Pangitaa Kadtong Nahilig sa Pagkamatarong Alang sa Kinabuhing Dayon
“Ang tanan niadtong kinsa nahilig sa pagkamatarong alang sa kinabuhing dayon nahimong mga magtutuo.”—BUHAT 13:48.
1. Mahitungod sa tawhanong kasingkasing, unsang katakos ang nabatonan ni Jehova?
SI Jehova nga Diyos makabasa sa kasingkasing. Kini gitin-aw sa dihang ang propetang si Samuel midihog sa usa ka anak nga lalaki ni Jesse ingong hari sa Israel. Sa pagkakita kang Eliab, si Samuel “dayon miingon: ‘Sa pagkatinuod ang iyang dinihogang usa ania na sa atubangan ni Jehova.’ Apan si Jehova miingon kang Samuel: ‘Ayaw tan-awa ang iyang panagway ug sa gitas-on sa iyang barog, kay ako nagasalikway kaniya. Kay ang Diyos nagatan-aw dili ingon sa makita sa tawo, kay ang tawo nagatan-aw lamang sa panagway sa gawas; apan alang kang Jehova, nakita niya ang anaa sa kasingkasing.’” Sa ingon, si Samuel gigiyahan sa pagdihog kang David, kinsa namatud-ang ‘nakapahimuot sa kasingkasing sa Diyos.’—1 Samuel 13:13, 14; 16:4-13.
2. Unsay nakagamot diha sa mahulagwayong kasingkasing sa usa ka tawo, ug sa ingon unsay atong mabasa mahitungod niini diha sa Kasulatan?
2 Ang usa ka tawo nagapasundayag ug usa ka tino dominanting tinamdan. Siya adunay partikular nga disposisyon nga nakagamot diha sa iyang mahulagwayong kasingkasing. (Mateo 12:34, 35; 15:18-20) Busa, atong mabasa ang usa ka tawo kansang “kasingkasing nahilig sa pagpakiggubat.” (Salmo 55:21) Kita giingnan nga ang “bisan kinsa nga nahilig sa kasuko adunay daghang kalapasan.” Ug atong mabasa: “Adunay mga kauban nga mahiligon sa panagkabingkil, apan adunay usa ka higala nga mopabilin labaw pa sa usa ka igsoon.” (Proverbio 18:24; 29:22) Makalilipay, daghan ang nagpamatuod nga sama sa mga Gentil sa karaang Antioquia sa Pisidia. Sa pagkadungog mahitungod sa tagana ni Jehova alang sa kaluwasan, “sila misugod sa pagkalipay ug sa paghimaya sa pulong ni Jehova, ug ang tanan niadtong kinsa nahilig sa pagkamatarong alang sa kinabuhing dayon nahimong mga magtutuo.”—Buhat 13:44-48.
Ang mga Magtutuo Maoy “Putli sa Kasingkasing”
3, 4. (a) Kinsa ang mga putli sa kasingkasing? (b) Sa unsang paagi kadtong putli sa kasingkasing makakita sa Diyos?
3 Kadtong mga magtutuo sa Antioquia nahimong bawtismadong mga Kristohanon, ug ang mga matinumanon taliwala kanila makapadapat sa ilang kaugalingon sa mga pulong ni Jesus: “Malipayon silang putli sa kasingkasing, sanglit sila makakita sa Diyos.” (Mateo 5:8) Apan kinsa “ang putli sa kasingkasing”? Ug sa unsang paagi ilang “makita ang Diyos”?
4 Ang putli sa kasingkasing maoy hinlo sa sulod. Ang ilaha maoy usa ka kaputli sa pagpabili, mga pagmahal, mga tinguha, ug mga motibo. (1 Timoteo 1:5) Ilang makita ang Diyos karon nga niana sila nagasugot kaniya nagalihok alang sa mga maghuhupot sa integridad. (Itandi ang Exodo 33:20; Job 19:26; 42:5.) Ang Gregong pulong dinhi nga gihubad “makita” usab nagpasabot “makakita sa hunahuna, makasabot, mahibalo.” Sanglit sa pagkahingpit gibanaag ni Jesus ang personalidad sa Diyos, ang pagsabot sa maong personalidad napahimuslan “sa putli ug kasingkasing,” kinsa nagtuo kang Kristo ug sa iyang nagalukat-sa-sala nga halad, makabatog kapasayloan sa ilang mga sala, ug makahimo sa pagtanyag ug dalawatong pagsimba ngadto sa Diyos. (Juan 14:7-9; Efeso 1:7) Alang sa mga dinihogan, makakita nga kab-oton sa Diyos ang kinatumyan niini sa dihang sila pagabanhawon na ngadto sa langit, diin sila sa aktuwal makakita sa Diyos ug kang Kristo. (2 Corinto 1:21, 22; 1 Juan 3:2) Apan ang pagkakita sa Diyos pinaagi sa tukmang kahibalo ug sa matuod nga pagsimba maoy posible alang sa tanan niadtong kinsa putli sa kasingkasing. (Salmo 24:3, 4; 1 Juan 3:6; 3 Juan 11) Sila nahilig sa pagkamatarong alang sa kinabuhing dayon sa langit o diha sa usa ka paraisong yuta.—Lucas 23:43; 1 Corinto 15:50-57; 1 Pedro 1:3-5.
