Kon sa Unsang Paagi Apektado Ka sa Pagkausab sa Dagway ni Kristo

Upat ka lalaki mao pay pagtungas gikan sa usa ka taas nga bukid. Didto sa taas sa bukid may butang katingalahang nahitabo. Samtang nagtan-aw ang tulo ka nakurat nga mga tinun-an ni Jesu-Kristo, siya nausab atubangan sa ilang mga mata. Pamati samtang ang magsusulat sa Ebanghelyo nga si Marcos motaho niining kulbahinam nga hitabo:

“GIUBAN ni Jesus sila si Pedro, Santiago ug Juan, ug gidala sila sa usa ka taas nga bukid nga silasila ra. Ug nausab ang iyang dagway atubangan kanila, ug ang iyang mga sapot migilak, nga puti kaayo nga wala pay nakalabaw sa kaputi bisag unsaon pa sa pagpaputi nga sama niini dinhi sa yuta. Usab, si Elias ug si Moises mipakita kanila, ug sila nakigsulti kang Jesus. Ug sa masanongon si Pedro miingon kang Jesus: ‘Magtutudlo, maayo gayod nga ania kami dinhi, magbuhat kamig tulo ka payag, usa alang kanimo, usa alang kang Moises, ug usa alang kang Elias.’ Ngani, siya wala mahibalo kon unsay isulti, kay nangalisang man sila. Unya dihay panganod nga mitungha, ug gilandongan sila niini, ug gikan sa panganod migula ang usa ka tingog nga nag-ingon: ‘Mao kini ang akong Anak, nga pinalangga; pamati kamo kaniya.’ Apan, sa kalit sila mitan-aw sa palibot apan wala na silay laing nakita uban kanila, gawas lamang kang Jesus.”​—Marcos 9:2-8.

Hunahunaa lamang! Ang dagway ni Jesus midan-ag sama sa adlaw. (Mateo 17:2) Ang iyang mga sapot migilak, “nga puti kaayo nga wala pay nakalabaw sa kaputi bisag unsaon pa sa pagpaputi nga sama niini dinhi sa yuta.” Dihay nadungog nga gamhanang tingog sa Diyos nga mipahayag mahitungod sa iyang Anak. Pagkakahibulongang hitabo!

Ang Gregong pulong dinhi nga gihubad “nausab” nagkahulogang “pagbag-o ngadto sa laing porma.” Kini makita usab sa Roma 12:2, diin gitambagan ang mga Kristohanon nga “mag-usab” pinaagi sa pagbag-o sa ilang mga hunahuna.​—An Expository Dictionary of New Testament Words, ni W. E. Vine, Tomo IV, panid 148.

Oo, usa ka madulaong hitabo nahitabo sa dihang nausab ang dagway ni Jesus pila ka panahon human gisaulog ang Paskuwa sa 32 K.P. Unsay mitultol niini nga milagro? Kini ba dunay linain nga katuyoan? Nganong si Moises ug si Elias nalangkit? Ug sa unsang paagi apektado ka sa pagkausab sa dagway ni Jesus?

Nahaunang mga Hitabo

Una pa mitungas sa bukid, si Jesus ug ang iyang mga tinun-an diha sa kasilinganan sa Cesaria sa Filipo. Sanglit ang siyudad maoy 25 kilometros pahabagatan-kasadpan sa Bukid Hermon, ang pagkausab sa dagway mahimong nahitabo diha sa usa sa hataas nga mga tuktok niini.

