Pakigkooperar sa Nagamandong Lawas Karong Adlawa
“Iyang igatudlo siya sa pagdumala sa iyang tanang katigayonan.“—LUCAS 12:44.
1. Diha sa unsa nga gingharian nga si Kristo misugod sa pagmando sa 33 K.P., ug pinaagi sa unsa?
SA PENTEKOSTES 33 K.P., si Jesu-Kristo, ang Ulo sa kongregasyon, aktibong misugod sa pagmando sa gingharian sa iyang dinihogan-sa-espiritu nga mga ulipon. Sa unsang paagi? Pinaagi sa balaang espiritu, sa mga manulonda, ug sa makitang nagamandong lawas. Sumala sa gipaila ni apostol Pablo, ang Diyos ‘nagluwas sa mga dinihogan gikan sa kagahom sa kangitngit ug naglalin kanila ngadto sa gingharian sa iyang Anak nga pinalangga.’—Colosas 1:13-18; Buhat 2:33, 42; Galacia 2:1, 2; Pinadayag 22:16.
2. Diha sa unsang labi pang dakong Gingharian nga si Kristo misugod sa pagmando sa 1914?
2 Sa kataposan sa “tinudlong panahon sa kanasoran,” gipadako ni Jehova ang harianong awtoridad ni Kristo, gipasangkad kini saylo sa Kristohanong kongregasyon. (Lucas 21:24) Oo, sa tuig 1914, gihatagan sa Diyos ang iyang Anak ug harianong awtoridad ibabaw sa “kanasoran,” “ang gingharian sa kalibotan,” sa tanang katawhan.—Salmo 2:6-8; Pinadayag 11:15.
Gitudlo sa “Pagdumala sa Iyang Tanang Katigayonan”
3, 4. (a) Diha sa sambingay ni Jesus bahin sa mina, kinsa ang gihawasan sa tawong hamili? (b) Unsang kaugmaran sa Gingharian ang nahitabo sa 1918 ug 1919?
3 Hinungdanon dinhi mao ang ilustrasyon ni Jesus mahitungod sa usa ka tawong hamili. (Lucas 19:11-27) Sa wala pa mopanaw sa halayong yuta aron sa pagdawat sa harianong gahom, gihatagan sa tawo ang iyang mga ulipon ug salapi (mga mina) aron ilang ipatigayon. Sa paghiuli, niining tawhana, nga naghawas kang Kristo, nagpatawag sa atubangan kaniya sa “mga ulipon nga iyang gihatagan sa salapi, aron iyang mahibaloan kon pilay ilang nakita sa patigayon.” (Lucas 19:15) Sa unsang paagi nahimo kini tapos nga nadawat ni Jesus ang harianong gahom?
4 Sa 1918 ang naentronong Haring Jesu-Kristo nakakitag gamayng grupo sa mga Kristohanon nga mibiya sa mga iglesya sa Kakristiyanohan ug puliki sa pag-atiman sa yutan-ong intereses sa ilang Agalon. Human sa paglunsay kanila nga daw pinaagi sa kalayo, gihatagan ni Jesus ang iyang mga ulipon ug dugang nga awtoridad sa 1919. (Malakias 3:1-4; Lucas 19:16-19) Iyang gitudlo sila sa “pagdumala sa iyang tanang katigayonan.”—Lucas 12:42-44.
“Pagkaon sa Hustong Panahon”
5, 6. (a) Unsang gipadakong tinudlong-buluhaton ang nadawat sa piniyalan ni Kristo? (b) Unsang mga tagna ang natuman human sa 1914, ug sa unsang paagi ang piniyalan nga matang aktibong nakigbahin sa ilang katumanan?
5 Ang nagamandong Haring Jesu-Kristo mihatag ug dugang buluhaton sa iyang piniyalan, o magdudumala sa balay, sa yuta. Ang dinihogang mga Kristohanon nahimong “mga embahador” sa Diyos nga kapuli alang sa gipurong-purongang hari nga gihatagan ug gahom sa pagmando sa tanang katawhan sa yuta. (2 Corinto 5:20; Daniel 7:14) Ang ilang tiningob nga responsabilidad dili kay maghatag lamang sa lawas sa dinihogang mga alagad ni Kristo sa “ilang bahin sa pagkaon sa hustong panahon.” (Lucas 12:42) Sila karon kinahanglang aktibong makigbahin sa pagtuman sa mga tagna nga natuman human nga natukod ang Gingharian sa 1914.
