“Sultihi Kami, Kanus-a Kining mga Butanga Mahitabo?”

“Bag-ong mga butang mao ang akong ginapahayag. Sa dili pa kini motungha, isaysay ko kini kaninyo.”​—ISAIAS 42:9.

 1, 2. (a) Unsay gipangutana sa mga apostoles ni Jesus bahin sa umaabot? (b) Sa unsang paagi ang tubag ni Jesus bahin sa daghag-bahing ilhanan natuman?

ANG balaang pagtulon-an nagagikan kang Jehova nga Diyos, “ang Usa nga nagpasundayag sa kataposan gikan sa sinugdan.” (Isaias 46:10) Ingon sa gipakita sa nag-unang artikulo, ang mga apostoles nangita sa maong pagtulon-an gikan kang Jesus, nga nangutana kaniya: “Sultihi kami, Kanus-a man kining mga butanga mahitabo, ug unsa man unya ang ilhanan dihang kining tanang butanga gikatino nga modangat sa katiklopan?”​—Marcos 13:4.

² Sa pagtubag, gihubit ni Jesus ang daghag-bahin nga “ilhanan” nga gilangkoban sa ebidensiya nga magpamatuod nga ang Hudiyohanong sistema sa dili madugay matapos. Kini natuman uban sa pagkalaglag sa Jerusalem sa 70 K.P. Apan ang tagna ni Jesus may dakong katumanan sa halayong umaabot. Sa dihang “ang tinudlong mga panahon sa kanasoran” natapos niadtong 1914, makita ang ilhanan sa dakong sukod, nga magpadayag nga sa dili madugay ang presenteng sistema matapos diha sa usa ka “dakong kasakitan.”a (Lucas 21:24) Minilyong buhi karon makapamatuod nga kini nga ilhanan natuman diha sa mga gubat sa kalibotan ug ubang talagsaong mga panghitabo niining ika-20ng siglo. Kini usab nagtimaan sa dakong katumanan sa tagna ni Jesus, kining modernong katumanan nga gilarawanan sa nahitabo gikan sa 33 ngadto sa 70 K.P.

 3. Sa naghisgot ug laing ilhanan, unsang dugang hitabo ang gitagna ni Jesus?

³ Human sa paghisgot ni Lucas sa tinudlong mga panahon sa kanasoran, ang katugbang nga mga asoy sa Mateo, Marcos, ug Lucas nagsaysay ug dugang pang sunodsunod nga mga panghitabo nga nalakip ang usa ka ilhanan dugang pa sa daghag-bahin nga ‘ilhanan sa kataposan sa sistema sa mga butang.’ (Mateo 24:3) (Sa panid 15, kining puntoha sa asoy gitiman-an sa dobleng linya.) Ang Mateo nag-ingon: “Dihadiha pagkahuman sa kasakitan nianang mga adlawa ang adlaw mongitngit, ug ang bulan dili mohatag sa kahayag niini, ug ang mga bituon mangahulog gikan sa langit, ug ang mga gahom sa kalangitan mangatay-og. Ug unya ang ilhanan sa Anak sa tawo magpakita sa langit, ug unya ang tanang tribo sa yuta magapukpok sa ilang kaugalingon sa pagminatay, ug ilang makita ang Anak sa tawo nga moanhi diha sa mga panganod sa langit uban ang gahom ug dakong himaya. Ug iyang ipadala ang iyang mga anghel uban ang usa ka dakong tingog sa trumpeta, ug ilang tigomon ang iyang mga pinili gikan sa upat ka hangin, gikan sa usa ka tumoy sa mga langit hangtod sa ilang laing tumoy.”​—Mateo 24:29-31.

Kasakitan ug Katingalahang Hitabo sa Langit

 4. Unsang mga pangutana ang gipatugbaw bahin sa katingalahang hitabo sa langit nga gihisgotan ni Jesus?

⁴ Kanus-a kaha kini matuman? Ang tanang tulo ka asoy sa Ebanghelyo naghisgot sa butang nga mahimo natong tawgong katingalahang hitabo sa langit​—ang adlaw ug bulan mongitngit ug mangahulog ang mga bituon. Si Jesus miingon nga kini mosunod “sa kasakitan.” Mao bay anaa sa hunahuna ni Jesus ang kasakitan nga natapos sa 70 K.P., o siya ba naghisgot bahin sa dakong kasakitan nga anaa pa sa umaabot sa atong modernong panahon?​—Mateo 24:29; Marcos 13:24.