Samtang naglakaw sa “hataas nga bukid,” gisukna ni Jesus ang iyang mga tinun-an: “Kinsa man kuno ako sumala sa sulti sa mga tawo?” Sila mitubag nga nag-ingon: “Si Juan Bawtista kuno, ug ang uban si Elias kuno, ug ang uban pa, Usa kuno sa mga propeta.” Unya si Kristo nangutana: “Apan kamo, unsay inyong ikasulti, kinsa man ako”? Si Pedro mitubag: “Ikaw mao ang Kristo.” Niana, Si Jesus “nagdili kanila sa pagpanugilon kang bisan kinsa bahin kaniya. Usab, siya misugod sa pagtudlo kanila nga ang Anak sa tawo makaagom ug daghang pag-antos ug isalikway sa mga tigulang ug sa punoan sa mga saserdote ug sa mga eskriba ug pagapatyon, ug tapos sa tulo ka adlaw mabanhaw siya.”​—Marcos 8:27-31.

Si Jesus mipadayon sa paghimo niini nga saad: “Dunay nagabarog karon dinhi nga dili na makatilaw ug kamatayon hangtod nga makita na nila ang gingharian sa Diyos nga mahiabot nga may gahom.” (Marcos 9:1; Mateo 16:28) Kining saara natuman “tapos sa unom ka adlaw,” sa dihang si Jesus miampo ug nausab atubangan ni Pedro, Santiago, ug Juan. Si Lucas miingon nga kini nahitabo “walo ka adlaw” human niadto, dayag tungod kay gilakip niya ang adlaw sa pagsaad ug sa pagkatuman.​—Mateo 17:1, 2; Marcos 9:2; Lucas 9:28.

Dili Usa ka Damgo o Handurawan

Ang pagkausab sa dagway ni Jesus dili usa ka damgo. Ang tulo ka apostol dili mahitabong magkaparehog damgo, ug gitawag kini ni Jesus nga usa ka “panan-awon.” Kana wala magpasabot ug usa ka handurawan, kay ang Gregong pulong gigamit sa Mateo 17:9 sa lain gihubad nga “talan-awon.” (Buhat 7:31) Busa ang mga nakakita bug-os nga nagmata, ug uban sa ilang mga mata ug mga dalunggan, sila aktuwal nakakita ug nakadungog sa nahitabo.​—Lucas 9:32.

Bug-os nagmata apan wala mahibalo kon unsay isulti, si Pedro misugyot sa pagtukod ug tulo ka balongbalong​—usa alang kang Jesus, Moises ug Elias. (Lucas 9:33) Ang panganod nga mitungha samtang nagsulti si Pedro dayag nagpaila sa presensiya sa Diyos diha sa Bukid, sama sa balongbalong sa panagkatigom sa Israel sa kamingawan. (Exodo 40:34-38; Lucas 9:34) Ug sa pagkatinuod ang mga apostol dili tulog sa dihang ang “Diyos nga Amahan” miingon: “Mao kini ang akong Anak, ang usa nga pinili, Pamati kamo kaniya.”​—2 Pedro 1:17, 18; Lucas 9:35.

Kon Nganong Nakita si Moises

Sa dihang nahitabo ang pagkausab sa dagway, si Moises “walay nahibaloan,” kay siya namatay na sa kasiglohang milabay. (Ecclesiastes 9:5, 10) Sama kang David, siya wala pa mabanhaw ug busa wala didto sa personal. (Buhat 2:29-31) Apan nganong si Moises nakita uban kang Kristo niini nga panan-awon?

Ang Diyos miingon kang Moises: “Magapatindog ako kanila sa taliwala sa ilang mga igsoon, usa ka manalagna nga sama kanimo; ug igabutang ko ang akong mga pulong sa iyang baba ug siya magasulti kanila sa tanan nga isugo ko kaniya.” (Deuteronomio 18:18) Sa espisipiko gipadapat ni Pedro kining tagnaa kang Jesu-Kristo. (Buhat 3:20-23) Gawas kang Jesus, si Moises mao ang labing dakong manalagna nga gipadala sa Diyos sa nasod sa Israel.

