Unsa ka Bililhon ang Imong Kinabuhi?

BISAN tuod dili maihap ang kinabuhi nga nakalas sa Uropa panahon sa Gubat sa Kalibotan I, ang makapahibulong nga mga paningkamot gihimo sa pagluwas ug mga kinabuhi sa Antarctica. Ang Anglo-Irish nga eksplorador nga si Ernest Shackleton ug ang iyang mga tripulante nakaagom ug katalagman sa dihang ang ilang barko, ang Endurance, nabangga ug nalunod tungod sa nagtipun-og nga yelo. Nakaarang si Shackleton sa pagdala sa iyang mga tawo ngadto sa medyo luwas nga dapit—sa Elephant Island sa South Atlantic Ocean. Apan nag-atubang gihapon silag grabeng kapeligrohan.

Naamgohan ni Shackleton nga ang ilang bugtong paglaom sa kaluwasan mao ang pagpadalag mga tawo aron magpatabang gikan sa estasyon sa pagpamalyena sa isla sa South Georgia. Kadto maoy 1,100 ka kilometro ang kalay-on, ug diha lamang siyay 6.7- metros nga bote nga iyang nasalbar gikan sa Endurance. Makuyaw ang ilang kahimtang.

Apan, niadtong Mayo 10, 1916, human ang 17 ka mapait nga mga adlaw, si Shackleton ug ang lima sa iyang mga tawo nakaabot ra gayod sa South Georgia. Apan tungod sa teribleng mga kahimtang sa dagat, napugos sila sa pagdunggo diha sa pikas nga bahin sa isla. Kinahanglang mobaktas silag 30 kilometros diha sa wala nila hisayri ug nalimin-sa-niyebe nga kabukiran aron sila makaabot sa ilang kataposang destinasyon. Bisan pa sa tanang kalisdanan—diha sa grabeng katugnaw ug walay igong mga kahimanan sa pagkatkat sa bukid—si Shackleton ug ang iyang mga kauban nakadangat ra gayod sa ilang destinasyon, ug sa kataposan iyang naluwas ang tanan niyang natanggong nga mga tawo. Nganong naghago man pag-ayo si Shackleton? “Ang iyang tumong,” misulat ang biograpo nga si Roland Huntford, mao “ang pagkuha sa tanan niyang mga tawo nga buhi.”

“Walay Usa Kanila ang Nawala”

Unsay nakaluwas sa mga tawo ni Shackleton gikan sa bug-os nga pagkadesperado samtang sila nagtapok ug naghulat diha sa usa lamang ka “bugnaw ug lisod sudlon nga tipak sa bato ug yelo nga 30 kilometros ang kalapdon”? Ang ilang pagsalig nga ang ilang lider motuman sa iyang saad sa pagluwas kanila.

Ang katawhan karon nahisama gayod niadtong mga lalaki nga napadpad sa Elephant Island. Daghan ang nagkinabuhi ubos sa di-mahubit nga mga kalisdanan ug nanlimbasog pag-ayo aron lamang mabuhi. Apan sila makasalig sa bug-os nga ang Diyos ‘magluwas sa sinakit’ gikan sa pagpanglupig ug kagul-anan. (Job 36:15) Magmasaligon nga giisip sa Diyos nga bililhon ang kinabuhi sa tanang tawo. “Tawga ako sa adlaw sa kasakitan,” nag-ingon si Jehova nga Diyos, ang Maglalalang, ug “pagaluwason ko ikaw.”—Salmo 50:15.

Malisdan ka ba sa pagtuo nga ang Maglalalang nag-isip kanimo nga bililhon sa personal, bisan tuod ikaw usa lamang ka indibiduwal taliwala sa bilyonbilyong tawo sa yuta? Nan matikdi ang gisulat ni propetang Isaias bahin sa bilyonbilyong bituon diha sa bilyonbilyong galaksiya sa halapad nga uniberso sa atong palibot. Atong mabasa: “Iyahat ang inyong mga mata sa itaas ug tan-awa. Kinsay naglalang niining mga butanga? Mao ang Usa nga nagpatungha sa ilang panon nga hilabihan ka daghan, siya nagtawag kanilang tanan pinaagi sa ngalan. Gumikan sa kadagaya sa dinamikong kusog, kay siya usab mabaskog sa gahom, walay usa kanila ang nawala.”—Isaias 40:26.

