Kristohanong mga Saksi nga May Langitnong Pagkalungsoranon
“Alang kanato, ang atong pagkalungsoranon nagalungtad sa mga langit.”—FILIPOS 3:20.
1. Unsa ang kahibulongang katuyoan ni Jehova bahin sa pipila ka tawo?
MGA indibiduwal nga natawong mga yutan-on magmando isip nga mga hari ug mga saserdote sa langit, bisan ibabaw sa mga manulonda. (1 Corinto 6:2, 3; Pinadayag 20:6) Pagkakatingalahan kanang kamatuorana! Bisan pa, katuyoan kana ni Jehova, ug siya magpalampos niini pinaagi sa iyang bugtong nga Anak, si Jesu-Kristo. Nganong himoon kana sa atong Maglalalang? Ug sa unsang paagi maapektahan ang usa ka Kristohanon karong adlawa sa kasayoran niini? Tan-awon nato kon sa unsang paagi tubagon sa Bibliya ang maong mga pangutana.
2. Unsang bag-ong butang ang gipahibalo ni Juan Bawtista nga buhaton ni Jesus, ug sa unsa nalangkit kining bag-ong butang?
2 Sa dihang giandam ni Juan Bawtista ang dalan alang kang Jesus, iyang gipahibalo nga may butang bag-o nga buhaton si Jesus. Ang talaan nag-ingon: “[Si Juan] magwali, nga moingon: ‘Sunod kanako may moanhi nga usang mas kusganon kay kanako; ako dili angayan sa pagyuko ug sa pagbadbad sa mga liston sa iyang mga sandalyas. Ako nagbawtismo kaninyo pinaagi sa tubig, apan siya magbawtismo kaninyo pinaagi sa balaang espiritu.’” (Marcos 1:7, 8) Una pa nianang panahona, walay usang nabawtismohan pinaagi sa balaang espiritu. Kadto maoy usa ka bag-ong kahikayan nga naglangkit sa balaang espiritu, ug kadto may kalabotan sa hapit-nang-ipadayag nga katuyoan ni Jehova nga mag-andam ug mga tawo alang sa langitnong pagmando.
‘Gipakatawo Pag-usab’
3. Unsang bag-ong mga butang bahin sa Gingharian sa langit ang gisaysay ni Jesus kang Nicodemo?
3 Sa usa ka sekretong pakigtagbo sa usa ka iladong Pariseo, gibutyag ni Jesus ang labaw pa bahin nianang balaang katuyoan. Ang Pariseo, si Nicodemo, miadto kang Jesus sa gabii, ug siya gisultihan ni Jesus: “Gawas kon ang usa ipakatawo pag-usab, dili niya makita ang gingharian sa Diyos.” (Juan 3:3) Si Nicodemo, kinsa ingong Pariseo nakatuon gayod ug Hebreohanong Kasulatan, may kasayoran bahin sa bililhong kamatuoran sa Gingharian sa Diyos. Ang basahong Daniel nagtagna nga ang Gingharian igahatag ngadto sa “usa nga sama sa anak sa tawo” ug sa “katawhan nga mao ang mga balaan sa Supremong Usa.” (Daniel 7:13, 14, 27) Ang Gingharian “magadugmok ug magalaglag” sa tanang ubang mga gingharian ug mobarog sa walay kataposan. (Daniel 2:44) Lagmit, si Nicodemo naghunahuna nga kanang mga tagnaa matuman maylabot sa Hudiyonhong nasod; apan si Jesus miingon nga aron makakita sa Gingharian, ang usa kinahanglang ipakatawo pag-usab. Wala makasabot si Nicodemo, busa si Jesus mipadayon sa pag-ingon: “Gawas kon ang usa ipakatawo gikan sa tubig ug espiritu, siya dili makasulod sa gingharian sa Diyos.”—Juan 3:5.
