Kaluwasan Ngadto sa Usa ka Matarong Bag-ong Kalibotan
“Sila sa pagkatinuod makakaplag sa ilang tugob nga kalipay diha sa kadagaya sa pakigdait.”—SALMO 37:11.
1, 2. (a) Sa unsang paagi ang kaluwasan ni Jehova sa atong panahon lahi sa mga kaluwasan sa karaang mga panahon? (b) Ngadto sa unsang matang sa kalibotan pagadalhon ni Jehova ang iyang katawhan?
SI Jehova maoy usa ka Diyos sa kaluwasan. Sa karaang panahon, iyang giluwas ang iyang katawhan sa daghang higayon. Temporaryo kadto nga mga kaluwasan, kay si Jehova sa bisan hain niadtong mga higayona wala magpahamtang sa iyang mga paghukom nga walay kataposan batok sa tibuok nga kalibotan ni Satanas. Apan sa atong adlaw, himoon ni Jehova sa dili madugay ang iyang kinadak-ang kaluwasan sa tanan niyang mga alagad. Niining higayona iyang pagalaglagon ang tanang lama sa sistema ni Satanas sa tibuok yuta, ug iyang dalhon ang iyang mga alagad ngadto sa usa ka walay kataposan, matarong bag-ong kalibotan.—2 Pedro 2:9; 3:10-13.
2 Si Jehova nagsaad: “Sa dili na madugay, ug ang daotan mangawala . . . Apan ang mga maaghop magapanunod sa yuta, ug sila sa pagkatinuod makakaplag sa ilang tugob nga kalipay diha sa kadagaya sa pakigdait.” (Salmo 37:10, 11) Hangtod kanus-a? “Ang mga matarong magapanunod sa yuta, ug sila magapuyo niini sa walay kataposan.” (Salmo 37:29; Mateo 5:5) Apan, sa dili pa kana mahitabo, kining kalibotana moagi ug kinadak-ang panahon sa kasamok nga naagian niini sukad.
Ang “Dakong Kasakitan”
3. Sa unsang paagi gihubit ni Jesus ang “dakong kasakitan”?
3 Sa 1914 misulod kining kalibotana sa “kataposang mga adlaw” niini. (2 Timoteo 3:1-5, 13) Kita karon maoy 83 ka tuig na ngadto nianang yugtoa ug nagakaduol na sa kataposan niini sa dihang, sama sa gitagna ni Jesus, ang mosunod maoy mahitabo: “Aduna unyay dakong kasakitan ingon nianang wala pa mahitabo sukad sa sinugdan sa kalibotan hangtod karon, dili, ni mahitabo pa pag-usab.” (Mateo 24:21) Oo, mas grabe pa kay sa Gubat sa Kalibotan II, diin duolan sa 50 ka milyong kinabuhi ang nakalas. Pagkamakauyog sa kalibotan ang panahong nagakaduol na!
4. Nganong ang paghukom sa Diyos moabot sa “Dakong Babilonya”?
4 Ang “dakong kasakitan” moabot nga may talagsaong pagkakalit, “sa usa ka takna.” (Pinadayag 18:10) Ang pagsugod niini pagatiman-an sa pagpahamtang sa Diyos sa paghukom diha sa tanang bakak nga relihiyon, nga gitawag sa Pulong sa Diyos nga “Dakong Babilonya.” (Pinadayag 17:1-6, 15) Ang nangibabawng bahin sa karaang Babilonya mao ang bakak nga relihiyon. Ang modernong Babilonya kaamgid sa iyang karaang katugbang ug naghawas sa kalibotanong imperyo sa bakak nga relihiyon. Siya ang nagdula sa babayeng bigaon pinaagi sa pagpakigkompromiso uban sa politikanhong mga elemento. Siya nagpaluyo sa ilang mga gubat ug nagpanalangin sa iyang kasundalohan sa nagkontrahanayng mga kiliran, nga misangpot sa pagpinatyanay sa usag usa sa mga tawo nga sama rag relihiyon. (Mateo 26:51, 52; 1 Juan 4:20, 21) Iyang gipiyong ang iyang mga mata sa dunot nga mga buhat sa iyang mga sumusunod ug naglutos sa matuod nga mga Kristohanon.—Pinadayag 18:5, 24.