Ang pagkasama makita tali kang Moises ug sa Dakong Moises, si Jesu-Kristo. Pananglitan, samtang sila mga bata pa, ang ilang mga kinabuhi gipameligro sa bangis nga mga magmamando, apan gitino sa Diyos ang kaluwasan sa mga bata. (Exodo 1:20–​2:10; Mateo 2:7-23) Ang duha ka lalaki migugol ug 40 ka adlaw sa pagpuasa sa pagsugod sa ilang karera ingong linain nga mga alagad sa Diyos. (Exodo 24:18; 34:28; Deuteronomio 9:18, 25; Mateo 4:1, 2) Ug si Moises ug si Jesus mihimog mga milagro pinaagi sa gahom sa Diyos.​—Exodo 14:21-31; 16:11-36; Salmo 78:12-54; Marcos 4:41; Lucas 7:18-23; Juan 14:11.

Si Moises gigamit sa Diyos sa pagluwas sa Israel gikan sa pagkaulipon sa Ehipto, sama nga si Jesus naghatag espirituwal nga kagawasan. (Exodo 12:37–​14:31; Juan 8:31, 32) Si Moises nakapribilehiyo sa pagkahimong tigpataliwala sa pakigtugon sa Kasugoan tali sa Diyos ug sa mga Israelinhon, samtang si Jesus maoy Tigpataliwala sa bag-ong pakigtugon. (Exodo 19:3-9; 34:3-7; Jeremias 31:31-34; Lucas 22:20; Hebreohanon 8:3-6; 9:15) Gigamit ni Jehova si Moises aron sa pagpadako sa Iyang ngalan atubangan sa mga Israelinhon, sa mga Ehiptohanon, ug sa uban, sama nga si Jesu-Kristo nagpadako sa balaang ngalan ni Jehova. (Exodo 9:13-17; 1 Samuel 6:6; Juan 12:28-30; 17:5, 6, 25, 26) Sa pagpatungha kang Moises diha sa pagkausab sa dagway ni Jesus, gipakita sa Diyos nga si Kristo moalagad niining mga kapasidara diha sa mas dakong sukod.

Kon Nganong Gipakita si Elias

Bisag ang patay nga manalagnang si Elias wala pa mabanhaw, maoy tukma nga siya angay makita diha sa panan-awon sa pagkausab sa dagway. Si Elias nakahimog dakong buluhaton sa pagpasig-uli sa putling pagsimba ug sa pagbalaan sa ngalan ni Jehova taliwala sa mga Israelinhon. Mibuhat si Jesus ug sama samtang dinhi pa sa yuta ug mobuhat ug labaw pa sa pagpasig-uli sa putling relihiyon ug bayawon sa iyang langitnong Amahan pinaagi sa Mesiyanikong Gingharian.

Gipakita sa manalagnang si Malakias nga ang buluhaton ni Elias naglarawan sa umaabot nga kalihokan. Pinaagi ni Malakias, ang Diyos miingon: “Tan-awa! akong ipadala kaninyo si Elias ang manalagna sa dili pa moabot ang dako ug makalilisang nga adlaw ni Jehova. Ug iyang pabalikon ang kasingkasing sa mga amahan ngadto sa mga anak, ug ang kasingkasing sa mga anak ngadto sa ilang mga amahan; tingali unya ako moanhi ug hampakon ko ang yuta ug itagana kini sa kalaglagan.”​—Malakias 4:5, 6.

Kining tagnaa dunay iyang gamayng katumanan sa buluhaton ni Juan Bawtista. Gipunting kini ni Jesus human sa pagkausab sa dagway, sa dihang nangutana ang iyang mga apostol kon nganong ang mga eskriba miingon nga si Elias moanhi pag-una​—una pa sa presensiya sa Mesiyas. Si Jesus miingon: “Tinuod nga si Elias kinahanglang moanhi ug igapasig-uli niya ang tanang mga butang. Apan, sultihan ko kamo nga si Elias mianhi na ug wala sila makaila kaniya, hinunoa ilang gibuhatan siya sumala sa ilang gusto. Sa sama nga paagi ang Anak sa Tawo magaantos diha sa ilang mga kamot.” Ang asoy midugang: “Unya ang mga tinun-an nakasabot nga nagsulti siya kanila mahitungod kang Juan Bawtista.”​—Mateo 17:10-13.

