga lalaki. Busa gahinig panahon ang pagtubag nga tin-aw ug gikan sa Kasulatan ang mga pangutana sa imong mga anak, nagatabang kanila nga makitang ang pagkakat-on sa pagbuhat sa kabubut-on sa Diyos makapatagbaw kaayo. Unsa pay ginatudlo sa katawhan sa Diyos—bata ug tigulang—karong adlawa?
Gitudloan sa Paghigugma ug sa Pagpakig-away
15. Kanus-a mahimong masulayan ang pagkatinuod sa atong inigsoong gugma?
15 Uyon sa bag-ong sugo ni Jesus, kita “gitudloan sa Diyos sa paghigugma sa usag usa.” (1 Tesalonica 4:9) Kon malinawon ug maayo ang lakat sa mga butang, mahimong mobati kita nga gihigugma nato ang tanan natong mga igsoon. Apan unsay mahitabo kon mobangon ang personal nga mga kasungian o kita masilo tungod sa gisulti o gibuhat sa laing Kristohanon? Niining puntoha masulayan ang pagkatinuod sa atong gugma. (Itandi ang 2 Corinto 8:8.) Unsay gitudlo sa Bibliya nga atong buhaton sa ingon niana nga mga kahimtang? Usa ka butang mao ang pagpaningkamot nga ipakita ang gugma sa bug-os. (1 Pedro 4:8) Imbes maglantaw sa atong kaugalingong mga interes, masuko sa gagmayng mga kasaypanan, o magdumot, kita angayng maningkamot nga tugotan ang gugma sa pagtabon sa daghang kasal-anan. (1 Corinto 13:5) Nahibalo kita nga mao kini ang kabubut-on sa Diyos, kay kini ang ginatudlo sa iyang Pulong.
16. (a) Unsang matanga sa pagpakig-away nga ang mga Kristohanon gitudloang makigbahin? (b) Sa unsang paagi kita nasangkapan?
16 Samtang daghan ang dili maglangkit sa gugma ug pagpakig-away, ang ulahi maoy laing butang nga ginatudlo kanato, apan usa ka lahing matang sa pagpakig-away. Giila ni David ang iyang pag-agad kang Jehova sa pagtudlo kaniya kon unsaon pagpakig-away, bisag sa iyang panahon kana naglakip sa literal nga pagpakig-away batok sa mga kaaway sa Israel. (1 Samuel 17:45-51; 19:8; 1 Hari 5:3; Salmo 144:1) Komosta ang atong pagpakig-away karon? Ang atong mga hinagiban dili unodnon. (2 Corinto 10:4) Ang atong pagpakig-away maoy espirituwal, tungod niana kita kinahanglang masangkapan sa espirituwal nga hinagiban. (Efeso 6:10-13) Pinaagi sa iyang Pulong ug sa iyang nagkatigom nga katawhan, si Jehova nagatudlo kanato nga malamposong isangka ang espirituwal nga pagpakig-away.
17. (a) Unsang mga taktika ang gigamit sa Yawa sa pagpasimang kanato? (b) Sa pagkamaalamon unsay angay natong likayan?
17 Sa malimbongon, malansisong mga paagi, subsob nga gamiton sa Yawa ang mga elemento sa kalibotan, mga apostata, ug ubang mga magsusupak sa kamatuoran sa pagpaningkamot sa pagpasimang kanato sa dili hinungdanong mga isyu. (1 Timoteo 6:3-5, 11; Tito 3:9-11) Ingon sa daw iyang nakita nga siya walay higayon sa pagbuntog kanato pinaagig direkta, inatubangay nga pag-atake, busa siya naningkamot sa pagpandol kanato pinaagi sa pag-agda kanato nga ipahayag ang atong mga reklamo ug binuang nga mga pangutana, nga walay espirituwal nga bili. Ingong mabinantayong mga manggugubat, angay kitang magmaalisto sa maong mga kapeligrohan sama sa atong himoon sa inatubangay nga mga pag-atake.—1 Timoteo 1:3, 4.