5. Sa unsang paagi magsugod ang “dakong kasakitan”?
5 Ang “dakong kasakitan” magsugod sa dihang ang politikanhong mga elemento kalit nga moatake sa “Dakong Babilonya.” Sila “magadumot sa bigaon ug magahimo kaniya nga pinayhag ug hubo, ug magakaon sa iyang unod nga mga bahin ug magaugdaw kaniya pinaagi sa kalayo.” (Pinadayag 17:16) Human niana, ang iyang mga tigpaluyo kanhi “manghilak ug magapamukpok sa ilang kaugalingon sa kasubo tungod kaniya.” (Pinadayag 18:9-19) Apan dugay nang gipaabot kini sa mga alagad ni Jehova, ug sila moingon: ‘Dayega si Jah, . . . kay iya nang gikapahamtangan ug paghukom ang dakong bigaon kinsa nagdunot sa yuta pinaagi sa iyang pagpakighilawas, ug siya nakapanimalos na sa dugo sa iyang mga ulipon diha sa iyang kamot.’—Pinadayag 19:1, 2.
Giatake ang mga Alagad sa Diyos
6, 7. Nganong ang mga alagad ni Jehova makasalig sa dihang atakehon sa panahon sa “dakong kasakitan”?
6 Kay nalaglag na ang bakak nga relihiyon, ang politikanhong mga elemento moliso sa mga alagad ni Jehova. Si Satanas, ang “Gog sa yuta sa Magog” diha sa tagna, nag-ingon: “Moabot ako ngadto sa mga nagmalinawon, nga nagpuyo sa kasegurohan.” Nagtuo nga sila sayon nga biktimahon, iyang atakehon sila pinaagi sa “dako kaayong militaryong gahom . . . , samag mga panganod nga nagatabon sa yuta.” (Ezequiel 38:2, 10-16) Ang katawhan ni Jehova nahibalo nga kini nga pag-atake dili molampos tungod kay sila may pagsalig kang Jehova.
7 Sa dihang si Paraon ug ang iyang kasundalohan nagtuo nga ila nang nababoy ang mga alagad sa Diyos diha sa Pulang Dagat, milagrosong giluwas ni Jehova ang iyang katawhan ug gilaglag ang kasundalohan sa Ehipto. (Exodo 14:26-28) Sa panahon sa “dakong kasakitan,” sa dihang magtuo ang nasod nga ila nang nababoy ang katawhan ni Jehova, siya milagrosong moabot na usab sa pagluwas: “Nianang adlawa . . . ang akong kayugot magautbo sa akong ilong. Ug sa akong pangabugho, sa kalayo sa akong kaligutgot, ako mamulong.” (Ezequiel 38:18, 19) Ang kinatayuktokan sa “dakong kasakitan” unya haduol na!
8. Unsang labaw-sa-kinaiyanhong mga hitabo ang mahinabo sa dili pa laglagon ni Jehova ang daotan, ug uban sa unsang epekto?
8 Sa usa ka yugto human magsugod ang “dakong kasakitan,” apan una pa ipahamtang ni Jehova ang iyang paghukom diha sa nahibilin niining kalibotana, ang labaw-sa-kinaiyanhong mga hitabo mahinabo. Matikdi ang epekto unya niini. “Unya ang ilhanan sa Anak sa tawo [Kristo] magpakita sa langit, ug niana ang tanang tribo sa yuta magapukpok sa ilang kaugalingon sa pagminatay, ug ilang makita ang Anak sa tawo nga moanhi diha sa mga panganod sa langit uban ang gahom ug dakong himaya.” (Mateo 24:29, 30) “Aduna unyay mga ilhanan sa adlaw ug bulan ug mga bituon, . . . samtang ang mga tawo panguyapan sa kahadlok ug sa pagpaabot sa mga butang nga moabot diha sa gipuy-ang yuta.”—Lucas 21:25, 26.