4. Alang niadtong natawo gikan sa balaang espiritu, sa unsang paagi mausab ang ilang relasyon uban kang Jehova?
4 Nakahisgot si Juan Bawtista bahin sa bawtismo pinaagi sa balaang espiritu. Niadtong tungora, gidugang ni Jesus nga ang usa ka indibiduwal kinahanglang matawo gikan sa balaang espiritu aron siya makasulod sa Gingharian sa Diyos. Pinaagi niining talagsaong pagkatawo, ang dili-hingpit nga mga lalaki ug mga babaye mosulod sa usa ka linain kaayong relasyon uban kang Jehova nga Diyos. Mahimo sila nga iyang sinagop nga mga anak. Atong mabasa: “Kon unsa kadaghan ang midawat [kang Jesus], ngadto kanila siya mihatag ug awtoridad nga mahimong mga anak sa Diyos, tungod kay sila nanagpasundayag man ug pagtuo sa iyang ngalan; ug sila nangatawo, dili gikan sa dugo o sa kabubut-ong unodnon o sa kabubut-on sa tawo, apan sa Diyos.”—Juan 1:12, 13; Roma 8:15.
Mga Anak sa Diyos
5. Kanus-a ba nabawtismohan sa balaang espiritu ang matinumanong mga tinun-an, ug unsang may-kalangkitang mga paglihok sa balaang espiritu ang nahitabo sa samang panahon?
5 Sa dihang si Jesus nakigsulti kang Nicodemo, si Jesus nadihogan na sa balaang espiritu, nga gidihogan siya alang sa umaabot niyang pagmando sa Gingharian sa Diyos, ug sa publiko ang Diyos nag-ila kang Jesus isip Iyang Anak. (Mateo 3:16, 17) Gipakatawo ni Jehova ang dugang espirituwal nga mga anak sa Pentekostes 33 K.P. Ang matinumanong mga tinun-an nga nagtigom sa itaas nga lawak sa Jerusalem gibawtismohan pinaagi sa balaang espiritu. Sa samang panahon, sila natawo pag-usab gikan sa balaang espiritu aron mahimong espirituwal nga mga anak sa Diyos. (Buhat 2:2-4, 38; Roma 8:15) Dugang pa, gidihogan sila pinaagi sa balaang espiritu alang sa umaabot langitnong panulondon, ug sila sa sinugdan gitimrihan pinaagi sa balaang espiritu ingong usa ka timaan sa pagkasegurado sa maong langitnong paglaom.—2 Corinto 1:21, 22.
6. Unsa ang katuyoan ni Jehova bahin sa langitnong Gingharian, ug nganong haom nga adunay bahin niini ang mga tawo?
6 Kini sila ang unang mga tawong dili hingpit nga gipili sa Diyos nga mosulod sa Gingharian. Nga mao, human sa ilang pagkamatay ug pagkabanhaw, sila mamahimong bahin sa langitnong Ginghariang organisasyon nga magmando ibabaw sa mga tawo ug mga manulonda. Gituyo ni Jehova nga pinaagi sa maong Gingharian, ang iyang dakong ngalan mabalaan ug ang iyang pagkasoberano mabindikar atubangan sa tanang kalalangan. (Mateo 6:9, 10; Juan 12:28) Pagkahaom nga adunay bahin ang mga tawo sa maong Gingharian! Gigamit ni Satanas ang mga tawo sa iyang gipatugbaw ang iyang unang hagit batok sa pagkasoberano ni Jehova balik sa tanaman sa Eden, ug karon gituyo ni Jehova nga ang mga tawo malangkit sa pagtubag sa maong hagit. (Genesis 3:1-6; Juan 8:44) Si apostol Pedro misulat ngadto sa mga indibiduwal nga napiling magmando sa maong Gingharian: “Bulahan ang Diyos ug Amahan sa atong Ginoong Jesu-Kristo, kay sumala sa iyang dakong kaluoy siya mihatag kanato ug usa ka bag-ong pagkahimugso ngadto sa usa ka buhi nga paglaom pinaagi sa pagkabanhaw ni Jesu-Kristo gikan sa mga patay, ngadto sa usa ka dili-madunoton ug wala-mahugawi ug dili-malawos nga panulundon. Gitagana kini didto sa mga langit alang kaninyo.”—1 Pedro 1:3, 4.