18. Unsay nalangkit gayod sa pagkinabuhi nga dili alang sa atong kaugalingon?
18 Wala nato ipasiugda ang mga tinguha sa mga tawo o ang kabubut-on sa mga nasod. Gitudloan kita ni Jehova pinaagi sa panig-ingnan ni Jesus nga kinahanglang magkinabuhi kita dili lamang alang sa atong kaugalingon; hinunoa, kita angayng masangkapan uban sa samang tinamdan sa pangisip nga diha kang Kristo Jesus ug magkinabuhi alang sa kabubut-on sa Diyos. (2 Corinto 5:14, 15) Sa miagi, kita tingali nagkinabuhi sa hinobra, mapatuyangong kinabuhi, nga nag-usik-usik sa bililhong panahon. Ang mga hudyaka, mga palabwanayg inom, ug imoralidad nagpaila niining tuman ka daotang kalibotan. Karon nga kita ginatudloan sa pagbuhat sa kabubut-on sa Diyos, dili ba kita mapasalamaton nga mahimulag niining dunot nga kalibotan? Busa atong isangka ang maayong pagpakig-away sa espirituwal aron dili malangkit sa makapahugaw nga mga buhat sa kalibotan.—1 Pedro 4:1-3.
Nagtudlo Kanato Aron Makabenepisyo sa Atong Kaugalingon
19. Ang pagkanatudloan sa kabubut-on ni Jehova ug dayon ang pagbuhat niana motultol ngadto sa unsang mga kaayohan?
19 Kinahanglang ilhon nga ang pagkanatudloan sa pagbuhat sa kabubut-on ni Jehova makabenepisyo kanato ug dako. Hisabtan, kinahanglang buhaton nato ang atong bahin pinaagi sa pagpamati ug maayo aron makat-onan ug dayon masundan ang mga instruksiyon nga moabot kanato pinaagi sa iyang Anak ingon man pinaagi sa iyang Pulong ug nagkatigom nga katawhan. (Isaias 48:17, 18; Hebreohanon 2:1) Sa atong pagbuhat niana, kita madasig sa pagbarog nga malig-on niining makuyaw nga mga panahon ug sa pagsugakod sa unahan. (Mateo 7:24-27) Bisan karon, kita magapahimuot sa Diyos pinaagi sa pagbuhat sa iyang kabubut-on ug makapaneguro nga matubag ang atong mga pag-ampo. (Juan 9:31; 1 Juan 3:22) Ug atong matagamtam ang tiunay nga kalipay.—Juan 13:17.
20. Unsa ang maayo nga pamalandongon inigkakita nimo sa tinuig nga teksto sa tibuok tuig sa 1997?
20 Sulod sa 1997, kita sa subsob may higayon sa pagbasa ug paghisgot sa tinuig nga teksto, sa Salmo 143:10: “Tudloi ako sa pagbuhat sa imong kabubut-on.” Samtang buhaton nato kini, atong gamiton ang pipila sa mga okasyon sa pagpalandong sa mga tagana nga gihimo sa Diyos aron kita matudloan, ingon sa gipakita sa itaas. Ug gamiton nato ang pagpamalandong nianang mga pulonga ingong usa ka panukmod sa paglihok nga mapinadayonon niana nga pangaliyupo, kay nasayod nga “siya nga nagabuhat sa kabubut-on sa Diyos magapabilin hangtod sa hangtod.”—1 Juan 2:17.
Unsaon Nimo Pagtubag?
◻ Kinsa karong adlawa ang ginatudloan sa pagbuhat sa kabubut-on ni Jehova?
◻ Sa unsang paagi makaapektar kanato ang Salmo 143:10 sulod sa 1997?
◻ Sa unsang paagi kita ginatudloan sa pagbuhat sa kabubut-on ni Jehova?
◻ Unsay gikinahanglan sa Kristohanong mga ginikanan sa pagtudlo sa ilang kabataan?