“Ang Inyong Kapahigawasan Nagakaduol Na”
9. Nganong ang mga alagad ni Jehova ‘makahangad sa ilang mga ulo’ sa dihang mahitabo ang labaw-sa-kinaiyanhong mga hitabo?
9 Nianang partikular nga panahon, ang tagna sa Lucas 21:28 matuman. Si Jesus nag-ingon: “Inigsugod pagkahitabo niining mga butanga, tindog nga tul-id ug ihangad ang inyong mga ulo, tungod kay ang inyong kapahigawasan nagakaduol na.” Ang mga kaaway sa Diyos mangurog sa kahadlok tungod kay sila mahibalo nga ang labaw-sa-kinaiyanhong mga hitabo nga nagakahitabo nagagikan kang Jehova. Apan ang mga alagad ni Jehova managmaya tungod kay sila nahibalo nga ang ilang kaluwasan nagakaduol na.
10. Sa unsang paagi gibatbat sa Pulong sa Diyos ang kinatayuktokan sa “dakong kasakitan”?
10 Unya ipahamtang ni Jehova ang makamatayng hampak diha sa sistema ni Satanas: “Magpakanaog ako sa hukom batok [kang Gog], uban ang kamatay ug uban ang dugo; ug pabundakan ko siya ug makapabahang ulan ug magpaulag yelo, kalayo ug asupre paulanan ko siya ug ang iyang mga panon . . . Ug sila makaila nga ako mao si Jehova.” (Ezequiel 38:22, 23) Ang tanang timaan sa sistema ni Satanas malaglag. Ang bug-os tawhanong katilingban sa nagasalikway-sa-Diyos nga katawhan malaglag. Mao kana ang kinatayuktokan sa Armageddon sa “dakong kasakitan.”—Jeremias 25:31-33; 2 Tesalonica 1:6-8; Pinadayag 16:14, 16; 19:11-21.
11. Nganong ang mga alagad ni Jehova pagaluwason sa “dakong kasakitan”?
11 Ang pagaluwason latas sa “dakong kasakitan” mao ang minilyong magsisimba ni Jehova sa tibuok kalibotan. Kini naglangkob sa “dakong panon” nga nanggula “gikan sa tanang kanasoran ug mga tribo ug katawhan ug mga dila.” Nganong sila luwason sa ingon niana nga makapukawg-kataha nga paagi? Tungod kay sila naghatag kang Jehova ug “sagradong pag-alagad adlaw ug gabii.” Sa ingon sila maluwas niining kataposan sa kalibotan ug pagaagakon ngadto sa usa ka matarong bag-ong kalibotan. (Pinadayag 7:9-15) Busa, ilang masaksihan ang katumanan sa saad ni Jehova: “Paglaom kang Jehova ug pagbantay sa iyang dalan, ug siya magabayaw kanimo sa pagpanunod sa yuta. Sa diha nga pagaputlon ang mga daotan, ikaw makakita niana.”—Salmo 37:34.
Ang Bag-ong Kalibotan
12. Unsay mapaabot sa mga mangaluwas sa Armageddon?
12 Pagkakulbahinam unya nianang panahona—ang pagkapapha sa pagkadaotan ug ang pagbanagbanag sa labing mahimayaong panahon sa tibuok nga kasaysayan sa tawo! (Pinadayag 20:1-4) Pagkamapasalamaton sa mga mangaluwas sa Armageddon kang Jehova nga nakasulod ngadto sa usa ka masanag, mahinlong sibilisasyon nga gihikay sa Diyos, usa ka bag-ong kalibotan, diha sa usa ka yuta nga pagahimoong paraiso! (Lucas 23:43) Ug sila dili na kinahanglang mamatay pa! (Juan 11:26) Sa pagkamatuod, gikan nianang yugtoa paunahan, ilang mabatonan ang katingalahan, maanindot kaayong palaaboton nga mabuhi hangtod nga si Jehova buhi!