7. Unsang linaing relasyon uban kang Jesus ang gipahimuslan niadtong gibawtismohan sa balaang espiritu?
7 Ingong sinagop nga mga anak sa Diyos, kining piniling mga Kristohanon nahimong mga igsoon ni Jesu-Kristo. (Roma 8:16, 17; 9:4, 26; Hebreohanon 2:11) Sanglit si Jesus mao ang Binhi nga gisaad kang Abraham, kining dinihogan-sa-espiritung mga Kristohanon maoy kauban, o kaabag, nga bahin sa maong Binhi, nga maoy maghatag ug panalangin sa matinuohong mga tawo. (Genesis 22:17, 18; Galacia 3:16, 26, 29) Unsang panalangina? Ang higayon nga matubos gikan sa sala ug mapasig-uli ngadto sa Diyos ug mag-alagad kaniya karon ug hangtod sa kahangtoran. (Mateo 4:23; 20:28; Juan 3:16, 36; 1 Juan 2:1, 2) Ang dinihogang mga Kristohanon sa yuta nagtultol sa mga matarong ug kasingkasing nganha sa maong panalangin pinaagi sa pagsaksi bahin sa ilang espirituwal nga igsoong si Jesu-Kristo ug sa ilang masagopong Amahan, si Jehova nga Diyos.—Buhat 1:8; Hebreohanon 13:15.
8. Unsa ang “pagpadayag” sa gipanganak-sa-espiritung mga anak sa Diyos?
8 Gihisgotan sa Bibliya ang “pagpadayag” niining gipanganak-sa-espiritung mga anak sa Diyos. (Roma 8:19) Ingong kaabag nga mga hari sa Gingharian uban kang Jesus, moapil sila sa paglaglag sa tibuok-kalibotang sistema sa mga butang ni Satanas. Human niana, sulod sa usa ka libo ka tuig, motabang sila sa pagpaagos sa mga kaayohan sa halad lukat ngadto sa katawhan ug sa maong paagi mabayaw ang tawhanong rasa ngadto sa kahingpitan nga giwala ni Adan. (2 Tesalonica 1:8-10; Pinadayag 2:26, 27; 20:6; 22:1, 2) Kining tanan nalakip sa ilang pagpadayag. Butang kini nga maikagong ginapaabot sa matinuohong katawhan.
9. Unsay pagtawag sa Bibliya sa tibuok-kalibotang lawas sa dinihogang mga Kristohanon?
9 Ang tibuok-kalibotang lawas sa dinihogang mga Kristohanon mao “ang kongregasyon sa mga panganay nga nahitala sa mga langit.” (Hebreohanon 12:23) Una silang makabatog kaayohan sa halad lukat ni Jesus. Sila mao usab “ang lawas ni Kristo,” nga nagpakita sa ilang suod kaayong relasyon sa usag usa ug kang Jesus. (1 Corinto 12:27) Si Pablo misulat: “Maingon nga ang lawas usa apan daghag sangkap, ug ang tanang sangkap niana nga lawas, bisan tuod daghan, maoy usa ra ka lawas, ingon man usab ang Kristo. Kay sa pagkamatuod pinaagi sa usa ka espiritu kitang tanan gibawtismohan ngadto sa usa ka lawas, Judio man o Griego, ulipon man o gawasnon, ug kitang tanan gipainom ug usa ka espiritu.”—1 Corinto 12:12, 13; Roma 12:5; Efeso 1:22, 23; 3:6.
“Ang Israel sa Diyos”
10, 11. Sa unang siglo, nganong gikinahanglan ang usa ka bag-ong Israel, ug kinsay naglangkob niining bag-ong nasod?
10 Sulod sa kapig 1,500 ka tuig una moanhi si Jesus isip ang gisaad nga Mesiyas, ang unodnong nasod sa Israel mao ang espesyal nga katawhan ni Jehova. Bisan pa sa makanunayong mga pahinumdom, sa kinatibuk-an ang nasod wala magmatinumanon. Sa pag-abot ni Jesus, ang nasod nagsalikway kaniya. (Juan 1:11) Busa, giingnan ni Jesus ang Hudiyong mga pangulo sa relihiyon: “Ang gingharian sa Diyos kuhaon gikan kaninyo ug ihatag sa nasod nga magpatunghag mga bunga niini.” (Mateo 21:43) Ang pagkaila sa maong “nasod nga magpatungha sa mga bunga [sa Gingharian]” mahinungdanon alang sa kaluwasan.