Gibuhat ni Juan ang samang buluhaton ni Elias sa dihang iyang gibawtismohan ang mga Hudiyo nga naghinulsol sa ilang mga sala batok sa pakigtugon sa Kasugoan. Labing hinungdanon, si Juan maoy mag-uuna ug mipaila kang Jesu-Kristo. (Mateo 11:11-15; Lucas 1:11-17; Juan 1:29) Apan nganong ang buluhaton ni Juan maoy gamay lamang nga katumanan sa tagna ni Malakias?

Niini nga panan-awon, nakita si Elias nga nakigsulti kang Jesus. Kini nahitabo human sa kamatayon ni Juan Bawtista, sa ingon nagpasabot nga ang buluhaton ni Elias pagabuhaton sa umaabot. Dugang pa, ang tagna nagpakita nga kining buluhatona pagahimoon una pa “ang dako ug makalilisang nga adlaw ni Jehova.” Kanang kusog nagsingabot nga hitabo naglakip sa “gubat sa dakong adlaw sa Diyos ang Labing Gamhanan” sa Har–​Magedon, o Armageddon. (Pinadayag 16:14-16) Kini nagpasabot nga ang umaabot niadto nga pagkatukod sa langitnong Gingharian sa Diyos pagasugdan pinaagi sa buluhaton nga katumbas sa buluhaton ni Elias ug sa iyang sumusunod, si Eliseo. Ug kapin sa usa ka siglo, ang modernong-adlaw nga mga Saksi ni Jehova nagapadayon sa buluhaton nga naglangkit sa pagpasig-uli sa putling pagsimba ug sa pagbayaw sa ngalan sa Diyos.​—Salmo 145:9-13; Mateo 24:14.

Ang Katuyoan Niini

Ang pagkausab sa dagway nakapalig-on kang Jesus alang sa mga pag-antos ug kamatayon nga duol na niyang agoman. Nakadungog sa iyang langitnong Amahan nga naghisgot bahin kaniya ingong Iyang inuyonang Anak dayag nga nakapalig-on sa pagtuo ni Jesus. Apan unsay kahulogan sa pagkausab sa dagway alang sa uban?

Ang pagkausab sa dagway ni Jesus nakapalig-on usab sa pagtuo sa mga nakakita. Kini nagpatisok sa ilang hunahuna nga si Jesu-Kristo mao ang Anak sa Diyos. Sa pagkamatuod, sukad nga ang Pangulong Tigpamaba ni Jehova, ang Pulong, diha pa sa maong panahon sa ilang taliwala, ilang nadunggan ang tingog sa Diyos nga nag-ingon: “Kini mao ang akong Anak, nga pinalangga, nga akong giuyonan.” Bisag si Jehova mipahayag ug samang pamatuod dihang gibawtismohan si Jesus, sa panahon sa pagkausab sa dagway gidugang sa Diyos nga ang mga tinun-an kinahanglang mamati sa Iyang Anak.​—Mateo 3:13-17; 17:5; Juan 1:1-3, 14.

Ang pagkausab sa dagway nakapalig-on sa pagtuo sa laing paagi. Sa panahon sa panan-awon, si Jesus, “Moises,” ug “Elias” mihisgot mahitungod sa “pagbiya nga gitakda kang [Kristo] nga mahitabo sa Jerusalem.” (Lucas 9:31) Ang “pagbiya” gihubad gikan sa usa ka porma sa Gregong pulong eʹxo·dos. Kining exodo, o pagbiya, dayag nalangkit sa kamatayon ni Jesus ug sa iyang pagkabanhaw pinaagi sa Diyos ngadto sa espirituhanong kinabuhi. (1 Pedro 3:18) Busa ang pagkausab sa dagway nagpalig-on sa pagtuo sa pagkabanhaw ni Kristo. Ilabina kini nakatukod sa pagtuo pinaagi sa pagtaganag katuohang ebidensiya nga si Jesus mahimong Hari sa Mesiyanikong Gingharian sa Diyos. Dugang pa, ang panan-awon nagpakita nga ang Gingharian mahimayaon.

