Kon Unsay Ikatudlo Kanato sa mga Linalang nga “Kinaiyanhong Maalamon”

ANG pagpabugnaw sa hangin, ang kontra-pabagtok, ang pagkuha sa asin sa parat nga tubig, ug ang sonar maoy mga imbensiyong kaylap nga nahibaloan sa katawhan sa ika-20ng siglo. Apan, kini naglungtad sa kalibotan sa mga hayop sa nangaging kaliboan na ka tuig. Oo, ang katawhan makabatog kaayohan pinaagi sa pagtuon niining mga linalang nga “kinaiyanhong maalamon.” (Proverbio 30:24-28; Job 12:7-9) Ang pipila ka hayop, daw, nahimong dili-manulting mga magtutudlo sa katawhan, ug makita nato nga makaiikag kaayo ang pagsusi niini.

Makabaton ba kitag kaayohan gikan sa pagtagad sa mga kinaiya sa pipila ka hayop? Aw, gipakasama ni Jesu-Kristo ang iyang mga sumusunod sa mga karnero, mga halas, mga salampati, ug bisan sa mga dulon. Unsay anaa sa iyang hunahuna sa dihang gipakasama niya ang iyang mga alagad niini nga mga linalang? Atong tan-awon.

“Ang Akong mga Karnero Nagapamati sa Akong Tingog”

Ang mga karnero gihisgotan sa Bibliya kapin sa 200 ka beses. Ingon sa gipatin-aw sa Smith’s Bible Dictionary, “ang mga karnero maoy simbolo sa kaaghop, pailob, ug pagpasakop.” Sa Isaias kapitulo 53, si Jesus mismo matagnaong gipakasama sa usa ka karnero. Pagkahaom nga gitandi niya ang iyang mga sumusunod sa mao ra nga hayop! Apan unsang partikular nga mga kinaiya sa mga karnero ang anaa sa hunahuna ni Jesus?

“Ang akong mga karnero nagapamati sa akong tingog, ug ako nakaila kanila, ug sila nagasunod kanako,” nag-ingon si Jesus. (Juan 10:27) Busa gipasiugda niya ang kaaghop sa iyang mga tinun-an ug sa ilang kaandam sa pagsunod kaniya. Ang literal nga mga karnero mamati sa ilang magbalantay ug andam sa pagsunod kaniya. Ang magbalantay usab suod kaayo sa panon.

Ang panon tingali nagkatag diha sa kapatagan samtang nagapanibsib, apan ang matag karnero padayong nakig-uban sa panon sa katibuk-an. Busa, kon bation sa mga hayop nga nameligro o nahadlok, “sila dalidali nga magtipon,” nag-ingon ang basahong Alles für das Schaf (Ang Tanang Butang Alang sa mga Karnero). Kon modagan ang mga karnero sa pag-ikyas sa peligro, himoon nila kini ingong usa ka panon, nga mohunong sa matag panahon sa pagtimbangtimbang sa kahimtang. “Ang pag-ikyas nga anam-anam magtugot sa mga nating karnero ug luyahong mga hayop nga makaapas. Ang panon makahatag gani kanila ug linaing proteksiyon.” Unsay atong makat-onan niining kinaiyaha?

Ang matuod nga mga Kristohanon karon wala makatag taliwala sa mga denominasyon ug sa mga sekta sa Kakristiyanohan. Hinunoa, sila natipon sa usa ka panon. Bation sa matag Kristohanon ang personal suod nga relasyon ngadto niining panon sa Diyos, ug kini nakaamot sa panaghiusa sa organisasyon sa mga Saksi ni Jehova. Sa dihang may motunghang krisis​—grabeng sakit man kini, panaggubat, o kinaiyanhong katalagman​—asa pangitaon sa matag magsisimba ang paggiya ug proteksiyon? Sa organisasyon ni Jehova, nga nagtanyag ug espirituwal nga kasegurohan.