11 Ang bag-ong nasod mao ang dinihogang Kristohanong kongregasyon, nga natawo sa Pentekostes 33 K.P. Ang unang mga membro niini maoy Hudiyong mga tinun-an ni Jesus nga nagdawat kaniya isip ilang langitnong Hari. (Buhat 2:5, 32-36) Bisan pa, sila maoy mga membro sa bag-ong nasod sa Diyos, dili gipasukad sa ilang Hudiyonhong kagikan, kondili gipasukad sa pagtuo diha kang Jesus. Busa, kining bag-ong Israel sa Diyos maoy linaing butang—usa ka espirituwal nga nasod. Sa dihang ang kinabag-ang Hudiyo wala modawat kang Jesus, ang imbitasyon sa pagkahimong bahin sa bag-ong nasod gipaabot ngadto sa mga Samarianhon ug unya ngadto sa mga Hentil. Ang bag-ong nasod gitawag “ang Israel sa Diyos.”—Galacia 6:16.
12, 13. Sa unsang paagi natin-aw nga ang bag-ong Israel dili lamang usa ka sekta sa Hudaismo?
12 Sa karaang Israel, sa dihang ang mga dili-Hudiyo nahimong mga kinabig, sila kinahanglang magpailalom sa Moisesnong Kasugoan, ug kinahanglang pasimbolohan kini sa mga lalaki pinaagi sa pagpatuli. (Exodo 12:48, 49) Ang pila ka Hudiyong mga Kristohanon mibati nga angay usab kanang ipadapat ngadto sa mga dili-Hudiyo sa Israel sa Diyos. Apan, diha sa kaisipan ni Jehova ang laing butang. Gitultolan sa balaang espiritu si apostol Pedro ngadto sa balay sa Hentil nga si Cornelio. Sa dihang si Cornelio ug ang iyang pamilya misanong sa pagwali ni Pedro, ilang nadawat ang balaang espiritu—bisan sa wala pa sila mabawtismohi sa tubig. Tin-awng gipakita niini nga si Jehova nagdawat sa maong mga Hentil isip mga membro sa Israel sa Diyos nga wala magbaod nga sila magpailalom sa Moisesnong Kasugoan.—Buhat 10:21-48.
13 Ang pila ka magtutuo nalisdan sa pagdawat niini, ug sa wala madugay ang bug-os nga butang gihisgotan gayod sa mga apostol ug mga ansiano sa Jerusalem. Kanang may-pagbulot-an nga lawas namati sa pamatuod nga detalyadong naghisgot kon giunsa paglihok sa balaang espiritu diha sa dili-Hudiyong mga magtutuo. Gipadayag sa panukiduki sa Bibliya nga katumanan kadto sa dinasig nga tagna. (Isaias 55:5; Amos 9:11, 12) Ang usa ka hustong desisyon nakab-ot: Ang dili-Hudiyong mga Kristohanon dili na kinahanglang magpailalom sa Moisesnong Kasugoan. (Buhat 15:1, 6-29) Busa, ang espirituwal nga Israel tinuod nga bag-ong nasod ug dili lamang usa ka sekta sa Hudaismo.
14. Unsay gipasabot sa pagtawag ni Santiago sa Kristohanong kongregasyon nga ang “napulog-duha ka tribo nga nangatibulaag”?
14 Nahiuyon niini, sa pagsulat ngadto sa dinihogang mga Kristohanon sa unang siglo, gitumong sa tinun-ang si Santiago ang iyang sulat ngadto sa “napulog-duha ka tribo nga nangatibulaag.” (Santiago 1:1; Pinadayag 7:3-8) Siyempre, ang mga lungsoranon sa bag-ong Israel wala itudlo sa espisipikong mga tribo. Wala bahina sa 12 ka linaing mga tribo ang espirituwal nga Israel ingon sa kahimtang sa unodnong Israel. Bisan pa niana, ang dinasig nga pahayag ni Santiago nagpaila nga sa panud-ong ni Jehova hingpit nga gipulihan sa Israel sa Diyos ang 12 ka tribo sa kinaiyanhong Israel. Kon ang usa ka kinaiyanhong Israelinhon mahimong bahin sa bag-ong nasod, ang iyang unodnong kagikan—bisan pag siya sakop sa tribo sa Juda o Levi—dili bililhon.—Galacia 3:28; Filipos 3:5, 6.
Usa ka Bag-ong Pakigtugon
15, 16. (a) Unsay panud-ong ni Jehova sa dili-Hudiyong mga membro sa Israel sa Diyos? (b) Sa unsang legal nga pasikaranan gitukod ang bag-ong Israel?