5. Sa unsang paagi lamang nga ang usa mahimong usa ka magtutuo ug matuod nga sumusunod ni Jesu-Kristo?
5 Kadtong wala nahilig sa pagkamatarong alang sa kinabuhing dayon dili mahimong mga magtutuo. Imposible alang kanila ang pagtuo. (2 Tesalonica 3:2) Dugang pa, walay usa ang mahimong usa ka matuod nga magsisimba ni Jesu-Kristo gawas kon siya magpatudlo ug si Jehova, kinsa nasayod kon unsay anaa sa kasingkasing, moagak nianang tawhana. (Juan 6:41-47) Siyempre, diha sa pagsangyaw sa balay ug balay, wala hukming daan sa mga Saksi ni Jehova ang matag usa. Dili nila mabasa ang mga kasingkasing apan nagtugyan sa mga resulta ngadto sa mahigugmaong mga kamot sa Diyos.
6. (a) Unsay gikaingon bahin sa personal nga pakigkontak diha sa balay ug balay nga ministeryo? (b) Unsa nga mga tagana ang gihimo sa pagtabang sa mga Saksi ni Jehova nga makaplagan kadtong nahilig sa pagkamatarong alang sa kinabuhing dayon?
6 Usa ka eskolar ang may katukmang miingon: “[Si Pablo] nagtudlo sa kamatuoran sa publiko ug gikan sa balay ug balay. Dili lamang sa plataporma, kondili diha sa personal nga pakigkontak uban sa mga indibiduwal gisangyaw niya si Kristo. Kasagaran ang pakigkontak mismo sa tawo maoy mas epektibo kay sa bisan unsang ubang matang o paagi sa pag-abot sa mga kalag.” (August Van Ryn) Ang maong mga publikasyon sama sa Theocratic Ministry School Guidebook, Reasoning From the Scriptures, ug sa Our Kingdom Ministry mitabang sa mga Saksi ni Jehova sa paghatag ug mga pakigpulong ug sa pagpahimulos ug dako sa personal nga panagkita diha sa pag-alagad sa kanataran. Makatabang, usab, ang mga pasundayag sa Tigom sa Pag-alagad ug tambag sa Tunghaan sa Teokratikanhong Ministeryo. Kadtong miapil sa tunghaan nakadawat ug bililhong pagbansay diha sa maong mga hiyas sa pagpanudlo sama sa maayong mga introduksiyon, hustong paggamit sa Kasulatan, lohikal nga paghan-ay, makapakombensir nga argumento, paggamit ug mga ilustrasyon, ug epektibong mga konklusyon. Atong tan-awon kon sa unsang paagi ang Bibliya nagpadako niini nga instruksiyon nga maghimo sa katawhan sa Diyos nga mas epektibo samtang sila nagapangita niadtong nahilig sa pagkamatarong alang sa kinabuhing dayon.
Ang Makapahinuklog nga mga Introduksiyon
7. Ang pangbukas nga mga pulong sa Wali ni Jesus sa Bukid nagtudlog unsa mahitungod sa mga introduksiyon?
7 Sa pananglitan ni Jesus, kadtong nangandam alang sa balay-ug-balay nga pagsangyaw makakat-on bahin sa mga introduksiyon nga nakapukaw sa interes. Sa iyang pangbukas nga Wali sa Bukid, iyang gigamit ang pulong “malipayon” sa nuybe ka beses. Pananglitan, siya miingon: “Malipayon kadtong mahunahunaon sa ilang espirituwal nga panginahanglan, sanglit ilaha ang gingharian sa mga langit. . . . Malipayon ang mga mapainubsanon, sanglit sila makapanunod sa yuta.” (Mateo 5:3-12) Ang tudling sa mga pulong maoy direkta ug tin-aw. Ug kana nga introduksiyon sa pagkamatuod makapukaw ug interes ug mapalangkit ang iyang mga mamiminaw, kay kinsa bay dili buot nga magmalipayon?