13. Sa unsang paagi sugdag-balik ni Jesus ang buluhaton sa pagpang-ayo nga iyang gisugdan dinhi sa yuta?
13 Si Jesus, nga gitudlo ni Jehova ingong langitnong Hari, maoy magdumala sa milagrosong mga panalangin nga tagamtamon sa mga mangaluwas. Sa dinhi pa sa yuta, iyang gibuksan ang mga mata sa mga buta ug ang dalunggan sa mga bungol ug giayo ang ‘tanang matang sa balatian ug ang tanang matang sa kaluyahon.’ (Mateo 9:35; 15:30, 31) Sa bag-ong kalibotan, iyang sugdag-balik kanang dakong buluhaton sa pagpang-ayo apan sa tibuok kalibotan nga sukod. Ingong Ahente sa Diyos, iyang tumanon ang saad: “Pahiran [sa Diyos] ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.” (Pinadayag 21:4) Wala na gayoy panginahanglan pag mga doktor o mga tig-alagad sa lubong!—Isaias 25:8; 33:24.
14. Unsang kaluwasan ang moabot sa nangamatay nang mga alagad ni Jehova?
14 Ang pagaluwason usab mao kadtong tanang matinumanong mga alagad sa Diyos nga nangamatay sa nangagi. Sa bag-ong kalibotan, sila pagaluwason gikan sa mga paghawid sa lubnganan. Si Jehova nagpasalig: “Aduna unyay pagkabanhaw sa mga matarong ug sa mga dili-matarong.” (Buhat 24:15) Lagmit, ang mga “matarong” pagabanhawon ug una ug magtabang sa pagpadako sa Paraiso. Pagkamalipayon unya alang sa mga mangaluwas sa Armageddon sa pagkadungog sa mga eksperyensiya niadtong matinumanong mga nangamatay sa kanhiayng panahon, nga karon nahibalik na sa kinabuhi!—Juan 5:28, 29.
15. Hubita ang pipila ka kahimtang nga maeksperyensiyahan diha sa bag-ong kalibotan.
15 Kadtong tanang buhi nianang panahona makasinati sa giingon sa salmista bahin kang Jehova: “Imong ginabuklad ang imong kamot ug ginatagbaw ang tinguha sa tagsatagsa ka butang nga buhi.” (Salmo 145:16) Wala nay kagutom: Ang yuta ipasig-uli sa usa ka ekolohikal nga pagkatimbang ug mopatunghag dagayang abot. (Salmo 72:16) Wala nay mga tawong walay mga balay: “Sila sa pagkatinuod magatukod ug mga balay ug magapuyo niini,” ug ang tagsatagsa manglingkod “ilalom sa iyang paras ug ilalom sa iyang kahoyng igos, ug walay magpakurog kanila.” (Isaias 65:21, 22; Miqueas 4:4) Wala nay kahadlok: Wala nay gubat, kapintasan, o krimen. (Salmo 46:8, 9; Proverbio 2:22) “Ang tibuok yuta nagapahulay, nagamalinawon. Ang mga tawo nahimong masadyaon uban sa mga paghugyaw sa kalipay.”—Isaias 14:7.
16. Nganong ang pagkamatarong molukop sa bag-ong kalibotan?
16 Sa bag-ong kalibotan, ang propaganda nga gigamit ni Satanas mawagtang na. Hinunoa, “ang pagkamatarong mao ang makat-onan sa mga molupyo sa mabungahong yuta.” (Isaias 26:9; 54:13) Uban sa maayong espirituwal nga pagpanudlo tuigtuig, “ang yuta mapuno gayod sa kahibalo ni Jehova sama sa katubigan nga nagatabon sa dagat.” (Isaias 11:9) Ang makapalig-ong mga hunahuna ug mga lihok molukop sa katawhan. (Filipos 4:8) Hunahunaa lang, usa ka tibuok-kalibotang katilingban sa mga tawo nga libre gikan sa krimen, sobrang pagpabili sa kaugalingon, kasina—usa ka internasyonal nga panag-igsoonay diin ang bunga sa espiritu sa Diyos ginapasundayag sa tanan. Sa pagkatinuod, bisan karon ang maong mga hiyas ginaugmad sa dakong panon.—Galacia 5:22, 23.
