LEKSIYON 40
Sa Unsang Paagi Mahimo Tang Hinlo sa Panan-aw sa Diyos?
Imadyina ang usa ka mahigugmaong inahan nga nag-andam sa iyang gamayng anak sa dili pa ni moadto sa eskuwelahan. Iyang seguroon nga nakaligo ang bata ug nga ang sinina niini hapsay ug hinlo. Pinaagi niini, magpabiling himsog ang bata ug makita sa uban nga giatiman gyod siya sa iyang ginikanan. Sa susama, ang atong mahigugmaong Amahan, si Jehova, gusto nga hinlo ta—sa pisikal ug moral. Kon hinlo ta, makabenepisyo ta ug mapasidunggan nato siya.
1. Unsay atong himoon aron mahimong hinlo sa pisikal?
Giingnan ta ni Jehova: “Magmabalaan mo.” (1 Pedro 1:16) Para mahimo tang balaan, kinahanglang hinlo ta sa pisikal ug moral. Mahimo tang hinlo sa pisikal pinaagi sa regular nga pagligo ug sa pagmentinar sa kahinlo sa atong sinina, balay, ug sakyanan. Makatabang pod ta sa paghinlo sa atong Kingdom Hall. Pinaagi sa pagpabiling hinlo sa pisikal, atong mapasidunggan si Jehova.—2 Corinto 6:3, 4.
2. Aron mahimong hinlo, unsa nga mga batasan ug buhat ang angay natong likayan?
Gidasig ta sa Bibliya nga “hinloan nato ang atong kaugalingon sa tanang kahugawan sa unod ug espiritu.” (2 Corinto 7:1) Busa angay natong likayan ang bisan unsa nga makadaot sa atong lawas o hunahuna. Ang atong ginahunahuna angayng makapalipay kang Jehova, busa maningkamot gyod tang suklan ang sayop nga panghunahuna. (Salmo 104:34) Maningkamot pod ta nga hinlo ang atong sinultihan.—Basaha ang Colosas 3:8.
Unsa pay makapahugaw nato sa pisikal ug moral? Naay mga substansiya nga makahugaw sa atong lawas. Busa dili gyod ta manigarilyo, magmama, ug magdroga. Kon ato nang himoon, mas mohimsog ta ug atong mapakita nga naa tay pagtahod sa regalo nga kinabuhi. Maningkamot pod ta nga mahimong hinlo sa moral pinaagi sa pagsukol sa hugawng mga buhat, sama sa masturbasyon ug pagtan-awg pornograpiya. (Salmo 119:37; Efeso 5:5) Kini nga mga batasan ug buhat lisod tingaling hunongon, pero makaya nato ni sa tabang ni Jehova.—Basaha ang Isaias 41:13.
TUN-IG DUGANG
Sayra kon nganong ang pisikal nga kahinlo magpasidungog kang Jehova ug kon unsay himoon aron mahunong ang hugawng mga buhat.
3. Ang pisikal nga kahinlo magpasidungog kang Jehova
Mahibaloan nato ang panghunahuna ni Jehova bahin sa kahinlo pinaagi sa pagsusi sa iyang mga sugo sa karaang Israel. Basaha ang Exodo 19:10 ug 30:17-19, ug dayon hisgoti kini nga mga pangutana:
Unsay makat-onan nato niini nga mga teksto bahin sa panghunahuna ni Jehova sa pisikal nga kahinlo?
Unsay regular nimong himoon aron pirme kang hinlo sa pisikal?
Ang kahinlo sa pisikal nagkinahanglag panahon ug paningkamot. Pero mahimo nato na bisan asa ta nagpuyo, dato man ta o dili. I-play ang VIDEO, ug dayon hisgoti ang mosunod nga pangutana:
Nganong madayeg si Jehova kon hinlo ang atong mga gamit dihang mosangyaw ta?
4. Hunonga ang dili maayong mga buhat
Si Jehova makatabang nato sa paghunong sa bisan unsang dili maayong buhat
Kon nanigarilyo ka o nagdroga, nahibalo tingali ka kon unsa ka lisod ang paghunong niana. Unsay makatabang? Sayra kon unsay epekto niana nga mga buhat kanimo. Basaha ang Mateo 22:37-39, ug dayon hisgoti kon sa unsang paagi ang pagpanigarilyo o pagdroga sa usa ka tawo makaapektar sa . . .
iyang relasyon kang Jehova.
iyang pamilya ug sa mga tawo sa iyang palibot.