8. Diha sa balay-ug-balay nga ministeryo, sa unsang paagi ang usa ka ulohan sa panaghisgot ipailaila?
8 Ang bisan unsang ulohan sa panaghisgot nga gigamit alang sa balay ug balay nga ministeryo angayng ipailaila diha sa usa ka positibo, mahigalaong paagi. Apan walay usa ang angayng mogamit ug usa ka makapakurat nga introduksiyon, sama sa, “Ako adunay mensahe alang kanimo gikan sa kawanangan.” Ang maayong balita nagagikan sa langit, apan ang maong introduksiyon basin makapahibulong sa tagbalay kon kaha ang Saksi tagdon ba nga kinasingkasing o dumilian dihadiha dayon.
Paggamit sa Pulong sa Diyos sa Hustong Paagi
9. (a) Sa unsang paagi ang mga kasulatan ipailaila, basahon, ug ipadapat diha sa ministeryo? (b) Unsa nga panig-ingnan ang ipunting sa pagpakita kon sa unsang paagi gigamit ni Jesus ang mga pangutana?
9 Diha sa ministeryo sa kanataran, sama sa plataporma, ang mga teksto angay nga hustong ipailaila, basahon uban ang nahiangay nga pagpasiugda, ug ipadapat diha sa usa ka tin-aw, tukma nga paagi. Ang mga pangutanang makapahunahuna sa tagbalay bahin sa mga punto sa Kasulatan usab makatabang. Usab, ang mga paagi ni Jesus matulon-anon. Sa usa ka okasyon, ang usa ka tawo nga batid sa Kasugoan ni Moises nangutana kaniya: “Magtutudlo, unsay angay ko nga buhaton aron maangkon ko ang kinabuhing walay kataposan?” Sa pagtubag si Jesus misukna: “Unsay nahisulat sa Kasugoan? Unsay imong nabasa?” Walay duhaduha, si Jesus nasayod nga mao kini ang usa ka pangutana nga matubag sa tawo. Siya tukmang mitubag, nag-ingon: “‘Higugmaon mo si Jehova nga imong Diyos uban sa tibuok mong kasingkasing ug uban sa tibuok mong kalag ug uban sa tibuok mong kusog ug uban sa tibuok mong hunahuna,’ ug, ‘higugmaa ang imong silingan sama sa imong kaugalingon.’” Kini mitukmod kang Jesus sa paghatag ug komendasyon, ug misunod ang dugang panaghisgot.—Lucas 10:25-37.
10. Unsay angayng hinumdoman sa usa maylabot sa iyang ulohan nga hisgotan, ug unsay angay likayan sa dihang mosukna ug mga pangutana sa mga tagbalay?
10 Kadtong nagasangyaw gikan sa balay ug balay kinahanglang magpasiugda sa tema sa ulohang pagahisgotan ug ipatin-aw ang katarongan alang sa pagbasa sa mga teksto sa Bibliya nga naghan-ay niana nga ulohan. Sanglit ang Saksi naningkamot nga maabot ang kasingkasing sa tagbalay, angay niyang likayan ang pagsukna ug makaulang nga mga pangutana. Sa paggamit sa Pulong sa Diyos, ‘hinaot ang atong sinultihan sa kanunay kahimut-anan, tinimplahan ug asin.’—Colosas 4:6.
11. Sa paggamit ug Kasulatan aron itul-id ang sayop nga mga panglantaw, unsang panig-ingnan ang atong nabatonan gikan sa pagtintal ni Satanas kang Jesus?
