Nahiusa sa Gugma—Taho sa Tinuig nga Tigom

MAKITA ang kahinam sa tanang nangadto sa Assembly Hall sa mga Saksi ni Jehova sa Jersey City, New Jersey, U.S.A. Sa buntag sa Oktubre 3, 2009, kapin sa 5,000 ang mitambong sa ika-125 nga tinuig nga tigom sa Watch Tower Bible and Tract Society of Pennsylvania. Libolibo usab ang namati ug mitan-aw sa programa pinaagig audio ug video nga gikonektar sa tulo ka pasilidad sa Bethel sa United States ug sa Canada. Tanantanan, 13,235, nga nahiusa sa ilang gugma kang Jehova, ang nakapahimulos sa tulo ka oras nga programa.

Si Geoffrey Jackson sa Nagamandong Lawas mao ang tsirman. Gisugdan niya ang programa pinaagig pagpresentar sa usa ka grupo sa mga Bethelite nga miawit ug alawiton gikan sa atong bag-ong songbok. Ang nagdumala sa maong grupo maoy membro usab sa Nagamandong Lawas nga si David Splane, kinsa daklit nga naghisgot sa kahinungdanon sa musika diha sa putli nga pagsimba. Ang nanambong gidapit sa pagkanta ug tulo ka bag-ong alawiton; ang grupo maoy unang mikanta niana, ug dayon miduyog kanila ang nanambong. Ang maong grupo gigamit alang lamang sa maong okasyon; dili kini himoong sumbanan sa mga kongregasyon, sirkito, o mga distrito.

Taho Gikan sa mga Sanga

Ang nanambong nga mga membro sa Komite sa Sanga mihatag ug taho gikan sa lima ka sanga. Si Kenneth Little miingon nga sa dili madugay ang Canada na ang mag-imprenta sa kadaghanang magasin alang sa United States ug Canada, nga moresulta sa napulo ka pilo nga pag-uswag sa produksiyon sa maong sanga. Aron mahimo kini, duha ka relibo ang magtrabaho sa bag-ong imprentahanan, nga mokabat ug 16 ka oras matag adlaw.

Si Reiner Thompson mitaho bahin sa buluhaton sa Gingharian sa Dominican Republic, ug si Albert Olih naghisgot sa atong buluhaton sa Nigeria. Si Emile Kritzinger sa Mozambique misaysay nga human sa daghang tuig nga paglutos didto, ang mga Saksi ni Jehova narehistro na niadtong 1992. Ning bag-o pa, kining tulo ka nasod adunay dakong pag-uswag sa gidaghanon sa mga magmamantala. Si Viv Mouritz nga gikan sa sanga sa Australia mitaho bahin sa pag-uswag sa buluhaton sa East Timor, nga ilalom sa pagdumala sa sanga sa Australia.

Mga Komite sa Nagamandong Lawas

Sukad niadtong 1976, ang tanang buluhaton sa mga Saksi ni Jehova gidumala na sa unom ka komite sa Nagamandong Lawas. Sa ulahi, ang membro sa ubang mga karnero gitudlo ingong mga katabang. Sa pagkakaron, 23 ang nagtabang sa maong buluhaton. Ang unom kanila giinterbiyo. Sila dunay total nga 341 ka tuig sa bug-os-panahong pag-alagad—nga moaberids ug 57 ka tuig matag usa.

Si Don Adams, nga miabot sa Bethel niadtong 1943, misaysay nga ang Komite sa mga Koordinetor naglangkob sa mga koordinetor sa lima pa ka laing komite. Ang maong komite maoy magtino nga ang lima ka komite magtinabangay sa hapsay nga paagi. Kini usab ang mohimog mga kahikayan sa dihang motungha ang dagkong emerhensiya, paglutos, mga kaso sa korte, kalamidad, ug uban pang mga butang nga nag-apektar sa mga Saksi ni Jehova sa tibuok kalibotan.