Paghimog plano kon unsaon paghunong ang dili maayong buhat.a I-play ang VIDEO.
Basaha ang Filipos 4:13, ug dayon hisgoti kini nga pangutana:
Nganong ang regular nga pag-ampo, pagtuon sa Bibliya, ug pagtambong sa tigom maghatag sa usa ka tawo ug kusog sa paghunong sa dili maayong buhat?
5. Sukli ang hugawng panghunahuna ug buhat
Basaha ang Colosas 3:5, ug dayon hisgoti kini nga mga pangutana:
Nganong ang pornograpiya, sexting, ug masturbasyon hugaw sa panan-aw ni Jehova?
Para nimo, rasonable bang magdahom si Jehova nga mahimo tang hinlo sa moral? Ngano?
Sayra kon sa unsang paagi nato masuklan ang hugawng panghunahuna. I-play ang VIDEO.
Si Jesus migamit ug ilustrasyon aron ipakita nga kinahanglang determinado tang buhaton kon unsay gikinahanglan aron magpabiling hinlo sa moral. Basaha ang Mateo 5:29, 30, ug dayon hisgoti kini nga pangutana:
Wala ipasabot ni Jesus nga kinahanglan natong pasakitan ang atong kaugalingon. Hinuon, iyang gipakita nga kinahanglan tang mohimog aksiyon. Unsay kinahanglang himoon sa usa aron malikayan niya ang hugawng panghunahuna?b
Kon naningkamot ka nga masuklan ang hugawng panghunahuna, gipabilhan na ni Jehova. Basaha ang Salmo 103:13, 14, ug dayon hisgoti kini nga pangutana:
Kon nakigbisog ka sa hugawng buhat, nganong kini nga teksto makatabang nimo?
Ayawg surender!
Basin makahunahuna ka nga mosurender na lang kay masipyat man gihapon ka. Pero hunahunaa ni: Kon ang usa ka runner madagma ug matumba, wala na magpasabot nga napildi na siya sa lumba o kinahanglan siyang mosugod pag-usab sa lumba. Sa susama, kon nasipyat na pod ka, wala na magpasabot nga wala na kay paglaom nga magbag-o. Wala pod na magpasabot nga balewala na lang tong imong mga paningkamot. Dihang mohimo kag mga kausaban, normal ra nga masipyat usahay. Busa ayawg surender! Sa tabang ni Jehova, mahunong nimo ang dili maayong buhat.
ANG UBAN MOINGON: “Naadik na ko. Dili nako ni kayang hunongon.”
Unsang teksto ang puwede nimong gamiton aron ipakita nga kaya niyang hunongon ang dili maayong buhat sa tabang ni Jehova?
SUMARYO
Mapalipay nato si Jehova kon pirmeng hinlo ang atong lawas, hunahuna, ug binuhatan.
Review
Nganong importante kaayo nga mahimong hinlo?
Unsay imong himoon aron mahimong hinlo sa pisikal?
Unsay imong himoon aron pirmeng hinlo ang imong hunahuna ug binuhatan?
SUSIHA
Unsang simpleng mga butang ang imong mahimo aron hinlo ka sa pisikal bisag dili ka dato?
Sayra kon unsay praktikal nga himoon aron mahunong nimo ang pagpanigarilyo.
“Kon Unsaon Paghunong sa Pagpanigarilyo” (Pagmata!, Mayo 2010)
Susiha ang mga epekto sa pornograpiya.
“Pornograpiya—Makadaot o Dili?” (Ang Bantayanang Torre, Agosto 1, 2013)
Sayra kon unsay gihimo sa usa ka tawo aron mahunong niya ang pagtan-awg pornograpiya.
“Kadaghan Ko Napakyas Una Ko Milampos” (Ang Bantayanang Torre Num. 4 2016)
a Ang “Kon Unsaon Paghunong sa Pagpanigarilyo,” nga naa sa Susiha nga seksiyon niini nga leksiyon, naghisgot kon unsay praktikal nga himoon aron mahunong ang usa ka bisyo.
b Para sa tabang kon unsaon paghunong ang batasan sa masturbasyon, tan-awa ang “Unsaon Nako Pagbuntog ang Batasan sa Pagmasturbar?” sa librong Mga Pangutanang Gisukna sa mga Batan-on—Mga Tubag nga Mosaler, Tomo 1, kapitulo 25.