6 Unsay kahulogan niini sa aktuwal nga buhat? Kini nagkahulogan sa pagpasangkad sa pagwali sa ‘kining maayong balita sa gingharian ngadto sa tanang ginapuy-ang yuta.’ (Mateo 24:14) Dugang pa, kini nagkahulogan sa pagmantala ug gamhanang mga mensahe sa paghukom batok sa daotang sistema ni Satanas ug sa mga tigpaluyo niini. Kini adunay epekto nga ‘pag-uyog sa mga nasod.’ Busa, ang “bililhong mga butang,” ang “ubang mga karnero” ni Jesus, misugod sa pagsulod. (Haggeo 2:7; Juan 10:16) Gikan sa 1935 paunahan, ang “dakong panon” misugod sa pagpanon ngadto sa organisasyon ni Jehova sa tibuok-kalibotan. (Pinadayag 7:9, 10) Kini nagkinahanglan ug progresibong mga pagpauswag sa organisasyon. Sa malarawanong pagkasulti, ang mga bato pulihan ug puthaw, ang mga kahoy pulihan ug tumbaga, ang puthaw pulihan ug salapi, ug ang tumbaga pulihan ug bulawan. (Isaias 60:17) Kining tanan nahitabo sukad sa 1919 ubos sa aktibo ug suod nga pagtultol ni Jesu-Kristo, kinsa mitugyan sa tanan niyang yutan-ong intereses sa Gingharian, o katigayonan, ngadto sa iyang matinumanong ulipon nga matang ug sa Nagamandong Lawas niini.
7. Unsay nalangkit sa nagadugang nga mga responsabilidad sa piniyalan?
7 Masabtan dayon nato nga ang nagadugang nga palas-anon sa responsabilidad nga gihatag diha sa ulipon, piniyalan, o magdudumala sa balay sa Agalon nagkinahanglag madasigong pagsulat ug editoryal nga mga buluhaton. Ang espirituwal nga tagana sa pagkaon kinahanglang regular nga patikon sa hustong panahon diha sa Ang Bantayanang Torre. Sa 1919 ang The Golden Age (kaubang magasin nga sa ulahi nahimong Consolation, ug unya Awake!) gisugdan sa pagpatik aron mapukaw ang interes sa publiko, dugang pa sa pagpalig-on sa “mga panimalay.” (Mateo 24:45) Ang baha sa mga libro, mga pulyeto, ug mga tract gipatik usab sa daghan nang katuigan.
Mapinadayonong mga Paglunsay
8. Uban sa unsa nga unang nailhan ang mga sakop sa Nagamandong Lawas, ug unsang pahayag ang gihimo sa The Watchtower sa 1914?
8 Kon tan-awon ug balik kining “panahon sa kataposan,” kita dili mahibulong nga ang mga sakop sa Nagamandong Lawas sa sinugdan suod nga naila uban sa editoryal nga kawanihan sa Watch Tower Society. (Daniel 12:4) Ang artikulong “The Theocratic Alignment Today,” gipatik diha sa The Watchtower sa Nobyembre 1, 1944, nag-ingon: “Sa makataronganon, sila nga gisaligan sa pagpatik sa gipadayag nga mga kamatuoran sa Bibliya gitamod ingong piniling nagamandong lawas sa Ginoo aron sa paggiya sa tanan nga gustong mosimba sa Diyos diha sa espiritu ug kamatuoran ug sa pag-alagad kaniya sa panaghiusa sa pagpakaylap niining gipadayag nga mga kamatuoran ngadto sa mga tawo nga giuhaw ug gigutom.”
9. Uban sa unsa nga ang Nagamandong Lawas sa ulahi suod nga nailhan, ug ngano?
9 Dihay legal nga mga kinahanglanong nalangkit sa pagpatik sa mga magasin ug sa ubang mga giya sa pagtuon sa Bibliya. Busa, ang Watch Tower Bible and Tract Society gitukod ug girehistro diha sa estado sa Pennsylvania, U.S.A. Sulod sa daghang katuigan, ang makitang Nagamandong Lawas naila uban sa pito-ka-membro nga mga hunta direktiba niining korporasyona nga gitukod aron sa pagpatik sa mga giya sa pagtuon sa Bibliya nga gikinahanglan ug gigamit sa katawhan sa Ginoo sa tibuok kalibotan.