11 Ilabina sa mga pagbalik duaw hayan may panginahanglan sa pagtul-id sa sayop nga mga panglantaw pinaagi sa pagpakita kon unsa sa pagkamatuod ang giingon o gipasabot sa Bibliya. Si Jesus mibuhat sa ingon sa pagsanta kang Satanas, kinsa miingon: “Kon ikaw anak sa Diyos, umambak ka ngadto sa ubos [gikan sa atop sa templo, samag kinabubut-ong paghikog]; kay nahisulat, ‘Siya magasugo sa iyang mga manulonda mahitungod kanimo, ug sila magasapnay kanimo sa ilang mga kamot, aron ang imong mga tiil dili mahipangdol sa bato.’” Ang Salmo 91:11, 12, nga gikutlo ni Satanas, wala magpakamatarong sa pagbuhis sa kinabuhi, usa ka gasa gikan sa Diyos. Kay nakaamgo nga sayop ang pasulay kang Jehova pinaagi sa pagpameligro sa iyang kinabuhi, si Jesus miingon kang Satanas: “Usab nahisulat na, ‘Ayaw pagtintala si Jehova nga imong Diyos.’” (Mateo 4:5-7) Siyempre, si Satanas wala mangita sa kamatuoran. Apan sa dihang ang nangatarongang mga tawo nagpahayag ug sayop nga mga panglantaw nga makababag sa ilang espirituwal nga pag-uswag, ang ministro sa Pulong sa Diyos angay nga sa tukma magpakita kon unsay giingon o gipasabot gayod sa Kasulatan. Kining tanan maoy bahin sa “paggamit sa pulong sa kamatuoran sa hustong paagi”—usa sa hinungdanong mga leksiyon nga gitudlo diha sa Tunghaan sa Teokratikanhong Ministeryo.—2 Timoteo 2:15.
Ang Pangdani Adunay Iyang Dapit
12, 13. Nganong husto ang paggamit ug pangdani diha sa ministeryo?
12 Ang pangdani adunay usa ka hustong dapit diha sa Kristohanong Ministeryo. Pananglitan, giagda ni apostol Pablo ang iyang isigkamagbubuhat nga si Timoteo nga magpadayon diha sa mga butang nga iyang nakat-onan ug “nakadani sa pagtuo.” (2 Timoteo 3:14) Sa Corinto, si Pablo “nagahatag ug usa ka pakigpulong diha sa sinagoga sa matag adlaw nga igpapahulay ug “nagadani” sa mga Hudiyo ug mga Grego.” (Buhat 18:1-4) Sa Efeso, siya nagmalamposon sa ‘paghatag ug mga pakigpulong ug migamit ug pangdani mahitungod sa gingharian sa Diyos.’ (Buhat 19:8) Ug sa dihang ilalom sa pagkabilanggo sa Roma, gipaduol sa apostol ang mga tawo ngadto niya ug nagpamatuod kanila, “nagapangdani,” ug ang pipila nahimong mga magtutuo.—Buhat 28:23, 24.
13 Siyempre, walay sapayan kon unsa ka madanihon ang Saksi tingali, kadto lamang nahilig sa pagkamatarong alang sa kinabuhing dayon ang mahimong mga magtutuo. Ang makapakombensir nga mga argumento ug tin-aw nga mga pagbatbat, nga sa tukma ginapresentar, hayan makadani kanila sa pagtuo. Apan unsa pa man ang makatabang sa pagdani kanila?
Magmalohikal ug Makapakombensir
14. (a) Unsay nalangkit sa lohikal, konektadong kahan-ayan? (b) Ang makapakombensir nga argumento nagkinahanglan ug unsa?
14 Usa sa mga hiyas sa pagpanulti nga gipasiugda sa atong Tunghaan sa Teokratikanhong Ministeryo mao ang lohikal, konektadong kahan-ayan. Kini naglakip sa pagbutang sa tanang yawing mga ideya ug gikinahanglang materyal diha sa makataronganong han-ay. Usab hinungdanon ang makapakombensir nga mga argumento, nga nagkinahanglag pagpahimutang ug usa ka maayong patukoranan ug sa pagtagana ug maayong pamatuod. Ang susama niini mao ang pagtabang sa mga mamiminaw sa pagpangatarongan pinaagi sa pagmintinar sa usa ka komun nga baroganan, naghan-ay nga husto sa mga punto, ug nagpadapat kanila nga epektibo. Usab, ang Kasulatan nagtagana ug mga giya.
15. (a) Giunsa pagkuha ni Pablo ang pagtagad ug pag-establisar sa usa ka kumon nga baroganan sa dihang siya nagpakigpulong sa Mars’ Hill? (b) Sa pakigpulong ni Pablo, unsang ebidensiya ang atong nabatonan sa lohikal, konektadong kahan-ayan?