 5. Unsang hunahuna ang gituohan kaniadto bahin sa kasakitan sa modernong panahon?

⁵ Sukad natapos ang tinudlong mga panahon sa kanasoran sa 1914, ang katawhan sa Diyos interesado kaayo sa “dakong kasakitan.” (Pinadayag 7:14) Sa daghang katuigan nagtuo sila nga ang modernong-panahon nga dakong kasakitan may pangbukas nga bahin nga katumbas sa panahon sa Gubat sa Kalibotan I, unya may sal-ot nga kal-ang, ug sa kataposan ang pangataposang bahin, “ang gubat sa dakong adlaw sa Diyos nga Labing Gamhanan.” Kon ingon niana, unsay mahitabo sa panahon sa kal-ang nga mga dekada sa “kataposan sa sistema”?​—Pinadayag 16:14; Mateo 13:39; 24:3; 28:20.

 6. Unsay gituohan kaniadto nga maoy katumanan sa tagna ni Jesus bahin sa katingalahang hitabo sa langit?

⁶ Buweno, gituohan nga sulod niini nga kal-ang sa panahon ang daghag-bahin nga ilhanan makita, lakip ang buluhatong pagwali nga gibuhat sa natigom nga katawhan sa Diyos. Mopatim-aw usab nga ang gitagnang katingalahang hitabo sa langit madahom nga makita panahon sa kal-ang human sa pangbukas nga yugto niadtong 1914-18. (Mateo 24:29; Marcos 13:24, 25; Lucas 21:25) Ang sentro sa pagtagad mao ang literal nga mga butang sa mga langit​—mga tigsuhid sa wanang, mga roket, cosmic o gamma rays, ug mga pagtugpa o mga base sa bulan.

 7. Unsang gipasibong pagsabot bahin sa dakong kasakitan ang gihatag?

⁷ Ugaling, gituki-pag-usab sa Ang Bantayanang Torre sa Hunyo 15, 1970, ang tagna ni Jesus, ilabina ang umaabot nga dakong kasakitan. Kini nagpakita nga tungod sa nahitabo sa unang siglo, ang modernong kasakitan dili mahimong may pangbukas nga bahin niadtong 1914-18, nga mga dekada ang kal-ang, ug sa ulahi magpadayon pag-usab. Kining magasina mihinapos: “Ang ‘dakong kasakitan’ nga ang ingon dili na mahitabo pag-usab maoy sa unahan pa, kay kana nagpasabot sa kalaglagan sa tibuok kalibotang empiryo sa bakak nga relihiyon (lakip sa Kakristiyanohan) nga sundan sa ‘gubat sa dakong adlaw sa Diyos nga Labing Gamhanan’ sa Armageddon.”

 8. Uban sa gipasibong hunahuna bahin sa modernong kasakitan, sa unsang paagi gipatin-aw ang Mateo 24:29?

⁸ Apan ang Mateo 24:29 nag-ingon nga ang katingalahang hitabo sa langit moabot “dihadiha pagkahuman sa kasakitan.” Sa unsang paagi kana? Ang Bantayanang Torre sa Nobyembre 1, 1975, misugyot nga dinhi “ang kasakitan” mao kadtong usa nga natapos balik sa 70 K.P. Apan sa unsang diwa nga mahimong ikaingon nga ang katingalahang hitabo sa langit sa atong panahon mahitabo “dihadiha” human sa usa ka hitabo sa 70 K.P.? Kadto gisaysay nga sa panan-aw sa Diyos ang mga siglo sa tunga niini mubo ra. (Roma 16:20; 2 Pedro 3:8) Hinunoa, ang mas lalom nga pagsusi niining tagnaa, ilabina ang bahin sa Mateo 24:29-31, nagpunting sa lahi kaayo nga pagpatin-aw. Kini nag-ilustrar kon sa unsang paagi ang kahayag mosidlak “labaw ug labaw pa ngadto sa pagkahingpit sa adlaw.” (Proverbio 4:18, American Standard Version)b Atong tagdon kon nganong ang usa ka bag-o, o nausab, nga pagpatin-aw haom.

 9. Sa unsang paagi nakahatag dugang kasayoran ang Hebreohanong Kasulatan sa mga pulong ni Jesus bahin sa mga hitabo sa kalangitan?