10, 11. Unsang pagpalunsay ang nahitabo sa 1944, ug unsang komento ang gihimo mahitungod niini diha sa The Watchtower?
10 Ang pito ka direktor sa Sosyedad maoy matinumanong mga Kristohanon. Apan ang ilang katungdanan diha sa legal nga korporasyon mahimong ikaingon nga ilang nautang ang ilang mga posisyon diha sa Nagamandong Lawas sa ilang pagkapili pinaagi sa botasyon sa legal nga mga membro sa Watch Tower Society. Dugang pa, sumala sa balaod ang maong pagkamembro ug ang mga pribiliheyo niini sa pagbotar sa orihinal gihatag lamang sa pipila nga naghatag ug mga kontribusyon sa Sosyedad. Kining kahikayana kinahanglang bag-ohon. Kini gihimo diha sa tinuig nga miting sa korporasyon sa Watch Tower Society sa Pennsylvania nga gihimo sa Oktubre 2, 1944. Ang mga reglamento sa Sosyedad giamiyendahan aron ang pagkahimong membro dili na ipasukad sa pinansiyal nga paagi. Ang mga membro pilion gikan sa taliwala sa matinumanong mga ulipon ni Jehova, ug sila nag-apil sa daghang nag-alagad sa bug-os panahon diha sa hedkuwarter sa Sosyedad sa Brooklyn, New York, ug sa mga sanga niini sa tibuok kalibotan.
11 Mitaho mahitungod niini nga kauswagan, ang The Watchtower sa Nobyembre 1, 1944, nag-ingon: “Ang salapi, nga gihawasan sa pinansiyal nga kontribusyon, dili angay mao ang magahukom, nga sa pagkamatuod walay labot sa pagpangatungdanan sa nagamandong lawas sa mga Saksi ni Jehova sa kalibotan. . . . Ang balaang espiritu, ang aktibong gahom nga nagagikan kang Jehova nga Diyos pinaagi kang Kristo Jesus, angay mao ang magahukom ug mogiya niining butanga.”
Lahi Gikan sa Hunta Direktiba
12. Unsay nagpakita nga gipanalanginan ni Jehova ang mga pagpalunsay ubos sa pagtultol sa Nagamandong Lawas?
12 Ang progreso sa buluhatong pagsangyaw sa mga dekadang misunod nagpamatuod nga gipanalanginan ni Jehova ang gihisgotan na nga mga pagpalunsay sa pagsabot sa Nagamandong Lawas. (Proverbio 10:22) Ngani, ang gidaghanon sa mga magmamantala sa Gingharian sa tibuok kalibotan milukso gikan sa ubos sa 130,000 sa 1944 ngadto sa 1,483,430 sa 1970! Apan dugang mga kauswagan ang umaabot pa.
13. (a) Hangtod sa 1971, unsay kahimtang maylabot sa Nagamandong Lawas? (b) Unsay nahitabo sa tinuig nga miting sa Sosyedad niadtong 1971?
13 Hangtod sa 1971 ang mga sakop sa Nagamandong Lawas nailhan gihapon uban sa pito ka membro sa hunta direktiba sa Watch Tower Bible and Tract Society of Pennsylvania. Ang presidente sa sosyedad ang nagpas-an sa dakong luwan sa responsabilidad sa paghimog mga desisyon maylabot sa palakaw sa mga sangang buhatan sa Sosyedad sa tibuok kalibotan. Apan ang makasaysayanhong mga pakigpulong nga gipahayag diha sa tinuig nga miting gihimo sa Oktubre 1, 1971. Ang presidente sa Sosyedad mihatag ug pakigpulong bahin sa ulohan “Pagdala sa Balaang Dapit Ngadto sa Tukmang Kahimtang,” ug ang bise presidente mipakigpulong bahin sa topikong “Ang Nagamandong Lawas Lahi Gikan sa Legal nga Korporasyon.” Unsay kalainan sa Nagamandong Lawas ug sa legal nga korporasyon?