Nganong Dugay Kaayo?
17. Nganong naghulat ug dugay kaayo si Jehova sa dili pa taposon ang pagkadaotan?
17 Apan, nganong naghulat ug dugay kaayo si Jehova sa pagkuha sa pagkadaotan ug sa pagluwas sa iyang katawhan ngadto sa bag-ong kalibotan? Palandonga kon unsa pay kinahanglang himoon. Labawng hinungdanon mao ang pagbindikar sa pagkasoberano ni Jehova, ang iyang katungod sa pagmando. Pinaagi sa pagtugot ug igong panahon sa paglabay, siya nakapasundayag sa walay duhaduha nga ang pagmando sa tawo nga gawas sa iyang pagkasoberano misangpot nga usa ka dakong kapakyasan. (Jeremias 10:23) Busa karon si Jehova bug-os nga makataronganon sa pagpuli sa tawhanong pagmando ug pagmando sa iyang langitnong Gingharian ilalom ni Kristo.—Daniel 2:44; Mateo 6:9, 10.
18. Kanus-a napanunod sa mga kaliwat ni Abraham ang yuta sa Canaan?
18 Kon unsay nagakahitabo sulod niining tanang kasiglohan susama sa nahitabo sa panahon ni Abraham. Gisultihan ni Jehova si Abraham nga ang iyang mga kaliwat magapanunod sa yuta sa Canaan—apan dili sulod sa upat ka gatos ka tuig “tungod kay ang kalapasan sa mga Amorihanon wala pa mahingpit.” (Genesis 12:1-5; 15:13-16) Dinhi ang terminong “Amorihanon” (usa ka dakong tribo) lagmit naghawas sa mga tawo sa Canaan sa katibuk-an. Busa mga upat ka siglo ang miagi una pa gitugotan ni Jehova ang iyang katawhan sa pag-ilog sa Canaan. Kasamtangan gitugotan ni Jehova ang mga nasod sa Canaan sa pag-ugmad sa ilang mga katilingban. Uban sa unsang resulta?
19, 20. Unsang matang sa mga katilingban ang naugmad sa mga Canaanhon?
19 Ang Bible Handbook, ni Henry H. Halley, nag-ingon nga diha sa Megido, nakaplagan sa mga arkeologo ang mga kagun-oban sa templo ni Astoreth, ang diyosa nga asawa ni Baal. Siya nagsulat: “Pipila lamang ka lakang gikan niining temploha maoy usa ka sementeryo, diin daghang tibod ang nakit-an, nga nasudlan sa mga bukog sa mga masuso nga gipanghalad niining temploha . . . Ang mga propeta ni Baal ug Astoreth maoy opisyal nga mga mamumuno sa gagmayng kabataan.” “Laing makalilisang nga buhat mao [kanang] ilang giingon nga ‘haligi nga mga sakripisyo.’ Sa dihang magtukod ug balay, usa ka bata ang ihalad, ug ang lawas niini ilakip ug tukod diha sa bungbong.”
20 Si Halley mikomento: “Ang pagsimba kang Baal, Astoreth, ug ubang Canaanhong mga diyos giapilan ug labing maluhong mga rituwal; ang ilang mga templo maoy mga sentro sa bisyo. . . . Ang mga Canaanhon nagsimba, pinaagi sa imoral nga pagpatuyang, . . . ug unya, pinaagi sa pagpatay sa ilang kamagulangang mga anak, ingong mga halad ngadto sa mao ra gihapong mga diyos. Daw sa dakong bahin, ang yuta sa Canaan nahimong usa ka matang sa Sodoma ug Gomora sa nasodnong sukod. . . . Ang usa ba ka sibilisasyon nga may ingon niana ka makaluod nga kahugaw ug kapintas may bisan unsa pang katungod sa paglungtad? . . . Ang mga arkeologo nga nangalot sa mga kagun-oban sa mga siyudad sa Canaan nahibulong nga wala dayon sila laglaga sa Diyos nga angay unta nga dugay na Niyang gihimo.”—Itandi ang 1 Hari 21:25, 26.