⁹ Ngadto sa upat niya ka apostoles, si Jesus mitagna nga ‘ang adlaw mongitngit, ang bulan dili mohatag sa kahayag niini, ug ang mga bituon mangahulog.’ Ingong mga Hudiyo, masabtan nila ang maong pinulongan gikan sa Hebreohanong Kasulatan, diin diha sa Sofonias 1:15, pananglitan, ang panahon sa paghukom sa Diyos gitawag ug “adlaw sa unos ug sa kalumpagan, adlaw sa kangitngit ug sa kadulom, adlaw sa mga panganod ug sa mabagang kangiob.” Ang lainlaing Hebreohanong mga manalagna naghubit usab sa adlaw nga mongitngit, sa bulan nga dili modan-ag, ug sa mga bituon nga dili mohatag ug kahayag. Imong makaplagan ang maong pinulongan diha sa balaang mga mensahe batok sa Babilonya, Edom, Ehipto, ug sa amihanang gingharian sa Israel.​—Isaias 13:9, 10; 34:4, 5; Jeremias 4:28; Ezekiel 32:2, 6-8; Amos 5:20; 8:2, 9.

10, 11. (a) Unsay gitagna ni Joel bahin sa mga butang sa kalangitan? (b) Haing bahina sa tagna ni Joel ang natuman niadtong 33 K.P., ug hain ang wala?

¹⁰ Sa dihang ilang nadunggan ang giingon ni Jesus, si Pedro ug ang tulo pa lagmit nahinumdom sa tagna ni Joel nga makita sa Joel 2:28-31 ug 3:15: “Igabubo ko ang akong espiritu ibabaw sa tanang unod, ug ang inyong mga anak nga lalaki ug mga anak nga babaye magapanagna. . . . Ako magapakita sa mga katingalahan diha sa kalangitan ug sa yuta, ang dugo ug kalayo ug ang mga haligi nga aso. Ang adlaw mismo mahimong kangitngitan, ug ang bulan mahimong dugo, sa dili pa moabot ang dako ug makalilisang nga adlaw ni Jehova.” “Mongitngit ang adlaw ug ang bulan, ug ang mga bituon mapadngan sa ilang kahayag.”

¹¹ Ingon sa giasoy sa Buhat 2:1-4 ug 14-21, sa Pentekostes 33 K.P., gibubo sa Diyos ang balaang espiritu sa 120 ka tinun-an, mga lalaki ug mga babaye. Gipadayag ni apostol Pedro nga mao kini ang gitagna ni Joel. Apan, komosta man ang mga pulong ni Joel bahin sa ‘adlaw nga mongitngit ug sa bulan nga mahimong dugo ug sa mga bituon nga mapadngan sa ilang kahayag’? Walay timaan nga kini natuman niadtong 33 K.P. o sa panahon sa kapin sa 30 ka tuig nga gilawigon sa kataposan sa Hudiyohanong sistema sa mga butang.

12, 13. Sa unsang paagi ang katingalahang hitabo sa langit nga gitagna ni Joel natuman?

¹² Dayag nga kanang ulahing bahin sa tagna ni Joel mas suod nga nalangkit sa “umaabot nga dako ug makapukaw ug kahadlok nga adlaw ni Jehova”​—ang kalaglagan sa Jerusalem. Ang Bantayanang Torre sa Mayo 15, 1967, miingon bahin sa kasakitan nga midangat sa Jerusalem niadtong 70 K.P.: “Kadto mao gayod ang ‘adlaw ni Jehova’ maylabot sa Jerusalem ug sa iyang mga anak. Ug kon bahin nianang maong adlaw dihay daghang ‘dugo ug kalayo ug aso nga daw gabon,’ ang adlaw wala mohatag ug kahayag sa kangiob sa siyudad sa adlawng dako, ug ang bulan makapahinumdom sa dugong naula, dili malinawon, platahon nga kahayag sa bulan sa gabii.”c

¹³ Oo, sama sa ubang mga tagna nga atong nahisgotan, ang katingalahang hitabo sa langit nga gitagna ni Joel mamatuman sa dihang ipahamtang ni Jehova ang paghukom. Imbes pataason pa ang panahon sa paglungtad sa kataposan sa Hudiyohanong sistema, ang pagngitngit sa adlaw, bulan, ug mga bituon nahitabo sa dihang ang manglalaglag nga mga puwersa miabot batok sa Jerusalem. Sa makataronganon, kita makadahom ug mas dako nga katumanan nianang bahina sa tagna ni Joel sa dihang magsugod na sa pagkahitabo ang paglaglag sa Diyos sa presenteng sistema.

Haing Kasakitan Una pa sa Katingalahang Hitabo sa Langit?

14, 15. Unsay epekto sa tagna ni Joel diha sa atong pagsabot sa Mateo 24:29?