15 Kining mga hiyasa sa pagpanulti maoy dayag diha sa iladong pakigpulong ni apostol Pablo sa Mars’ Hill sa karaang Atenas. (Buhat 17:22-31) Ang iyang introduksiyon nakahatag ug pagtagad ug nag-establisar sa usa ka komun nga baroganan, kay siya miingon: “Mga taga Atenas, nasabot ko nga sa tanang paagi kamo mga masimbahon gayod kay sa uban.” Alang kanila, kini walay duhaduha mopatim-aw nga usa ka komplemento. Human nga gihisgotan ang usa ka altar nga gipahinungod “Ngadto sa Wala hiilhing Diyos,” si Pablo misugod sa iyang lohikal, konektadong kahan-ayan ug makapakombensir nga argumento. Iyang gipasiugda nga kining Diyos nga wala nila hiilhi maoy “nagbuhat sa kalibotan ug sa tanang butang nga diha niini.” Dili sama kang Atena o ubang Gregong mga diyos, ‘siya wala magapuyo sa hinimog tawong mga templo, ni nagkinahanglan pa siya nga alagaran sa tawhanong mga kamot.’ Gipaila dayon sa apostol nga kini nga Diyos naghatag kanato ug kinabuhi ug wala maghimo kanatong mangapngap sa pagpangita kaniya. Unya si Pablo nangatarongan nga ang atong Maglalalang, kinsa wala lang manumbaling sa miaging mga panahon sa kaburong, ‘nagsugo sa mga tawo bisan diin sa paghinulsol.’ Kini sa makataronganon mitultol ngadto sa punto nga ang ‘Diyos magahukom sa nanagpuyo sa yuta diha sa pagkamatarong pinaagi sa usa ka gitudlong tawo kinsa iyang gibanhaw gikan sa mga patay.’ Sanglit si Pablo “nagamantala sa maayong balita bahin kang Jesus ug sa pagkabanhaw,” kadtong mga taga Atenas nahibalong kini nga maghuhukom mao si Jesu-Kristo.—Buhat 17:18.
16. Sa unsang paagi maapektahan ang ministeryo sa usa sa pakigpulong ni Pablo sa Mars’ Hill ug sa pagbansay diha sa Tunghaan sa Teokratikanhong Ministeryo?
16 Tinuod, si Pablo wala magsangyaw sa balay ug balay diha sa Mars’ Hill. Apan gikan sa iyang pakigpulong ug sa pagbansay nga gihatag diha sa Tunghaan sa Teokratikanhong Ministeryo, ang mga Saksi ni Jehova makakat-on ug dako nga mapalambo ang ilang ministeryo sa kanataran. Oo, kining tanan motabang kanila nga mahimong mas epektibong mga ministro, sama sa lohikal nga kahan-ayan ug makapakombensir nga argumento ni Pablo nga nakadani sa pipila niadtong mga taga Atenas sa pagkahimong mga magtutuo.—Buhat 17:32-34.
Paggamit ug Nagatudlong mga Ilustrasyon
17. Unsang matanga sa mga ilustrasyon ang angayng gamiton diha sa ministeryo?
17 Ang Tunghaan sa Teokratikanhong Ministeryo usab motabang sa mga ministro sa Diyos sa paggamit ug maayong mga ilustrasyon diha sa balay-ug-balay nga pagsangyaw ug sa ubang mga bahin sa ilang ministeryo. Aron ipasiugda ang hinungdanong mga punto, ang yanong mga ilustrasyon nga angayan maoy gamiton. Ang Saksi magkuha kanila gikan sa sinating mga situwasyon ug mag-amping sa pagpadapat kanila nga tin-aw. Ang mga ilustrasyon ni Jesus nakaabot niining tanang mga kinahanglanon.
18. Sa unsang paagi ang Mateo 13:45, 46 namatud-ang bililhon diha sa ministeryo?
18 Pananglitan, palandonga ang mga pulong ni Jesus: “Ang gingharian sa mga langit nahisama sa usa ka nagapanaw nga negosyante nga nangita ug hamiling mga perlas. Sa pagkakaplag ug usa ka perlas nga taas ug bili, milakaw ug nagbaligya sa iyang tanang mga kabtangan ug nagpalit niini.” (Mateo 13:45, 46) Ang mga perlas maoy mahalong mga mutya nga makita diha sa sulod sa mga bagaw sa talaba ug ubang mga tuway. Apan pipila lamang nga perlas ang “hamili.” Ang negosyante nagkinahanglag panabot sa pag-apresyar sa kinalabwang bili sa usa ka perlas ug andam nga ibugti ang tanang diha kaniya aron makabaton niana. Tingali sa usa ka pagbalik duaw o sa usa ka pagtuon sa Bibliya, kining ilustrasyona magamit aron ipakitang ang usa ka indibiduwal nga tinuod miapresyar gayod sa Gingharian sa Diyos molihok nga sama niana nga negosyante. Ang maong tawo magabutang sa Gingharian nga una sa kinabuhi, nga nahibalong kini takos sa tanang pagsakripisyo.
