Naila ba Nimo ang Ilhanan sa Presensiya ni Jesus?
WALAY usa ang gustong masakit o makaagom ug katalagman. Aron malikayan ang maong mga kadaot, ang maalamong tawo magbantay gayod sa mga timailhan sa kapeligrohan ug molihok sumala niana. Gihubit ni Jesu-Kristo ang usa ka partikular nga ilhanan nga angay natong mailhan. Ang ilhanan nga gihisgotan niya mag-apektar sa tanang tawo sa kalibotan. Naglakip kana kanimo ug sa imong pamilya.
Si Jesus naghisgot bahin sa Gingharian sa Diyos, nga magwagtang unya sa pagkadaotan ug maghimo sa yuta nga paraiso. Ang iyang mga tinun-an gustong masayod bahin niini ug kon kanus-a moabot ang maong Gingharian. Sila nangutana: “Unsa man unya ang ilhanan sa imong presensiya ug sa kataposan sa sistema sa mga butang?”—Mateo 24:3.
Si Jesus nasayod nga human siya mamatay ug mabanhaw, daghang katuigan pa ang molabay una siya maentrono sa langit ingong Mesiyanikong Hari nga magmando sa katawhan. Tungod kay dili man makita sa mga tawo ang pag-entrono kaniya, si Jesus mihatag ug ilhanan aron mailhan sa iyang mga sumusunod ang iyang “presensiya” ug ang “kataposan sa sistema sa mga butang.” Kining maong ilhanan gilangkoban ug daghang bahin, nga sa tingob magtimaan sa panahon sa presensiya ni Jesus.
Ang mga magsusulat sa ebanghelyo nga sila si Mateo, Marcos, ug Lucas maampingong nagrekord sa tubag ni Jesus. (Mateo, mga kapitulo 24 ug 25; Marcos, kapitulo 13; Lucas, kapitulo 21) Ang ubang mga magsusulat sa Bibliya naghatag ug dugang detalye bahin sa maong ilhanan. (2 Timoteo 3:1-5; 2 Pedro 3:3, 4; Pinadayag 6:1-8; 11:18) Dili nato mahisgotan ang tanang detalye tungod sa kakulang sa luna, apan tagdon nato ang lima ka pangunang mga bahin nga naglangkob sa ilhanan nga gihisgotan ni Jesus. Imo unyang makita nga kini hinungdanon kanimo.—Tan-awa ang kahon sa panid 6.
“Dakong Kausaban sa Kasaysayan”
“Ang nasod motindog batok sa nasod ug ang gingharian batok sa gingharian.” (Mateo 24:7) Ang Alemang magasin nga Der Spiegel nagtaho nga sa wala pa ang 1914, ang mga tawo “nagtuo sa usa ka bulawanong umaabot nga adunay mas labawng kagawasan, kauswagan, ug kadagaya.” Unya ang tanan nausab. “Ang gubat nga nagsugod sa Agosto 1914 ug natapos sa Nobyembre 1918 maoy usa ka makapakurat nga panghitabo. Kini nagpahinabog kalit nga kausaban sa kasaysayan sa tawo, nga nagbahin niana sa daan ug sa bag-o,” nagpahayag ang magasing GEO. Kapin sa 60 ka milyong sundalo sa lima ka kontinente ang nakigsangka sa mabangis nga gubat. Sa aberids, mga 6,000 ka sundalo ang namatay kada adlaw. Sukad niadto, ang mga historyano sa tanang kaliwatan ug sa bisan unsang politikanhong ideolohiya naglantaw sa “katuigang 1914 hangtod 1918 ingong usa ka yugto sa panahon nga nagpahinabog dakong kausaban sa kasaysayan.”
Ang Gubat sa Kalibotan I nagpahinabog permanenteng kausaban sa tawhanong katilingban ug nagbanlod sa katawhan ngadto sa kataposang mga adlaw niining sistema sa mga butang. Daghang gubat ug terorismo ang nahitabo sa nahibiling bahin niadtong sigloha. Ang kahimtang wala moarang-arang sa unang mga tuig niining sigloha. Gawas sa gubat, ang ubang bahin sa ilhanan nadayag usab.
Kagutom, Kamatay, ug mga Linog
“Aduna unyay mga kanihit sa pagkaon.” (Mateo 24:7) Ang kagutom mihampak sa Uropa panahon sa unang gubat sa kalibotan, ug kini nag-apektar sa katawhan sukad niadto. Ang historyano nga si Alan Bullock misulat nga sa Rusya ug Ukraine niadtong 1933, “dakong panon sa mga tawong nalunosan ang naglatagaw sa kabanikahan . . . Ang patayng mga lawas nagtipun-og sa daplin sa kadalanan.” Niadtong 1943, nasaksihan sa magsusulat nga si T. H. White ang kagutom nga nahitabo sa Henan, usa ka probinsiya sa Tsina. Siya misulat: “Panahon sa gutom, halos tanang butang puwedeng kaonon ug mahimong pinopinohon ug kan-on aron molagsik. Apan kon mag-atubang na gani sa hulga sa kamatayon, ang usa mapugos pagkaon sa mga butang nga dili angayng kaonon.” Ikasubo nga ang kagutom sa Aprika nahimong komon na kaayo niining di pa dugayng katuigan. Bisan tuod ang yuta makapatunghag igong pagkaon alang sa tanan, ang Food and Agriculture Organization sa HK nagbanabana nga 840 ka milyong tawo sa tibuok kalibotan ang halos walay makaon.
