Kinabuhi ug Ministeryo ni Jesus

Nangutlog Uhay sa Adlawng Igpapahulay

WALA magdugay si Jesus ug ang iyang mga disipulo migikan sa Jerusalem sa pagbalik sa Galilea. Panahon kadto sa tingpamulak, ug ang mga trigo sa kaumahan didto nanguhay. Gipanggutom ang mga disipulo. Busa nangutlo silag mga uhay ug nangaon. Sanglit Adlawng Igpapahulay man kadto, namatikdan ang ilang gihimo.

Bag-o pang nanlimbasog ang relihiyosong mga lider sa Jerusalem sa pagpatay kang Jesus tungod sa giingong paglapas sa Adlawng Igpapahulay. Karon mipasakag sumbong ang mga Pariseo. “Tan-awa! Ang imong mga tinun-an nagahimo sa dili matarong nga butang sulod sa adlaw nga igpapahulay,” sumbong pa nila.

Ang mga Pariseo nag-ingon nga ang pagpangutlog uhay ug pagbagnod niini sa kamot aron kan-on maoy pag-ani ug paggiok. Apan ang ilang istriktong interpretasyon kon unsay nalangkit sa trabaho nakahimo sa Adlawng Igpapahulay nga mabudlay, samtang gidesinyo man kini nga usa unta ka masadya, makapalig-on sa espirituwal nga panahon. Busa mitubag si Jesus uban sa Kasulatanhong mga pananglitan sa pagpakita nga dili gayod tuyo ni Jehova nga Diyos ang ingon nga walay kapuslanang pagpadapat sa Iyang kasugoan sa Adlawng Igpapahulay.

Sa gigutom, miingon si Jesus, mihunong si David ug ang iyang kauban sa tabernakulo ug mikaon sa mga tinapay nga gihalad. Bisan ug nakuha na ang mga tinapay atubangan kang Jehova ug gipulihan ug bag-ong mga tinapay, sa naandan gireserba kadto aron kan-on sa mga saserdote. Apan, ilalom sa mga sirkumstansiya, wala hukmi si David ug ang iyang kauban sa pagkaon niadto.

Mihatag ug laing pananglitan, si Jesus miingon: “Wala ba ninyo hibasahi sa Kasugoan nga sa adlaw nga igpapahulay ang mga saserdote sulod sa templo nagtagad sa adlaw nga igpapahulay nga dili balaan apan wala sila niini pakasad-a?” Oo, bisan sa Adlaw nga Igpapahulay ang mga saserdote nagsigeg ihaw ug naghimog ubang mga buluhaton diha sa templo sa pagpangandam sa mga halad nga mananap! “Apan sultihan ko kamo,” miingon si Jesus, “nga adunay labaw pa sa templo ang ania dinhi.”

Nanambag sa mga Pariseo, si Jesus mipadayon: “Kon nakasabot pa unta kamo sa kahulogan niini, ‘Maoy kahimut-an ko ang pagkaluoy, dili ang halad,’ dili unta kamo managhukom sa mga walay sala.” Dayon siya mitapos: “Kay ang Ginoo sa adlaw nga igpapahulay mao ang Anak sa tawo.” Unsay iyang buot ipasabot niadto?

Nagpunting si Jesus sa iyang malinawong pagmando sa Gingharian sa usa ka libo ka tuig. Sulod sa 6,000 ka tuig nag-antos ang katawhan sa mabudlayng pagkaulipon ilalom kang Satanas nga Yawa, uban sa kabangisan ug gubat nga maoy naandan na karon. Sa laing bahin, ang dakong pagmando sa adlawng igpapahulay ni Kristo maoy panahon sa pagpahulay gikan sa tanang pag-antos ug paglupig. Mateo 12:1-8; Levitico 24:5-9; 1 Samuel 21:1-6; Numeros 28:9; Oseas 6:6.

◆ Unsang sumbong ang gipasaka batok sa mga disipulo ni Jesus, ug sa unsang paagi gitubag ni Jesus kadto?

◆ Unsang kapakyasan sa mga Pariseo ang gipaila ni Jesus?

◆ Sa unsang paagi si Jesus mao ang “Ginoo sa adlaw nga igpapahulay”?