¹⁴ Ang katumanan sa tagna ni Joel (uyon sa ubang mga tagna nga migamit sa susamang pinulongan) nagtabang kanato sa pagsabot sa mga pulong sa Mateo 24:29. Tin-aw, ang giingon ni Jesus bahin sa ‘adlaw nga mongitngit, sa bulan nga dili mohatag ug kahayag, ug sa mga bituon nga mangahulog’ wala magpasabot sa mga butang nga nagakahitabo sulod sa daghang dekada sa kataposan sa presenteng sistema, sama sa pagtungha sa mga roket sa wanang, mga paglandig sa bulan, ug sa susamang mga butang. Dili, ang iyang gihisgotan mao ang mga butang nga nalangkit sa “dako ug makapukaw ug kahadlok nga adlaw ni Jehova,” ang kalaglagan nga umaabot pa.

¹⁵ Kini nalangkit sa atong pagsabot kon sa unsang paagi ang katingalahang hitabo sa langit mahitabo “dihadiha human sa kasakitan.” Si Jesus wala maghisgot sa kasakitan nga natapos niadtong 70 K.P. Kondili, siya nagpunting sa pagsugod sa dakong kasakitan nga mahitabo sa sistema sa kalibotan sa umaabot, nga mosangko sa iyang gisaad nga “presensiya.” (Mateo 24:3) Kana nga kasakitan anaa pa sa atong unahan.

16. Unsa nga kasakitan ang gihisgotan sa Marcos 13:24, ug ngano man?

¹⁶ Komosta na man ang mga pulong diha sa Marcos 13:24: “Apan niadtong mga adlawa, human niana nga kasakitan, ang adlaw mongitngit, ug ang bulan dili mohatag sa kahayag niini”? Dinhi, ang mga pulong ‘niadto’ ug “niana” maoy mga matang sa Gregong pulong nga e·keiʹnos, usa ka matudloong pronombre nga nagpakitag usa ka butang nga dugay pang mahitabo. Ang e·keiʹnos mahimong gamiton aron ipaila ang sa usa ka butang nga dugay nang nahitabo (o nahisgotan na) o usa ka butang sa halayong umaabot. (Mateo 3:1; 7:22; 10:19; 24:38; Marcos 13:11, 17, 32; 14:25; Lucas 10:12; 2 Tesalonica 1:10) Busa, ang Marcos 13:24 nagpunting “niana nga kasakitan,” dili ang kasakitan nga gipahinabo sa mga Romano, kondili sa gamhanang buhat ni Jehova sa kataposan sa presenteng sistema.

17, 18. Unsa nga kahayag ang gihatag sa Pinadayag bahin sa kon unsang paagi mahitabo ang dakong kasakitan?

¹⁷ Ang mga kapitulo 17 ngadto sa 19 sa Pinadayag mohaom ug magpamatuod niining gipasibo nga pagsabot sa Mateo 24:29-31, Marcos 13:24-27, ug Lucas 21:25-28. Sa unsang paagi? Ang mga Ebanghelyo nagpakita nga kining maong kasakitan dili magsugod ug dili matapos dihadiha. Human sa pagsugod niini, ang ubang mga tawong masinupakon buhi gihapon sa pagkakita sa “ilhanan sa Anak sa tawo” ug sa pagsanong​—sa pagminatay ug, sama sa gipahayag sa Lucas 21:26, “panguyapan sa kahadlok ug sa pagpaabot sa mga butang nga moabot diha sa gipuy-ang yuta.” Kanang makalilisang nga kahadlok maoy tungod sa ilang pagkakita sa “ilhanan” nga magtimaan sa ilang haduol nga kalaglagan.

¹⁸ Ang asoy sa Pinadayag nagpakita nga ang umaabot nga dakong kasakitan magsugod sa dihang ang militaristiko nga “mga sungay” sa internasyonal nga “mapintas nga mananap” moliso sa “bantogang bigaon,” ang Babilonyang Bantogan.d (Pinadayag 17:1, 10-16) Apan daghang tawo ang mahibilin, kay ang mga hari, mga magpapatigayon, mga kapitan sa barko, ug uban pa magbangotan sa kataposan sa bakak nga relihiyon. Sa walay duhaduha daghan ang makasabot nga mosunod na ang ilang paghukom.​—Pinadayag 18:9-19.

Unsay Moabot?