Pagtapos nga may Panukmod
19. Diha sa balay-ug-balay nga ministeryo, unsay ipakita sa mga panapos ngadto sa tagbalay?
19 Diha sa Tunghaan sa Teokratikanhong Ministeryo, ang katawhan sa Diyos usab makakat-on nga ang panapos sa usa ka pakigpulong o panaghisgot kinahanglang may relasyong direkta sa tema ug angayng ipakita sa mga mamiminaw kon unsay buhaton ug magdasig kanila sa pagbuhat niana. Diha sa balay ug balay nga ministeryo, ang tagbalay nagkinahanglang tinong pakitaan kon unsang kursoha ang angay niyang kuhaon, sama sa pagdawat ug usa ka publikasyon sa Bibliya o pag-uyon sa pagbalik duaw.
20. Unsang maayong panig-ingnan sa usa ka makapatukmod nga konklusyon ang atong nabatonan sa Mateo 7:24-27?
20 Ang konklusyon sa Wali ni Jesus sa Bukid nagtaganag usa ka maayong panig-ingnan. Pinaagi sa usa ka dali hisabtang ilustrasyon, gipakita ni Jesus nga maalamong lakang ang pagpaminaw sa iyang mga pulong. Siya mihinapos: “Busa, ang bisan kinsang nagapatalinghog sa akong mga pulong ug nagatuman kanila mahisama sa usa ka maalamon nga tawo, nga nagatukod sa iyang balay ibabaw sa bato. Ug mibuhos ang ulan ug mibaha ug mihuyop ang hangin ug mihasmag nianang balaya, apan kini wala matarog, kay kini natukod man diha sa bato. Labot pa, ang bisan kinsang wala magpatalinghog sa akong mga pulong ug wala magatuman kanila mahisama sa usa ka tawong buang, nga nagtukod sa iyang balay ibabaw sa balas. Ug mibubos ang ulan ug mibaha ug mihuyop ang hangin ug mihasmag sa balay ug kini nakankan, ug ang kadaot niini dako gayod.” (Mateo 7:24-27) Pagkamaayo niini nga ipakitang ang mga ministro sa Diyos kinahanglang maningkamot sa pagdasig sa mga tagbalay!
21. Unsay giilustrar sa atong panaghisgot, apan unsay angay natong ilhon?
21 Ang nahisgotang mga punto nag-ilustrar kon sa unsang paagi ang Tunghaan sa Teokratikanhong Ministeryo makatabang sa daghan sa pagkahimong takos nga mga magmamantala sa Gingharian. Siyempre, ang bug-os nga katakosan nagagikan gayod sa Diyos. (2 Corinto 3:4-6) Ug bisan pa kon unsa ka takos ang ministro, walay usa nga makadani sa mga tawo aron mahimong mga magtutuo gawas kon sila danihon sa Diyos pinaagi ni Kristo. (Juan 14:6) Apan, ang katawhan sa Diyos angayng magpahimulos gayod sa bintaha sa tanang espirituwal nga mga tagana nga gihimo ni Jehova samtang sila nagapangita niadtong nahilig sa pagkamatarong alang sa kinabuhing dayon.
Unsay Imong mga Tubag?
◻ Kinsa ang mga “putli sa kasingkasing,” ug sa unsang paagi ilang “makita ang Diyos”?
◻ Unsang mga butanga ang angayng palandongon sa dihang magpailaila sa mensahe sa Gingharian diha sa balay-ug-balay nga buluhaton?
◻ Sa unsang paagi ang Pulong sa Diyos pagagamiton sa hustong paagi diha sa ministeryo?
◻ Unsay makatabang sa paghimo sa lohikal, makapakombensir nga mga presentasyon diha sa pag-alagad sa kanataran?
◻ Unsay angayng hinumdoman mahitungod sa mga ilustrasyon nga gigamit sa ministeryo?
◻ Unsay angayng mapalampos sa mga konklusyon nga gigamit diha sa pagsangyaw nga buluhaton?
[Hulagway sa panid 16]
Si Jesus miingon nga “ang putli sa kasingkasing” “makakita sa Diyos.” Unsay ipasabot niini?
[Hulagway sa panid 18]
Ang mga teksto angay nga hustong ipailaila, basahon uban ang nahiangay nga pagpasiugda, ug ipadapat diha sa tin-aw, tukma nga paagi