14. Unsay kalainan tali sa legal nga korporasyon ug sa Nagamandong Lawas?
14 Sama sa gihisgotan na, ang Watch Tower Bible and Tract Society of Pennsylvania adunay hunta direktiba nga limitado sa pito ka membro. Kining dedikadong mga lalaking Kristohanon pilion alang sa tulo-ka-tuig nga termino sa mga membro sa korporasyon nga mototal nga dili mosobra sa 500, ang kadaghanan kanila dili dinihogang mga Kristohanon. Dugang pa, sanglit ang paglungtad sa korporasyon sa lunlon maoy legal, nga dunay pihong hedkuwarter, mahimong bungkagon ni Cesar, sa ato pa, sa Estado. (Marcos 12:17) Apan, ang Nagamandong Lawas maoy dili usa ka legal nga instrumento. Ang mga membro niini dili pinili pinaagi sa botasyon. Sila gitudlo pinaagi sa balaang espiritu ubos sa pagtultol ni Jehova nga Diyos ug ni Jesu-Kristo. (Itandi ang Buhat 20:28.) Dugang pa, kadtong naglangkob sa Nagamandong Lawas maoy dinihogan-sa-espiritu nga mga lalaki nga walay pihong gigikanang lugar o mga hedkuwarter.
15. Unsang pahayag mahitungod sa organisasyon ang gihimo sa The Watchtower sa Hunyo 15, 1972, ug unsay ikasulti bahin sa modernong-adlawng Nagamandong Lawas?
15 Maylabot niining mga pagpalunsay sa pagsabot, ang The Watchtower sa Hunyo 15, 1972, nag-ingon: “Sa mapasalamaton ang Kristohanong mga saksi ni Jehova nahibalo ug miila nga dili kini relihiyosong organisasyon sa usa-ka-tawo, kondili kini adunay nagamandong lawas sa dinihogan-sa-espiritu nga mga Kristohanon.” Ang Nagamandong Lawas sa dinihogan nga ulipon nga matang ug ang ilang minilyong mga kauban taliwala sa ubang mga karnero mauswagong gisangkapan sa pag-atiman sa katungdanan niini sa pagkamagdudumala.
16. Sa unsang paagi ang yutan-ong mga katigayonan ni Kristo miuswag sukad sa 1971, ug unsa ang pipila niini nga iyang gitugyan aron atimanon sa matinumanon ug maalamong ulipon, nga gihawasan sa Nagamandong Lawas niini?
16 Ang yutan-ong katigayonan ni Haring Jesu-Kristo padayon nga nagatubo. Sukad sa 1971 ang gidaghanon sa mga Saksi milukso gikan sa ubos nga 1,600,000 ngadto sa kinatas-ang ihap nga kapin sa 3,700,000 sa 1989. Pagkadako nga pamatuod sa panalangin sa Diyos! (Isaias 60:22) Kining pagtubo nagkinahanglan alang sa pagpadako sa mga pasilidad sa mga hedkuwarter sa Sosyedad ug sa sanga niini, ug maingon man sa pagpamoderno sa mga paagi sa pagpatik ug sa pag-apod-apod. Kini misangpot sa pagtukod ug daghang mga Kingdom Hall ug mga Assembly Hall sa tibuok kalibotan. Kasamtangan, ang Nagamandong Lawas nagpadayon usab sa pagpangabaga sa responsabilidad sa pagdumala sa buluhatong pagsangyaw, paggamag mga materyal sa pagtuon sa Bibliya, ug sa pagtudlog mga magtatan-aw sa mga sanga, sa mga distrito, sa mga sirkito, ug sa mga kongregasyon. Kini mao ang intereses sa Gingharian nga gitugyan ni Kristo sa pag-atiman diha sa matinumanon ug maalamong ulipon, nga gihawasan sa Nagamandong Lawas niini.
17. Unsang dugang kauswagan sa pagkamagdudumala ang gihimo sa 1971, 1974, ug 1976?
17 Ang unang-siglong nagamandong lawas gipadako nga nag-apil labaw pa kay sa mga apsotoles ni Jesus. Sa dihang nadesisyonan ang isyu bahin sa sirkunsisyon, dayag nga naapil sa lawas “ang mga apostol ug mga tigulang sa Jerusalem.” (Buhat 15:1, 2) Ikatandi, ang Nagamandong Lawas gipadako sa 1971 ug usab sa 1974. Aron maatiman ang ilang buluhaton sa pagkamagdudumala, naghikay ang Nagamandong Lawas ug lima ka komite nga nagsugod sa paglihok sa Enero 1, 1976. Ang matag usa ka komite gilangkoban gikan sa tulo ngadto sa unom ka membro, ang tanan adunay managsamang tingog maylabot sa mga butang nga gitagad. Ang tsirman sa matag usa ka komite moalagad sa usa ka tuig, ug ang indibiduwal nga mga membro sa Nagamandong Lawas moalagad diha sa usa o kapin pa niini nga mga komite. Ang matag usa niining lima ka komite nagahatag partikular nga pagtagad sa usa ka espisipikong bahin sa yutan-ong katigayonan ni Kristo. Ang ikaunom nga komite—ang Komite sa Tsirman, kansang mga membro mag-ulhosay kada tuig, nagaatiman sa dinaliang mga suliran.