19. Unsay atong madahom sa dihang ang dakong kasakitan magsugod?

¹⁹ Ang mga asoy sa Ebanghelyo sa Mateo, Marcos, ug Lucas apil na ang Pinadayag mga kapitulo 17-19 mohatag ug igong kalamdagan kon unsay mahitabo sa dili madugay. Sa panahong gitakda sa Diyos, ang dakong kasakitan magsugod pinaagi sa pag-atake sa tibuok kalibotang empiryo sa bakak nga relihiyon (Babilonyang Bantogan). Kini ilabinang mapintas batok sa Kakristiyanohan, nga maoy katugbang sa dili matinumanong Jerusalem. “Dihadiha human” niining hugnaa sa kasakitan, “aduna unyay mga ilhanan sa adlaw ug bulan ug mga bituon, ug ibabaw sa yuta tumang kasakit [nga wala pa sukad mahitabo] sa kanasoran.”​—Mateo 24:29; Lucas 21:25.

20. Unsang katingalahang butang sa langit ang ato pang madahom?

²⁰ Sa unsang diwa nga ‘ang adlaw mongitngit, ang bulan dili mohatag sa kahayag niini, ang mga bituon mangahulog gikan sa langit, ug ang mga gahom sa kalangitan mangatay-og’? Walay duhaduha, diha sa unang bahin sa dakong kasakitan, daghang kahayag​—prominenteng mga klerigo sa relihiyosong kalibotan​—iyagyag ug paphaon sa “napulo ka sungay” nga gihisgotan sa Pinadayag 17:16. Walay duhaduha ang politikal nga mga gahom mangatay-og usab. Aduna ba usab unyay makalilisang mga panghitabo sa pisikal nga kalangitan? Tingali aduna, ug mas labaw pa ka makapukaw ug kahadlok kay sa niadtong gihubit ni Josephus nga nahitabo duol sa kataposan sa Hudiyohanong sistema. Nahibalo kita nga sa karaang panahon, ang Diyos mipasundayag sa iyang gahom aron ipahinabo ang maong malaglagong mga epekto, ug kana mahimo niya pag-usab.​—Exodo 10:21-23; Josue 10:12-14; Maghuhukom 5:20; Lucas 23:44, 45.

21. Sa unsang paagi ang umaabot nga “ilhanan” mahitabo?

²¹ Niining puntoha ang tanang tulo ka magsusulat sa Ebanghelyo migamit sa toʹte (unya) sa pagpailaila sa sunod nga hitabo. “Unya ang ilhanan sa Anak sa tawo makita sa langit.” (Mateo 24:30; Marcos 13:26; Lucas 21:27) Sukad sa Gubat sa Kalibotan I, ang tinuod nga mga tinun-an ni Jesus nakaila sa daghag-bahing ilhanan sa iyang dili makitang presensiya samtang ang kadaghanang tawo wala makamatikod niana. Apan ang Mateo 24:30 nagpunting ngadto sa dugang nga “ilhanan” nga motungha sa umaabot, nianang iya sa “Anak sa tawo,” ug ang tanang nasod mapugos sa paghatag ug pagtagad. Sa dihang si Jesus moabot uban sa panganod nga dili makita, ang mosupak nga mga tawo sa tibuok kalibotan makaila sa “pag-anhi” (Grego, er·khoʹme·non) tungod sa milagroso nga pagpasundayag sa iyang harianong gahom.​—Pinadayag 1:7.

22. Unsa ang mahimong epekto sa pagkakita sa “ilhanan” sa Mateo 24:30?

²² Ang Mateo 24:30 nagagamit pag-usab sa toʹte aron ipailaila kon unsa ang sunod nga mahitabo. Unya ang mga nasod, nga makamatikod sa sangpotanan sa ilang kahimtang, magapukpok sa ilang kaugalingon ug magminatay, tingali nakasabot nga ang ilang kalaglagan haduol na. Pagkalahi sa mga alagad sa Diyos, kay kita makayahat sa atong mga ulo, kay nahibalo nga haduol na ang kaluwasan! (Lucas 21:28) Ang Pinadayag 19:1-6 nagpakita usab sa matuod nga mga magsisimba sa langit ug dinhi sa yuta nga nagakalipay tungod sa kataposan sa bantogang bigaon.

23. (a) Unsang lihok ang pagahimoon ni Jesus maylabot sa mga pinili? (b) Unsay ikasulti bahin sa pagdala ngadto sa langit sa mga nanghibilin?