Ang pagkausab sa dagway usab nagpalig-on sa pagtuo sa tagna sa Kasulatan. Mga 32 ka tuig sa ulahi (mga 64 K.P.), nahinumdoman gihapon kining hitaboa ni Pedro ug misulat: “Wala namo ipasikad sa tumotumong mga sugilanon ang among pagpahibalo kaninyo mahitungod sa gahom ug presensiya sa atong Ginoong Jesu-Kristo, apan kami mismo nakakita sa iyang pagkahalangdon. Kay sa iyang pagkadawat sa pasidungog ug himaya gikan sa Diyos nga Amahan, sa dihang kining mga pulonga gihatod kaniya pinaagi sa halangdong himaya ang tingog nga nag-ingon: ‘Kini mao ang akong Anak, nga pinalangga, kinsa akong giuyonan.’ Oo, kami mismo nakabati sa maong tingog gikan sa langit samtang kami uban kaniya didto sa bukid nga balaan. Busa midugang ang among pagsalig sa matagnaong pulong; ug maayo nga inyong gitagad kini pag-ayo ingong usa ka suga nga nagasiga sa dapit nga mangitngit, hangtod mobanagbanag ang adlaw ug ang kahayag sa bitoon nga kabugason modan-ag sa inyong mga kasingkasing.”​—2 Pedro 1:16-19.

Ang Kahulogan Niini Alang Kanimo

Oo, gilantaw ni Pedro ang pagkausab sa dagway ni Jesus ingong usa ka gamhanang pamatuod sa matagnaong pulong sa Diyos. Mahimong mao usab kini ang gipasabot ni apostol Juan niini nga panan-awon sa dihang siya miingon: “Ang Pulong nahimong unod ug mipuyo uban kanato, ug atong nakita ang iyang himaya, ang himaya nga ingon sa pagadawaton sa bugtong anak gikan sa amahan; ug siya puno sa dili-takos nga kalulot ug kamatuoran.” (Juan 1:14) Sa susama, ang pagkausab sa dagway motukod sa imong pagtuo sa matagnaong pulong ni Jehova.

Ang pagkausab sa dagway ug sa kaubang mga hitabo mopalig-on sa imong pagtuo nga si Jesu-Kristo mao ang Anak sa Diyos ug ang gisaad nga Mesiyas. Kini mopalig-on sa imong pagtuo sa pagkabanhaw ni Jesus ngadto sa kinabuhing espirituhanon sa langit. Kining katingalahang panan-awon angay mopauswag usab sa imong pagtuo sa kagamhanan sa Diyos, kay ang pagkausab sa dagway maoy pasiunang talan-awon sa himaya ug Harianong gahom ni Kristo.

Ilabinang makapalig-on sa pagtuo ang pagkasayod nga ang pagkausab sa dagway ni Kristo nagpunting sa atong adlaw, sa dihang ang presensiya ni Kristo mahimong kamatuoran. (Mateo 24:3-14) Sukad sa 1914 siya nagmando na ingong tinudlong Hari sa Diyos sa mga langit. Ang iyang hinatag-sa-Diyos nga awtoridad ug gahom sa dili madugay igapadayag batok sa tanang mga kaaway sa balaang pagmando, magabukas sa dalan alang sa usa ka bag-ong kalibotan. (2 Pedro 3:13) Ikaw makapahimulos sa walay kataposang mga panalangin niini kon ikaw magpadayag ug pagtuo sa kahibulongang mga butang nga gilarawan sa pagkausab sa dagway ni Jesu-Kristo.