21. Unsay kaamgiran tali sa kahimtang sa mga Canaanhon ug nianang sa atong adlaw?
21 Ang pagkadaotan sa mga Amorihanon ‘nahingpit.’ Busa si Jehova karon bug-os nang may katarongan sa pagpatay kanila. Mao man usab karon. Kining kalibotana napuno sa kapintasan, imoralidad, ug pagtamay sa kasugoan sa Diyos. Ug sanglit kita makataronganong malisang sa mangilngig nga mga paghalad sa kabataan sa karaang Canaan, komosta ang paghalad sa tinagpulo ka milyong batan-on diha sa mga gubat niining kalibotana, nga mas grabe pa kay sa bisan unsang butang diha sa Canaan? Tino, si Jehova karon bug-os nang may katarongan sa pagtapos niining daotang sistema.
Nagahimo ug Lain Pang Butang
22. Unsay nahimo sa pagpailob ni Jehova sa atong panahon?
22 Ang pailob ni Jehova niining kataposang mga adlaw nagahimo ug lain pang butang. Siya naghatag ug higayon sa pagtigom ug sa pag-edukar sa dakong panon, nga may gidaghanon na nga kapin sa lima ka milyon. Ilalom sa pagdumala ni Jehova, ginahimo sila nga usa ka mauswagong organisasyon. Ang kalalakin-an, kababayen-an, ug kabataan ginabansay sa pagtudlo sa uban sa mga kamatuoran sa Bibliya. Pinaagi sa ilang mga tigom ug sa mga publikasyon sa Bibliya, ilang nakat-onan ang mahigugmaong mga dalan sa Diyos. (Juan 13:34, 35; Colosas 3:14; Hebreohanon 10:24, 25) Dugang pa, ilang ginaugmad ang mga kahanas sa pagpanukod, elektroniks, pag-imprenta, ug ubang mga natad aron masuportahan ang pagsangyaw sa “maayong balita.” (Mateo 24:14) Lagmit ang ingon niana nga mga kahanas sa pagpanudlo ug pagpanukod kaylap nga pagagamiton sa bag-ong kalibotan.
23. Nganong usa ka pribilehiyo nga mabuhi niining panahona?
23 Oo, karon ginaandam ni Jehova ang iyang mga alagad aron makalabang sa “dakong kasakitan” ngadto sa usa ka matarong bag-ong kalibotan. Dayon wala na unyay Satanas ug iyang daotang kalibotan nga pagasagubangon, walay sakit, kaguol, ug kamatayon. Uban sa dakong kasibot ug kasadya, ang katawhan sa Diyos mopadayon uban sa malipayong trabaho sa pagtukod ug usa ka paraiso, diin ang matag adlaw mahimong “tugob sa kalipay.” Pagkadako sa atong pribilehiyo nga mabuhi niining kinatayuktokan sa mga panahon, sa pagkaila ug pag-alagad kang Jehova, ug sa pagkaamgo nga sa dili madugay atong ‘ihangad ang atong mga ulo tungod kay ang atong kapahigawasan nagakaduol na’!—Lucas 21:28; Salmo 146:5.
Mga Pangutana sa Pagrepaso
◻ Unsa ang “dakong kasakitan,” ug sa unsang paagi kini magsugod?
◻ Nganong ang pag-atake ni Gog sa mga alagad ni Jehova dili molampos?
◻ Sa unsang paagi matapos ang “dakong kasakitan”?
◻ Unsang katingalahang mga kaayohan ang itagana sa bag-ong kalibotan?
◻ Nganong naghulat si Jehova ug dugay kaayo una pa laglaga kining sistemaha?
[Hulagway sa panid 16]
Ang tibuok yuta pagabag-ohon ngadto sa usa ka paraiso