Sa unsang paagi mabatonan ang tambag sa Bibliya? Pinaagi sa mga publikasyon sama sa Ang Bantayanang Torre ug ang kauban niining basahon, ang Pagmata! Kining mga magasina ug ang Kristohanong mga tigom nagtanyag pa ug linaing tabang alang niadtong kinsa nagkinahanglan ug ekstrang pag-atiman, sama sa mga nati ug luyahong mga karnero diha sa panon. Pananglitan, ang pagtagad ginahatag sa nag-inusarang mga ginikanan ug niadtong nag-antos sa depresyon. Busa, pagkamaalamon gayod nga basahon ang matag magasin, motambong sa matag tigom sa kongregasyon, ug ipadapat ang atong makat-onan! Sa ingon atong ginapakita ang kaaghop ug ang suod kaayo nga relasyon sa panon sa Diyos.​—1 Pedro 5:2.

“Mabinantayon Ingon sa mga Halas Apan Inosente Ingon sa mga Salampati”

Ang Smith’s Bible Dictionary nag-ingon: “Sa tibuok Sidlakan ang halas gigamit ingong simbolo sa daotang prinsipyo, sa espiritu sa pagkamalinapason.” Sa laing bahin, ang “akong salampati” maoy usa ka termino sa pagmahal. (Awit ni Solomon 5:2) Nan, unsay anaa sa hunahuna ni Jesus sa dihang iyang gidasig ang iyang mga sumusunod nga mahimong “mabinantayon ingon sa mga halas apan inosente ingon sa mga salampati”?​—Mateo 10:16.

Si Jesus naghatag ug mga instruksiyon sa pagsangyaw ug sa pagpanudlo. Ang iyang mga tinun-an makadahom ug nagkalainlaing reaksiyon. Ang pipila magpakitag interes, samtang ang uban modumili sa maayong balita. Lutoson pa gani sa uban kining matuod nga mga alagad sa Diyos. (Mateo 10:17-23) Sa unsang paagi mosanong ang mga tinun-an sa paglutos?

Sa Das Evangelium des Matthäus (Ang Ebanghelyo ni Mateo), si Fritz Rienecker nag-ingon mahitungod sa Mateo 10:16: “Ang kaigmat . . . kinahanglang ubanan sa integridad, katim-os, ug kaprangka, kon ugaling may mahitabo nga maghatag sa mga kaaway ug katarongan sa pagreklamo. Ang mga embahador ni Jesus anaa taliwala sa mabangis nga mga kaaway, nga walay konsiderasyon ug kinsa nagaatake sa mga apostol nga walay kokaluoy ug sa kinagamyang higayon. Busa, kinahanglang​—sama sa halas​—magbantay batok sa mga kaaway, ug timbangtimbangon ang kahimtang uban ang alerto nga mga mata ug mga sentido; nga kontrolado ang situwasyon nga walay paglansis o paglimbong, nga magmaputli ug tinuod sa pulong ug buhat ug busa nagpamatuod sa ilang kaugalingon nga samag salampati.”

Unsay makat-onan sa modernong-adlawng mga alagad sa Diyos gikan sa mga pulong ni Jesus nga makita sa Mateo 10:16? Karon, ang mga tawo nagasanong sa maayong balita ingon gayod sa ilang pagsanong niadto sa unang siglo. Sa dihang nag-atubang sa paglutos, kinahanglang usahon sa matuod nga mga Kristohanon ang kaigmat sa halas ug ang kaputli sa salampati. Dili gayod mogamit ang mga Kristohanon ug panglimbong o pagkadili-matinud-anon apan mahinlo, tiunay, ug matinud-anon sa pagmantala sa mensahe sa Gingharian ngadto sa uban.

Sa pag-ilustrar: Ang mga kauban sa trabaho, mga batan-on sa tunghaan, o bisan ang mga membro sa imong pamilya tingali mokomentog dili maayo bahin sa imong mga pagtuo ingong usa ka Saksi ni Jehova. Ang dihadiha nga reaksiyon tingali mao ang pagbalos ug samang mahait nga komento mahitungod sa ilang pagtuo. Apan kana ba inosente? Dili gayod. Kon imong ipakita sa imong mga kritiko nga walay epekto ang ilang mga komento diha sa imong maayong pamatasan, sila lagmit mag-usab alang sa ikaayo. Ikaw sa ingon nahimong maigmat ug walay-ikasaway​—‘mabinantayon ingon sa usa ka halas, bisan pa inosente ingon sa usa ka salampati.’