“Sa nagkalainlaing mga dapit mga kamatay.” (Lucas 21:11) “Ang trangkaso Espanyola gibanabanang nakapatay ug tali sa 20 ka milyon ug 50 ka milyong tawo sa 1918, labaw pa sa kamatay o sa unang gubat sa kalibotan,” nagtaho ang Süddeutsche Zeitung. Sukad niadto, daghang tawo ang natakboyan ug mga sakit sama sa malarya, buti, tesis, polyo, ug kolera. Ug ang kalibotan nalisang sa dili-mabangbang nga pagkaylap sa AIDS. Ang mga tawo karon naglibog kon nganong ang mga sakit nagpadayon sa paglungtad bisan pa sa makapahinganghang kauswagan sa natad sa medisina. Kining makalibog nga kahimtang, nga hangtod karon wala gihapon masabti sa mga tawo, tin-awng nagpaila nga talagsaon ang atong panahon.
“Mga linog.” (Mateo 24:7) Sa miaging 100 ka tuig, ang mga linog nakakalas ug gatosan ka libong kinabuhi. Sumala sa usa ka tinubdan, ang mga linog nga makagun-ob ug mga tinukod ug makapabuka sa yuta mahitabo sa aberids nga 18 ka beses kada tuig sukad sa 1914. Ang mas kusog nga mga linog, nga makapayhag ug mga tinukod mahitabo mga usa ka beses kada tuig. Bisan pa sa mga kauswagan sa teknolohiya, daghan gihapon ang mangamatay tungod kay daghang siyudad diin nagkadaghan ang pumoluyo ang gitukod sa mga dapit nga posibleng maglinog.
Makapalipayng Balita!
Kadaghanan sa mga bahin sa ilhanan sa kataposang mga adlaw makapasubo. Apan si Jesus naghisgot usab ug makapalipayng balita.
“Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran.” (Mateo 24:14) Ang buluhaton nga gisugdan mismo ni Jesus—ang pagsangyaw sa maayong balita sa Gingharian—modangat sa kinatayuktokan niini sa kataposang mga adlaw. Mao gayod kini ang nagakahitabo. Ang mga Saksi ni Jehova nagasangyaw sa mensahe sa Bibliya ug nagatudlo sa masinugtanong mga tawo sa pagpadapat sa ilang nakat-onan diha sa ilang adlaw-adlawng kinabuhi. Sa pagkakaron, kapin sa unom ka milyong Saksi ang nagsangyaw sa 235 ka kayutaan ug diha sa kapin sa 400 ka pinulongan.
Matikdi nga si Jesus wala moingon nga ang tanang kalihokan sa tawo mohunong tungod sa nagkagrabeng kahimtang sa kalibotan. Wala usab siya moingon nga ang tibuok kalibotan maapektohan sa usa lang ka bahin sa ilhanan. Apan nagtagna siya ug daghang panghitabo nga sa tingob magtimaan sa ilhanan nga klarong mailhan bisan asa sa yuta.
Inay kay motan-aw lang sa usa ka partikular nga panghitabo, nakita mo ba ang sunodsunod nga panghitabo, ang usa ka daghag-bahin nga ilhanan nga nag-apektar sa tibuok kalibotan? Ang nagakahitabo sa yuta nag-apektar kanimo ug sa imong pamilya. Apan, mangutana tingali kita kon ngano nga diyutay ra man ang nagpakabana.
Giuna ang Personal nga mga Interes
“Gidili ang Paglangoy Dinhi,” “Taas nga Boltahe,” “Menori ang Dagan.” Kini maoy pipila sa mga pasidaan nga atong makita apan kasagarang wala panumbalinga sa mga tawo. Ngano man? Dali ra kitang mahaylo sa pagbuhat kon unsay atong gihunahuna nga makaayo kanato. Pananglitan, basin bation nato nga kinahanglan kitang mopadagan ug kusog kay sa gitugot sa balaod, o basin gusto kaayo kitang molangoy sa dapit diin gidili kini. Apan ang dili pagpanumbaling sa mga pasidaan dili maalamon.
Pananglitan, ang pagdahili sa niyebe sa kabukiran sa Alps sa Austria, Italya, Pransiya, ug Switzerland makakalas usahay sa kinabuhi sa mga turista nga wala manumbaling sa mga pasidaang nag-awhag kanila sa pag-ski o pag-snowboard diha lamang sa luwas nga mga ruta. Sumala sa Süddeutsche Zeitung, daghang turista ang dili manumbaling sa maong mga pasidaan tungod kay alang kanila, dili sila mobatig kaukyab kon walay nalangkit nga risgo. Ikasubo nga ang dili pagpanumbaling sa mga pasidaan lagmit magpahinabog kadaot.