Si Dan Molchan naghubit sa buluhaton sa Komite sa Kawanihan, nga maoy nag-atiman sa espirituwal ug pisikal nga panginahanglan sa 19,851 ka Bethelite sa tibuok kalibotan. Si David Sinclair naghisgot kon sa unsang paagi ang Komite sa Pagpatik nagdumala sa pagpamalit ug mga suplay ug galamiton alang sa mga sanga. Dayon, si Robert Wallen, nga nag-alagad sa Bethel sa duolag 60 ka tuig, miasoy kon sa unsang paagi ang Komite sa Pag-alagad nagsuperbisar sa buluhaton sa katawhan ni Jehova sa kanataran ug sa mga kongregasyon. Si William Malenfant nagsumaryo sa hagong buluhaton sa Komite sa Pagtudlo sa pag-andam ug programa sa kombensiyon. Sa kataposan, si John Wischuk nagsaysay kon sa unsang paagi ang Komite sa Pagsulat nagdumala sa maampingong pag-andam sa mga materyal alang sa atong mga publikasyon.a

Ang Tinuig nga Teksto sa 2010 Nagpasiugda sa Gugma

Ang misunod nga tulo ka pakigpulong gihatag sa mga membro sa Nagamandong Lawas. Si Gerrit Lösch nagsugod sa iyang pakigpulong pinaagig pangutana, “Gusto ka bang higugmaon sa uban?” Iyang gisaysay nga ang gugma maoy pangunang panginahanglan sa tawo, ug kitang tanan molambo diha niana. Kon wala ang gugma, wala usab kita kay ang dili-mahakogong gugma ni Jehova maoy nagtukmod kaniya sa paglalang kanato. Ang atong pangunang motibo sa pagsangyaw ug pagpanudlo mao ang gugma kang Jehova.

Ang gugma nga gipasukad sa prinsipyo ipakita dili lamang sa atong mga silingan kondili sa atong mga kaaway usab. (Mat. 5:43-45) Ang nanambong giawhag sa pagpalandong sa naagoman ni Jesus alang kanato—siya gibunalan, gibiaybiay, gilud-an, ug gidughang. Bisan pa niini, iyang giampo ang mga sundalo nga naglansang kaniya. Dili ba nga mas higugmaon nato siya tungod niini? Dayon gipahibalo ni Brader Lösch ang tinuig nga teksto sa 2010: 1 Corinto 13:7, 8, ‘Ang gugma molahutay sa tanang butang. Ang gugma dili gayod mapakyas.’ Kita adunay paglaom nga dili lamang mabuhi sa walay kataposan kondili mahigugma ug pagahigugmaon usab sa walay kataposan.

Hapit Ka na ba Mahutdig Gasolina?

Si Samuel Herd nagsugod sa iyang pakigpulong pinaagig ilustrasyon. Ibutang ta nga ubanon ka sa imong higala sa pagbiyahe ug 50 kilometros. Kay naglingkod ka man sa atubangan sa awto, imong nakita ang signal diha sa dashboard nga hapit nang mahurot ang gasolina. Imong gisultihan niana ang imong higala. Miingon siya nga dili ka angayng mabalaka kay duna pay mga upat ka litros diha sa tangke. Apan, wala madugay nahurot ang gasolina. Mamasin ka ba sa pagbiyahe bisag hapit nang mahurot ang gasolina? Dili ba mas maayo nga pun-on nimog gasolina ang tangke? Sa susama, kinahanglan nga kanunayng puno ang atong tangke, nga ang gasolina mao ang atong kahibalo bahin kang Jehova.

Busa, kinahanglan kitang magpatubil kanunay. Adunay upat ka paagi nga mahimo nato kini. Ang una mao ang personal nga pagtuon, nga mahimong pamilyar sa Bibliya pinaagi sa pagbasa niana adlaw-adlaw. Dili lang kita magbasa kondili sabton usab nato ang atong nabasa. Ang ikaduha mao ang regular nga Pamilyahanong Pagsimba. Naggahin ba kitag panahon matag semana aron mapuno ang atong tangke o diyutay ra ang atong ipatubil? Ang ikatulo mao ang pagtambong sa mga tigom sa kongregasyon. Ang ikaupat mao ang hilom, walay-makabalda nga pagpamalandong bahin sa mga paagi ni Jehova. Ang Salmo 143:5 nag-ingon: “Ako nahinumdom sa kanhing mga adlaw; ako nagpalandong sa tanan mong kalihokan.”