Nasabtan ba nimo kon unsay ipasabot niana? Ang atong Milky Way nga galaksiya, diin ang atong solar nga sistema maoy bahin lamang niana—adunay labing menos 100 ka bilyong bituon. Ug unsa ba ka daghan ang galaksiya? Walay usang makatino, apan ang pipila ka pagbanabana nag-ingon nga adunay 125 ka bilyon. Puwerteng daghanang bituon kon mao! Apan ang Bibliya nagsugilon kanato nga ang Maglalalang sa uniberso nahibalo sa ngalan sa tagsatagsa ka bituon.

“Ang Mismong mga Buhok sa Inyong Ulo Naihap ang Tanan”

Ang usa tingali mosupak, ‘apan ang pagkahibalo lamang sa mga ngalan sa bilyonbilyong bituon o bilyonbilyong tawo wala magpasabot nga siya mahingawa sa matag usa kanila.’ Ang usa ka kompiyuter nga may igong memorya makatala sa mga ngalan sa bilyonbilyong tawo. Apan, walay usang makaingon nga ang kompiyuter mahingawa sa matag usa kanila. Apan gipakita sa Bibliya nga si Jehova nga Diyos wala lamang mahibalo sa mga ngalan sa bilyonbilyong tawo, kondili siya usab nahingawa kanila ingong mga indibiduwal. “Itugyan kaniya ang tanan ninyong mga kabalaka,” misulat si apostol Pedro, “kay siya may kahingawa kaninyo.”—1 Pedro 5:7.

Si Jesu-Kristo miingon: “Dili ba ang duha ka goryon ikabaligya man sa usa ka sensilyo nga gamay ug bili? Bisan pa niana, walay usa kanila ang mahulog sa yuta nga dili mahibaloan sa inyong Amahan. Apan ang mismong mga buhok sa inyong ulo naihap ang tanan. Busa ayaw kamo kahadlok: kamo labaw pag bili kay sa daghang goryon.” (Mateo 10:29-31) Matikdi nga si Jesus wala mag-ingon nga ang Diyos nakamatikod lamang sa nahitabo sa mga goryon ug sa mga tawo. Siya miingon: “Kamo labaw pag bili kay sa daghang goryon.” Nganong ikaw labaw pag bili? Kay ikaw gihimo “sa larawan sa Diyos”—nga may katakos sa pag-ugmad ug pagpadayag sa moral, intelektuwal, ug espirituwal nga mga hiyas nga magbanaag sa hataas nga mga hiyas sa Diyos.—Genesis 1:26, 27.

“Sangpotanan sa Intelihenteng Kalihokan”

Ayaw pagpahisalaag sa mga tawong mamugos nga kuno walay Maglalalang. Matod nila nga ang walay-salabotan, walay-personalidad nga mga puwersa sa kinaiyahan maoy naghimo kanimo. Sila moingon nga halayo sa pagkahimong gilalang sa “larawan sa Diyos,” ikaw kuno walay kalainan sa tanang ubang mananap niining planetaha—lakip na sa mga goryon.

Para nimo makataronganon ba nga ang kinabuhi sulagma lamang nga mitungha o tungod sa walay-salabotan nga puwersa? Matod pa sa biologo sa molekula nga si Michael J. Behe, ang “hilabihan ka komplikadong biokemikal nga mga proseso” nga naggahom sa kinabuhi maoy nakapahimo nianang ideyaha nga dili gayod makataronganon. Ang ebidensiya sa biokemistriya, siya miingon, motultol sa dili-ikapanghimakak nga konklusyon nga “ang labing yanong kinabuhi sa yuta . . . maoy sangpotanan sa intelihenteng kalihokan.”—Darwin’s Black Box—The Biochemical Challenge to Evolution.

Ang Bibliya nagsugilon kanato nga ang kinabuhi sa yuta sa tanang lebel maoy sangpotanan sa intelihenteng kalihokan. Ug kini nag-ingon kanato nga ang Tinubdan niining tanang intelihenteng kalihokan mao si Jehova nga Diyos, ang Maglalalang sa uniberso.—Salmo 36:9; Pinadayag 4:11.

Ayaw pagpadaog sa kamatuoran nga abi kay kita kinahanglang mag-agwanta sa kalibotan nga puno sa kasakit ug pag-antos, dili ka na lang motuo nga adunay Maglalalang ug Tigdisenyo sa yuta ug sa tanang kinabuhi nga ania dinhi. Hinumdomi ang duha ka paninugdang mga kamatuoran. Ang usa mao nga ang Diyos wala magdisenyo sa pagkadili-hingpit nga naglungtad sa atong palibot. Ang lain mao nga ang atong Maglalalang adunay maayong mga rason sa temporaryong pagtugot niini. Sama sa sagad hisgotan niining magasina, gitugotan ni Jehova nga Diyos ang paglungtad sa daotan sa limitadong panahon lamang—aron permanenteng mahusay ang moral nga mga isyu nga gipatungha sa panahon nga ang mga tawo unang nagsalikway sa iyang pagkasoberano.a—Genesis 3:1-7; Deuteronomio 32:4, 5; Ecclesiastes 7:29; 2 Pedro 3: 8, 9.