Unsay hinungdan nga gibalewala sa mga tawo ang ilhanan nga gihubit ni Jesus? Sila tingali nabutaan sa kahakog, wala magpakabana tungod sa kawalay-interes, dili makadesisyon tungod sa pagduhaduha, okupado sa adlaw-adlawng pagkinabuhi, o nahadlok nga mawad-ag dungog. Posible kaha nga ang usa niini maoy hinungdan nga ikaw wala manumbaling sa ilhanan sa presensiya ni Jesus? Dili ba mas maalamon ang pag-ila sa ilhanan ug paglihok sumala niana?
Kinabuhi sa Paraisong Yuta
Nagkadaghang tawo ang nagpakabana sa ilhanan sa presensiya ni Jesus. Si Kristian, usa ka batan-on nga minyong lalaki sa Alemanya, misulat: “Nagkinabuhi kita sa makapasubo nga panahon. Walay duhaduha nga kita anaa na sa ‘kataposang mga adlaw.’” Siya ug ang iyang asawa naggugol ug daghang panahon sa pagpakighisgot sa uban bahin sa Mesiyanikong Gingharian. Si Frank nagpuyo usab sa Alemanya. Siya ug ang iyang asawa nagdasig sa uban pinaagi sa maayong balita sa Bibliya. Si Frank miingon: “Tungod sa kahimtang sa kalibotan, daghang tawo karon ang mabalak-on bahin sa umaabot. Naningkamot kami sa pagdasig kanila pinaagi sa gitagna sa Bibliya nga paraisong yuta.” Sa pagbuhat niana, si Kristian ug Frank nakaamot sa katumanan sa usa ka bahin sa ilhanan ni Jesus—ang pagwali sa maayong balita sa Gingharian.—Mateo 24:14.
Sa dihang ang kataposang mga adlaw moabot na sa kinaulahiang bahin niini, wagtangon ni Jesus kining daang sistema ug ang mga tawo nga nagsuportar niini. Human niana, ang Mesiyanikong Gingharian mao nay modumala sa mga kalihokan sa yuta, nga mahimo na unyang Paraiso sumala sa tagna. Ang katawhan dili na unya masakit ug mamatay, ug ang mga patay pagabanhawon dinhi sa yuta. Mao kini ang makapalipayng palaaboton niadtong moila sa ilhanan sa panahon. Dili ba maalamon ang pagkat-on ug dugang bahin sa ilhanan ug kon unsay angayng buhaton sa usa aron maluwas sa dihang taposon na kining sistemaha? Segurado nga kini maoy usa ka butang nga kinahanglang buhaton dayon sa tanan.—Juan 17:3.
[Blurb sa panid 4]
Gitagna ni Jesus ang daghang panghitabo nga sa tingob magtimaan sa ilhanan nga klarong mailhan bisan asa sa yuta
[Blurb sa panid 6]
Nakita mo ba ang sunodsunod nga panghitabo, ang usa ka daghag-bahin nga ilhanan nga nag-apektar sa tibuok kalibotan?
[Kahon/Mga hulagway sa panid 6]
MGA ILHANAN SA KATAPOSANG MGA ADLAW
Mga gubat nga wala pa hitupngi.—Mateo 24:7; Pinadayag 6:4
Kagutom.—Mateo 24:7; Pinadayag 6:5, 6, 8
Mga kamatay.—Lucas 21:11; Pinadayag 6:8
Pag-uswag sa kalapasan.—Mateo 24:12
Mga linog.—Mateo 24:7
Makuyaw nga mga panahong lisod sagubangon.—2 Timoteo 3:1
Hinobrang paghigugma sa salapi.—2 Timoteo 3:2
Pagkadili-masinugtanon sa mga ginikanan.—2 Timoteo 3:2
Pagkawalay-kinaiyanhong pagbati.—2 Timoteo 3:3
Pagkamahigugmaon sa kalipayan inay sa Diyos.—2 Timoteo 3:4
Pagkawalay-pagpugong sa kaugalingon.—2 Timoteo 3:3
Pagkawalay-gugma sa pagkamaayo.—Timoteo 3:3
Pagkawalay-pagtagad sa nagsingabot nga kapeligrohan.—Mateo 24:39
Pagsalikway sa mga mabiaybiayon sa pamatuod sa kataposang mga adlaw.—2 Pedro 3:3, 4
Pagwali sa maayong balita sa Gingharian sa Diyos sa tibuok yuta.—Mateo 24:14
[Picture Credit Lines sa panid 5]
WWI soldiers: From the book The World War—A Pictorial History, 1919; poor family: AP Photo/Aijaz Rahi; polio victim: © WHO/P. Virot