Aktibong Pakigkooperar sa Nagamandong Lawas
18. Sa unsang paagi nagalihok ang Nagamandong Lawas, ug unsa ang usa ka paagi sa pagpasundayag sa atong kooperasyon niini?
18 Ang mga komite sa Nagamandong Lawas nagahimog senemanang mga miting sa pagsobli sa hinungdanong mga butang, mohimog mga desisyon human sa mainampoon nga mga pagtulotimbang, ug plano alang sa umaabot nga teokratikanhong kalihokan. Sumala sa gipadayag sa nag-una, ang Buhat kapitulo 15 nagpakita nga ang mabug-at nga pangutana nga nagkinahanglag sulbad ikonsulta sa unang-siglong nagamandong lawas aron matagad. Sa susama karong adlawa, ang importanteng mga pangutana ikonsulta sa enterong Nagamandong Lawas, nga nagatigom kada semana o makadaghan pa kon gikinahanglan. Ang mga membro sa Nagamandong Lawas, nga sa pagkakaron 12 ang gidaghanon, mangita sa pagtultol ni Jehova nga Diyos pinaagi sa Kasulatan ug pinaagi sa pag-ampo. Ang usa ka paagi nga atong ikapasundayag ang atong kooperasyon sa Nagamandong Lawas mao ang paghinumdom ilabina niining mga dinihogan diha sa atong adlaw-adlaw nga mga pag-ampo.—Roma 12:12.
19. Sa unsang paagi ang mga instruksiyon sa Nagamandong Lawas moabot sa mga kongregasyon?
19 Sa unsang paagi ang mga instruksiyon ug mga desisyon sa Nagamandong Lawas makaabot sa mga kongregasyon? Human nga ang mga sakop sa unang-siglong nagamandong lawas makaabot sa ilang desisyon pinaagi sa tabang sa espiritu sa Diyos, sila nagpadala ug sulat sa mga kongregasyon. (Buhat 15:22-29) Apan, ang pangunang paagi karong adlawa maoy pinaagi sa Kristohanong mga publikasyon.
20. (a) Unsang dugang organisasyonal nga pagpalunsay ang gihimo sa 1976? (b) Sa unsang paagi ang mga Komite sa Sanga nakigkooperar sa Nagamandong Lawas?
20 Sukad sa Pebrero 1, 1976, ang matag sangang-buhatan sa Watch Tower Society adunay Komite sa Sanga nga gilangkoban sa kuwalipikadong mga lalaki nga gitudlo sa Nagamandong Lawas. Ingong mga hawas sa Nagamandong Lawas alang sa nasod o mga nasod ubos sa pagdumala sa ilang sanga, kining mga igsoona kinahanglan matinumanon, maunongong mga lalaki. Kini nagapahinumdom kanato sa may katakos, mahadlokon sa Diyos, kasaligang mga lalaki kinsa mitabang kang Moses sa paghukom sa katawhan sa karaang Israel. (Exodo 18:17-26) Ang mga membro sa Komite sa Sanga nagapadapat sa mga instruksiyon nga madawat pinaagi sa mga basahon ug mga magasin ug sa Atong Ministeryo sa Gingharian sa Sosyedad, maingon man sa katibuk-ang mga sulat ug espesyal nga mga sulat nga nagahisgot sa lokal nga mga suliran. Ang mga Komite sa Sanga nagapahibalo kanunay sa kauswagan sa buluhaton diha sa matag usa ka yuta ug sa mga suliran nga tingalig motungha. Kining maong mga taho nga gikan sa tibuok kalibotan nagatabang sa Nagamandong Lawas sa paghukom kon unsang mga ulohana ang konsiderahon diha sa mga publikasyon sa Sosyedad.