²³ Ang tagna ni Jesus nagpadayon sa pag-ingon, sa Marcos 13:27: “Unya [toʹte] iyang ipadala ang mga anghel ug tigomon ang iyang mga pinili gikan sa upat ka hangin, gikan sa tumoy sa yuta hangtod sa tumoy sa langit.” Gihatagan ug pagtagad dinhi ni Jesus ang nanghibilin sa 144,000 nga “mga pinili” nga buhi pa sa yuta. Sa unang bahin sa kataposan sa sistema sa mga butang, kining dinihogang mga tinun-an ni Jesus gidala ngadto sa teokratikanhong panaghiusa. Apan, sumala sa gigamit nga pagkasunodsunod, ang Marcos 13:27 ug Mateo 24:31 naghubit ug lain pa nga butang. “Uban ang usa ka dakong tingog sa trumpeta,” ang nanghibilin sa “mga pinili” pagatigomon gikan sa mga tumoy sa yuta. Sa unsang paagi sila pagatigomon? Walay duhaduha, sila “timbrihan” ug klaro nga mailhan ni Jehova ingong bahin “niadtong gipanagtawag ug pinili ug matinumanon.” Ug sa tinudlong panahon sa Diyos, sila pagatigomon ngadto sa langit aron mahimong mga hari-saserdote.e Kini mohatag kalipay kanila ug sa ilang matinumanong mga kauban, ang “dakong panon,” kinsa mismo pagatimbrihan alang ‘sa pagpanggula gikan sa dakong kasakitan’ aron tagamtamon ang mga panalangin sa usa ka paraiso nga yuta.​—Mateo 24:22; Pinadayag 7:3, 4, 9-17; 17:14; 20:6; Ezekiel 9:4, 6.

24. Ang Mateo 24:29-31 nagpadayag ug unsang pagkasunodsunod bahin sa umaabot nga mga hitabo?

²⁴ Sa dihang ang mga apostoles miingon, “Sultihi kami . . . ,” ang tubag ni Jesus nagasakop ug labaw pa kay sa ilang masabtan. Apan, sa ilang tibuok kinabuhi sila nalipay nga makita ang tipikong katumanan sa iyang tagna. Ang atong pagtuon sa tubag ni Jesus naghatag ug pagtagad sa bahin sa iyang tagna nga matuman sa haduol nga umaabot. (Mateo 24:29-31; Marcos 13:24-27; Lucas 21:25-28) Makita na nato nga ang atong kaluwasan nagakahiduol na. Kita makapaabot sa pagsugod sa dakong kasakitan, unya ang ilhanan sa Anak sa tawo, ug unya ang pagtigom sa mga pinili sa Diyos. Sa kataposan, ingong Tiglaglag ni Jehova sa Armageddon, ang atong Manggugubat-nga-Hari, ang naentronong si Jesus, “magabug-os sa iyang pagpangdaog.” (Pinadayag 6:2) Kanang adlaw ni Jehova, sa dihang ipahamtang niya ang panimalos, moabot ingong dakong panghinapos sa kataposan sa sistema sa mga butang nga nagtimaan sa adlaw ni Ginoong Jesus sukad sa 1914 padayon.

25. Sa unsang paagi kita makabahin sa umaabot pang katumanan sa Lucas 21:28?

²⁵ Hinaot nga kamo padayong makabaton ug kaayohan sa inyong kaugalingon pinaagi sa diyosnong pagtulon-an, aron sa pagsanong sa umaabot pang mga katumanan sa mga tagna ni Jesus: “Inigsugod pagkahitabo niining mga butanga, tindog nga tul-id ug ihangad ang inyong mga ulo, tungod kay ang inyong kagawasan nagakaduol na.” (Lucas 21:28) Pagkatahom nga umaabot ang naghulat atubangan sa mga pinili ug sa dakong panon samtang mopadayon si Jehova sa pagbalaan sa iyang balaang ngalan!

[Mga footnote]

Nakahinumdom Ka Ba?

◻ Sa unsang paagi ang mga bahin sa Joel 2:28-31 ug 3:15 natuman sa unang siglo?

◻ Haing kasakitan ang gihisgotan sa Mateo 24:29, ug nganong kita nakahinapos niana?

◻ Sa unsang katingalahang hitabo sa langit ang gihisgotan sa Mateo 24:29, ug sa unsang paagi kini mahitabo dihadiha human sa kasakitan?

◻ Sa unsang paagi ang Lucas 21:26, 28 mamatuman sa umaabot?

[Hulagway sa panid 16, 17]

Ang dapit sa templo

[Credit Line]

Pictorial Archive (Near Eastern History) Est.