“Ang Dagway sa mga Dulon Maorag mga Kabayo nga Andam Alang sa Gubat”

Ang magasing GEO nagtaho nga sa 1784, ang Habagatang Aprika naigo sa “kinadak-ang duot [sa mga dulon] nga sukad natala sa kasaysayan.” Gihugpaan sa duot ang 5,200 kilometros kuwadrado nga lugar, nga duolan sa lima ka beses ang gidak-on sa Hong Kong. Ang Smith’s Bible Dictionary nag-ingon nga ang mga dulon “nakahimog grabe kaayong kadaot sa pananom sa mga nasod nga giduaw niini.”

Sa iyang hinatag-sa-Diyos nga pagpadayag sa mga butang nga mahitabo sa panahon “sa adlaw sa Ginoo,” gigamit ni Jesus ang usa ka panan-awon sa duot sa mga dulon. Mahitungod niini kini gikaingon: “Ang dagway sa mga dulon maorag mga kabayo nga andam alang sa gubat.” (Pinadayag 11, 10; 9:3-7) Unsay kahulogan niini nga simbolismo?

Ang mga Saksi ni Jehova dugay nang nakasabot nga ang mga dulon sa Pinadayag kapitulo 9 naghulagway sa dinihogang mga alagad sa Diyos sa yuta niining sigloha.a Kini nga mga Kristohanon gitudlo sa usa ka partikular nga trabaho​—sa pagsangyaw sa mensahe sa Gingharian sa tibuok yuta ug sa paghimog mga tinun-an. (Mateo 24:14; 28:19, 20) Kini nagkinahanglan alang kanila sa pagbuntog sa mga babag ug sa paglahutay sa ilang buluhaton. Unsa pay labing maayong ikailustrar niini gawas sa lisod-buntogon nga mga dulon?

Bisag kapin lamang ug lima ka sentimetros ang gitas-on, ang dulon sagad makabiyaheg tali sa 100 ug 200 kilometros sa usa ka adlaw. Ang dulon sa disyerto makabiyahe pa hangtod sa 1,000 kilometros. Ang GEO nagbatbat nga “ang mga pako niini mokapakapa sa 18 ka beses sa usa ka segundo ug hangtod sa 17 ka oras sa usa ka adlaw​—usa ka butang nga walay laing insekto ang makahimo.” Pagkadakong trabaho alang sa maong gaming nga linalang!

Ingong usa ka grupo, ang mga Saksi ni Jehova madasigon sa pagpakaylap sa maayong balita sa Gingharian. Sila karon nagasangyaw na sa kapin sa 230 ka kayutaan. Kini nga mga alagad sa Diyos nagabuntog sa daghang kalisod aron makaambit sa pagtuman sa buluhaton. Unsang matanga sa problema ang ilang ginaatubang? Ang pagpihig, legal nga mga pagdili, sakit, pagkawala sa kadasig, ug pagsupak gikan sa mga paryente maoy pipila lamang. Apan walay nakapahunong sa ilang pag-uswag. Sila malahutayon sa ilang hinatag-sa-Diyos nga buluhaton.

Padayon sa Pagpakita sa Kristohanong mga Hiyas

Oo, gipakasama ni Jesus ang iyang mga sumusunod sa mga karnero, mga halas, mga salampati, ug mga dulon. Kini haom gayod sa atong adlaw. Ngano man? Tungod kay ang kataposan niining sistemaha sa mga butang haduol na, ug ang mga problema labaw pang nagakalisod sukad.

Sa paghinumdom sa mahulagwayong mga pulong ni Jesus, ang matuod nga mga Kristohanon nagpabilin gayod nga suod sa panon sa Diyos ug sa kaaghop nagadawat ug tambag gikan sa organisasyon ni Jehova. Sila padayong nagabantay ug alerto sa mga situwasyon nga makababag sa ilang Kristohanong mga kalihokan, samtang sila nagpabiling walay-ikasaway sa tanang butang. Dugang pa, sila nagalahutay sa pagbuhat sa kabubut-on sa Diyos atubangan sa mga kababagan. Ug sila nagpadayon sa pagkakat-on gikan sa pipila ka mga linalang nga “kinaiyanhong maalamon.”

[Footnote]