15 Sa panud-ong ni Jehova, ang dili-Israelinhong mga membro niining bag-ong nasod maoy bug-os espirituwal nga mga Hudiyo! Si apostol Pablo mipatin-aw: “Siya dili Hudiyo nga sumala sa panggawas, ni ang pagkatinuli maoy sa panggawas diha sa unod. Apan siya Hudiyo nga sumala sa pangsulod, ug ang iyang pagkatinuli maoy sa kasingkasing pinaagi sa espiritu, ug dili pinaagig sinulat nga kalagdaan. Ang pagdayeg niana nga usa magagikan, dili sa tawo, apan gikan sa Diyos.” (Roma 2:28, 29) Daghang Hentil ang midawat sa imbitasyon aron mahimong bahin sa Israel sa Diyos, ug kining maong hitabo nagtuman sa tagna sa Bibliya. Pananglitan, si propeta Oseas misulat: “Akong ipakita ang kaluoy kaniya nga wala pakitaig kaluoy, ug ako magaingon niadtong dili akong katawhan: ‘Kamo ang akong katawhan’; ug sila, sa ilang bahin, magaingon: ‘Ikaw mao ang akong Diyos.’”—Oseas 2:23; Roma 11:25, 26.
16 Kon ang espirituwal nga mga Israelinhon dili ilalom sa pakigtugon sa Moisesnong Kasugoan, unsay gipasikaran sa ilang pagkasakop sa bag-ong nasod? Si Jehova mihimog usa ka bag-ong pakigtugon uban niining espirituwal nga nasod pinaagi ni Jesus. (Hebreohanon 9:15) Sa gisugdan ni Jesus ang Memoryal sa iyang kamatayon, sa Nisan 14, 33 K.P., iyang gipasa ang tinapay ug bino ngadto sa 11 ka matinumanong mga apostol ug miingon nga ang bino nagsimbolo sa “dugo sa pakigtugon.” (Mateo 26:28; Jeremias 31:31-34) Sumala sa giasoy sa talaan ni Lucas, si Jesus miingon nga ang kopa sa bino nagsimbolo sa “bag-ong pakigtugon.” (Lucas 22:20) Isip katumanan sa mga pulong ni Jesus, sa dihang gibubo ang balaang espiritu sa Pentekostes ug ang Israel sa Diyos natawo, ang Gingharian gikuha gikan sa unodnong Israel ug gihatag ngadto sa bag-o, espirituwal nga nasod. Imbes ang unodnong Israel, ang maong bag-ong nasod karon mao ang alagad ni Jehova, nga gilangkoban sa iyang mga saksi.—Isaias 43:10, 11.
“Bag-ong Jerusalem”
17, 18. Unsang mga kabatbatan ang gihatag diha sa basahong Pinadayag bahin sa himayang nagpaabot sa dinihogang mga Kristohanon?
17 Pagkadakong himaya ang nagpaabot niadtong nabulahan nga makaambit sa langitnong pagkatinawag! Ug pagkakahimut-anan ang pagkasayod sa kahibulongang mga butang nga nagpaabot kanila! Ang basahong Pinadayag naghatag kanato ug makalilipayng pasiunang mga talan-awon sa ilang langitnong panulondon. Pananglitan, sa Pinadayag 4:4, atong mabasa: “Palibot sa trono [ni Jehova] may kaluhaag-upat ka trono, ug diha niini nga mga trono akong nakita nga naglingkod ang kaluhaag-upat ka ansiano nga nagsininag puting panggawas nga mga bisti, ug diha sa ilang ulo mga koronang bulawan.” Kining 24 ka ansiano maoy dinihogang mga Kristohanon, nga gibanhaw ug karon nagalingkod sa langitnong katungdanan nga gisaad kanila ni Jehova. Ang ilang mga korona ug mga trono magpahinumdom kanato sa ilang pagkaharianon. Hunahunaa, usab, ang ilang kahibulongang hataas nga pribilehiyo sa pag-alagad palibot sa trono ni Jehova!