21. Sa unsang paagi ang nagapanawng mga magtatan-aw itudlo, ug unsay naapil sa ilang mga katungdanan?
21 Ubos sa pagtultol sa balaang espiritu, ang mga Komite sa Sanga nagarekomendar ug hamtong, espirituwal nga mga lalaki sa pag-alagad isip sirkito ug distritong mga magtatan-aw. Human nga itudlo direkta sa Nagamandong Lawas, sila mag-alagad isip nagapanawng mga magtatan-aw. Kining mga igsoona nagaduaw sa mga sirkito ug sa mga kongregasyon aron sa paglig-on kanila sa espirituwal ug sa pagtabang kanila sa pagpadapat sa mga instruksiyon nga madawat gikan sa Nagamandong Lawas. (Itandi ang Buhat 16:4; Roma 1:11, 12) Ang nagapanawng mga magtatan-aw mohatag ug mga taho ngadto sa sangang buhatan. Pinaagi sa tabang sa balaang espiritu ug sa dinasig nga Kasulatan, sila makigbahin sa lokal nga mga ansiano sa pagrekomendar ug kuwalipikadong mga igsoong lalaki sa pagtudlo isip ministeryal nga mga alagad ug mga ansiano pinaagi sa Nagamandong Lawas o sa mga hawas niini.—Filipos 1:1; Tito 1:5; itandi ang 1 Timoteo 3:1-13; 4:14.
22. (a) Sa unsang paagi ang mga ansiano sa kongregasyon nakigkooperar sa Nagamandong Lawas? (b) Unsay nagpamatuod nga gipanalanginan ni Jehova kining teokratikanhong kahikayan?
22 Sa baylo, kadtong naglangkob sa mga lawas sa mga ansiano ‘nagatagad sa ilang kaugalingon ug sa tibuok panon, nga niini ang balaang espiritu mao ang nagtudlo kanila ingong mga magtatan-aw.’ (Buhat 20:28) Kining maong mga magtatan-aw matinumanong nagapaningkamot sa pagpadapat sa mga instruksiyon nga madawat gikan kang Jehova nga Diyos ug ni Jesu-Kristo pinaagi sa matinumanon ug maalamong ulipon ug sa Nagamandong Lawas niini. Gipanalanginan ni Jehova kining teokratikanhong kahikayan, aron ‘ang kongregasyon mapalig-on sa pagtuo ug manag-uswag sa gidaghanon sa adlaw-adlaw.’—Buhat 16:5.
23. Mahitungod sa Nagamandong Lawas, kita angay mohukom sa pagbuhat ug unsa?
23 Pagkamaayo gayod nga pinaagi sa Nagamandong Lawas, si Jehova nga Diyos ug ang Agalon, si Jesu-Kristo, nagapakitag pagpaluyo sa katawhan sa Diyos! (Salmo 94:14) Ingong bahin sa organisasyon ni Jehova, kita sa tagsa-tagsa nagabenepisyo gikan sa maong pagpaluyo. (Salmo 145:14) Kini angay molig-on sa atong desisyon sa pagtabang sa mga kahikayan sa Diyos. Sa pagkamatuod, hinaot nga kita mapalgang nagatabang sa Nagamandong Lawas sa mga Saksi ni Jehova samtang nagapadayon kita paingon sa panahon sa dihang “ang yuta mapuno sa kahibalo ni Jehova sama sa mga tubig nga nagatabon sa dagat.”—Isaias 11:9.
Pangunang mga Punto nga Hinumdoman
◻ Unsang nagadugang nga mga responsabilidad ang nadawat sa piniyalan nga matang sa 1919?
◻ Sulod sa daghang katuigan, uban sa unsa nga nailhan ang makitang Nagamandong Lawas?
◻ Unsang mauswagong mga pagpalunsay ang gihimo sa tinudlo nga mga membro sa Nagamandong Lawas?
◻ Unsa ang pila ka yutan-ong mga katigayonan ni Kristo nga iyang gitugyan ngadto sa ulipon nga matang sa Nagamandong Lawas niini?
◻ Sa unsang paagi makigkooperar kita sa Nagamandong Lawas?
[Mga hulagway sa panid 16, 17]
Gikan sa hedkuwarter sa kalibotan sa Brooklyn, New York, ang Nagamandong Lawas nagadumala sa pagpatik, ug sa buluhatong pagsangyaw sa mga Saksi ni Jehova sa 93 ka sangang-buhatan sa Watch Tower Society
Alemanya
Japan
Habagatang Aprika
Brazil