“Ang mga Matarong Mosidlak”

Si John Barr mihatag sa ikatulo ug kataposang pakigpulong, nga nagpatin-aw sa ilustrasyon ni Jesus bahin sa trigo ug mga bunglayon. (Mat. 13:24-30, 38, 43) Ang maong ilustrasyon nagtumong sa “ting-ani” nga nianang panahona ang “mga anak sa gingharian” pagatigomon ug ang mga bunglayon ilain aron pagasunogon.

Gipatin-aw ni Brader Barr nga ang pagpanigom adunay kinutoban. Iyang gikutlo ang Mateo 24:34, nga nag-ingon: “Kining kaliwatana dili gayod mahanaw hangtod nga mahitabo kining tanang butanga.” Kaduha niya basaha kining komentoha: “Dayag nga gipasabot ni Jesus nga mag-abot ang kinabuhi sa pipila ka dinihogan nga buhi na sa dihang ang ilhanan nagsugod pagkahitabo niadtong 1914 ug ang kinabuhi sa ubang mga dinihogan nga makakita sa pagsugod sa dakong kasakitan.” Wala kita masayod sa eksaktong gitas-on ‘niining kaliwatana,’ apan naglakip kini niining duha ka grupo kansang kinabuhi mag-abot. Bisan tuod ang mga dinihogan lainlaig edad, kadtong sakop sa duha ka grupo nga naglangkob sa kaliwatan parehong nagkinabuhi panahon sa kataposang mga adlaw. Makapahupay gayod ang pagkahibalo nga dili tanan sa mas bata nga mga dinihogan nga kadungan niadtong mga gulang-gulang na nga nakakita sa ilhanan nga nagsugod pagkahitabo niadtong 1914 ang mamatay una pa ang dakong kasakitan!

“Ang mga anak sa gingharian” mahinamong nagpaabot sa ilang langitnong ganti, apan kitang tanan kinahanglang magpabiling matinumanon, nga magasidlak hangtod sa kataposan. Pagkadakong pribilehiyo nga makakita sa pagpanigom sa “trigo” sa atong panahon.

Human sa panapos nga awit, si Theodore Jaracz sa Nagamandong Lawas maoy mitanyag sa paniklop nga pag-ampo. Makapalig-on gayod ang programa sa tinuig nga tigom!

[Footnote]

[Kahon sa panid 5]

TUNGHAAN ALANG SA MGA ANSIYANO

Sa tinuig nga tigom, si Anthony Morris, nga membro sa Nagamandong Lawas, nagpahibalo nga magpadayon ang pagbansay alang sa mga ansiyano sa kongregasyon. Ang tunghaan alang sa mga ansiyano sa United States gisugdan sa sayong bahin sa 2008 sa educational center sa Patterson, New York. Bag-o lang nahuman ang ika-72 nga klase ug 6,720 na ka ansiyano ang nabansay. Daghan pa ang kinahanglang bansayon. Sa United States lang, dunay kapin sa 86,000 ka ansiyano. Busa, giaprobahan sa Nagamandong Lawas nga magdugang ug usa ka tunghaan sa Brooklyn, New York, sugod sa Disyembre 7, 2009.

Sulod sa duha ka bulan, upat ka nagapanawng magtatan-aw ang bansayon sa Patterson ingong mga instruktor. Paadtoon sila sa Brooklyn aron magtudlo, ug upat pa ang bansayon. Dayon, sila ang motudlo didto sa tunghaan sa Brooklyn, ug ang unang upat maoy magtudlo diha sa mga Assembly Hall ug Kingdom Hall. Pagahimoon kini hangtod nga moabot ug 12 ang instruktor nga magtudlo diha sa unom ka tunghaan kada semana sa Iningles didto sa United States. Dayon, upat ka instruktor ang bansayon sa pagtudlo sa Kinatsila. Ang maong tunghaan dili kapuli sa Kingdom Ministry School; ang katuyoan niini maoy pagpauswag sa espirituwalidad sa mga ansiyano. Ang mga sanga sa tibuok kalibotan magpahigayon sa maong tunghaan diha sa mga Assembly Hall ug Kingdom Hall sugod sa 2011 nga tuig sa pag-alagad.

[Mga hulagway sa panid 4]

Ang tinuig nga tigom gisugdan pinaagig mga awit gikan sa bag-ong songbok nga “Mag-awit Kang Jehova”