18 Sa Pinadayag 14:1, mapasiklapan nato ang ilang laing hulagway: “Nakita ko, ug, tan-awa! ang Kordero nga nagabarog diha sa Bukid Zion, ug may uban kaniya nga usa ka gatos ug kap-atag-upat ka libo nga nagabaton sa iyang ngalan ug sa ngalan sa iyang Amahan nga nahisulat diha sa ilang mga agtang.” Dinhi atong makita ang limitadong gidaghanon niining mga dinihogan—144,000. Ang ilang harianong kahimtang mailhan sa pagkaaging sila nagbarog uban sa naentronong Hari ni Jehova, “ang Kordero,” si Jesus. Ug sila atua sa langitnong Bukid Zion. Ang yutan-ong Bukid Zion mao ang puwesto sa Jerusalem, ang harianong siyudad sa Israel. Ang langitnong Bukid Zion naghawas sa binayaw nga katungdanan ni Jesus ug sa iyang kaubang mga manununod, kinsa naglangkob sa langitnong Jerusalem.—2 Cronicas 5:2; Salmo 2:6.
19, 20. (a) Ang dinihogang mga Kristohanon mahimong bahin sa unsang langitnong organisasyon? (b) Sa unsang yugto sa panahon nga gipili ni Jehova kadtong kansang pagkalungsoranon didto unya sa mga langit?
19 Nahiuyon niini, ang mga dinihogan diha sa ilang langitnong kahimayaan gihisgotan usab isip “Bag-ong Jerusalem.” (Pinadayag 21:2) Ang yutan-ong Jerusalem mao “ang siyudad sa dakong Hari” ug ang puwesto usab sa templo. (Mateo 5:35) Ang langitnong Bag-ong Jerusalem mao ang harianong organisasyon sa Gingharian nga pinaagi niana ang dakong Soberano, si Jehova, ug ang iyang tinudlong Hari, si Jesus, karon nagmando na ug diin ang saserdotehanong pag-alagad gihimo samtang ang dagayang mga panalangin nag-agos gikan sa trono ni Jehova aron pagaayohon ang katawhan. (Pinadayag 21:10, 11; 22:1-5) Sa laing panan-awon si Juan nakabati nga ang matinumanon, binanhaw, dinihogang mga Kristohanon gitawag nga ‘ang asawa sa Kordero.’ Pagkamakalilipayng ilustrasyon ang gipaila niini sa panagsandurot nga ilang mapahimuslan uban kang Jesus ug sa ilang masinugtanong pagpasakop kaniya! Handurawa ang kalipay sa langit sa dihang ang kataposang membro nila makadawat na gayod sa iyang langitnong ganti. Karon, sa kataposan, “ang kasal sa Kordero” mahitabo na! Unya ang maong harianong langitnong organisasyon mabug-os na.—Pinadayag 19:6-8.
20 Oo, ang kahibulongang mga panalangin nagpaabot niadtong bahin kanila miingon si apostol Pablo: “Alang kanato, ang atong pagkalungsoranon nagalungtad sa mga langit.” (Filipos 3:20) Sulod sa halos duha ka libo ka tuig, si Jehova nagpili sa iyang espirituwal nga mga anak ug nagaandam kanila alang sa langitnong panulondon. Sumala sa tanang ebidensiya, kining pagpili ug pag-andam nga buluhaton hapit nang mahuman. Apan daghan pa ang mosunod, sumala sa gipadayag kang Juan diha sa iyang panan-awon nga nahitala sa Pinadayag kapitulo 7. Busa karon, ang laing grupo sa mga Kristohanon ang nagkinahanglan sa atong pagtagad, ug atong hisgotan kining grupoha sa sunod artikulo.
Nahinumdom Ka Ba?
◻ Unsa ang nagkalainlaing mga paglihok sa espiritu diha niadtong may langitnong panulondon?
◻ Unsang suod nga relasyon ang napahimuslan sa mga dinihogan uban kang Jehova? uban kang Jesus?
◻ Giunsa pagbatbat sa Bibliya ang kongregasyon sa dinihogang mga Kristohanon?
◻ Sa unsang legal nga pasikaranan gitukod ang Israel sa Diyos?
◻ Unsang langitnong mga pribilehiyo ang nagpaabot sa dinihogang mga Kristohanon?
[Hulagway sa panid 10]
Latas sa yugtong halos duha ka libo ka tuig, gipili ni Jehova ang mga magmando sa langitnong Gingharian