“Pagaluwason Niya ang Kabos nga Nagatuaw Alang sa Tabang”

Siyempre, bisan pa sa alaot nga mga kahimtang nga giantos sa daghang tawo karon, ang kinabuhi maoy usa gihapon ka kahibulongang gasa. Ug himoon nato ang tanan aron sa pagtipig niini. Ang umaabot nga kinabuhi nga gisaad sa Diyos labaw pa kaayo kay sa pagpakigbisog lamang sa pagsagubang sa mapintas ug mapait nga mga kahimtang—sama sa mga tawo ni Shackleton didto sa Elephant Island. Ang katuyoan sa Diyos mao ang pagluwas kanato gikan sa atong masakit ug malisod nga kinabuhi karon, aron kita “makapangupot pag-ayo sa tinuod nga kinabuhi” nga maoy orihinal nga katuyoan sa Diyos alang sa iyang tawhanong kalalangan.—1 Timoteo 6:19.

Buhaton sa Diyos kining tanan kay ang matag usa kanato bililhon sa iyang panan-aw. Iyang gihikay nga ang iyang Anak, si Jesu-Kristo, magtagana sa halad lukat nga gikinahanglan aron kita mahigawas gikan sa sala, pagkadili-hingpit, ug kamatayon nga atong napanunod gikan sa atong orihinal nga mga ginikanan, si Adan ug Eva. (Mateo 20:28) “Gihigugma pag-ayo sa Diyos ang kalibotan,” si Jesu-Kristo miingon, “nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya . . . makabaton ug kinabuhing walay-kataposan.”—Juan 3:16.

Unsay himoon sa Diyos niadtong kansang kinabuhi karon nadaot tungod sa kasakit ug pagpanglupig? Maylabot sa iyang Anak, ang inspiradong Pulong sa Diyos nagsugilon kanato: “Pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. Maluoy siya sa timawa ug sa kabos, ug pagaluwason niya ang mga kalag sa mga kabos. Gikan sa pagpanglupig ug sa kapintasan tubson niya ang ilang kalag.” Nganong himoon niya kini? Kay “ang ilang dugo [o, ilang kinabuhi] mahimong bililhon sa iyang mga mata.”—Salmo 72:12-14.

Sa daghang siglo ang katawhan nagabudlay ilalom sa kabug-at sa sala ug pagkadili-hingpit, nga daw ‘nagaagulo’ sa tumang pagsakit ug pag-antos. Gitugotan lamang kini sa Diyos uban ang kahibalo nga siya mag-ayo sa bisan unsang kadaot nga ipahinabo niini. (Roma 8:18-22) Sa dili na gayod madugay iyang ‘ipasig-uli ang tanang butang’ pinaagi sa iyang Gingharianong kagamhanan diha sa mga kamot sa iyang Anak, si Jesu-Kristo.—Buhat 3:21; Mateo 6:9, 10.

Maglakip kana sa pagkabanhaw sa mga tawong nag-antos ug nangamatay sa nangagi. Anaa sila sa panumdoman sa Diyos. (Juan 5:28-29; Buhat 24:15) Sa dili madugay ilang madawat ang ‘madagayaong’ kinabuhi—kinabuhing walay-kataposan diha sa kahingpitan sa paraisong yuta nga walay pagsakit ug pag-antos. (Juan 10:10; Pinadayag 21:3-5) Ang matag usa nga buhi makatagamtam unya sa usa ka tugob nga kinabuhi ug mag-ugmad sa kahibulongang mga hiyas ug mga katakos nga maoy timaan sa mga tawong gihimo “sa larawan sa Diyos.”

Atua ka kaha unya aron sa pagpahimulos sa kinabuhi nga gisaad ni Jehova? Anaa ra kana kanimo. Gidasig ka namo sa pagpahimulos sa mga tagana nga gihimo sa Diyos aron mabatonan kining tanang panalangin. Ang mga magpapatik niining magasina malipay sa pagtabang kanimo sa pagbuhat sa ingon.

[Footnote]

[Hulagway sa panid 4, 5]

Ang natanggong nga mga tawo masaligon nga tumanon ni Shackleton ang iyang saad sa pagluwas kanila

[Credit Line]

© CORBIS

[Hulagway sa panid 6]

“Kamo labaw pag bili kay sa daghang goryon”